Erein September, kitail pahn doadoahk laud pwehn kangoange tohnihmw koaros ren tepida onop Paipel, ni atail doadoahngki kisin pwuhko Pereperenki Mour Kohkohlahte! Sounkalohk kan kak pilada en wia sawaspen pioneer ni ar wiahda awa 30. Ia duwen atail pahn kapwaiada doadoahk tohrohr wet?

• Ni Omw Tepin Tuhwong Emen: Doadoahngki tihnsewen kisin pwuhko pwehn sewese aramas akan en perenki rong, oh song kasalehda mwomwen onop Paipel. Tamataman irail akan me men rong mahso, iangahki irail akan me ke kin pwurala rehrail. Mehnda ma re sohte men onop rahnteio, mwein re pahn kakete perenki wiepe kapw en onop oh kisin pwuhko. Kitail sohte pahn kihdi kisin pwuhko ni ihmw kan me sohte towe de kadarala rehn irail kan me sohte kin perenki rong mahso. Wiliepen Pwihn en Elder kan kak koasoanehdi pil ehu mihting en kalohk erein sounpwongo.

• Ahnsou Teikan: Ma amwail mwomwohdiso kin doadoahngki deupen pwuhk kan, kasalehda kisin pwuhko Pereperenki Mour Kohkohlahte! Kehsehki irail kan me perenki rong me ma re ale kisin pwuhko, re pil kak onopki Paipel ni soh isepe. Ni mwotomwot kasalehda mwomwen onop Paipel wasao, de koasoanehdi en wia met ni ehu ahnsou mwuhr. Sounapwalih en kalohk kak koasoanehdi sounkalohk koahiek kan ren kohla ni wasahn pesines kan oh kangoangehki aramas akan duwen onop Paipel. Ke pil kak kangoangehki iengomw tohndoadoahk kan de aramas akan me ke kalohkohng ni ahnsou sohte lipilipil duwen onop Paipel.

Sises ketin kehkehlingkihong kitail en katohnpadahk oh padahkih irail. (Md 28:19, 20) Doadoahk tohrohr wet en sewese kitail en kapwaiada pwukoa wet, ni atail doadoahngki Pereperenki Mour Kohkohlahte!