1, 2. (a) Ia duwen atail ese me kitail kak pwuhriong nan mour kapwo? (b) Irair dah kan en mour kapwo me kitail sukuhlki nan Kolose 3:10-14?

 NAN Paipel en New World Translation of the Holy Scriptures, lepin lokaia “mour kapw” dierek pak riau. (Ep. 4:24; Kol. 3:10) Met kin pidada en wiahla soangen aramas men me “wiawihda rasehng Koht.” Ia duwe, kitail kak wiahla soangen aramas kapw wet? Ei. Siohwa ketin kapikada aramas akan rasehng ih, eri kitail kak kahlemengih sapwellime irair kaselel kan.​—Sen. 1:26, 27; Ep. 5:1.

² Ei mehlel, ekei pak kitail koaros ahneki ineng sapwung kan pwehki kitail sohsohki soh unsek. Oh wasa me kitail tikida ie pil kak kamwakid kitail. Ahpw pwehki sapwellimen Siohwa sawas me kalahngan, kitail kak wiahla soangen aramas me e ketin kupwurki. Pwehn sewese kitail en koasoanehdi teng en wia met, kitail pahn koasoiapene soangen irair kaselel kei me wia kisehn mour kapwo. (Wadek Kolose 3:10-14.) Mwuhr kitail pahn kilang ia duwen atail  kak kasalehda soangen irair pwukat nan kalohk.

3. Ia ehu irair en mour kapwo?

³ Pohl kawehwehda me sohte lipilipilki aramas wia kisehn mour kapwo me kesempwal. E nda: “Solahr mehkot mie me kin katohrepeseng mehn liki oh mehn Suhs, me sirkumsaisla de sohte sirkumsaisla kan, me rotorot akan, de mehn wai kan, lidu de me saledek kan.” Nan mwomwohdiso, sohte emen anahne medewe me e mwahusang meteikan pwehki wasa me e kohsang ie, ih mehn ia, de ih lapalap men nan eh wasao. Dahme kahrehda? Pwehki nin duwen sapwellimen Krais tohnpadahk kan, kitail “koaros wialahr ehu.”​—Kol. 3:11; Kal. 3:28.

4. (a) Ia pahn mwomwen wiewiahn sapwellimen Siohwa ladu kan ong meteikan? (b) Soangen irair dah me kak kahpwalihala miniminpenehn Kristian kan?

⁴ Ni atail kin pwuhriong likoun mour kapwo, kitail kin wauneki aramas akan, sohte lipilipil irail mehn ia de wasa re kohsang ie. (Rom. 2:11) Nan ekei sahpw, met kak uhdahn apwal. Karasepe, mahso nan Palieir en Aperika, koperment kan kin koasoanehdi wasahn kousoan kan ong aramas sang soangsoangen keinek kan. Pali laud en aramas ako wasao, pil iangahki Sounkadehde kan, kin koukousoante wasa ko. Pwihn me Kin Apwalih Mwomwohdiso nan Sampah Pwon men kangoange riatail Kristian ko en ‘langahda douluhl mohngiongirail kan.’ Eri nan October 2013, re pwungki koasoandi tohrohr ehu me pahn sewese Kristian kan sang soangsoangen keinek kan en kalaudehla arail esehla emenemen.​—2 Cor. 6:13.

5, 6. (a) Koasoandi dahieu me wiawihda nan ehu sahpw pwehn sewese sapwellimen Koht aramas akan en kalaudehla arail kin miniminpene? (Menlau kilang tepin kilel.) (b) Ia imwilahn met?

⁵ Brother ko wiahda koasoandi kan pwe Sounkadehde kan sang mwomwohdiso riau me arail lokaia de keinek wekpeseng en kak ehupene ni ekei imwin wihk kan. Riatail kan sang mwomwohdiso ko kin ehupene kalohk, tuhpene ni mihting kan, oh mwemweitla ni imwen riarail kan. Mwomwohdiso epwiki kei iang koasoandi wet, oh ohpis en Sounkadehdehn Siohwa kan wasao alehdi rohng mwahu tohto me pid koasoandi wet. Met pil kamwakid ekei me kaidehn Sounkadehde kan. Karasepe, emen kaunen pelien lamalam nda: “Kaidehn ngehi Sounkadehde men, ahpw I pahn nda me amwail doadoahk en kalohk inenen soandi mwahu, oh mendahki mie keinek tohto, kumwail kin miniminpene.” Ia ahn riatail Kristian kan ar pepehm ong koasoandi wet?

⁶ Nin tapio, sister men me kin lokaiahki lokaiahn Xhosa me adaneki Noma, nohn salohki eh pahn lukehdo nan kisin imweo Sounkadehde kan sang mwomwohdiso me kin lokaiahki lokaiahn wai. Ahpw mwurin eh iang Sounkadehde mehn wai kan kalohk oh mwemweitla imwarail kan, met kahrehiong en sohla nohn saloh. E nda: “Re duwei kiht!” Eri ni Sounkadehde ko sang mwomwohdiso me kin doadoahngki lokaiahn wai ar kohla iang mwomwohdiso me kin doadoahngki lokaiahn Xhosa kalohk, Noma lukehdo ekei irail ni imweo pwe irail en mwengepene. E pwuriamweikihla ni eh kilang emen elder mehn wai me iang lukodo, sohte suwedki mwohd pohn koakon plastik karakarahk ehu. Pwehki prokram wet doulahte wiewiawi, tohtohn irail Kristian kan kompoakepahnkihda me tohto oh pousehlahte esehla irail kan sang ehu wasa tohrohr.

7. Dahme kahrehda kitail en ahnsou koaros poakehla meteikan?

⁷ Sapwellimen Siohwa aramas akan pahn ahneki kahpwal lao ahn Sehdan sampah imwisekla. Kitail koaros pahn lelohng kahpwal en sohte doadoahk en mwohni, soumwahu laud, kalokolok, kahpwal kan en melimel ape, kepwe kan sohla mie pwehki tiahk en mwersuwed, de pil  soangen kahpwal teikan. Pwehn sewese emenemen erein kahpwal pwukat, kitail anahne kasalehda limpoak mehlel nanpwungatail. Poakehla meteikan pahn kamwakid kitail en kadek ong irail. (Ep. 4:32) Irair riau wet wia kisehn mour kapwo oh pahn sewese kitail en kahlemengih Koht oh kansenamwahwih meteikan.​—2 Kor. 1:3, 4.

8. Soahng mwahu dah kan me kak wiawi ni atail kin poakehla oh kadek ong koaros nan mwomwohdiso? Menlau kihda ehu karasaras.

⁸ Ia duwen atail kak kalaudehla atail kadek ong irail kan nan atail mwomwohdiso me keseusang ehu sahpw tohrohr de me ahneki kahpwal? Kitail men kasamwo irail, wiahla kompoakparail, oh sewese irail en ahnla wasao. (1 Kor. 12:22, 25) Karasepe, Dannykarl keseula Sapan sang Philippines. Pwehki ih mehn liki men, ienge tohndoadoahk ko sohte kin mwahu ong ih duwehte arail kin mwahu ong tohndoadoahk teikan. Ih eri iang towehda ehu mihting en Sounkadehdehn Siohwa kan. Dannykarl nda: “Kereniong koaros me iang towehda mihtingo mehn Sapan kei, ahpw re uhdahn kasamwo ie, likamwete I ese irail sangete mahs.” Kadek en Kristian ko pousehlahte sewese ih en karanihala Siohwa. Mwuhr, Dannykarl papidaisla, oh rahnwet e kin papah nin duwen elder men. Ienge elder teiko perenki me ih oh eh pwoudo, Jennifer, iang kisehn arail mwomwohdiso oh re nda: “Nin duwen pioneer kei, ira kihsang soahng kan me sohte nohn kesempwal nan ara mour oh kihda mehn kahlemeng mwahu en rapahki mahs Wehio.”​—Luk 12:31.

9, 10. Menlau kihda karasaras kan duwen imwila mwahu me kohsang atail poakehla meteikan nan kalohk.

⁹ Kitail ahneki ahnsou mwahu en “wia mwahu ong aramas koaros” ni atail kin ehukihong irail rongamwahu en Wehio. (Kal. 6:10) Sounkadehde tohto kin poakehla irail kan me keseudo nan sapwarailo oh song en sukuhlki arail lokaia. (1 Kor. 9:23) Arail nannanti kin wahdo imwila mwahu. Karasepe, pioneer sister men nan Australia me adaneki Tiffany sukuhlki lokaiahn Swahili pwehn sewese mwomwohdiso ehu me kin doadoahngki lokaiao nan kahnimw en Brisbane. Mendahki e apwalki esehla lokaiao, met kahrehiong eh mouro en miehla katepe laudsang mwoweo. Tiffany nda: “Ma ke men omw doadoahk en kalohk en kaperen, kohla papah nan mwomwohdiso ehu me kin doadoahngki ehu lokaia tohrohr. E duwehte omw kin seiseiloakseli ahpw mihmihte nan omw kahnimwo. Ke pahn pein kilang duwen kapwuriamwei en miniminpenehn riatail Kristian kan sampah pwon.”

¹⁰ Peneinei en Sapan ehu pil wia duwehte. Nein pwopwoudo neira serepeino, Sakiko, nda: “Se kin kalapw tuhwong aramas akan me keseudo sang Brazil nan kalohk. Ni at kin kasalehiong irail iren Paipel kan duwehte Kaudiahl 21:3, 4 de Melkahka 37:10, 11, 29 sang neirail Paipel ni lokaiahn Portugal, re kin rong mwahu oh ekei pak pilen masarail ko kin keredi.” Peneineio kin poakehla  irail kan me keseudo wasao oh men sewese irail sukuhlki padahk mehlel, eri nin duwen peneinei ehu, re tepida sukuhlki lokaiahn Portugal. Mwuhr, peneineio sewese tapiada mwomwohdiso ehu me kin doadoahngki lokaiao. Erein sounpar tohto, peneinei wet sewesehier me tohto me keseudo wasao en wiahla sapwellimen Siohwa ladu kan. Sakiko nda: “E uhdahn doadoahk laud en sukuhlki lokaiahn Portugal, ahpw kapai kan me se alehdi uhdahn laudsang. Se inenen kalahngankihong Siohwa.”​—Wadek Wiewia 10:34, 35.

11, 12. (a) Dahme kahrehda kitail en ahneki madamadau pwung ong atail pwuhriong likoun mour kapwo? (b) Dahme pahn sewese kitail en kolokolte atail aktikitik?

¹¹ Dahme kamwakid kitail en pwuhriong likoun mour kapw iei en kawauwih Siohwa, kaidehn en ale kaping sang meteikan. Tamataman me tohnleng unsek men pil aklapalapala oh wiahda dihp. (Pil kilang Esekiel 28:17) Kitail sohte unsek, eri e pahn uhdahn apwal ong kitail en soikala aklapalap. Ahpw kitail kak kasalehda aktikitik. Dahme pahn sewese kitail en wia met?

¹² Ehu me pahn sewese kitail en aktikitik iei en wadek Mahsen en Koht rahn koaros oh doudouloale dahme kitail wadek. (Deud. 17:18-20) Kitail uhdahn anahne doudouloale dahme Sises ketin padahkihong kitail oh pil sapwellime mehn kahlemeng mwahu en aktikitik. (Mad. 20:28) Sises uhdahn ketin aktikitik ni eh widenda patehnehn sapwellime wahnpoaron ko. (Sohn 13:12-17) Pil ehu me kitail kak wia iei en kapakapki sapwellimen Siohwa manaman. Sapwellime manaman kak sewese kitail en pelianda soangen pepehm koaros me dene kitail mwahusang meteikan.​—Kal. 6:3, 4; Pil. 2:3.

13. Soangen kapai dah kan me kohsang atail kin aktikitik?

¹³ Wadek Lepin Padahk 22:4. Siohwa ketin kupwurki kitail en aktikitik. Aktikitik kin wahdo kapai tohto. Ni atail kin aktikitik, met pahn kalaudehla meleilei oh miniminpene nan mwomwohdiso. Pil ehu, Siohwa pahn ketikihong kitail sapwellime kalahngan. Wahnpoaron Piter koasoia: “Kumwail koaros pwuhriong nan likoun karakarahk oh uhpahpene nanpwungamwail; pwe Pwuhk Sarawi mahsanih, ‘Koht kin ketin pelianda me aklapalap akan, a e ketikihong sapwellime kalahngan me karakarahk kan.’”​—1 Pit. 5:5.

14. Ihs me ketin wia mehn kahlemeng keieu mwahu en opampap oh kanengamah?

¹⁴ Nan sampah rahnwet, ma emen kin kasalehda opampap oh kanengamah, meteikan kin kalapw medewe me e luwet. Ahpw met likamw. Irair kaselel riau pwukat kohsang rehn Siohwa, Meno me keieu manaman nanleng oh nin sampah. Ih me ketin wia mehn kahlemeng keieu mwahu en opampap oh kanengamah. (2 Pit. 3:9) Karasepe, medewehla ia uwen kanengamah me Siohwa ketin kasalehda ni eh ketin doadoahngki tohnleng kan ni ahnsou me Eipraam oh Lot patohwan kalelapak reh peidek kan. (Sen. 18:22-33; 19:18-21) Pil medewehla uwen kanengamah me Siohwa ketin kasalehiong wehin Israel me sapeikiong ih daulih sounpar 1,500.​—Esek. 33:11.

15. Mehn kahlemeng dahieu me Sises ketikihda ni eh ketin kasalehda opampap oh kanengamah?

¹⁵ Sises ketin “opampap.” (Mad. 11:29) E uhdahn ketin kanengamahiong luwet en sapwellime tohnpadahk ko. Erein sapwellime doadoahk en kalohk nin sampah, mie me kin kalapw kauwe oh kapwukoahki ih mehkot me e sohte ketin wiahda. Ahpw e ketin opampap oh kanengamah lao e pwoula. Nan eh lokolok mwuledek pohn tuhkehn kalokoloko, e patohwan peki rehn Semeo en ketin mahkohng ohl ako me kemehla ih. E mahsanih: “Re sehse dahme re wiewia.” (Luk 23:34) Pil ni ahnsou me Sises kin ketin pwunodada de tihwohla, e ketin kolokolete sapwellime irair en opampap oh kanengamah.​—Wadek 1 Piter 2:21-23.

16. Ia duwen atail kak kasalehda opampap oh kanengamah?

 ¹⁶ Pohl kasalehda ehu ahl me kitail kak kasalehda opampap oh kanengamah ni eh ntingihedi: “Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr.” (Kol. 3:13) Pwehn mahkohng meteikan, kitail anahne kasalehda opampap oh kanengamah. Met pahn kalaudehla oh kolokol miniminpenehn mwomwohdiso.

17. Dahme kahrehda opampap oh kanengamah wia irair kesempwal kei?

¹⁷ Siohwa ketin kupwurki kitail en opampap oh kanengamahiong meteikan. Irair pwukat kesempwal ma kitail men mour nan sampah kapwo. (Mad. 5:5; Seims 1:21) Ni atail kin opampap oh kanengamah, kitail kin kawauwihala Siohwa oh sewese meteikan en pil wia duwehte.​—Kal. 6:1; 2 Tim. 2:24, 25.

18. Ia duwen limpoak oh sohte lipilipilki aramas ar dokpene?

¹⁸ Irair ko koaros me kitail koasoiapene kin pidada limpoak. Karasepe, tohnpadahko Seims anahne kaweid rie Kristian ko pwehki arail wiewia ong me kepwehpwe kan mwahusang arail wiewia ong me semwehmwe kan. E kawehwehda me met sohte pahrekiong sapwellimen Koht kosonnedo en “poakohng mehn mpomw duwehte omw kin poakohng pein uhk.” E pil nda: “Ma kumwail pahn lipilipilki aramas pwehki mwomwarail kan, eri, kumwail wiahkihda dihp.” (Seims 2:8, 9) Ma kitail poakohng aramas akan, kitail sohte pahn lipilipilki emen pwehki soangen sukuhl me e ale, eh keinek, de ma e lapalap de soh. Kitail sohte kak mwomwehdahte me dene kitail kin sohte lipilipilki aramas akan. Sohte lipilipilki aramas anahne wia kisehn atail irair kan me kohsang loalatail.

19. Dahme kahrehda e kesempwal kitail en kasalehda limpoak?

¹⁹ Limpoak pil kin “kanengamah oh kadek” oh sohte kin “pohnmwahso.” (1 Kor. 13:4) Kitail anahne kanengamah, kadek, oh aktikitik pwehn pousehlahte ehukihong mehn mpatail kan rongamwahwo. (Mad. 28:19) Irair pwukat pil kin kamengeila atail en ahneki nanpwungmwahu rehn riatail Kristian kan koaros nan mwomwohdiso. Ni ahnsou me kitail koaros kin kasalehda soangen limpoak wet, atail mwomwohdiso pahn miniminpene oh met pahn kawauwihala Siohwa. Meteikan pahn kilang miniminpene wet oh pahn men esehla padahk mehlel. Eri dahme Paipel kawehwehda duwen mour kapwo imwikihla mahsen pwukat: “Kumwail kapatahiong soahng pwukat limpoak, pwe ih me kin kapatapene oh oarepene mehkoaros pwe en wiahla ehu ni mehlel.”​—Kol. 3:14.

20. (a) Peidek dah kan me kitail en pein idek rehtail, oh dahme kahrehda? (b) Ahnsou mwahu dah me kitail kasikasik ni ahnsou kohkohdo?

²⁰ Emenemen kitail anahne pein idek rehtail, ‘Wekidekla dah kan me I anahnehte wiahda pwehn pwilikihdi oh dehr pwurehng mour mering en mahso?’ Kitail anahne kapakap ong Siohwa oh peki en ketin sewese kitail. Kitail anahne doadoahk laud pwehn wekidala madamadau de wiewia sapwung kan pwe kitail en kak “iang sohsohki Wehin Koht.” (Kal. 5:19-21) Kitail pil anahne pein idek rehtail, ‘I kin pousehlahte kamwahwihala ei elen madamadau pwehn kaperenda Siohwa?’ (Ep. 4:23, 24) Kitail sohte unsek, eri kitail anahne pousehlahte doadoahk laud pwehn pwuhriong nan likoun mour kapw oh kolokolte. Kitail en pousehlahte wiewia met. Atail mour pahn uhdahn mwahu ni aramas koaros me momour ar pahn pwuhriong nan likoun mour kapw oh alasang ni unsek sapwellimen Siohwa irair kaselel kan!