Wiewia 6:1-15
6 Ni rahn ako me tohnpadahk kan wie tohtohla, mehn Suhs akan me kin lokaiahn Krihs tepida kaulimki mehn Suhs akan me kin lokaiahn Ipru, pwehki irail sohte kin apwalih mwahu arail liohdi kan ni arail kin nehkpeseng kanarail mwenge ehuehu rahn.
2 Eri, me Ehk Riemeno ahpw ekerpene tohnpadahk ko koaros oh nda: “E sohte pwung* sen pwilikihdi mahsen en Koht pwe sen nehk mwenge ni tehpel kan.
3 Eri, riat ko, pein kumwail en pilada sang nanpwungamwail ohl likilik isimen,* me diren sapwellimen Koht manaman* oh erpit, pwe se pahn idihirailda ong anahn wet;
4 ahpw se pahn poadidiong kapakap oh padahngki mahsen en Koht.”
5 Irail koaros me mi wasao perenkihda dahme re nda, re ahpw pilada Stipen, ohl emen me diren pwoson oh sapwellimen Koht manaman,* oh pil Pilip, Prokorus, Nikaner, Timon, Parminus, oh Nikolaus sang Andiok me iangala lamalam en mehn Suhs.
6 Irail kahrelahng wahnpoaron ko ohl pwukat, oh mwurin arail kapakap, re pwil pehrail ko pohrail.
7 Mahsen en Koht eri lolohkseli, oh tohnpadahk kan nan Serusalem ahpw wie tohtohla; oh me tohto rehn samworo ko pil pwosonla.
8 A Stipen me direkihla kupwuramwahu oh roson en Koht kin wiahda soahng kapwuriamwei kan oh kilel kan nanpwungen aramas akan.
9 Ahpw ohl ekei sang pwihn me adaneki Sinakoke en Aramas Saledekla, iangahki ekei sang Sairihni oh Aleksandria, oh ekei sang Silisia oh Eisia ahpw kohdo pwe ren akamaiong Stipen.
10 Re ahpw sohte kak pelianda erpit oh sapwellimen Koht manaman* me kin kaweid eh koasoi.
11 Irail kaweidki ohl ekei ni rir ren nda: “Se rong eh kin koasoia soahng kan me uhdahn suwed me uhwong Moses oh Koht.”
12 Oh irail kamwoarongehda aramas ako, me mah ko oh sounkawehwehn Kosonnedo ko, re ahpw kohlahte parokedi ih oh walahng nan Sanedrino.*
13 Re ahpw wahdo sounkadehde likamw kei me nda: “Ohl menet sohte uhdihsang koasoia soahng kan me uhwong wasa sarawi wet oh uhwong Kosonnedo.
14 Karasepe, se rong eh nda me Sises mehn Nasaret menet pahn kamwerehdi wasakiset oh wekidala tiahk kan me Moses kihong kitail.”
15 Oh ni irail koaros me mwomwohd nan Sanedrino ar kangkakil ih, re ahpw kilangada me meseo likamwete mesen tohnleng men.
Footnote kan
^ De “kaperenda Koht.”
^ De “ohl isimen me adamwahu.”
^ LK, pneuʹma. Kilang KLL.
^ LK, pneuʹma. Kilang KLL.
^ LK, pneuʹma. Kilang KLL.
^ Kilang KLL.
