Sounpar koaros, sapwellimen Siohwa aramas akan kin kasikasik en iang towehda Katamano. Nan erein wihk kan mwohn oh mwurin Katamano, kitail kin isaneki ahnsou mwahu kan en kapinga oh kalahngankihong Siohwa kisakis en pweinen pweipwei sapahlo. (Ep 1:3, 7) Karasepe, kitail kin doadoahk laud en luke meteikan ong ni Katamano. Ekei kin kak wiahda wekidekla kan pwe ren kak wia sawaspen pioneer ni ar wiahda awa 30 de 50 erein sounpwong en March de April. Ke men kalaudehla omw doadoahk en kalohk erein ahnsowo? Dahme kak seweseiuk?

Kitail kin kalapw wiahda soahng tohto ma kitail kin mwadang wiahda koasoandi. (Lep 21:5) Pwehki ahnsoun Katamano pahn mwadang leledo, met ahnsou mwahu en tepida wiahda koasoandi. Medewe ia duwen omw kak kalaudehla omw doadoahk en kalohk erein ahnsoun Katamano, oh pilada dahme ke anahne wia pwehn lel mehn akadei kan. Mwuri peki Siohwa en ketin kapaia omw nanti koaros.—1So 5:14, 15.

Ke kak medewehda ekei ahl akan me ke kak wia pwehn kalaudehla omw doadoahk en kalohk erein ahnsoun Katamano?