Dahme pwuhken Madiu koasoia duwen mouren Sises sang ni eh ipwidi oh kekeirda weksang dahme pwuhken Luk koasoia pwehki madamadau en sounnting en rongamwahu pwukat wekpeseng.

Pwuhken Madiu kin koasoia duwen mwekid kan me pidada Sosep. E koasoia duwen ahn Sosep pepehm ni eh esehda me Mery liseian, eh ouramano me tohnlengo kawehwehiong ih duwen irairo, oh mwomwen eh idawehn dahme tohnlengo nda. (Mad. 1:19-25) Madiu pil koasoia duwen tohnleng men eh padahkihong Sosep nan ouraman ehu en tangala Isip, iangahki eh peneineio, oh ia duwen eh kapwaiada met. Madiu pil padahkihong kitail me Sosep pil ouramanihada me tohnleng men padahkihong ih en pwurala Israel, duwen eh pwurala, oh koasoanehdi me ih oh eh peneineio en kousoanla Nasaret. (Mad. 2:13, 14, 19-23) Eden Sosep pwarada pak eisek ehu nan tepin irelaud kan en rongamwahu en Madiu, ahpw eden Mery pwarada pak isuh.

Ahpw pwuhken Luk koasoia duwen Mery. E koasoia duwen tohnlengo Kapriel eh pwarowohng Mery, Mery eh mwemweitla rehn Elisapet, oh duwen Mery eh kapinga Siohwa. (Luk 1:26-56) Luk pil koasoia duwen dahme Simion koasoiaiong Mery me pid Sises eh pahn ketin lokolok. Pil duwen ahnsowo me Mery oh eh peneneio kohla ni tehnpas sarawio ni ahnsou me Sises sounpar 12. Luk koasoia dahme Mery nda ahpw kaidehn dahme Sosep nda. Luk pil nda me Mery uhdahn mwekidki laud soahng koaros me wiawi. (Luk 2:19, 34, 35, 48, 51) Eden Mery pwarada pak 18 nan tepin irelaud riau ko nan rongamwahu en Luk, ahpw eden Sosep pwarada pak 5. Eri Madiu kawehwehda laud duwen ahn Sosep pwunod kan oh dahme e wia, ahpw Luk kasalehda oaritik kan duwen en Mery eh pwukoa oh dahme e lelohng.

Pil duwehte, kairekdi en kadaudok kan me sounnting en Rongamwahu riemeno ntingihedi wekpeseng. Madiu padokada kairekdi en kadaudok me Sosep kohsang ie, oh kasalehda me nein Sosep ohlo Sises, sapwellimanki pwung nin duwen kosonned en sohsohki mwoalen nanmwarki Depit. Dahme kahrehda? Met pwehki Sosep wia kadaudok en Solomon me samanki Nanmwarki Depit. (Mad. 1:6, 16) Ahpw, Luk padokada kairekdi en kadaudok me Mery kohsang ie oh kasalehda me Sises sapwellimanki pwuhng en sohsohki mwoalen nanmwarki Depit “nin duwen eh wia aramas.” (Rom 1:3) Dahme kahrehda? Pwehki Mery iei kadaudok en Nadan me samanki Nanmwarki Depit. (Luk 3:31) Ahpw dahme kahrehda Luk sohte kasalehda me Mery iei nein Eli serepein? Met pwehki eden ohl akan iei me kin kileldi nan kairekdi en kadaudok kan nan pwuhk kan. Eri ni Luk eh kilelehdi eden Sosep oh nda me ih nein Eli, met wehwehki me Sosep iei ohl me pwoudiki nein Eli serepeino.​—Luk 3:23.

Kairekdi en kadaudok me Madiu oh Luk ntingihedi kasalehda ni sansal me Sises iei Mesaiao me Paipel kohpada. Ni mehlel, aramas tohto kin ese duwen kairekdi en kadaudok en Sises me kahrehda Parisi oh Sadusi ko sohte kak kahmahmki met. Rahnwet, ahn Madiu oh Luk ara kilelehdi kairekdi en kadaudok kan kin wia kisehn poahsoanpen atail pwoson oh mehn kadehde duwen mehlelpen sapwellimen Koht inou kan.