MOMOUR NIN DUWEN KRISTIAN KEI
Kalaudehla Atail Koahiek nan Doadoahk en Kalohk—Uhdihsang Onopki Paipel Rehn Emen me Sohte Kin Kekeirda
DAHME KAHREHDA E KESEMPWAL: Aramas akan anahne likweriong mwaren Siohwa pwe ren komourla. (Ro 10:13, 14) Ahpw kaidehn aramas koaros me pwungki onopki Paipel men mourki sapwellimen Siohwa koasoandi kan. Kitail kin doadoahngki mwahu atail ahnsou nan doadoahk en kalohk ni atail kin sewese irail me uhdahn men wiahda wekidekla kan pwehn kaperenda Siohwa. Ma tohnsukuhl en Paipel men sohte kekeirda mwurin eh onopkiher erein ahnsou ieu, e pahn wia elen loalokong en uhdihsang wia onopo oh uhd sewese irail kan me Siohwa kin ketin kakerenialahng reh oh sapwellime pwihn. (Soh 6:44) Ahpw, ma ahnsou kohkohdo aramaso wiahda wekidekla kan oh kin kasalehda me e “ahneki mohngiong mwahu en ale mour soutuk,” eri kitail pahn perenki pwurehng onop Paipel reh.—Wi 13:48.
IA DUWEN OMW PAHN WIA MET:
-
Kapingahki tohnsukuhlo pwehki eh men esehla padahk mehlel.—1Ti 2:4
-
Kasansalehda kesempwalpen kapwaiada dahme e sukuhlki.—Lu 6:46-49
-
Ni kadek koasoia duwen sapwellimen Sises karasaras en sounkamwarako, oh idek reh en medemedewe duwen soahng kan me kin koledi ih sang eh pahn kapwaiada dahme e sukusukuhlki.—Md 13:18-23
-
Ni kamantik, kawehwehda ia kahrepen omw pahn sohla onop Paipel reh
-
Padahkihong ih me ekei pak, ke pahn kin kohla reh pwehn kangoange oh me ke pahn pwurehng onop en Paipel reh ahnsou kohkohdo ma e wiahda wekidekla kan
KILANG KISIN KASDO, OH MWURI SAPENGALA PEIDEK PWUKAT:
-
Dahme ke sukuhlki sang koasoakoasoipeneo me kasalehda tohnsukuhlo eh sohte kekeirda?
-
Ia duwen sounkalohko eh sewese tohnsukuhlo en wehwehki me e anahne wiahda wekidekla kan?
-
Ia duwen sounkalohko eh padahkihong tohnsukuhlo me onopo kak pil pwurehng wiawi ahnsou kohkohdo?