Ia duwe, ke kin wadek kanahieng Kahn Iroir kan me wiawihda nan pahret? Eri, kilang ma ke kak sapengala peidek kan me mi pah:

Dahme kahrehda pahpa nohno kan me keseusang sapwarailo anahne medewe mwahu lokaia dah me irail en esehla pwehn sewese neirail seri kan en kakairada arail nanpwungmwahu rehn Siohwa?

Seri kan ele pahn esehla lokaiahn arail sukuhlo oh pil wasa me irail keseula. E pahn mwahu ong seri kan en esehla lokaiahki ehu lokaia tohrohr. Pahpa nohno kan anahne medewe mwahu ia wasa me neirail seri kan pahn keieu paiekihda padahk mehlel oh kakairada arail nanpwungmwahu rehn Siohwa, ma ni mwomwohdiso ehu me doadoahngki lokaiahn wasao de pein arail lokaia. Pahpa nohno Kristian kan kin mwohneki mahs ahn neirail seri kan nanpwungmwahu rehn Siohwa laudsang dahme pein irail mwahuki.​—w17.05, pali 9-11.

Ni Sises eh ketin kalelapak rehn Piter: “Ke poakohng ie laudsang mepwukat?” Ia wehwehn lepin lokaiao “mepwukat”? (Sohn 21:15)

E mwomwen me Sises mahmahsanih duwen mwahmw ako wasao oh/de duwen pesines en laid. Mwurin Sises eh pwoula, Piter pwuralahng doadoahk me e kin wia mahso—doadoahk en laid. Kristian kan anahne medewe ni toupahrek duwen arail doadoahk en mwohni.​—w17.05, pali 22-23.

Dahme kahrehda Eipraam peki rehn eh pwoudo en nda me ira pirien? (Sen. 12:10-13)

E mehlel me Sera oh Eipraam pirien pwehki ira pahpapene. Ma Sera pahn nda me e pwoudiki Eipraam, Eipraam pahn kakete kamakamala oh sohte pahn mie kadaudoke kan nin duwen me Koht ketin inoukihong ih.​—wp17.3, pali 14-15.

Wiepen nting dahieu me Elias Hutter wiahda pwehn sewese irail kan me men esehla lokaiahn Ipru?

E men sewese nah tohnsukuhl kan en kak kasawihada wekpeseng en uhdahn lepin lokaiahn Ipru ehu nan Paipel oh lepin nting kan me kapatapatohng mwohn oh mwurin lepin lokaiao. Pwehn wia met, e ntingihedi uhdahn lepin lokaiao ni nting mosul, ahpw lepin nting kan me kapatapatohng mwohn oh mwurin lepin lokaiao sohte mosul. Soangen wiepe wette iei me dierek nan nting tikitik kan nan New World Translation of the Holy Scriptures​—With References.​—wp17.4, pali 11-12.

Ire kesempwal dah kan me Kristian men anahne medewe ma e men naineki kesik pwehn pere ih sang aramas mwersuwed?

Ekei ire kesempwal kan iei: Koht kin ketin kilangwohng mour nin duwen mehkot sarawi. Sises sohte ketin kangoange sapwellime kan en doadoahngki kedlahs pwehn pere irail. (Luk 22:36, 38) Kitail anahne wekidohng neitail kedlahs kan ong ni mehn deipwel kan. Mour kin kesempwal sang kepwe kan. Kitail kin wauneki kadeikpen loalen meteikan, oh kitail men wiahda adamwahu. (2 Kor. 4:2)​—w17.07, pali 31-32.

Dahme kahrehda Rongamwahu en Madiu oh Luk wekpeseng ni ara koasoia duwen mouren Sises ni eh wie kekeirda?

Madiu kin koasoakoasoia duwen Sosep; karasepe, ahn Sosep pepehm ni ahnsou me Mery liseianda oh pil ahnsou me e alehdi kaweid sang tohnleng men en tangala Isip oh pil ni eh pwurodo. Ahpw Luk kin koasoakoasoia duwen Mery; karasepe, ni Mery eh mwemweitla rehn Elisapet oh pil eh pepehm ni ahnsou me nah pwutako Sises mihmi nan tehnpas sarawio.​—w17.08, pali 32.

Kahpwal dah kei me Paipel anahne dadaur pah?

Wehwehn lepin lokaia oh lepin kahs kan me Paipel doadoahngki kin wekiwekla. Palien koperment kan kin wekila oh kahrehda wekideklahn lokaia kan. Uhwong laud wiawihong doadoahk en kawehwehdi Paipel ong ni lokaia me pali laud en aramas kin doadoahngki.​—w17.09, pali 19-21.

Mie tohnleng men me wia sounperepatail?

Soh. Sises mahsanih duwen en sapwellime tohnpadahk kan arail tohnleng kan me kin aririh Koht. (Mad. 18:10) Wehwehn sapwellime mahsen ko iei me tohnleng kan kin men ese duwen sapwellime tohnpadahk kan, ahpw kaidehn re kin pere emenemen tohnpadahk ko ni ahl manaman ehu.​—wp17.5, pali 5.

Limpoak dahieu me keieu siksang limpoak koaros?

A·gaʹpe iei soangen limpoak me keieu siksang limpoak koaros ni eh kin poahsoankihda mouren kaweid pwung kan. Limpoak wet kin kak pidada pepehm en poakohng emen. Ahpw e kin kasalehda mouren kaweid kesempwal kan, duwehte wiewia kadek kan ong kamwahupen meteikan.​—w17.10, pali 7.