Wiewia 21:1-40
21 Mwurin at nantihong pwe pein kiht en kohkohsang irail oh serekieila nan madau, se ahpw tang inenlahng Kos, oh mandahn rahno se lel Rohdes, oh sang wasao se ahpw kohla Patara.
2 Ni ahnsou me se diarada sohp pwoat me pahn kohla Penisia, se douda powe oh serekieila.
3 Mwurin at kilangada dekehn Saiprus ni palimeing, se ahpw daulih oh sereklahng Siria oh peidi Dair, wasa me kanengen sohpo pahn kohdi sang ie.
4 Se raparapahki oh diarada tohnpadahk ko, se ahpw mihmi wasao erein rahn isuh. Sang ni sawas en sapwellimen Koht manaman,* irail pwurepwurehng ndaiong Pohl en dehr kohla Serusalem.
5 Ni at mwemweit wasao eh nekier, se ahpw mwesel kohkohla, ahpw irail koaros iangahki lih akan oh seri kan iang kiht kohla lel likin kahnimwo. Oh ni at kelepwikihdi ni oaroahro, se ahpw kapakap
6 oh kamwurala emenemen. Kiht eri karadahng pohn sohpo oh irail pwuralahng ni imwarail ko.
7 Kiht eri kanekehla at seiloak sang Dair oh lelehr Tolemeis, oh se rahnmwahwih riatail ko oh mihmi rehrail rahn ehu.
8 Mandahn rahno, se mweselda kohla Sesaria, se ahpw pedolong nan imwen Pilip, sounkalohki rongamwahwo, me iei emen rehn ohl isimeno, oh se mihmi reh.
9 Ohl menet naineki serepein pahmen me sohte pwopwoud* me kin kokohp.
10 Ahpw mwurin at mihmi wasao erein rahn tohto, soukohp men me ede Akapwus ahpw kohdihdo sang Sudia.
11 Oh e kohdo reht oh ale ahn Pohl mehn katengo oh pirekipene neh oh peh kan oh nda: “Iet me sapwellimen Koht manaman* koasoia: ‘Ih duwen mehn Suhs akan nan Serusalem ar pahn salihedi ohl me ahneki mehn kateng wet oh re pahn pangala ih rehn mehn liki kan.’”
12 Eri ni at rongada duwen met, kiht oh irail kan me mi wasao ahpw tepida pekipeki reh en dehr kohdahla Serusalem.
13 Pohl ahpw sapengki: “Dahme kumwail sengisengki oh songosong en kaluwetehla dahme I koasoanedier?* I koasoanedier oh onopadahr, kaidehn ongete selidi ahpw pil ong mehla nan Serusalem pwehki mwaren Kaun Sises.”
14 Ni eh sohte wekidala eh lamalam, se ahpw sohla uhwong* oh nda: “Kupwuren Siohwa* en pweida.”
15 Mwurin mwo, se ahpw kaunopada at seiloaklahng Serusalem oh tepida mweselda.
16 Ekei tohnpadahk sang Sesaria pil iangkitada pwe ren kahreikitalahng rehn Neison mehn Saiprus, emen tepin tohnpadahk ko, me se pahn mihmi ni imweo.
17 Ni at lellahng Serusalem, riatail ko kasamwo kiht ni peren.
18 Ahpw mandahn rahno, Pohl iangkitada kohla rehn Seims, oh sounapwalih ko koaros mi wasao.
19 Oh e rahnmwahwih irail oh tepida koasoiaiong irail oaritikpen soahng kan me Koht ketin wiadahr nanpwungen mehn liki kan sang ni eh doadoahk en kalohk.
20 Mwurin arail rongehr met, irail ahpw tepida kalinganahda Koht, re ahpw ndaiong ih: “Riat Pohl, ke kilang, mehn Suhs nen kei pwosonlahr oh irail koaros kin uhki Kosonnedo.
21 Irail ahpw rongada koasoi pwoat duwen kowe me dene ke kin padahkihong mehn Suhs akan me kin mi nanpwungen mehn liki kan en kesehla kosonned en Moses oh kin ndaiong irail ren dehr sirkumsaisihala neirail seri kan de pil idawehn tiahk kan me re kin kalapw wia.
22 Eri, dahme kitail pahn wiahiong? Irail uhdahn pahn rong me ke leledohr.
23 Eri wia dahme se pahn ndaiong uhk: Mie ohl pahmen me mihmi reht me wiadahr inou ehu.
24 Kahrehda ohl pwukat oh iang irail kamwakelda ong kaudok, oh pil pwainla pweinarail kan, pwe irail en koahkoahsang pitenmoangarail kan. Aramas koaros ahpw pahn ese me sohte mehkot me utung koasoi me re rongehr duwen kowe, ahpw ke kin weweid ni pwung oh pil kapwaiada Kosonnedo.
25 A duwen me pwoson akan sang rehn mehn liki kan, kitail kadaralahngirailehr atail koasoandi ni nting me irail en liksang soahng kan me meirongalahr ong dikedik kan, oh pil nta, soahng kan me mwopwula* oh tiahk samin me pid wia nsenen pwopwoud.”*
26 Mandahn rahno, Pohl ahpw kahrehda ohl ako oh iang irail kamwakelda ong kaudok, oh e pedolong nan tehnpas sarawio pwe en pakairki iahd me rahn akan en kamwakel ong kaudok pahn imwisekla, pwe emenemen en kihda eh meirong.
27 Eri ni rahn isuh en kamwakelo eh kereniongehr imwisekla, ni mehn Suhs ekei sang Eisia ar kilangada ih nan tehnpas sarawio, irail ahpw kamwoarongehda pokono pwon oh koledi ih,
28 oh weriwerki nda: “Kumwail mehn Israel kan, sewesei kiht! Iei ohl menet me kin padahkihong aramas koaros wasa koaros soahng kan me kin kamwamwahlih neitail aramas akan oh atail Kosonned oh wasa sarawi wet. Oh patehng met, e kahrehlong nan tehnpas sarawio mehn Krihs kei oh kasaminehla wasa sarawi wet.”
29 Pwe re kilangada mwowe Tropimus mehn Episos men me ieiang ih nan kahnimwo, oh re kihkihong me Pohl kahrehlong ih nan tehnpas sarawio.
30 Kahnimwo pwon ahpw mwoarongada, aramas ako ahpw tangpene oh koledi Pohl oh wurahdekihieisang nan tehnpas sarawio, oh ni ahnsowohte wenihmw ko ritidi.
31 Ni arail songosong en kemehla ih, pakair ehu ahpw lellahng kaunen karis en sounpeio* me Serusalem pwon pingidahr;
32 oh e mwadangete kahrehda sounpei ko oh kaunen sounpei ko oh tangdihla rehrail. Ni ahnsou me re kilangada kaunen karis en sounpeio oh sounpei ko, re ahpw uhdihsang arail keme Pohl.
33 Kaunen karis en sounpeio eri keiong mpe oh koledi oh ruwese en selkihdi selmete riau; e ahpw idek ihs ih oh dahme e wiadahr.
34 Ahpw ekei nan pokono tepida weriwerki ehu soahng, a ekei ehu soahng. Pwehki moromoro, e sohte kak dehdehki dahme uhdahn wiawi, e ahpw ruwese en wisiklahng ahn sounpei ko wasahn kousoan.
35 Ahpw ni eh lella ni kehndakeo, sounpei ko anahne wahda ih pwehki aramas ako men keme,
36 pwe pokon ehu kin ideidawehn oh weriwerki: “Kemehla ih!”
37 Ni eh pahn wisiklahng ahn sounpei ko wasahn kousoan, Pohl ahpw ndaiong kaunen karis en sounpeio: “E mweimwei I en koasoiaiong uhk mehkot?” E ahpw nda: “Ke kak lokaiahn Krihs?
38 Eri, kaidehn kowe mehn Isip me tapihada uhwong koperment ahnsou kei samwalahro oh kahrehla ohl 4,000 me kin wisik naip nan sapwtehno?”
39 Pohl ahpw nda: “Ni mehlel, ngehi mehn Suhs emen sang Tarsus nan Silisia, towe mehlel en kahnimw kesempwal ehu. Eri I peki rehmw ken mweidohng ie I en koasoiong aramas akan.”
40 Mwurin eh mweidada, Pohl wie kesikesihnente ni kehndakeo, e ahpw oaloallahng aramas ako. Ni aramas ako ar meleileidi, e ahpw koasoiong irail ni lokaiahn Ipru, nda:
Footnote kan
^ LK, pneuʹma. Kilang KLL.
^ LK, “meipwon.”
^ LK, pneuʹma. Kilang KLL.
^ De “kaluwetehla ei mohngiong.”
^ LK, “se nennenla.”
^ Kilang KLL.
^ De “soahng kan me kamakamala de mehla ahpw nta sohte kerasang.”
^ LK, por·neiʹa. Kilang KLL.
^ Me kin kaun sounpei 1,000.
