Dahme kahrehda kitail kin uhdahn perenki atail mihting tohrohr en ehuehu pahr kan? Duwehte Israel en mahso, mihting tohrohr kan nan atail ahnsou kin kalapw kihong kitail ahnsou mwahu en kaudokiong Siohwa iangahki iengatail Kristian epwiki kei de pil kid kei. Kitail kin perenki ire koaros me kitail kin alehdi me kin sewese kitail en karanihte Siohwa. Kitail pil kin kesempwalki ahnsou mwahu kat ni atail kin patehng kompoakepatail kan oh atail peneinei. Atail uhdahn kalahnganki met kin kamwakid kitail en iang towehda rahn siluh en mihting tohrohro.

Ni atail ahneki ahnsou mwahu en iang pokonpene, kitail en dehr medemedewehte dahme kitail kak alehdi ahpw pil ia duwen atail kak kasalehiong meteikan limpoak. (Kal 6:10; Ipr 10:24, 25) Ni atail ritingada wenihmw ong brother de sister men de katohrehla sehr kante me kitail anahne, kitail kin kasalehda me kitail kin nsenohki kamwahupen meteikan. (Pil 2:3, 4) Mihting tohrohr kan kin kihong kitail ahnsou mwahu en wiahda kompoakepatail kapw kan. Mwohn oh mwurin prokramo oh erein mwengehn souwas, kitail kak akadeiki en koasoiong irail kan me kitail sehse. (2Ko 6:13) Kitail kak wiahda nanpwungmwahu me pahn poatopoat! Ahpw keieu, ni ahnsou me aramas teikan kilang atail kasalehda limpoak mehlel, ele re pahn pilada ren iang kitail papah Siohwa.​—Soh 13:35.

KILANG KISIN KASDO “LOVE NEVER FAILS”! INTERNATIONAL CONVENTIONS, OH MWURI SAPENGALA PEIDEK PWUKAT:

• Ia duwen limpoak eh kowohng irail me kohsang sahpw teikan nan mihting tohrohr en pahr 2019 (international convention)?

• Dahme kahrehda minimin oh limpoak nanpwungen sapwellimen Siohwa aramas akan uhdahn kapwuriamwei?

• Soangen limpoak en Kristian dah kan me kasansalda sang emen Pwihn me Kin Apwalih Mwomwohdiso nan Sampah Pwon?

• Ia duwen limpoak en Kristian kaminiminpene riatail kan nan Germany oh South Korea?

• Dahme kitail en koasoanehdi teng en wia?