NANPWUNGEN Sounkadehde ngoang kan me kin papah nan sahpw kan me mie anahn laud ong sounkalohki Wehio iei sister kiripw tohto. Ekei irail papahkiher erein sounpar tohto nan sahpw pwukat. Dahme kin sewese irail mwohn arail keseula nan sahpw teikan? Dahme irail sukuhlkihsang arail kin papah wasa ko? Ia mwomwen arail mour ahnsou wet? Se koasoiong ekei sister koahiek pwukat. Ma kowe emen sister kiripw me uhdahn inengieng en iang doadoahk en kalohk me inenen kaperen, se kamehlele me ke pahn paiekihda dahme re nda. Ni mehlel, sapwellimen Koht aramas akan koaros kak paiekihda ni arail medewe duwen mehn kahlemeng en sister pwukat.

Ia duwe, ke medewe me ke sohte ahneki koahiek en pweida nin duwen pioneer kiripw men nan sahpw teikan? Anita, me met sounpar 75, kin peikasalki eh koahiek. E tikida nan England, wasa me e tepida pioneer ahnsou me e sounpar 18. E nda, “I perenki padahkihong aramas akan duwen Siohwa, ahpw I sohte medewe me I kak papah nan sahpw teikan. I sohte sukuhlki ehu lokaia tohrohr oh I kamehlele me I sohte douluhl kak esehla. Eri ni ei alehdi doaropwehn luhk en iang Sukuhl en Kilead, I inenen pwuriamweila. I pwuriamweikihla me soangen ngehiet pil kak alehdi luhk wet. Ahpw I medewehla, ‘Ma Siohwa ketin medewe me I kak wia met, eri I pahn song.’ Met wiawi sounpar 50 samwalahro. Sangete ahnsowo, I kin wie papah nin duwen misineri men nan Sapan.” Anita pil nda: “Ekei pak, I kin pohkomwokomw oh ndahng sister pwulopwul kan, ‘Ale noumwail ehd kan oh iang ie wia doadoahk ehu me keieu kaperen!’ I perenki me tohtohn irail iang wia met.”

Sister tohto me papah nan sahpw teikan kin nin tapio peikasalki arail pahn keseula ehu sahpw tohrohr. Ia duwen arail kakairada soangen eimah me re anahne?

Maureen, me met sounpar 64, nda: “Ni ei wie kekeirda, I kin men ahneki mour ehu me mie katepe, soangen mour me pahn sewese meteikan.” Ni ahnsou me e sounpar 20, e keseula Quebec, Canada, wasa me mie anahn laud ong pioneer kan. E nda: “Mwuhr, I alehdi doaropwehn luhk en iang Sukuhl en Kilead, ahpw I masak kohla wasa ieu me I sehse oh kompoakepahi kan sohte iang. I pil pwunodki kohkohsang ei nohno me kin apwalih ei pahpao me kohwahki soumwahu. Nipwong tohto I kin sengiseng oh kapakapohng Siohwa ni ngidingid duwen ire pwukat. Ni ahnsou me I ndaiong ei pahpa oh nohno duwen met, ira kangoange ie en kohla iang sukuhlo. I pil kilang duwen  at mwomwohdiso kin ni limpoak sewese ei pahpa oh nohno. Ni ei kilang duwen sapwellimen Siohwa sawas, met sewese ie en likih me e pahn ahnsou koaros ketin apwalih ie. Ni ahnsowo, I onopadahr en keseula!” Sangete nan pahr 1979, Maureen papah nin duwen misineri men nan Palikapi en Aperika dauliher sounpar 30. Rahnwet, ni eh kin apwalih eh nohno nan Canada, Maureen pil kin papahte nin duwen emen pioneer tohrohr. Ni eh kin tamanda sounpar kan me e papah nan sahpw teikan, e nda: “Siohwa kin ahnsou koaros ketikihda dahme I anahne ni ahnsou me I anahne.”

Wendy, me met sounpar 65, tepida pioneer nan Australia ni ahnsou me e sounpar 14. E nda: “I uhdahn kin namenek oh apwalki koasoiong aramas me I sehse. Ahpw doadoahk en pioneer padahkihong ie en koasoiong soangsoangen aramas akan, eri I sohla masak aramas. Mwuhr, I wehwehkihda me pepehm wet sohla wia mehkot laud ong ie. Doadoahk en pioneer padahkihong ie en koapworopworki Siohwa, oh I tepida sohla masak en medewe me I kak papah nan sahpw teikan. Pil ehu, sister kiripw men me kin papah nin duwen misineri men nan Sapan dauliher sounpar 30 luke ie en iang ih kalohk nan Sapan erein sounpwong siluh. Ei iang ih doadoahk kalaudehla ei ineng en keseula nan sahpw teikan.” Mpen pahr 1985, Wendy keseula Vanuatu, ehu deke me mi mpen mwail 1,100 ni palimese en Australia.

Ahnsou wet Wendy mihmihte Vanuatu oh kin doadoahk nan ohpis en kawehwe. E nda: “I kin keieu perenki en kilang duwen pwihn de mwomwohdiso kan ar wiawihda nan wasa pwukat. En iang ekis pidada wia sapwellimen Siohwa doadoahk nan deke pwukat iei pwais ehu me inenen kaselel.”

Kumiko, me met sounpar 65, wia pioneer men nan Sapan ahnsou me ienge pioneero nda me ira en keseula Nepal. Kumiko nda: “E kin pwurepwurehng peki ie, ahpw I kin nda soh. I pwunodki ei pahn sukuhlki ehu lokaia tohrohr oh pil wiahda wekidekla kan pwehn ahnla ehu wasa. Pil ehu, mie kahpwal en rapahkihda mwohni me anahn pwehn keseula ehu wasa tohrohr. Erein ei medemedewe ei pilipilo, I dake skuhder oh lelohng aksident oh kapedolong imwen wini. Ih wasao me I tepida medemedewe: ‘Ihs me ese dahme pahn wiawihong ie mwuhr? I kakete alehdi soumwahu laud ehu oh katihasang ei pahn pioneer nan sahpw teikan. Ia duwe, mehlel I sohte kak papah wasa ko sounparte ehu?’ Ngehi eri kapakapohng Siohwa ni ngidingid pwehn ketin sewese ie en wia met.” Mwurin Kumiko pedoisang imwen wini, e mwemweitla Nepal. Mwuhr ih oh ienge pioneero keseula wasao.

Ni Kumiko eh medewehla eh kin papah wasao kereniong sounpar eisek, e nda: “Kahpwal ko me I kin pwunodki tohrohrpeseng mwohi duwehte Sehd Weitahtao.  I inenen perenkihda ei kohla papah wasa me mie anahn laud ong sounkalohk. Ni ei kin ehukihong peneinei ehu duwen Paipel nan imwarailo, mehn mparail meh limen de wenemen kin kohdo oh iang rong. Met kin kalapw wiawi. Seri kan pil kin ni wahu peki ie en kihong neirail kisin doaropwe me pid Paipel. E inenen kaperen en kalohk nan soangen wasa pwukat.”

E sohte kapwuriamwei me sister kiripw eimah pwukat me se koasoiong kin lelohng kahpwal kan. Ia duwen arail kin dadaur pahn kahpwal pwukat?

Diane, sang Canada, nda: “Nin tapio, I apwalki ei uhdahn dohsang ei peneinei.” E kin papah nin duwen misineri men nan Ivory Coast (met Côte d’Ivoire) erein sounpar 20. Met e sounpar 62. E nda: “I kin peki Siohwa en ketin sewese ie en kasalehda limpoak ong aramas akan en wasa me I pekederla ie. Emen sounpadahk en Kilead ko, Brother Jack Redford, kawehwehiong kiht me nin tapio ele se pahn soansuwedki de pwuriamweikihla irair en wasa me se pekederla ie, ahpw mehlel ni at pahn kilang uwen semwehmwehn wasa ko. Ahpw e nda: ‘Dehr kilang arail semwehmwe. Kilang aramas ako, pohn masarail oh meserail ko. Kilang mwomwen arail mwekidki arail rong padahk mehlel en Paipel.’ Ih met me I wia, oh ia uwen met eh wia kapai ehu! Ni ei kin ehukihong aramas akan rongamwahu en Wehio me kansenamwahu, I kin kilang meserail ko ar perenkihda!” Dahme pil sewese Diane en ahnla eh kin papah nan ehu sahpw tohrohr? E nda: “I karanihala nei tohnsukuhl en Paipel ko oh I ahneki peren laud ni ei kilang arail wiahla sapwellimen Siohwa ladu lelepek kei. I wiahkihla ei wasa wasao me I pekederla ie. Duwehte me Sises ketin inoukihda, I wiahkihla riei Kristian kan ei pahpa nohno, riei pwutak oh serepein.”​—Mark 10:29, 30.

Anne, me met sounpar 46, kin papah nan ehu sapwen Eisia me atail doadoahko keinapwidi. E nda: “Erein sounpar kan me I kin papah nan soangsoangen wasa kan, I kin mihmi rehn sister kan me tikida wasa me weksang ei wasao oh arail madamadau oh wiewia kan uhdahn weksang ahi. Ekei pak, met kin kahrehda sawehwe nanpwungat oh pil nsensuwed. Ni met eh kin wiawi, I kin song en karanihala irail oh wehwehkihla mwahu arail tiahk kan. I pil kin doadoahk laud en kasalehda limpoak oh toupahrek ong irail. I perenki me met kin imwila mwahu oh se ahnekihte nanpwungmwahu keren me sewese ie en dadaurete nan ei pwukoa doadoahko.”

Nan pahr 1993, Ute, sang Sehmen, me met sounpar 53, pekederla en wia misineri men nan Madagascar.  E nda: “Nin tapio, I kin nanti laud en sukuhlki lokaiahn wasao, ahnla karakar en wasao, oh dadaur pahn soumwahu en malaria, oh pil soumwahu kan me kin kohsang soangen mwahs akan (amoeba oh parasite). Ahpw I kin ale sawas laud. Sister en wasao, neirail seri kan, oh pil nei tohnsukuhl en Paipel kan kin ni kanengamah sewese ie en uhdahn esehla lokaiao. Iengei misinerio kin apwalih ie ni ahnsou me I kin soumwahuda. Ahpw laudsang met, Siohwa kin ketin sewese ie. I kin kalapw kapakapkihong ei iren kapwunod kan. Ngehi eri kanengamah oh awih, ekei pak erein rahn kei, ekei pak sounpwong kei, pwe ei kapakap ko en pasapengla. Siohwa kin ketin apwalihala kahpwal ko koaros.” Met Ute papahkiher nan Madagascar sounpar 23.

Duwehte irail kan me kin kohla wasa me mie anahn laud ong sounkalohk, sister kiripw kan me kousoanla nan soangen sahpw pwukat kin kalapw kasalehda me arail papah nan wasa pwukat kin kamwahwihala arail mour. Kapai dah kei me re kin alehdi?

Heidi, sang Sehmen, me met sounpar 73, papahier nin duwen misineri men nan Ivory Coast (met Côte d’Ivoire) sangete pahr 1968. E nda: “Peren me keieu laud me I alehdi iei en kilang nei tohnsukuhl kan ar doula ‘momourki mour mehlel.’ Ekei nei tohnsukuhl kan en Paipel wiahla pioneer oh elder kei nan mwomwohdiso. Me tohto rehrail kin ekerkin ie Nohno de Nohno kahlap. Emen rehn elder ko oh eh pwoudo oh neira seri ko kin wiahkin ie arail peneinei. Eri Siohwa ketikihong ie eldero, eh pwoudo, oh neira seri silimeno en wiahla nei seri kei.”​—3 Sohn 4.

Karen sang Canada, me met sounpar 72, papahier nan Palikapi en Aperika daulih sounpar 20. E nda: “Mouren misineri kin padahkihong ie en kasalehda tounmetei laud, limpoak, oh kanengamah. Pil ehu, ei iang iengei tohndoadoahk kan sang soangsoangen sahpw kan kin kamwahwihala ei kin kilangwohng ei doadoahko oh meteikan. I sukuhlki me mie wiepe tohto en wia soahng kan. Oh ia uwen eh wia kapai ehu ni ahnsou wet en ahneki kompoakepah keren kan nan sampah pwon! Mendahki atail mour oh atail pwais kaselel kan kin wekila, atail nanpwungmwahu rehn meteikan kin mihmihte.”

Margaret, sang England, me met sounpar 79, kin papah nin duwen misineri men nan Laos. E nda: “Ei papah nan ehu sahpw tohrohr kahrehiong ie en uhdahn kilang ia duwen Siohwa eh kin ketin kainangihedo aramas akan sang soangsoangen sahpw oh tiahk ong sapwellime pwihn. Met uhdahn kalaudehla ei pwoson. E uhdahn kamehlelehiong ie me Siohwa kin ketin kaukaweid sapwellime pwihn oh me sapwellime koasoandi kan pahn pweida.”

Ei mehlel, sister kiripw kan me kin papah nan ehu sahpw tohrohr wiadahr adamwahu nan arail doadoahk en Kristian. Re warohng ale kaping. Patehng met, re wie tohtohla. (Mel. 68:11) Ia duwe, ke pil kak wekidala omw irair kan pwehn idawehn mehn kahlemeng en sister ngoang pwukat me kileldi nan oaralap wet? Ma ei, ke pahn uhdahn kilang “ia uwen kalahngan en KAUN-O.”​—Mel. 34:8.