1, 2. (a) Dahme ele kin kahrehiong kitail en idek peidek wet: “Ia erein”? (b) Dahme kahrehda mehn kahlemeng en ladu lelepek en mahs ko kangoange kitail rahnwet?

 “IA EREIN?” Peidek wet iei me soukohp lelepek ko Aiseia oh Apakuk idek. (Ais. 6:11; Apak. 1:2) Nanmwarki Depit pil idek peidekohte pak limau ni ahnsou me e ntingihedi Melkahka 13. (Mel. 13, 1, 2) Sises Krais pil ketin keinemwe peidek wet, “Ia erein?” ni eh ketiket rehn aramas akan me sohte ar pwoson. (Mad. 17:17) Ele kitail pil kin idek peidekohte rahnwet.

² Dahme kahrehda kitail kin idek peidek wet: “Ia erein?” Ele wiewia sapahrek ehu wiawihong kitail. De mwein kitail soumwahu de mahla. Ele kitail kin ahneki pwunod pwehki kitail mi nan “ahnsou apwal ekei.” (2 Tim. 3:1) De madamadau sapwung en aramas akan me mi rehtail kin kahrehiong kitail en pwangada oh mworusala. Sohte lipilipil soangen kahrepe dah, e kin wia mehn kangoang ehu en ese me Siohwa sohte kin ketin kupwur suwedki sapwellime ladu lelepek kan en mahs me pil kin idek peidekohte.

3. Dahme kak sewese kitail ni atail mi nan irair apwal ehu?

³ Dahme kak sewese kitail ni atail mi nan irair ehu me apwal  en dadaur pah? Koht ketin kamwakid tohnpadahko Seims en ndaiong kitail: “Eri, riei ko, kumwail kanengamah lao Kaun-o ketido.” (Seims 5:7) Eri kitail koaros anahne kanengamah. Ahpw dahkot kanengamah, oh ia duwen atail kak kasalehda irair kaselel wet?

4, 5. (a) Dahkot kanengamah, oh ia duwen atail kak kanengamah? (b) Ia duwen Seims eh kawehwehda kanengamah? (Menlau kilang tepin kilel.)

⁴ Paipel mahsanih me kanengamah kohsang sapwellimen Koht manaman. Ma sohte sapwellimen Koht sawas, e pahn apwal ong aramas soh unsek kan en kanengamah pahn irair apwal kan. Kanengamah wia kisakis ehu sang rehn Koht, oh kitail kin kadehdehda atail limpoak ong Siohwa oh meteikan ni atail kasalehda met. Ma kitail sohte kanengamah, limpoak me kitail ahneki rehn meteikan pahn luwetala. (1 Kor. 13:4; Kal. 5:22) Dahme kanengamah kin pidada? E kin pidada atail dadaur pahn irair apwal kan oh ahnsowohte ahneki madamadau pwung. (Kol. 1:11; Seims 1:3, 4) Kanengamah pil kin sewese kitail en kolokolete atail lelepek ong Siohwa sohte lipilipil soangen kahpwal dah me kitail ahneki. E pahn sewese kitail en dehr dupuk ong meteikan me suwed ni atail kin lokolok. Paipel mahsanih me kitail en men pwungki en awih ni kanengamah. Met wia mehn kasukuhl kesempwal ehu me kitail sukuhlki sang Seims 5:7, 8. (Wadek.)

⁵ Dahme kahrehda kitail en men awih Siohwa pwehn ketin wia kupwure? Tohnpadahko Seims karasahiong atail irair duwehte irair en soumwet men. Mehnda ma soumweto kin doadoahk laud pwehn padokedi weren tuhke kan, e sohte kak kamwakid irair en mesenlahng de uwen mwadang en tuhke ko ar kin wosada. Oh e sohte kak kamwadangahla ahnsou. E anahne awih ni kanengamah “wa kesempwal kan en eh mwaht.” Pil duwehte met, mie soahng tohto me kitail sohte kak kaunda ni atail awiawih sapwellimen Siohwa inou kan en pweida. (Mark 13:32, 33; Wiewia 1:7) Duwehte soumweto, kitail anahne awih ni kanengamah.

6. Dahme kitail kak sukuhlkihsang mehn kahlemeng en soukohp Maika?

⁶ Soukohp Maika anahne dadaur pahn irair apwal kan, pil duwehte kitail rahnwet. E momour erein ahnsou me Nanmwarki Ahas kakaun. Ahas wia nanmwarki men me inenen suwed. Met kahrehda diren mwersuwed nan sahpwo. Soahng kan inenen suwed me kahrehda Paipel mahsanih me aramas ako kin “samanih wiahda me suwed.” (Wadek Maika 7:1-3.) Maika ese me e sohte kak kawekila irairo. Eri dahme e pahn wia? E nda: “I pahn sohpeiong KAUN-O; I pahn koapworopwor awiawih Koht, me pahn ketin komouriehla. Ei Koht pahn ketin karonge ie.” (Maika 7:7) Duwehte Maika, kitail pil anahne “awiawih Koht.”

7. Dahme kahrehda kitail anahne wia laudsang en ihte awih Siohwa en ketin kapwaiada sapwellime inou kan?

⁷ Ma kitail ahneki pwoson duwehte ahn Maika, kitail pahn men awih Siohwa. Atail irair sohte duwehte ahn tohnimweteng men me kin mi nan eh pereo awiawih rahn me e pahn kamakamala. Mendahte e sohte men awih, ahpw e anahne. E sohte kin kasikasik rahno. Eh irairo uhdahn weksang atail! Kitail kin men awih Siohwa pwehki kitail ese me ni ahnsou me konehng, e pahn ketin kapwaiada sapwellime inou en ketikihong kitail mour soutuk! Eri kitail “dadaurete ni kanengamah oh peren.” (Kol. 1:11, 12, NW) Erein atail awiawih, kitail en dehr kaulimki me Siohwa kin ketin pwapwand. Ma kitail wia met, e sohte pahn ketin kupwurperenkin kitail.​—Kol. 3:12.

8. Dahme kitail sukuhlkihsang ohl oh lih lelepek kan mahso?

⁸ Dahme pahn sewese kitail en kalaudehla atail men awih? Medewehla duwen ohl oh lih lelepek kan mahs me kin kanengamah awih Siohwa pwehn ketin kapwaiada sapwellime inou kan. (Rom 15:4) Ni atail medewehla duwen arail mehn kahlemeng kan, e mwahu kitail en taman uwen werei arail kin awiawih, dahme kahrehda re men awih, oh ia duwen Siohwa eh ketin kapaiahda irail pwehki arail kanengamah.

9, 10. Ia uwen werei me Eipraam oh Sara anahne awih Siohwa?

⁹ Tehk duwen mehn kahlemeng en Eipraam oh Sara. Pwehki ira kasalehda “pwoson oh kanengamah,” ira alehdi dahme ‘Koht ketin inoukihong ira.’ Paipel mahsanihong kitail me “Eipraam eri kanengamah oh awiawihete,” oh Siohwa ketin inoukihda me e pahn ketin kapaiahda oh kahrehiong en wiahla semen wehi laud ehu. (Ipru 6:12, 15) Dahme kahrehda Eipraam anahne kasalehda kanengamah? Pwehki ahnsou anahn pwe inowo en kak pweida. Ni Nisan 14 en pahr 1943 mwohn Krais, inou wet tepida pweida. Ni rahno, Eipraam oh Sara oh tohn imweo koaros kotehla Pillap Iupreitis oh pedolong nan Sapwen Inowo. Ahpw Eipraam anahne awih sounpar 25 mwohn nah pwutako Aisek ipwidi oh pil sounpar 60 mwohn nein Aisek pwutak ko Esau oh Seikop ipwidi.​—Ipru 11:9.

¹⁰ Ia uwen laud en sahpw nan Sapwen Inowo me Eipraam sohsohki? Paipel mahsanih me Siohwa “sohte ketikihong Eipraam ekis kisehn wasaht pwe en sapwenikihla, pil sohte kisin wasa kis; ahpw Koht ketin inoukihong me e pahn ketikihong ih oh kadaudoke kan pwe re  en sapwenikihla. Ni ahnsou me Koht ketin wiahda inou wet, Eipraam saikinte naineki seri.” (Wiewia 7:5) Met sohte pweida lao sounpar 430 mwurin Eipraam eh kotehla Pillap Iupreitis me kadaudoke kan wiahla wehi ehu me pahn kousoan nan sahpwo.​—Eks. 12:40-42; Kal. 3:17.

11. Dahme kahrehda Eipraam men awih Siohwa, oh kapai dah kan me e pahn kilang pwehki eh kanengamah?

¹¹ Eipraam men awih pwehki e kamehlele me Siohwa pahn ketin kolokol sapwellime inou kan. E kin pwoson Siohwa. (Wadek Ipru 11:8-12.) Eipraam perenki awih mendahki e sohte kilang pweidahn sapwellimen Koht inou kan koaros mwohn eh mehla. Ahpw medewehla peren me Eipraam pahn ahneki ni ahnsou me e pahn iasada nan paradais sampah. E pahn pwuriamweila ni eh wadek duwen koasoipen eh mour oh eh peneinei nan pali tohto en Paipel. * Medewehla ia uwen eh pahn peren ni eh esehda duwen eh pwukoa kesempwal en kapwaiada kupwuren Siohwa duwen inou me pid Mesaiao! Kitail kak kamehlele me e pahn medewe me e uhdahn mie katepe en awih kapai pwukat.

12, 13. Dahme kahrehda Sosep anahne kanengamah, oh madamadau pwung dahieu me e ahneki?

¹² Sosep, me eh pahpao pahpa kahlapki Eipraam, pil men kasalehda kanengamah. E lelohng wiewia sapahrek kei me inenen suwed. Keieu, rie kan netikihla ih nin duwen lidu men ni eh sounpar 17. Mwuhr, ahn eh soumaso pwoudo karaunehki me e song en angkehlailih, oh met kahrehda Sosep en selidi nan imweteng. (Sen. 39:11-20; Mel. 105:17, 18) Mendahki Sosep wia sapwellimen Koht ladu lelepek men, e mwomwen ale kalokolok ahpw kaidehn kapai kan. Ahpw mwurin sounpar 13, soahng koaros wekila. Sosep pedoisang nan imweteng oh wiahla keriau en kaun me keieu manaman nan Isip.​—Sen. 41:14, 37-43; Wiewia 7:9, 10.

¹³ Ia duwe, wiewia sapahrek pwukat kahrehiong Sosep en kadakadaur eh lingeringer? E medewe me Siohwa ketin likidmeliehla ih? Soh. Sosep awih ni kanengamah. Dahme sewese ih? Eh pwoson Siohwa. E wehwehki me Siohwa kak ketin kapwaiada kupwure. Kitail kilang met sang ni eh ndaiong rie ko: “Kumwail dehr perki mehkot. I sohte kak wiliandi Koht. Kumwail koasoanehdi kumwail en wiahiong ie me suwed, Koht ahpw ketin kawekiong ni mehkot mwahu, pwe en doarehla mouren aramas ngeder me momourkiher rahnwet irair me wiawihero.” (Sen. 50:19, 20) Sosep ese me mie katepen eh awih kapai kan sang Siohwa.

14, 15. (a) Dahme kahrehda kanengamah me Depit kasalehda uhdahn kapwuriamwei? (b) Dahme sewese Depit en awih ni kanengamah?

¹⁴ Nanmwarki Depit pil lelohng wiewia sapahrek tohto. Siohwa ketin idihada Depit pwehn wia nanmwarki en Israel ni ahnsou me e pwulopwul. Ahpw Depit anahne awih sounpar 15 mwohn eh wiahla nanmwarki en pein eh keinek. (2 Sam. 2:3, 4) Erein ahnsowo, Depit anahne tang oh rukusang Nanmwarki Sohl, me songosong en kemehla ih. * Met kahrehda Depit en sohte mie pein imwe. E anahne mi nan sahpw tohrohr ehu de nan pwoar en paip kan nan sapwtehn. Kedekedeo, Sohl kamakamala nan mahwen ehu. Ahpw Depit pil anahne awihte mpen sounpar isuh mwohn e wiahla nanmwarki en wehin Israel pwon.​—2 Sam. 5:4, 5.

¹⁵ Dahme kahrehda Depit men awih ni kanengamah?  E kihong kitail pasapengo nan melkahkaohte ni eh idek peidek wet pak limau: “Ia erein?” E nda: “I kin koapworopworki sapwellimomwi limpoak poatopoat; I kin peren, pwehki komwi pahn ketin doareiehla. Maing KAUN, I pahn kouliong komwi, pwehki sapwellimomwi kalahngan ong ie.” (Mel. 13:5, 6) Depit ese me Siohwa ketin poakohng ih oh pahn ahnsou koaros ketin loalopwoatohng ih. E tamanda ahnsou ko me Siohwa ketin sewese ih mwoweo, oh e kasikasik ahnsou ehu me Siohwa pahn ketikihsang eh kahpwal kan. Depit ese me mie katepen eh awih sapwellimen Siohwa kapai kan.

16, 17. Ia duwen Siohwa oh Sises ara ketin wia mehn kahlemeng keieu mwahu en men awih?

¹⁶ Siohwa sohte ketin mahsanihong kitail en wia mehkot me pein ih sohte ketin kupwurki wia. E ketin wia mehn kahlemeng keieu mwahu me pid en men awih. (Wadek 2 Piter 3:9.) Karasepe, sounpar kid kid kei samwalahro nan mwetuwel en Ihden, Sehdan karaunehki Siohwa me e sohte ketin kasalehda wiewia pahrek. Siohwa kin ketin “awiawih ni kanengamah” ahnsou me mwareo pahn kasarawihala ni unsek. E pahn imwikihla kapai kaselel kan ong irail ko me “awiawih ih ni kanengamah.”​—Ais. 30:18, NW.

¹⁷ Sises pil ketin kupwurki awih. Ni ahnsou me e ketiket sampah, e ketin lelepek lao eh pwoula. Nan pahr 33, e patohwanohng Siohwa pweinen meirongo nanleng. Ahpw e anahne awih lao lel pahr 1914 pwehn tepida kakaun nin duwen Nanmwarki. (Wiewia 2:33-35; Ipru 10:12, 13) Mendahki met, e pil anahne ketin awih lao lel imwin Kaundahn Pahr Kido mwohn eh imwintihti kan koaros pahn kasohrala. (1 Kor. 15:25) Uhdahn e wia ahnsou werei en awiawih! Ahpw, e katapan en awih kapai pwukat.

18, 19. Dahme pahn sewese kitail en men awih ni kanengamah?

¹⁸ E sansal me Siohwa ketin kupwurki kitail en kanengamah, oh men awih. Dahme pahn sewese kitail en wia met? Kitail anahne kapakapki sapwellimen Koht manaman. Tamataman me kanengamah kohsang sapwellimen Koht manaman. (Ep. 3:16; 6:18; 1 Des. 5:17-19) Eri peki Siohwa en ketin seweseiuk dadaur ni kanengamah!

¹⁹ Pil tamataman dahme sewese Eipraam, Sosep, oh Depit en kanengamah awih sapwellimen Siohwa inou kan en pweida. Arail pwoson oh likih Siohwa me sewese irail. Irail sohte kin medemedewehte pein irail oh dahme re mwahuki. Ni atail medewe duwen imwila mwahu kan ong irail, kitail pil pahn ngoangki awih ni kanengamah.

20. Dahme kitail koasoanehdi teng en wia?

²⁰ Eri mehnda ma ele kitail kin dadaur pahn kahpwal kan, kitail en koasoanehdi teng en “kanengamah oh awih.” Ekei pak kitail ele kin idek, “Maing ei Kaun, ia erein met eh pahn wiawi?” (Ais. 6:11) Pwehki sapwellimen Koht manaman, kitail kak kahlemengih soukohp Seremaia oh nda: “KAUN-O kelehpw me ahi, ihme kahrehda ih me I koapworopworki [“awiawih,” NW].”​—Koul Ked. 3:21, 24.