Wiewia 19:1-41
19 Eri, ni ahnsou me Apolos mihmi nan Korint, Pohl wia eh seiloak nan wasa kan me dohsang sehd oh kohdihla Episos. E ahpw diarada ekei tohnpadahk wasao
2 oh ndaiong irail: “Ia duwe, kumwail aleier sapwellimen Koht manaman* ni ahnsou me kumwail pwosonlahr?” Re ahpw sapengki: “Se sohte rong duwen sapwellimen Koht manaman.”*
3 Ih eri nda: “Eri, soangen papidais dah me kumwail ale?” Irail ahpw nda: “Papidais en Sohn.”
4 Pohl eri nda: “Sohn kin papidaiski papidais me wia kilelepen koluhla oh kin ndaiong aramas akan ren kamehlele meno me pahn ketido mwuri, me iei Sises.”
5 Ni arail rongada met, irail ahpw papidaisla ni mwaren Kaun Sises.
6 Oh ni Pohl eh pwil peh ko pohrail, sapwellimen Koht manaman* ahpw kohdi pohrail oh irail tepida lokaiahki lokaia tohrohr kei oh wia kokohp.
7 Irail koaros ohl 12.
8 Ni eh pedolong nan sinakokeo, e kin eimah koasoakoasoi erein sounpwong siluh oh kin kihda padahk kan oh songosong pwe ren kamehlele duwen Wehin Koht.
9 Ahpw ni ahnsou me ekei irail uhdahn kahng kamehlele* oh kin kauwe duwen Ahlo mwohn pokono, ih eri kohkohsang irail oh katohrehla tohnpadahk ko sang irail, oh kin padapadahk nan imwen sukuhl en Tiranus rahn koaros.
10 Met kin wiawi erein sounpar riau, kahrehda irail koaros me kin kousoan nan wehin Eisia, mehn Suhs oh mehn Krihs, rong mahsen en Kauno.
11 Oh Koht ketin pousehlahte wiewia manaman kapwuriamwei kan sang ni eh ketin doadoahngki Pohl,
12 me kahrehda pil angkasi oh likou me kin sair paliwere kin wisiklahng me soumwahu kan oh irail kin mwahula, oh ngehn suwed kan kin pedoisang rehrail.
13 Ahpw ekei mehn Suhs akan me kin seiloakseli oh kin kausala ngehn suwed kan pil kin song en doadoahngki mwaren Kaun Sises ong irail akan me ngehn suwed tiada pohrail. Irail kin nda: “I ruwese kumwail ni mwaren Sises me Pohl kin kalohki.”
14 Eri mie pwutak isimen, nein kaunen samworo en mehn Suhs me ede Skepa, irail me kin wia met.
15 Ngehn suwed ko ahpw sapengki irail nda: “I ese Sises oh I ese Pohl; ahpw ihs kumwail?”
16 Eri, ohl me ngehn suwedo tiada powe ahpw lusuk irail oh powehdi emenemen irail, me kahrehda irail ohla oh kilisou tangieisang nan ihmwo.
17 Mehn Suhs oh mehn Krihs koaros me kin kousoan nan Episos ahpw esehda met; oh irail koaros masakada, oh mwaren Kaun Sises ahpw wie lapalapala.
18 Oh me tohto me pwosonlahr ahpw kohdo oh wehkada oh koasoiahda ni sansal dahme irail wiadahr.
19 Ni mehlel, me tohto me kin wia akmanaman wapene neirail pwuhk ko oh isikada mwohn aramas koaros. Oh re kapatapene uwen pweinen pwuhk ko oh diarada me e pahrekiong silper 50,000.
20 Eri, mahsen en Siohwa* kin lolohkseli oh inenen kehlailla.
21 Mwurin mepwukat eh wiawiher, Pohl ahpw koasoanehdi me mwurin eh pahn kolahng Masedonia oh Akaia, e pahn seiloaklahng Serusalem. E nda: “Mwurin ei pahn kohla mwo, I uhdahn pahn pil kilang Rom.”
22 Eri, e kadarala Masedonia meh riemen sang irail ko me papah ih, Timoty oh Erastus, ahpw pein ih kin mihmi nan wehin Eisia erein ahnsou kis.
23 Ahnsowo, moromor laud ehu ahpw wiawi me pid Ahlo.
24 Ohl emen me ede Demihtrius, ih sounsukmete silper me kin wiakihda silper kisin imwen kaudok en Artemis, kin wahdohng tohndoadoahk koahiek kan lapalahn wihn en mwohni.
25 E kapokonpene irail iangahki meteikan me kin iang wia soangen doadoahko oh nda: “Kompoakepahi ko, kumwail ese me atail pai kin kohsang ni pesineset.
26 Met kumwail kilang oh rong duwen Pohl menet eh kamwakidadahr aramas tohto ren kamehlele oh wekidalahr ar madamadau, kaidehn nan Episoste ahpw pil kereniong nan wehin Eisia koaros, sang ni eh kin nda me koht akan me wiawihkihda pehn aramas kaidehn uhdahn koht ekei.
27 Patehng met, e keper pwe atail pesineset pahn adsuwedla, oh pil imwen kaudok en koht lih lapalap Artemis pahn sohla katepe, oh ih me aramas kin kaudokiong nan wehin Eisia pwon oh sampah pahn sohla eh lingan.”
28 Ni aramas ako ar rongada met oh inenen lingeringerda, irail ahpw tepida weriwer ndinda: “Artemis en mehn Episos me lapalap!”
29 Moromor ehu eri kohpeseng nan kahnimwo pwon oh irail koaros wiahkintehieu tangolong nan wasahn kilang mwadongo oh wurahdekihlong Kaius oh Aristarkus, mehn Masedonia kei me iang Pohl seiseiloak.
30 Pein Pohl men pedolongala rehn aramas ako, ahpw tohnpadahk ko sohte mweidohng.
31 Pil ekei irail me kin koasoanehdi kasarawi oh mwadong kan me kompoakepahnki ih ahpw ileklahng oh peki reh en dehr kihong eh mour nan keper ni eh pahn pedolong nan wasahn kilang mwadongo.
32 Ni mehlel, ekei irail weriwerki ehu soahng, a ekei ehu soahng tohrohr; pwe pokono pingidahr oh pali laud en irail sohte ese kahrepen arail pokonpene.
33 Irail eri wahieisang Aleksander nan pokono, mehn Suhs ako eri sikendahla ih mwowe, Aleksander ahpw oaloahlki peho oh men kawehwehiong aramas ako irairo.
34 Ahpw ni ahnsou me re esehda me ih mehn Suhs men, irail koaros wiahkintehieu tepida weriwerki erein awa riau: “Artemis en mehn Episos me lapalap!”
35 Ni ahnsou me sounnting en kahnimwo kameleileidi pokono, e ahpw nda: “Mehn Episos kan, koaros sou ese me kahnimw en mehn Episos iei silepen imwen kaudok en Artemis me lapalap oh sansal me pwupwudihsang nanleng?
36 Pwehki eh sohte emen me kak kalikamwe mepwukat, kumwail anahne meleileidi oh dehr pwurupwurur.
37 Pwe kumwail wadohr ohl pwukat wasaht me sohte kin pirapa imwen kaudok kan oh sohte kin lahlahwe atail koht liho.
38 Eri ma Demihtrius oh ienge tohndoadoahk koahiek kan men kedipa emen, mie rahnen kopwung kan oh mie kepina kan; eri mweidohng irail en wia arail kedip kan nanpwungarail.
39 Ahpw ma kumwail raparapahki mehkot laudsang met, e anahne koasoansoandi nan mihting me kin wiawi nin duwen kosonned.
40 Pwe kitail uhdahn mihla nan keper en dipikihda uhwong koperment me pid irair en rahnwet, pwehki sohte kahrepe ehu kitail kak kasalehda ong kahrepen moromor wet.”
41 Mwurin eh koasoia met, e ahpw kadarpeseng pokono.
Footnote kan
^ LK, pneuʹma. Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ De “keptakailahte oh sohte kamehlele.”
^ Kilang KLL.
