Wiewia 7:1-60
7 Samworo lapalapo ahpw nda: “Ia duwe, mepwukat mehlel?”
2 Stipen ahpw sapengki: “Ohl ako, riei ko oh semei ko, kumwail rong. Koht en lingan ketin pwarohng Eipraam, samatail mehn mahso ni eh kin mihmi nan Mesopodamia, mwohn eh kousoanla Aran,
3 oh e ketin mahsanihong: ‘Mweselsang sapwomwen oh kisehmw kan oh kohla nan sahpw me I pahn kasalehiong uhk.’
4 Ih eri mweselsang sapwen mehn Kaldia oh kousoanla Aran. A mwurin semeo eh mehla, Koht ketin padahkihong en kasaudohng nan sahpw wet, wasa me kumwail koukousoan ie met.
5 Ahpw e sohte ketikihong ih ekis kisehn sahpwo pwe en sohsohki, soh, pil sohte kisin wasa kis en sok powe; ahpw e ketin inoukihda en ketikihong ih sahpwo oh pil kadaudoke, mendahki e saikinte naineki seri.
6 Oh Koht pil ketin mahsanihong ih me kadaudoke pahn wia mehn liki nan sahpw ehu me kaidehn sapwarail oh aramas akan pahn kaliduwih oh kaloke* irail erein sounpar 400.
7 Koht ketin mahsanih: ‘Oh I pahn kadeikada tohnwehi me kaliduwih irail, oh mwurin mepwukat, re pahn pedoisang oh pahn papah ie wasakiset.’
8 “E pil ketikihong ih inou lap en sirkumsais oh e wiahla semen Aisek oh sirkumsaisihala ih ni kawaluh en rahn, oh Aisek wiahla semen Seikop,* oh Seikop wiahla moangen peneinei* ehk riemeno.
9 Oh moangen peneinei ko peiriniongada Sosep oh netikihong ih mehn Isip ko. Ahpw Koht kin ketin ieiang ih,
10 oh kin ketin doarehsang ih eh kahpwal kan koaros oh ketikihong ih kupwuramwahu oh erpit mwohn Parao, nanmwarkien Isip. Parao ahpw idihada ih en kaunda Isip oh pil imweo pwon.
11 Lehk lapalap ehu ahpw lelohngehr wasa koaros nan Isip oh Kenan, ei, lapalahn kahpwal ehu, oh samatail mehn mahs ako sohte kak diar mehkot ren kang.
12 Ahpw Seikop rongada me mie mwenge nan Isip oh e kadarala samatail mehn mahs ako, iei keieun ar kohla mwo.
13 Ni keriapak en arail kohla, Sosep kasalehiong rie pwutak ko pein ih, Parao ahpw esehda duwen ahn Sosep peneinei.
14 Sosep ahpw ileklahng seme Seikop oh eh peneinei koaros ren kohdo sang wasao, irail koaros meh 75.
15 Seikop eri kohdihla Isip oh e mehla wasao, oh pil samatail mehn mahs ako.
16 Irail ahpw wisiklahng Sekem oh nekinekdi nan sousou me Eipraam pwainkihda mwohni silper sang rehn nein Amor pwutak ko nan Sekem.
17 “Ni ahnsou me pweidahn inou me Koht ketin mahsanihong Eipraam eh kerendohr, aramas ako wie tohtohla oh inenen ngederla nan Isip,
18 lao lel ahnsou me emen nanmwarki tohrohr kesepwilda nan Isip, me sehse Sosep.
19 Nanmwarki menet kin mwersuwedih atail keinek oh kin wiakauwe oh idingkihong samatail ko ren kesehla neirail seri pwelel ko pwe ren dehr momour.
20 Ni ahnsowo Moses ahpw ipwidi, oh e uhdahn kaselel.* Oh e kekeirda nan imwen seme erein sounpwong siluh.
21 Ahpw ni eh lekdekla, nein Parao serepeino ahpw ale ih oh apwalihada duwehte pein nah pwutak.
22 Eri Moses sukuhlkiher duwen erpit koaros en mehn Isip. Ni mehlel, eh lokaia oh wiewia me manaman.
23 “Eri, ni eh lelehr sounpar 40, e ahpw lemehda* en kohla tuhwong* rie ko, mehn Israel ko.
24 Ni eh kilangada mehn Isip men eh wiakauwehla emen rie ko, e ahpw sewese rieo oh kemehla mehn Isipo pwe en ikih.
25 E lemehiong me rie ko pahn wehwehki me Koht pahn ketin doadoahngki ih pwe en doareirailla, ahpw re sohte wehwehki.
26 Mandahn rahno e pwarala rehrail oh kilangada meh riemen ara wie pepei, oh e song en kauhdi ira oh nda: ‘Ohl ako, kumwa pirien. Dahme kumwa pepeiki?’
27 A me wiakauwe mehn mpeo ahpw siken Moses oh nda: ‘Ihs me idihiukada pwe ken kaunkitada oh kadeingkitada?
28 Ke men kemeiehla duwehte omw kemelahr mehn Isipo aio?’
29 Ni Moses eh rongada met, e ahpw tangdoaui oh kousoanla nan sapwen Midian nin duwen mehn liki men, wasa me e nainekihda pwutak riemen.
30 “Mwurin sounpar 40 eh dower powe, tohnleng men ahpw pwarohng ih nan mpwulen kisiniei nan kisin tuhke kis nan sapwtehn en Nahna Sainai.
31 Moses ahpw pwuriamweikihla dahme e kilangadao. Ahpw ni eh kerenlahng pwe en kadehde, e rongada kapitien Siohwa* eh mahsanih:
32 ‘Ngehi me Koht en semomw mehn mahs ako, Koht en Eipraam oh Aisek oh Seikop.’ Moses ahpw tepida rerrer oh masakala kadehde.
33 Siohwa* ahpw ketin mahsanihong: ‘Kihsang suhten ni nehmw kan, pwe wasa me ke kesikesihnen ie me sarawi.
34 I uhdahn kilangehr uwen lokolok en nei aramas akan me mihmi nan Isip, oh I rongehr ngilen ar weirek, I kohdidohr pwe I en doareirailla. Eri kohdo, I pahn kadaruhkalahng Isip.’
35 Iei Moses menet me re soikala ni arail nda: ‘Ihs me idihiukada pwe ken kaunkitada oh kadeingkitada?’ iei ih me Koht ketin poaronedohr nin duwen kaun oh soundoar ni eh ketin doadoahngki tohnleng me pwarohng ih nan kisin tuhkeo.
36 Ohl menet kahreirailiei oh wiahda soahng kapwuriamwei kan oh kilel kan nan Isip oh ni Sehd Weitahta oh nan sapwtehn erein sounpar 40.
37 “Iei Moses menet me ndaiong mehn Israel ko: ‘Koht pahn ketin idihada sang rehn riamwail kan soukohp emen me duwehte ngehi ong kumwail.’
38 Iei ih me iang mi nanpwungen aramas en Israel ko nan sapwtehn iangahki tohnleng me koasoiong ih pohn Nahna Sainai oh pil samatail mehn mahs ako, oh e aleier mahsen en Koht me wie momour pwe en kihong kitail.
39 Samatail mehn mahs ako kahng peikiong ih, re ahpw soikala oh nan arail mohngiong re men pwuralahng Isip,
40 oh ndaiong Aaron: ‘Wiahiong kitail ekei koht pwehn tieng mwohtail. Pwe kitail sehse dahme wiawihong Moses me kahluwaieisang kitail nan sapwen Isip.’
41 Eri, irail wiahda koupwul men ni rahn ako oh wadohng dikedik wet meirong ehu, irail ahpw tepida pereperenki dahme re wiadahro.
42 Koht eri ketin sohpeisang irail oh mweidirailla ren kaudokiong karis en nanleng,* duwehte eh ntingdier nan pwuhk en Soukohp ako: ‘Wehin Israel kan, kaidehn ngehi me kumwail kin meirongkihong mahn akan oh meirong teikan erein sounpar 40 nan sapwtehn.
43 Ahpw iei impwal en Molok oh usu en koht Repan me kumwail weuwa, dikedik kan me kumwail wiahda pwe kumwail en kaudokiong. Eri, I pahn kalipeikumwailla palilahn Papilon.’
44 “Samatail mehn mahs ako ahnekier impwal en mehn kadehdeo nan sapwtehno, duwehte me Koht ketin kaweidki ni eh ketin mahsanihong Moses en wiahda nin duwen mwohmw me e ketin kasalehiong ih.
45 Samatail mehn mahs ako aleier impwal wet sang rehn samarail ko. Irail eri iang Sosua wahla nan sapwen mehn liki kan, me Koht ketin kasarehsang mwohn samatail mehn mahs ako. Eri e mihmi wasao lel ni mwehin Depit.
46 Ih eri kenikenla mwohn silangin Koht oh peki pwais kaselel en kauwada ehu tehnpas ong Koht en Seikop.
47 Ahpw Solomon me kauwada tehnpaso ong ih.
48 Ahpw, Wasa Lapalahpie sohte kin ket nan tehnpas akan me wiawihkihda pehn aramas, nin duwen me soukohp ako koasoia:
49 ‘Siohwa* ketin mahsanih, nanleng iei mwoalei oh sampah iei utupen aluweluwei kat. Soangen tehnpas dahieu me kumwail pahn kauwadahng ie? De ia ei wasahn kommoalen?
50 Kaidehn nin limei kat me wiahda mepwukat koaros?’
51 “Aramas keptakai, me mohngiong oh saleng sohte sirkumsaisla, kumwail kin pelianda sapwellimen Koht manaman* ahnsou koaros; kumwail kin wia duwehte me samamwail mehn mahs ako kin wia.
52 Ihs rehn soukohp ako me samamwail mehn mahs ako sohte kaloke? Ei, re kemelahr irail ko me kin pakapakairki mwowe duwen ketidohn me pwungo me kumwail ahpwtehn pangala oh kemehla,
53 iei kumwail me aleier Kosonnedo me tohnleng kan wahdo, kumwail ahpw sohte kapwaiada.”
54 Eri ni arail rongorong mepwukat, irail ahpw lingeringerda kowahlap* nan kapehdirail* oh ngihrail ko tepida tehtehrek ni arail kilenglahng ih.
55 E ahpw direkihla sapwellimen Koht manaman,* saradalahng nanleng oh kilangada sapwellimen Koht lingan oh Sises eh ketiket ni palimaun en Koht,
56 oh e nda: “Kilang! I kilang nanleng eh ritpeseng oh Nein-aramas eh ketiket ni palimaun en Koht.”
57 Irail ahpw weriwer laud oh pinahkihla salengerail kan pehrail kan oh irail koaros wiahkinteieu tangpenehng.
58 Mwurin arail kesepwekehla ih likin kahnimwo, re ahpw tepida kostakai ih. Sounkadehde ko kihdiong arail likou puhp ko ni nehn mwahnakapw emen me adaneki Sohl.
59 Ni arail katekate Stipen, e ahpw wia pekipek wet: “Maing Kaun Sises, komw ketin ale ei mour.”*
60 Ih eri kelepwikihdi oh ngihl laudida patohwan: “Maing Siohwa,* komw dehr ketin kapwukoahkin irail dihp wet.” Mwurin eh patohwan met, e ahpw mehla.*
Footnote kan
^ De “wiakauwe.”
^ De kakete, “wiahiong Seikop soahngohte.”
^ De “semen keinek.”
^ De “kaselel mwohn silangin Koht.”
^ De “e pilada.”
^ De “tehk.”
^ Kilang KLL.
^ Kilang KLL.
^ E dokedoke audepen lahng.
^ Kilang KLL.
^ LK, pneuʹma. Kilang KLL.
^ De “irail ahpw medengkihla.”
^ LK, “mohngiongirail.”
^ LK, pneuʹma. Kilang KLL.
^ De “kehl en mour.” LK, pneuʹma. Kilang KLL.
^ Kilang KLL.
^ LK, “e meirla.”
