Ni ahnsou keren Siohwa sohla pahn ketin kanengamahiong koasoandi en mwehi wet. Pelien lamalam likamw pahn kasohrala, miniminpenehn wehi kan pahn uhwong sapwellimen Koht aramas akan oh Siohwa pahn ketin kasohrehla me suwed nan Armakedon. Kristian kan kin kasikasik ahnsou kesempwal pwukat.

Mehlel me kitail sohte ese oaritik koaros duwen kahn kamakam kowahlapo. Karasepe, kitail sehse iahd me e pahn tepida. Kitail sehse soangen kahrepe dah kan me kaunen politik kan pahn doadoahngki pwehn uhwong pelien lamalam. Kitail sehse ia uwen werei me wehi kan pahn uhwong sapwellimen Koht aramas akan de dahme pahn pidada. Kitail pil sehse dahme Siohwa uhdahn pahn ketin doadoahngki pwehn kasohrehla me suwed nan Armakedon.

Ahpw, iren Paipel kan kasalehiong kitail mehkoaros me kitail anahne ese pwe kitail en kilengwohng ni ahnsou kohkohdo ni koapworopwor oh eimah. Karasepe, kitail ese me kitail momour ni kaimwiseklahn “imwin rahn akan.” (2Ti 3:1) Kitail ese me ahnsoun uhwong pelien lamalam pahn “kamalaulaula” pwe pelien lamalam mehlel en sohte kasohrala. (Md 24:22) Kitail ese me Siohwa pahn ketin kapitala sapwellime kan. (2Pi 2:9) Oh kitail ese me Mehmeno me Siohwa ketin pilada en kasohrehla me suwed oh kapitala pokon kalaimwuno sang Armakedon me pwung oh manaman.​—Kau 19:11, 15, 16.

Mwekid kan me pahn wiawi ni ahnsou kohkohdo uhdahn pahn kahrehiong aramas en “lipwongmaskihla ar masak.” Ahpw, ni atail kin wadek oh doudouloale duwen Siohwa eh ketin kapitala sapwellime aramas akan mahso, kitail kak “uhda oh sarada” oh koapworopworki me komourpatail kerendohr.​—Lu 21:26, 28.