Wiewia 27:1-44
27 Eri, pwehki eh koasoandier me se pahn sereklahng Itali, irail ahpw kihong Pohl oh ekei me selidier ko rehn kaunen pwihnen sounpei en Akustus me ede Sulius.
2 Ni at karada pohn sohp pwoat sang Adramitium me pahn kereniong sereklahng kepdau kan ni oaroahr en wehin Eisia, se ahpw mwesel; Aristarkus mehn Masedonia men sang Deselonika iang kiht.
3 Mandahn rahno se peidi Saidon, eri Sulius kin kadek ong Pohl oh mweidohng en kohla rehn kompoakepah kan pwe irail en apwalih ih.
4 Oh ni at mwesel sang wasao, se ahpw serek oh tang pahn mwetehn Saiprus pwehki kisiniengo uhdohng kiht.
5 Eri se seiloak nan sehd me sallahng Silisia oh Pampilia oh lel Maira nan Lisia.
6 Wasao kaunen sounpeio diarada sohp pwoat sang Aleksandria me pahn sereklahng Itali, e ahpw kihkitda powe.
7 Eri, mwurin at senserek wawai kohla erein rahn tohto, se ahpw lellahng Naidus nan apwal laud. Eri, pwehki kisiniengo sohte mweidohng kiht sen inenlahte, se ahpw serek oh tang pahn mwetehn Krihd ni at daulih Salmone.
8 Oh ni at nannanti senserek peianla oaroahro, se ahpw lella wasa ehu me adaneki Kepdau Mwahu, me mi limwahn kahnimw en Lasea.
9 Ahnsou reirei dower powe oh ahnsou wet e keperiong seiloak pwehki e dauliher ahnsoun kaisihsol en Rahnen Tomw, Pohl eri kaweidkin
10 irail: “Ohl ako, I kak kilang me seiloak wet pahn imwila suwed oh pil luhs laud, kaidehn ongete kepwe kan oh sohpet ahpw pil atail mour.”*
11 Ahpw kaunen sounpeio rong kepdin en sohpo oh me wareneki sohpo a kaidehn me Pohl nda.
12 Pwehki kepdauwo sohte mwahu ong sohp en wie peipei ie ni ahnsoun kopou, pali laud en irail kaweidki ren serek sang wasao oh song ma re pahn kak lella oh mihmi erein ahnsoun kopouo nan Pihniks, kepdau en Krihd ehu me sallahng paliepeng en palimese oh palieir en palimese.
13 Ni kisinieng tikitik ehu eh uhdo sang palieir, re ahpw kihkihong me re pahn kapwaiadahte arail koasoandio, irail ahpw apihada angkeo oh tepida senserek peianlahte oaroahr en Krihd.
14 Ahpw mwurin ahnsou kis, kisinieng kehlail ehu me adaneki Iuroakuilo* ahpw ipido sang dekeo.
15 Pwehki kisinieng kehlail ipidohng sohpo oh se sohla kak inenlahng nan kisiniengo, se ahpw mweidohng sohpo en iangala kisiniengo.
16 Eri, se tang pahn mwetehn kisin deke me adaneki Kauda, se ahpw kereniong sohla kak kolokol kisin pwoht* me mi mwurin sohpo.
17 Ahpw mwurin ar pwekada kisin pwohto pohn sohpo, re ahpw pirekipene sohpo sahl pwe ren katengehdi, oh pwehki ar masak re de serada pohn Sertis,* re ahpw lapwahda selin sereko oh mweidohng sohpo en iangala kisiniengo.
18 Pwehki sohpo eh uhdahn pwungupwungdengkiseli melimelo, re ahpw tepida kamarahda sohpo mandahn rahno.
19 Oh ni kesiluhwen rahn, re kesehsang ekei dipwisoun sohpo.
20 Ni ketipin oh usu kan ar sohte pwarada erein rahn tohto oh melimel kehlail* ehu kin lellel kiht, e mwomwen me solahr at koapworopwor en pitla.
21 Mwurin arail solahr mwengehki ahnsou reirei, Pohl ahpw kesihnenda nanpwungarail oh nda: “Ohl ako, ma kumwail rong ei kaweid oh sohte mweselsang Krihd, kumwail sohte pahn lelohng apwal oh luhs pwukat.
22 Ahpw met, I kangoangei kumwail en eimah, pwe sohte emen* kumwail pahn mehla, sohpette me pahn ohla.
23 Pwe nipwongo, Koht me ketin sapwellimankin ie oh me I kin papah ketin poaronehdo tohnleng men oh e kesihnenda mpei
24 oh nda: ‘Pohl, ke dehr masak. Ke uhdahn pahn kesihnenda mwohn Sihsar, oh kilang! Koht pahn ketin doarehla mouren irail koaros me iang uhk seiloak.’
25 Eri, ohl ako, kumwail en eimah, pwe I kamehlele Koht me e uhdahn pahn wiawi nin duwen me I rongehr.
26 Ahpw, kitail pahn pwungidekdahng pohn oaroahr en deke ehu.”
27 Ni kaeisek pahieun pwohng, sohpo kin wie pwungupwungdekseli nan Sehd en Adria, ni lukepen pwong, sehla ko ahpw tepida mwelekihada me re kerenlahngehr sahpw.
28 Re ahpw sohng uwen loalen wasao oh diarada me ngahp 20,* irail pil ekis keila oh pwurehng sohng oh diarada me ngahp 15.*
29 Oh pwehki irail masak pwe sohpo de seradahng pohn takai, irail ahpw kadaridi angke pahieu ni kapin sohpo oh kasikasik pwe wasa en rahnpeseng.
30 Ahpw ni sehla ko ar tepida songosong en tangasang sohpo oh kadaridi kisin pwohto nansedo oh mwomwmwomwe me re pahn kadaridi angke ko sang mwohn sohpo,
31 Pohl ahpw ndaiong kaunen sounpeio oh sounpei ko: “Ma ohl pwukat sohte pahn mihmihte pohn sohpet, kumwail sohte kak mourla.”
32 Sounpei ko eri lupukada sahl me kolokol kisin pwohto oh mweidohng en pwupwudihla.
33 Eri ni eh kereniongehr rahnpeseng, Pohl ahpw kangoangehkin irail koaros en mwenge oh nda: “Rahnwet rahn kaeisek pahieu me kumwail kin pwunopwunod awiawih oh sohte mwenge.
34 Eri, I kangoangei kumwail en mwenge; pwe met ong kamwahupamwail, pwe sohte pitenmoang ehu sang moangamwail kan pahn pwupwusang.”
35 Mwurin eh nda met, e ahpw ale pilawao oh kalahngankihong Koht mwohrail koaros, oh pilitikihpeseng oh tepida kang.
36 Eri irail koaros ahpw solahr pwunod oh tepida mwenge.
37 Kiht koaros aramas* 276 me mi pohn sohpo.
38 Ni arail mwengehier oh medla, irail ahpw kamarahda sohpo ni arail kesehla wihd ko nansedo.
39 Ni eh rahnpeseng, re sohte kak kasawihada sahpwo, ahpw re kilang kepdau ehu me mi ni oaroahro oh koasoanehdi sohpo en peidi wasao ma re kak.
40 Irail eri lupukada selin angke kan oh mweidala angke ko en kihrdiong nansedo, ni ahnsowohte irail lapwahda selin padil en ilihl kan oh apihada kisin serek me mi mwoweo pwe kisinieng en wahlong sohpo ni oaroahr.
41 Ni arail loiong resires ehu, sohpo serada powe oh mwohn sohpo tengala oh sohte kak mwekid, a mwurio ahpw maropkipene ilok kan.
42 Eri, sounpei ko ahpw koasoanehdi me re pahn kemehla me selidi koaros pwe emen de papala oh tangdoaui.
43 Ahpw kaunen sounpeio koasoanehdi en kapitala Pohl oh ireiraildi sang arail pilahno. E ahpw ruwesehkin irail ko me kak pap en lusdiong nansed pwe ren lellahng sahpw mahs,
44 oh luhwe ko en idawehn irail, ekei pohn dinapw akan oh ekei pohn kisehn sohpo. Eri kiht koaros ahpw lellahng sahpw.
Footnote kan
^ LK, psy·kheʹ. Kilang KLL.
^ Me iei, kisinieng sang paliepeng en palimese.
^ Ni ahnsou me kahpwal laud ehu kin pwarada nansed, kisin pwohto kin kadoadoahk pwehn doarehla aramas.
^ Kilang KLL.
^ LK, “sohte tikitik.”
^ LK, psy·kheʹ. Kilang KLL.
^ Mpen 36 m (120 ft).
^ Mpen 27 m (90 ft).
^ LK, psy·kheʹ. Kilang KLL.
