Medewehla me ke wie momour nan Kalili ni mwehin Siseso. Ke seiloaklahng Serusalem pwehn iang Kasarawi en Impwal kan. Kahnimwo direkihla tohnkaudok kan me kohdohsang wasa doh kan. Ke men patohwanohng Siohwa meirong ehu. Kowe eri wahda kuht men oh tepida kohkohwei nanpwungen ihmw kan nan kahnimwo kohlahng ni tehnpaso. Ni omw lel mwo, tehnpaso direkilahr aramas teikan me pil men kihda arail meirong. Eri, e lelehr omw ahnsou en kihong noumw kuhto rehn samworo kan. Ni ahnsowo ke tamanda me riomwo, me mwein iang mihmiseli nanpwungen aramas ako de nan kahnimwo lingeringer pahmw. Sises ketin kawehwehda dahme ke pahn anahne wia. (Wadek Madiu 5:24.) Ia duwen kowe oh riomw me lingeringer pahmwo amwa kak rapahki popohl duwehte me Sises ketin kaweidki? Nan ehuehu ire kan me mi pah, pilada mehnia pasapeng me pwung.

KE PAHN ANAHNE . . .

• koasoiong riomwo ihte ma ke medewe me mie kahrepe mwahu ehu me e lingeringerki

• song en kapwungala en riomwo madamadau ma ke medewe me e kin nohn keh lingeringer de kapwukoahki meteikan kahpwalo

• rong riomwo ni kanengamah ni eh kasalehda eh pepehm, oh mehnda ma ke pil sohte uhdahn wehwehki, sang nan omw mohngiong peki mahk reh pwehki eh pepehm en medekla de imwilahn omw wiewia kan me ke sohte kasik me e pahn lingeringerkihda

RIOMWO PAHN ANAHNE . . .

• rapahki sawas sang rehn meteikan nan mwomwohdiso ni eh ndaiong irail sapwung me ke wiahiong ih

• lipwoareiuk, kasalehda soahng koaros me ke kalingeringerihkihda, oh ndaiong uhk me ke anahne pohnese omw sapwungo

• pohnese aktikitik oh eimah me ke ahneki pwehn kohla tuhwong ih, oh mahk sang nan eh mohngiong

Mendahki atail kaudok rahnpwukat solahr kin pidada meirong en mahn akan, dahme Sises kin ketin padahkihong kitail duwen ahneki popohl rehn riatail kan oh kaudok me Koht ketin kupwurki?