1, 2. Dahme aramas akan tehkada duwen Sounkadehdehn Siohwa kan?

 ARAMAS tohto kin esehki Sounkadehdehn Siohwa kan ar weksang meteikan. Karasepe, sounnting en pwuhk, Anton Gill, kapingahla irair kaselel en Sounkadehde ko nan Nazi Sehmen. E ntingihedi: “Nazi ko kin wiahki Sounkadehdehn Siohwa kan arail imwintihti laud. . . . Nan pahr 1939, mie meh 6,000 me mihmi nan imweteng [concentration camps].” E pil kapatahiong me mendahki Sounkadehde ko lelohng lokolok laud, meteikan esehkin irail nin duwen aramas likilik kei, me kin meleilei pahn kasongosong, loalopwoatohng arail Koht oh pil miniminpene.

² Me keren, aramas nan Palieir en Aperika tehkada duwen soangen irair tohrohr ehu rehn Sounkadehdehn Siohwa kan. Mie ahnsou ehu me Sounkadehde kan nan sahpwo me pohrail kan wekpeseng sohte kak tuhpene oh ehupene. Ahpw ni Rahn Sarawi en December 18, 2011, Sounkadehde daulih 78,000 sang soangsoangen keinek kan sang Palieir en Aperika oh pil sahpw teikan me karanih irail pokonpene ong prokram tohrohr ehu nan wasahn mwadong keieu  laud en Johannesburg. Emen kaun en wasahn mwadongo nda: “Edin pokon me I kilangada me keieu mwahu me kohdo nan wasahn mwadong wet. Koaros likouda mwahu. Oh uhdahn mwahu amwail kamwakelehda wasaht. Ahpw keieu, soangsoangen aramas akan me iang amwail pwihnen.”

3. Ia duwen minimin en riatail Kristian kan sampah pwon eh weksang meteikan?

³ Eri, aramas akan me kaidehn Sounkadehde kei pil kak kilang ia duwen minimin en riatail Kristian kan sampah pwon eh weksang meteikan. (1 Pit. 5:9) Dahme kahrehda kitail uhdahn weksang pwihn teikan? Pwehki sawas sang Paipel oh pil sapwellimen Koht manaman, kitail kin doadoahk laud en wekidala soahng kan rehtail me sohte kin kaperenda Siohwa. Kitail “pwilikidier mour mering en mahso” oh “pwuhriongehr nan likoun mour kapw en aramas kapw.”​—Kol. 3:9, 10.

4. Dahme kitail pahn koasoiapene nan iren onop wet? Dahme kahrehda?

⁴ Mwurin atail pwilikidier mour mering en mahso, kitail en dehr kapwurehiong. Nan iren onop wet, keieu kitail pahn sukuhlki ia duwen atail kak pwilikihdi mour mering en mahso oh dahme kahrehda met uhdahn kesempwal. Kitail pahn kilang me emen kak wiahda wekidekla laud kan nan eh mour mendahki ia uwen laud en eh wiewia sapwung kan. Kitail eri pahn koasoiapene dahme irail kan me wereilahr nan padahk mehlel kak wia pwehn dehr pwurehng mour mering en mahso. Dahme kahrehda kitail anahne koasoiapene duwen met? Met pwehki mie ekei me ahnsou ehu kin papah Siohwa ahpw re uhdisangehr arail en doulahte kanahieng pein irail. Re tepidahr medewe oh pil wia dahme re kin wia mwohn re esehla duwen Siohwa. Emenemen kitail anahne tamataman kaweid wet: “Mehmen me pepehm me e kesikesihnen teng, a en kanahieng pwe e de pwupwudi.”​—1 Kor. 10:12.

5. (a) Menlau kihda ehu karasaras me kasalehda dahme kahrehda e kesempwal en pwilikihdi mour mering en mahso. (Menlau kilang tepin kilel.) (b) Wiewia dah kan me wia kisehn mour mering en mahso me Kolose 3:5-9 kasalehda?

⁵ Dahme ke pahn wia ma omw likou kan me ke likawih pwelipwel oh pwohsuwed? Ke pahn mwadangete kapwuhrasang. Ni ahlohte, ma kitail esehda me kitail kin wiewia soahng kan me Siohwa ketin kalahdeki, e uhdahn kesempwal kitail en wekila. Me pid soangen wiewia sapwung pwukat, Pohl nda: “Kumwail uhdahn pahn mweisang soahng pwukat koaros.” Kitail pahn koasoiapene soahng riau sang mepwukat: tiahk samin me pid wia nsenen pwopwoud oh wiewia samin.​—Wadek Kolose 3:5-9.

6, 7. (a) Ia duwen ahn Pohl koasoi ko eh kasalehda me emen anahne nantihong laud pwehn pwilikihdi eh mour mering en mahso? (b) Ia mwomwen ahn Sakura mour en mahso? Dahme sewese ih en wekila?

⁶ Tiahk Samin me Pid Wia Nsenen Pwopwoud. Nan Paipel, wiewia wet kin pidada wia nsenen pwopwoud rehn emen me kaidehn omw pwoud nin duwen kosonned oh tiahk en ohl mwahuki ohl de lih mwahuki lih. Pohl koasoia me Kristian kan anahne “kemehla” ineng en paliwararail me pid wia nsenen pwopwoud. Met wehwehki me kitail anahne nantihong laud en kihsang rehtail ineng sapwung kan. E kak uhdahn apwal ong kitail en wia met, ahpw kitail kak pweida!

⁷ Kitail kak kilang duwen met sang karasaras en sister men nan Sapan me adaneki Sakura. * Ahnsou me Sakura wie kekeirda, e kin kalapw pehm me e kelekelehpw oh e kin nsensuwed. Pwehn kihsang pepehm wet, e tepida wia nsenen pwopwoud rehn me tohto sangete eh sounpar 15. Pak siluh e kauwehla eh liseian. E nda: “Nin tapio, ni ei kin wendi rehn emen, I kin ahneki pepehm me I sohte kelekelehpw, oh I medewe  me mie me anahne ie oh poakepoake ie. Ahpw ni ei kin wia met pak tohto, ei pepehm me sohte emen me poakohng ie pil kin laudla.” Sakura pousehlahte wiewia soangen mour wet lao e sounpar 23. Ih eri tepida onop Paipel rehn Sounkadehdehn Siohwa kan, oh e uhdahn perenki dahme e sukuhlki. Siohwa ketin sewese ih en uhdihsang eh mour en tiahk samin oh pil sewese en powehdi eh pepehm en mworus oh namenengki dahme e wia ko. Rahnwet, Sakura wia emen pioneer oh solahr ahneki pepehm en kelekelehpw. E nda: “I inenen perenki ei paiekihda sapwellimen Siohwa limpoak rahn koaros.”

8. Soangen wiewia dah kan me kak kahrehiong Koht en ketin wiahkin kitail aramas samin kei?

⁸ Wiewia samin. Nan Paipel, wiewia “samin” kin pidada laudsang tiahk samin me pid wia nsenen pwopwoud. E kak dokedoke wiewia kan duwehte simoak de kamwan suwed. (2 Kor. 7:1; Ep. 5:3, 4) E pil kak dokedoke soahng suwed kan me aramas kin wia ni arail kelehpwla, duwehte wadewadek pwuhk kan me kainangihada arail ineng suwed, de kilikilang kilel de kasdo suwed. Soahng pwukat kak kahrehiong irail en wia tiahk samin en mwadongki dipwisou en kaparapar.​—Kol. 3:5. *

9. Dahme kak wiawi ma emen kin kakairada “ineng suwed”?

⁹ Aramas me kin kaukaule kilang kilel de kasdo suwed kin kakairada “ineng suwed” oh sohte kak uhdihsang wiewia samin kan. Irail sounroporop kan kasalehda me emen me sohla kak uhdihsang kilang kilel de kasdo suwed kin duwehla emen me sohla kak uhdihsang kang sakau de doadoahngki wini en kasahliel. Eri e sohte kapwuriamwei me mie imwila suwed me kohsang emen eh sohla kak uhdihsang kilikilang kilel de kasdo suwed kan. Mepwukat kak iangahki pepehm en namenek laud, sohte pwerisek nan doadoahk, sohte nsenamwahu nan peneinei, mweipeseng en pwopwoud, oh pil kemehla pein emen. Mwurin emen ohl eh uhdihsang kilikilang kilel de kasdo suwed erein sounpar ehu, e nda me e kakehr pwurehng wauneki pein ih.

10. Ia duwen Ribeiro eh uhdihsang eh kin kilikilang kilel de kasdo suwed?

¹⁰ Ong me tohto, e kin uhdahn apwal ong irail en saledeksang douluhl kilang kilel de kasdo suwed. Ahpw re kak powehdi kahpwal wet. Medewehla dahme wiawihong Ribeiro sang Brazil. Ni eh pwulopwul, e kohkohsang imweo oh kohla doadoahk wasahn wiahda soahng kan sang doaropwe me aramas kesehla. E kin kilangada pwuhken kilel suwed kan wasao. Ribeiro nda: “Ekisekis, I sohla kak uhdihsang kilang kilel suwed. Tiahk wet uhdahn suwedla me kahrehda I sohte kak awih lih me kin mihmi rehio en mwadang kohkohsang ni imwato pwe I en kak kilang kasdo suwed.” Ehu rahn ni wasahn doadoahko, Ribeiro kilangada nan koasoakoasoak en pwuhk kei pwuhk me oaralape Sawas ong Nsenamwahu en Peneinei. E pwekada oh tepida wadek. Dahme e esehda kahrehiong en onop Paipel rehn Sounkadehdehn Siohwa kan. Ahpw Ribeiro sohte kak uhdihsang kilang kilel de kasdo suwed erein ahnsou reirei. Dahme sewese ih? E nda: “Sang ei kapakap, onop Paipel, oh doudouloale dahme I sukuhlki, e kalaudehla ei kalahnganki sapwellimen Koht irair kaselel kan lao ei poakohng Siohwa kehlailsang ei ineng en kilang kilel de kasdo suwed.” Pwehki sawas sang Paipel oh sapwellimen Koht manaman, Ribeiro wekidala mwomwen eh mour, papidaisla, oh met e kin papah nin duwen elder men nan mwomwohdiso.

11. Dahme pahn sewese emen en saledeksang kilang kilel de kasdo suwed?

¹¹ Tehk me Ribeiro anahne wia laudsang ihte onopki Paipel pwehn kak saledeksang kilang  kilel de kasdo suwed. E anahne medewe laud duwen dahme e wadek nan Paipel oh mweidohng en sair eh mohngiong. E anahne kapakap ong Siohwa oh peki sapwellime sawas. Soahng pwukat sewese kalaudehla ahn Ribeiro eh limpoak ong Siohwa pwe en kak powehdi eh ineng en kilang kilel de kasdo suwed. Pwehn saledeksang kilang kilel de kasdo suwed, kitail pil anahne uhdahn poakohng Siohwa oh tateki me suwed.​—Wadek Eimwos 5:15.

12. Dahme sewese Stephen en kadohwaneweisang ih lingeringer oh lokaia lemei?

¹² Ekei aramas kin keh lingeringer oh nda lokaia lemei oh kin kasarowe meteikan. Ni met eh kin wiawi, koaros nan peneinei pil lokolongki. Pahpa men nan Australia me adaneki Stephen kin kalapw peined oh kin mwadang lingeringerkihda mehkot tikitik. E nda: “Ngehi oh ei pwoudo tohrohrpeseng pak siluh oh se wiewiahier doaropwehn mweipeseng.” Ahpw Sounkadehde kan tepida onop Paipel rehra, oh Stephen song en kapwaiada dahme e sukuhlki. E nda me mwohn eh esehla Siohwa, e kin inenen mwehlda ahnsou kan me mehkot kalingeringerihada ih oh e pehm me e duwehte pakudang ehu me kak pospeseng. Ahpw mwurin Stephen tepida idawehn kaweid en Paipel, soahng kan tepida mwahula. E nda: “Mouren ei peneineio mwadang mwahula. Pwehki sapwellimen Siohwa sawas, met popohl oh meleilei uhdahn laudla rehi.” Rahnwet, Stephen kin papah nin duwen sounsawas men, oh eh pwoudo kin wiewia doadoahk en pioneer erein sounpar kei. Elder kan nan mwomwohdiso me Stephen kin iango, nda: “Stephen wia brother nennen oh pwerisek men oh e kin aktikitik.” Re pil nda me sohte pak ehu re kilang eh lingeringerda. Stephen sohte men ale kapingpen wekidekla laud me wiawihong ih. E nda: “Kapai kaselel pwukat koaros sohte pahn wia kisehn ei mour ma I sohte mweidohng Siohwa en ketin sewese wekidala ei mour.”

13. Dahme kahrehda lingeringer wia irair keper ehu? Dahme Paipel kaweidkin kitail?

¹³ Paipel kaweidkin kitail en dehr lingeringer, lokaia lemei oh wering meteikan. (Ep. 4:31) Soahng pwukat kin kalapw kahrehda wiewia lemei. Rahnwet, me tohto nan sampah sohte wiahki mehkot lingeringer oh tiahk lemei. Ahpw en wia soahng pwukat kin kasohwahwih Sounkapikpatailo. Eri, riatail Kristian tohto wekilahr oh pwuhriongehr nan likoun mour kapw.​—Wadek Melkahka 37:8-11.

14. Aramas lemei men kak aktikitikla?

¹⁴ Brother men me adaneki Hans kin papah nin duwen elder men nan mwomwohdiso ehu nan Austria. Soun koasoanehdi pwihn en elder kan nan eh mwomwohdiso nda: “Ih emen nanpwungen brother kan me keieu aktikitik me ke pahn men tuhwong.” Ahpw Hans sohte kin ahnsou koaros aktikitik. Ni ahnsou me e pwulopwul, e tepida kamamsakau laud oh wiahla aramas lemei men. Ehu pak ni eh sakaula, e uhdahn lingeringerda oh kemehla serepein me e kin iango. Hans anahne selidi erein sounpar 20, ahpw eh mour nan imwetengo sohte wekidala ih. Eh nohno eri peki rehn elder men en mwemweitla rehn Hans, oh Hans tepida onop Paipel. E nda: “Uhdahn apwal ong ie en pwilikihdi ei mour mering en mahso. Iren Paipel kan me kangoange ie iei Aiseia 55:7 me mahsanih: ‘Aramas suwed kan en sohpeisang ar mour suwed,’ oh 1 Korint 6:11, me mahsanihki irail me kesehla arail wiewiahn dihp kan: ‘Ekei kumwail iang mihmi ni soangen aramas pwukat mahso.’ Erein sounpar tohto, Siohwa ni kanengamah ketin sewesehkin ie sapwellime manaman pwe ien pwuhriong nan likoun mour kapw.” Hans papidaisla ni ahnsou me e mihmihte nan imweteng oh e pedoisang wasao mwurin sounpar 17 elep. E nda: “I kalahnganki sapwellimen Siohwa mahk oh kalahngan me inenen laud.”

15. Ia pil ehu kisehn mour mering en mahso? Dahme Paipel mahsanih duwen met?

 ¹⁵ Likamw pil wia kisehn mour mering en mahso. Karasepe, me tohto kin likamw pwehn soikala pwain daksis de pein pwukoahki arail sapwung kan. Ahpw Siohwa iei “Koht en mehlel.” (Mel. 31:5, NW) Eri e ketin kupwurki sapwellime tohnkaudok kan koaros en kin “lokaia mehlel” oh “dehr kin kine likamw.” (Ep. 4:25; Kol. 3:9) E sansal me kitail en kin mehlel mehnda ma met apwal de kanamenek.​—Lep. Pad. 6:16-19.

16. Dahme pahn sewese kitail en pwilikihdi mour mering en mahso?

¹⁶ Kitail sohte kak pwilikihdi mour mering en mahso ni atail kin doadoahngkihte pein atail kehl. Sakura, Ribeiro, Stephen, oh Hans anahne wia uwen arail kak en wekidala arail wiewiahn mahso. Dahme sewese irail iei manaman en Mahsen en Koht oh pil sapwellime manaman. (Luk 11:13; Ipru 4:12) Pwehn paiekihda manaman wet, kitail anahne wadek Paipel rahn koaros, doudouloale, oh pousehlahte kapakapki erpit oh kehl pwehn doadoahngki dahme kitail sukuhlki. (Sos. 1:8; Mel. 119:97; 1 Des. 5:17) Kitail pil kin paiekihda Mahsen en Koht oh sapwellime manaman ni atail kin kaunopadahng oh towehda mihting kan en mwomwohdiso. (Ipru 10:24, 25) Oh kitail men doadoahngki soangen sawas tohto teikan me sapwellimen Siohwa pwihn kin kihong kitail, duwehte neitail makasihn kan, JW Broadcasting, JW Library, oh jw.org.​—Luk 12:42.

17. Dahme kitail pahn koasoiapene nan iren onop en mwuhr?

¹⁷ Kitail koasoiapenehr ekei wiewia suwed kan me Kristian kan anahne pwilikihdi oh dehr pwurehng pwe kitail en kak kaperenda Siohwa. Ahpw pil mie soahng tohto me kitail anahne wia. Kitail anahne pwuhriong mour kapwo oh wiahkihla met kisehn atail mour. Nan iren onop en mwuhr, kitail pahn koasoiapene ia duwen atail kak wia met.