Nan Kosonned en Moseso, ohl emen me medemedewe en mweisang eh pwoud anahne wiahda kisinlikou en kamweid. Met kin irehdihsang aramas akan ren mwadang mweipeseng. Ahpw ni mwehin Siseso, kaunen pelien lamalam kan kin kamengeila pwopwoud kan ren mweipeseng. Ohl akan kak mweisang ar pwoud ni soangsoangen kahrepe kan. (“certificate of dismissal” mehn onop kan ong Mr 10:4, nwtsty-E; “divorces his wife,” “commits adultery against her” mehn onop kan ong Mr 10:11, nwtsty-E) Sises ketin kasansalehda ire mehlel me Siohwa me ketin kamanahla oh wiahda koasoandi en pwopwoud. (Mr 10:2-12) Ohl pwopwoud oh lih pwopwoud pahn wiahla “warteieu” oh patpene kohkohlahte. Pwuhken Madiu pil koasoia ireo oh kasalehda me kahrepe ehute ong mweipeseng me poahsoankihda Paipel, iei “tiahk samin me pid wia nsenen pwopwoud.”​—Md 19:9, NW.

Rahnpwukat, aramas tohto kin kilangwohng pwopwoud duwehte me Parisi ko kin wia, ahpw kaidehn nin duwen Sises eh kin ketin kilangwohng pwopwoud. Aramas akan nin sampah wet kin mwadang mweipeseng ni kahpwal kan ar kin pwarada. Ahpw pwopwoud Kristian kan kin kesempwalki arail inoun pwopwoud oh kin nantihong powehdi kahpwal kan sang ni arail kin doadoahngki kaweid en Paipel kan. Mwurin amwail kilang kisin kasdo Love and Respect Unites Families, sapengala peidek pwukat:

• Ia duwen omw kak doadoahngki Lepin Padahk 15:1 nan omw mouren pwopwoud, oh dahme kahrehda met kesempwal?

• Ia duwen omw kak soikala kahpwal kan ni omw pahn doadoahngki Lepin Padahk 19:11?

• Ma omw mouren pwopwoud kereniongehr ohla, pwe ken dehr medewe ‘I pahn mweisang ei pwoud?’ soangen peidek dah kan me ke anahne medemedewe?

• Ia duwen omw kak wia ohl pwopwoud de lih pwopwoud mwahu ni omw pahn doadoahngki Madiu 7:12?