AHNSOWO kohkohlahng imwin November 1932 nan Mexico City, kahnimw ehu me kalapw kedirepw oh me aramas daulih rar kei kin kousoan ie. Wihk ehu mwowe, dengki kan me kin kaweid sidohsa tepida miehla ni ahl akan. Ahpw met, aramas akan uhdahn kasikasik mehkot tohrohr. Sounwia doaropwehn nuhs kan ni wasahn peidi en kisa kan kolokol neirail kilel kan pwehn kilele aramas kesempwal men me pahn peidi wasao. Ihs aramas menet? Joseph F. Rutherford, me wia president en Watch Tower Society. Sounkadehdehn Siohwa kan wasao pil kasikasik pwehn kasamwohdo Brother Rutherford, me kohdo pwehn iang towehda arail mihting tohrohr me pahn wiawi rahn siluh.

The Golden Age nda: “Mihting tohrohr wet pahn uhdahn mi nan poadopoad nin duwen mwekid kesempwal ehu pwehn nantihong lohkpeseng padahk mehlel nan Mexico.” E wia mihting tohrohr tikitik ehu me mpen aramas 150 iang towehda. Ahpw dahme kahrehda e nohn kesempwalki?

Mwohn mihting tohrohr wet, padahk mehlelo sohte uhdahn lohkpeseng wasa koaros nan Mexico. Sangete pahr 1919, mie mihting tohrohr tikitik kan, ahpw nempehn mwomwohdiso kan wie tikitikla sounpar kei mwuhr. Ni ahnsou me ohpis en Sounkadehdehn Siohwa kan ritida nan Mexico City, nan pahr 1929, e mwomwen me irairo pahn mwahula, ahpw miehte kahpwal kei me re anahne apwalihala. Pwihno kaweidki pioneer kan ni ahnsowo ren dehr wia pesines erein arail kalokalohk. Emen pioneer inenen lingeringerkihda met me kahrehiong ih en kohkohsang padahk mehlel oh pein wiahda eh pwihn en onop Paipel. Erein ahnsowohte, emen anahne wiliandi sounapwalih ohpis en Sounkadehdehn Siohwa kan wasao pwehki eh wiewia sapwungo. Sounkadehde loalopwoat kan nan Mexico anahne ale kangoang.

Erein eh mwemweito, Brother Rutherford uhdahn kangoange laud me lelepek pwukat ni eh wia padahk riau me kamwakid irail nan mihting tohrohro oh padahk limau wiawi nan redio. Ehdin brother ko doadoahngki redio station kan pwehn lohkpeseng rongamwahwo nan Mexico pwon. Mwurin mihting tohrohro, sounapwalih kapw men idihdida pwehn koasoanehdi doadoahk en kalohk. Met Sounkadehde ko ahneki ngoang laud, oh pwehki sapwellimen Siohwa kupwuramwahu, re pousehlahte kalokalohk.

Sounpar ehu mwuri, nan pahr 1933, mie mihting tohrohr riau me wiawi nan sahpwo, ehu nan Veracruz oh ehu nan Mexico City. Riatail Kristian ko wasao doadoahk laud nan arail wasahn kalohk, oh e imwila mwahu ong irail. Nan pahr 1931, mie sounkalohk 82. Ahpw nan pahr 1941, sounkalohk kan kekeirda laudla pak eisek! Mpen aramas 1,000 kohdo Mexico City pwehn iang towehda Mihting Tohrohro nan pahro.

Nan pahr 1943, Sounkadehde kan tepida pakairki Mihting Tohrohro, “Wehi Saledek kan,” me pahn wiawi  nan kahnimw 12 nan Mexico. * Re wia met ni arail doadoahngki sain kan. Re kin mwarehda sain lapala riau, ehu langalang mwohrail oh ehu langalang ni tihnsewarail. Sounkadehde kan kin doadoahngki sain pwukat pwehn pakairki arail mihting tohrohr kan sangete pahr 1936.

Arail doadoahngki sain kan uhdahn pweida nan Mexico City me kahrehiong makasihn ehu me ede La Nación ntingihda duwen Sounkadehde kan ar towehda mihting tohrohro: “Keieu en rahno, kangoang kohwong irail ren luke aramas tohto. Rahno mwuri, aramas akan inenen tohtohla wasao.” Pelien lamalam en Kadolik sohte perenki pweidahn doadoahko, eri re uhwongada Sounkadehde ko. Ahpw Riatail Kristian ko sohte masepwehk. Irail pousehlahte pakairki duwen mihting tohrohro. Pil ehu oaralap nan La Nación ripohtki: “Kahnimwo pwon kilang irail.” Ripwohto nda me riatail Kristian ko “likoukihda ‘sain en pakair kan.’” Oaralapo pil kasalehda kilel en riatail kan pohn ahl akan en Mexico City. Pahnangin kilelo nda: “Ahl akan direkihla aramas.”

Nan sounpar ko, pali laud en sounkadehde ko anahne wiahda tounmetei laud pwehn iang towehda ekei mihting tohrohr me wiawi nan Mexico. Riatail Kristian tohto kohsang kousapw kan me dohsang wasahn kisa kan de nan ahl akan. Eri irail me pahn iang mihtingo anahne dake dongki kan erein rahn kei pwe ren kak lella ni wasahn kisao me pahn tangahkinirailla ni kahnimw me mihting tohrohro pahn wiawi.

Pali laud en Sounkadehde ko semwehmwe oh kereniong sohte itar pweinerail pwehn kohla ni mihting tohrohro. Ni arail lella mwo, me tohto mi rehn Sounkadehde kan wasao me kasalehiong irail limpoak oh kasamwo irail. Meteikan meir nan Wasahn Kaudok kan. Ehu pak, mpen riatail Kristian 90 mi ni ohpis en Sounkadehdehn Siohwa kan wasao, wasa me re meir pohn kakon en pwuhk kan. Pwuhken pahro nda me riatail Kristian ko kasalehda arail kalahngan laud pwehki kakon en pwuhk ko “kansenamwahu sang pohn taht siment.”

Sounkadehde ko uhdahn kalahnganki arail iang riarail Kristian teikan pokonpene me kahrehda en mie katepen arail tounmetei kan koaros. Kereniong mpen Sounkadehde rar kei nan Mexico pil kin ahneki soangen kalahnganohte rahnwet. * Ehu ripoht nda nan pwuhken pahr (1949 Yearbook) nda me tounmetei kan me riatail Kristian kan wiahda sohte kaluwetehla arail ngoangki sapwellimen Siohwa doadoahk. Ehuehu mihting tohrohr ko me re iang towehda kin wia “ehu ire me re kin kalapw koasoia erein ahnsou reirei mwurin mihtingo.” Peidek me riatail Kristian ko pwurepwurehng idek iei, “Iahd me kitail pahn pil towehda ehu mihting tohrohr?”​—Neitail Pwuhk oh Dipwisou en Mahs kan nan Central America.