1, 2. Dahme kahrehda e wia elen erpit en rong Sounkapikpomw ni ahmw kin pilada dahme ke pahn wia nan ahmw mour? (Menlau kilang tepin kilel kan.)

MA KOWE emen me pwulopwul, ele ke kin ale kaweid tohto ong dahme ke pahn wia ahnsou kohkohdo. Sounpadahk kan, sounkaweid en sukuhl kan, de meteikan ele kin ndaiong uhk me ke anahne sukuhl laud de ahneki doadoahk mwahu ehu me pahn seweseiuk wiahda mwohni tohto. Ahpw Siohwa ketikihong uhk kaweid me weksang met. Ni mehlel, e ketin kupwurki ken doadoahk laud nan sukuhl pwe ken kak ale doadoahk ehu oh apwalih pein uhk. (Kol. 3:23) Ahpw e pil ketin mwahngih me ni ahmw pwulopwul, ke anahne wiahda pilipil kesempwal kan me pahn kamwakid dahme ke pahn wia ni ahnsou kohkohdo. Eri e ketikihda kaweid oh ire mehlel kan pwehn kaweid oh seweseiuk en mourki mour ehu me pahn kaperenda ih erein imwin rahn pwukat.​—Mad. 24:14.

² Tamataman me Siohwa ketin mwahngih soahng koaros. E ketin mwahngih dahme pahn wiawi ahnsou kohkohdo, oh e ketin mwahngih uwen keren en imwio. (Ais. 46:10; Mad. 24:3, 36) Siohwa pil ketin mwahngih duwen kowe. E ketin mwahngih dahme pahn  kaperenda oh dahme pahn kansensuwedihiuk. Kaweid en aramas ele mwomwen mwahu, ahpw ma e sohte poahsoankihda Mahsen Koht, e sohte ahneki erpit mehlel.​—Lep. Pad. 19:21.

3, 4. Ia imwilahn Adam oh Ihp oh neira kan arail rong kaweid suwed?

³ Kaweid suwed kin mie sangete mahs. Sehdan me tepin kihong aramas kaweid suwed. E ndaiong Ihp me ih oh Adam pahn nsenamwahu ma ira pein pilada mwomwen ara pahn mour. (Sen. 3:1-6) Ahpw Sehdan uhdahn roporop! E mwahuki Adam oh Ihp, pil seri kan me ira pahn naineki mwuhr, en peikiong ih oh kaudokiong ih, a kaidehn Siohwa. Ahpw sohte mehkot me Sehdan wiahda ong aramas. Siohwa me ketikihong ira soahng koaros me ira ahneki. E ketikihong ira emenemen, mwetuwel kaselel ehu en kousoan ie, oh paliwar unsek me kak mour kohkohlahte.

⁴ E kansensuwed me Adam oh Ihp sapeikiong Koht. Ni ara wia met, ira lopsang de uhtohrda sang Meno me ketikihong ira mour. Imwilahn met uhdahn suwed. Duwehte wahn rohs me kin lopsang tuhke ehu, Adam oh Ihp kedekedeo mahla oh mehla. Neira seri kan lokolongki met, oh pil iangahki kitail koaros. (Rom 5:12) Duwehte Adam oh Ihp, pali laud en aramas akan rahnwet kin pohnsehsehla dahme Koht mahsanih oh wiahte dahme re men wia. (Ep. 2:1-3) Ia imwilahn mepwukat? Paipel mahsanih me “sohte erpit” ni aramas akan ar uhwongada Siohwa.​—Lep. Pad. 21:30, NW.

5. Dahme Siohwa ketin kamehlele me pid aramas akan, oh e pwung dahme e ketin kamehlele?

⁵ Siohwa ketin kamehlele me e pahn mie aramas, iangahki me pwulopwul tohto, me pahn men esehla oh kaudokiong ih. (Mel. 103:17, 18; 110:3) Me pwulopwul pwukat uhdahn kesempwal ong Siohwa! Ia duwe, kowe emen irail? Eri ke kin uhdahn nsenamwahuki “paiamwahu” tohto sang rehn Koht, oh met kin kalaudehla ahmw peren. (Wadek Melkahka 103:5; Lep. Pad. 10:22) Kitail pahn koasoiapene soahng pahieu. Soahng pahieu pwukat iei padahk mehlel, kompoakepah mwahu kan, mehn akadei mwahu kan, oh saledek mehlel.

6. Dahme kahrehda ke anahne apwalih ahmw anahn en esehla Koht, oh dahme Siohwa ketikihda pwehn seweseiuk?

⁶ Mahn akan sohte ahneki anahn en esehla Sounkapikparailo. Ahpw kitail ahneki anahn wet. (Mad. 4:4) Ni atail kin rong Koht, kitail kin alehdi koahiek en dehdehkihla mwahu, erpit, oh nsenamwahu. Sises mahsanih: “Meid pai irail me kin pohnese me irail anahne Koht.” (Mad. 5:3) Koht ketikihong kitail Paipel oh ketin doadoahngki ‘ladu lelepek oh loalokongo’ pwehn wiahda sawasepen Paipel kan me kin sewese kakehlakahda atail pwoson. (Mad. 24:45) Kitail kin kahdaneki sawasepen Paipel pwukat padahk mehlel me rasehng mwenge pwehki re kin apwalih atail pwoson oh kakehlakahda atail nanpwungmwahu rehn Siohwa. Kitail kin paiekihda soangsoangen sawasepen Paipel pwukat!​—Ais. 65:13, 14.

7. Ia ekei kamwahu kan me kohsang atail ale padahk mehlel me Koht ketikihda?

⁷ Padahk mehlel kak kihong uhk erpit oh koahiek en madamadau, me kak pereiuk ni ahl tohto. (Wadek Lepin Padahk 2:10-14.) Karasepe, irair kaselel pwukat pahn seweseiuk en esehda likamw kan, duwehte likamw me dene sohte Sounkapikpatail de likamw me dene mwohni oh mehkan en sampah pahn kahrehiong uhk nsenamwahu. Irair kaselel pwukat pil pahn seweseiuk soikala ineng oh wiewia kan me pahn kamedekihiukala. Eri wia uwen ahmw kak koaros pwehn loalokongla oh medewe mwahu soahng kan. Eri ke pahn pein kilang me Siohwa ketin poakohng uhk oh kupwurki dahme keieu mwahu ong uhk.​—Mel. 34:8; Ais. 48:17, 18.

8. Dahme kahrehda ke anahne karanihala Koht ahnsou wet, oh ia duwen met eh pahn wia kamwahupomw ni ahnsou kohkohdo?

 ⁸ Ahnsou keren, soahng koaros nan ahn Sehdan sampah pahn sohrala. Siohwa kelehpw me pahn kak ketin pere kitail oh ketikihda soahng kan me kitail anahne, me pil iangahki dahme kitail pahn kang. (Apak. 3:2, 12-19) Eri met iei ahnsou en karanihala Koht oh kakehlakahda ahmw kin likih ih. (2 Pit. 2:9) Ma ke wia met, sohte lipilipil dahme kin wiewiawi, ahmw pepehm pahn duwehte ahn Depit, me nda: “I kin aririh KAUN-O ahnsou koaros; e kin ketiket limwahi, oh sohte mehkot kak kauweiehla.”​—Mel. 16:8.

9. (a) Nin duwen me Sohn 6:44 mahsanih, dahme Siohwa ketin wia? (b) Dahme tohrohr me pid tuhwong emen Sounkadehde?

⁹ Ni ahmw tepin tuhwong emen me sohte mi nan padahk mehlel, ia uwen laud en ahmw ese ih? Ele ke ese edeo oh mwomweo, ahpw mwein ihte met me ke ese. Met uhdahn weksang emen me ke ahpwtehn tuhwong me mi nan padahk mehlel. Ke ese me e poakohng Siohwa. Ke ese me Siohwa ketin mwahngih mehkot mwahu reh oh ketin luke ih en wiahla kisehn sapwellime peneinei me kin kaudokiong ih. (Wadek Sohn 6:44.) Sohte lipilipil ia wasa aramaso kohsang ie de mwomwen eh tikida, ke eseier soahng tohto duwen ih, oh e pil ese soahng tohto duwen uhk!

10, 11. Dahme sapwellimen Siohwa aramas akan ahneki me duwepenehte, oh ia duwen met eh kin kamwakid uhk?

¹⁰ Ahnsou me ke tepin tuhwong emen Sounkadehde, ke ese me soahng kan me keieu kesempwal me kumwa ahneki kin duwepenehte. Ke ese me mendahki kumwa kin lokaiahki lokaia me wekpeseng, kumwa kin lokaiahki “lokaia min” en padahk mehlel. (Sep. 3:9, NW) Met wehwehki me kumwa koaros kamehlele Koht, mourki koasoandi tehieu, oh ahneki koapworopwor tehieu ong ahnsou kohkohdo. Soahng pwukat sewese kumwa en likih emenemen oh kakehlakahda amwa nanpwungmwahu me pahn mihmi kohkohlahte.

¹¹ Eri ni ahmw kin kaudokiong Siohwa, ke kak uhdahn nda me kompoakepahmw kan me keieu mwahu. Mie kompoakepahmw kan sampah pwon, mehnda ma ke saikinte tuhwong irail! Ke  kak medewehda emen likin sapwellimen Siohwa aramas akan me ahneki kisakis kesempwal wet?

12. Soangen mehn akadei mwahu dah kan me ke kak wiahda?

¹² Wadek Eklesiasdes 11:9–12:1. Ia duwe, ke ahneki mehn akadei kan me ke kin songosong en lel? Ele ke kin wiahda mehn akadei en wadek Paipel rahn koaros de kamwahwihala ahmw pasapeng de padahk kan de kamwomwada kan nan mihting kan. De mwein ke kin songosong en kamwahwihala ahmw doadoahngki Paipel nan doadoahk en kalohk. Ia ahmw pepehm ni ahmw tehkada me ke mwamwahula nan soahng pwukat de ni meteikan ar ndaiong uhk duwen met? Ele ke uhdahn peren! Dahme kahrehda? Pwehki ke kin wia dahme Siohwa kupwurki ken wia, duwehte me Sises ketin wia.​—Mel. 40:8; Lep. Pad. 27:11.

13. Ia duwen en papah Koht eh mwahusang en medemedewehte mehn akadei kan en sampah?

¹³ Ni ahmw medemedewehte ahmw papah Siohwa, ke kin wiewia doadoahk me pahn kahrehiong ahmw mour en nsenamwahu oh mie katepe. Wahnpoaron Pohl nda: “Kumwail kehlail oh tengeteng oh pwerisekiong wia soahng tohto nan doadoahk en Kauno ahnsou koaros, pwe kumwail ese me amwail doadoahk me pid Kauno, kaidehk mehkot mwahl.” (1 Kor. 15:58) Ahpw ni aramas akan ar kin medemedewehte mehn akadei kan en sampah, duwehte wiahda mwohni de en ndandla, irail sohte kin uhdahn nsenamwahu. Mendahki ma irail pweida mwahu, irail kin kalapw pehm me met sohte katepe. (Luk 9:25) Kitail sukuhlki met sang mehn kahlemeng en Nanmwarki Solomon.​—Rom 15:4.

14. Dahme ke kak sukuhlkihsang dahme wiawihong Solomon?

¹⁴ Solomon, emen ohl me iang keieu kepwehpwe oh manaman, sohngada met. E nda: “I koasoanehdi nan kapehdi I en pereperenki peren en sampah kan oh rapahki dahkot nsenamwahu.” (Ekl. 2:1-10) Eri Solomon kauwada ihmw kaselel kan, wiahda mwetuwel kaselel oh wasahn kommoal kan, oh wia soahng koaros me e men wia. Ia duwe, e itarki oh nsenamwahuki mepwukat? Ni Solomon medewehla soahng koaros me e wiahda, e nda: “I ahpw wehwehkihda me met sohte katepe . . . met sohte katepe.” (Ekl. 2:11) Ke pahn kak sukuhl mehkot sang dahme wiawihong Solomon?

15. Dahme kahrehda ke anahne pwoson, oh ia duwen met eh pahn seweseiuk, nin duwen me Melkahka 32:8 mahsanih?

¹⁵ Ekei aramas sukuhlki duwen mour ihte sang ni arail wiahda sapwung kan oh lokolongki imwila suwed. Siohwa sohte kupwurki met en wiawihong uhk. E kupwurki ken rong oh peikiong ih. Ke anahne pwoson laud, ahpw ke sohte pahn koluhkihla pilipil kan me ke wiahda nan ahmw mour pwehki ahmw pwoson. Siohwa sohte pahn ketin meliehla ‘duwen ahmw kin poakohng mware.’ (Ipru 6:10) Eri ken doadoahk laud pwehn kalaudehla ahmw pwoson. Oh ke pahn wiahda pilipil mwahu kan nan ahmw mour oh pein kilang me Semomwo nanleng kin kupwurki dahme keieu mwahu ong uhk.​—Wadek Melkahka 32:8.

16. Dahme kahrehda kitail anahne kesempwalki saledek oh doadoahngki ni ahl erpit?

¹⁶ Pohl ntingihedi: “Wasa me sapwellimen Siohwa manaman kin mi ie, saledek pil kin mi ie.” (2 Kor. 3:17) Siohwa kupwurperenki saledek, oh ketin kapikuhkada pwe ken pil perenki saledek. Ahpw e kupwurki ken doadoahngki ahmw saledek ni erpit pwehn pereiuk. Ele ekei me pwulopwul kin kilang kilel de kasdo suwed, wia tiahk samin me pid wia nsenen pwopwoud, iang mwadong keper kan, de doadoahngki mehn kasahliel kan oh kamam sakau. Ni tapio, soahng pwukat ele mwomwen kaperen, ahpw e kin kalapw  kahrehda imwila suwed, duwehte soumwahu, apwalki kesehla tiahk pwukat, de pil mehla. (Kal. 6:7, 8) Me pwulopwul kan me kin iang wia soahng pwukat ele kin medewe me re ahneki saledek, ahpw irail sohte saledek.​—Taitus 3:3.

17, 18. (a) Ia duwen peikiong Koht eh kahrehiong kitail en ahneki saledek mehlel? (b) Ni ahl dah me Adam oh Ihp ahneki saledek laudsang aramas akan rahnwet?

¹⁷ Weksang met, peikiong Siohwa kin mwahu ong kitail. E mwahu ong atail roson oh kin kahrehiong kitail en ahneki saledek mehlel. (Mel. 19:7-11) Oh ni ahmw kin doadoahngki ahmw saledek ni elen erpit, me iei, ni ahmw pilada ken peikiong sapwellimen Koht kosonned unsek oh kaweid kan, ke kin kasalehiong Koht oh ahmw pahpa nohno me ke wia aramas koahiek men. Ahmw pahpa nohno ara likih iuk pahn laudla oh ira pahn kihong uhk saledek laud. Oh Siohwa ketin inoukihda me ahnsou keren e pahn ketikihong sapwellime ladu lelepek kan koaros saledek unsek, me Paipel kin kahdaneki “saledek lingan en sapwellimen Koht seri kan.”​—Rom 8:21.

¹⁸ Ih soangen saledek wet me Adam oh Ihp ahneki. Nan mwetuwel en Ihden, soahng ehute me Koht mahsanihong ira en dehr wia. Ira en dehr kang wahn tuhkeo me keinepwi. (Sen. 2:9, 17) Ia duwe, ke leme me Koht nohn kakos de sohte ketin pahrek ni eh ketikihong ira kosonned wet? Uhdahn soh! Medewehla duwen kosonned tohto me aramas akan wiahda oh idingkihong meteikan en peikiong. Ahpw Siohwa ketikihong Adam oh Ihp kosonned ehute.

19. Dahme Siohwa oh Sises kin ketin padahkihong kitail me pahn sewese kitail en uhdahn saledekla?

¹⁹ Siohwa kin ketin kasalehda erpit laud nan sapwellime wiewia kan ong kitail. E sohte ketikihong kitail kosonned tohto, ahpw ni kanengamah e ketin padahkihong kitail en peikiong kosonned en limpoak. E ketin padahkihong kitail en mourki sapwellime kaweid oh ire mehlel kan oh kitail en tateki dahme suwed. (Rom 12:9) Nan Kapahrek en Pohn Dohlo, sapwellime Ohlo, Sises, ketin sewese kitail en wehwehki dahme kahrehda aramas akan kin wia me suwed. (Mad. 5:27, 28) Oh nan sampah kapwo, nin duwen Nanmwarki en Wehin Koht, Sises pahn ketin pousehlahte padahkihong kitail en ahneki sapwellime madamadau ong dahme pwung oh sapwung. (Ipru 1:9) Sises pahn pil ketin kaunsekihala paliwaratail oh atail madamadau. Medewehla ia pahn mwomwen ahnsowo me solahr pahn mie kasongosong en wia me suwed oh kitail sohte anahne lokolongki atail soh unsek. Eri, kitail pahn ahneki “saledek lingan” me Siohwa ketin inoukihda.

20. (a) Ia duwen Siohwa eh ketin doadoahngki sapwellime saledek? (b) Ia duwen ahmw kak kahlemengih ih?

²⁰ Nan sampah kapwo, e pahn miehte irepen atail saledek. Ni ahl dah? Atail limpoak ong Koht oh meteikan pahn ahnsou koaros kamwakid kitail. Ni limpoak eh kin kaweid kitail, kitail kin kahlemengih Siohwa. Mendahki Siohwa sapwellimanki saledek unsek, e ketin mweidohng limpoak en kaweid soahng koaros me e ketin wia, iangahki sapwellime wiewia ong kitail. (1 Sohn 4:7, 8) Eri, kitail kak ahneki saledek mehlel ihte ma kitail kahlemengih Koht.

21. (a) Ia ahn Depit pepehm ong Siohwa? (b) Dahme kitail pahn koasoiapene nan iren onop en mwuhr?

²¹ Ke kin kalahnganki soahng mwahu koaros me Siohwa ketikihong uhk? E ketikihong uhk padahk mehlel, kompoakepah mwahu kan, mehn akadei mwahu kan, oh koapworopwor en ahneki saledek unsek ni ahnsou kohkohdo, oh kisakis kaselel tohto teikan. (Mel. 103:5) Ele ke kin ahneki soangen pepehmohte me Depit ahneki ni eh kapakapki: “Komw pahn ketin kasalehiong ie ahl me kin kowohng mour; omwi kin ketiket rehi kin kadirehkiniehla peren oh kahrehiong ie peren poatopoat.” (Mel. 16:11) Nan iren onop en mwuhr, kitail pahn koasoiapene ire mehlel kaselel teikan sang Melkahka 16. Met pahn seweseiuk en kilang ia duwen ahmw kak ahneki mour me keieu mwahu!