RENEÉ, emen sister me sounpar 35 de daulih, tikida Australia nan peneinei ehu me wia Sounkadehde ngoang kei. E nda: “Pak tohto se kin keseula wasa kan me mie anahn laud ong sounkalohk en Wehio pwehn iang sawas. Pahpa oh Nohno kin wia soahng kan pwehn uhdahn kaperen! Ahnsou me I nainekihda seri riemen, I men ira en pil ahneki soangen mourohte me I ahneki.”

 Ahn Reneé pwoudo, Shane, me kereniong sounpar 40, ahneki soangen mehn akadeiohte. E nda: “Mwurin nait seri keriemeno ipwidi, se wadek nan Kahn Iroir duwen peneinei ehu me wia Sounkadehde kei me dake wararail pwohto kohla palieir en Pacific pwehn kalohk ni deke kan en Tonga. * Koasoipen peneineio kamwakid kiht en ntingla ni ohpis en Sounkadehdehn Siohwa kan en Australia oh New Zealand pwehn idek ia wasa me mie anahn laud ong sounkalohk en Wehio. * Re sapengala oh luke kiht en keseula Tonga, wasaohte me se wadek duwen peneineio!”

Mwurin Shane, Reneé, oh neira seri riemeno, Jacob oh Skye, ar kousoan Tonga mpen sounpar ehu, pei kalapw wiawi wasao kahrehda re anahne pwurala Australia, ahpw re kin kolokolte arail mehn akadei en kalaudehla arail doadoahk en kalohk. Nan pahr 2011, re keseula Norfolk Island, kisin deke ieu nan Pacific me mi mpen mwail 900 palimese en Australia. Ia imwilahn arail keseula wasao? Rahnwet, Jacob me sounparehr 14 nda, “Siohwa sohte ihte ketin apwalih kiht ahpw e pil ketin kahrehiong at doadoahk en kalohko en kaperen!”

Duwehte Shane, Reneé oh neira seri ko, peneinei tohto teikan me wia Sounkadehde kei kin toukihda pein irail en papah wasa kan me mie anahn laud ong sounkalohk. Dahme kin kamwakid irail en keseula wasa ko?

Burnett oh Simone, pwopwoud ehu me sounpar 35 de daulih, oh neira pwutak ko, Eston oh Caleb, me sounpar 12 oh 9, keseula Burketown nan Queensland, Australia me dohsang kahnimw kan. Burnett nda, “Sounkadehde kan kin kalohk wasao mwurin sounpar siluh de pahieu koaros. Aramas tohto perenki duwen rongamwahwo. Se men kihong irail ahnsou mwahu en kaukaule onop Paipel.”

Mark oh Karen, me met sounpar 50 samwa, iangehr papah nan ekei mwomwohdiso nan Sydney, Australia, mwohn ira oh neira seri silimeno, Jessica, Jim, oh Jack, keseula Nhulunbuy, wasa doh ehu me kin weirada takai kesempwal kan nan Northern Territory. Mark nda: “I poakepoake aramas, ihme kahrehda I men mi wasa ieu me I kak wia soahng tohto nan mwomwohdiso oh nan kalohk.” Ahpw, Karen pweiek en keseula. E nda: “Ahpw mwurin Mark oh meteikan ar kangoange ie, e kahrehiong ie en men song. I perenkihda ei wia met!”

Nan pahr 2011, Benjamin oh Carolyn oh neira serepein tikitik ko, Jade oh Bria, keseusang Queensland, Australia, kohla Timor-Leste, kisin sahpw ehu me mi pohn dekehn Timor nan Indonesia. Ben nda: “Mahso ngehi oh Carolyn kin wia doadoahk en pioneer tohrohr nan Timor-Leste. Kalohk wasao uhdahn kaperen oh riatail ko mwo uhdahn kin sawas laud. Se uhdahn nsensuwedla ni at mweselsang wasao. Se koasoanehdi teng sen pwurala. Ni ahnsou me nait seri ko ipwidi, se keseula at pilahn ko ahpw sohte wekidala.” Carolyn kapatahiong: “Se men nait seri ko en mi nanpwungen misineri kan, tohn Pedel kan oh pioneer tohrohr kan oh paiekihda ara werekiong irail ni uwen me ira kak.”

Sises mahsaniong sapwellime tohnpadahk ko: “Ihs rehmwail, nan eh koasoakoasoane en kauwada eh imwen doulik ehu, e soh pahn mwohndi mahs oh medemedewe uwen pweine”? (Luk 14:28) Pil duwehte, ni peneinei ehu ar medewehda en keseula ehu wasa tohrohr, e kesempwal ren pilahnehda mwahu. Soangen anahn dah me kesempwal en medemedewe?

NANPWUNGMWAHU REHN SIOHWA: Ben nda: “Se men papah meteikan ahpw kaidehn en katoutouwihala irail. Eri mwohn at keseula, se tehk mwahu me sen kalaudehla at nanpwungmwahu rehn Siohwa. Se pil kalaudehla at doadoahk en kalohk oh doadoahk teikan nan mwomwohdiso.”

Jacob, me kitail koasoiapene mwoweo, nda: “Mwohn at keseula Norfolk Island, se wadek soahng tohto nan Kahn Iroir oh Awake! (lokaiahn wai) duwen peneinei kan me kin papah wasa kan me anahn laud mie ong sounkalohk. Se koasoiapene duwen kahpwal kan me re lelohng oh ia duwen Siohwa eh ketin apwalihala irail.” Rie serepeino, Skye, me sounpar 11 nda: “I kapakap pak tohto, ahnsou me I kin kelehpw oh pil rehn Nohno oh Pahpa!”

PEPEHM KAN: Reneé nda: “Pwehki se kousoan karanih at peneinei oh kompoakepaht keren kan nan wasa ieu  me I mwahuki, e pahn mengei en mihmihte. Ahpw I medewe ia duwen at keseula eh pahn wia kamwahu ehu ong at peneinei a kaidehn soahng kan me I pahn pwilikihdi.”

TIAHK EN WASAO: Peneinei tohto kin wia roporop pwehn kaunopada irail ong wasa me re pahn keseula ie. Mark nda: “Se wadek soahng koaros me se kak duwen Nhulunbuy. Riatail Kristian kan wasao kin ni kadek kadarodo doaropwehn nuhs en wasao, me sewesei kiht en ekis wehwehkihla aramas en wasao oh arail tiahk.”

Shane, me keseula Norfolk Island, nda: “Keieu, I kin medemedewehte en kasalehda ei irair en Kristian. I ese me ma I kin mehlel, aktikitik, oh doadoahk laud, I kak mi wasa sohte lipilipil nan sampah.”

Irail kan me kin pweida ni arail keseula wasa kan me mie anahn laud ong sounkalohk kin kasalehda kesempwalpen en materek oh ahneki madamadau pwung ni arail kin lelohng kahpwal kan me soh kasikpe. Tehk ekei karasepe kan:

Reneé nda: “I sukuhlki en wia soahng kan ni soangsoangen ahl akan. Karasepe, ni ahnsou me nansed kin engimahda nan Norfolk Island, sohp me kin wahdo kepwe kan sohte kak peidi oh kepwehn sidohwa kan malaulaula oh pweilaudla. Eri ni ei kin wia mwenge, I sukuhlki en doadoahngki sohte lipilipil dahme mie.” Eh pwoudo, Shane, kapatahiong: “Se pil koasoanehdi nait sent pwe en kak itarohng ehuehu wihk.”

Neira pwutako, Jacob, kasalehda pil ehu kahpwal tohrohr. E nda: “Aramas laud isimente likin kiht nan at mwomwohdiso kapwo. Eri sohte kompoakepahi me uwe ie! Ahpw ni ei kin iang me mah kan nan kalohk, se kin kedekedeo kompoakepahnkihla emenemen.”

Jim, me met sounpar 21, lelohng soangen irairohte. E nda: “Mwomwohdiso me keieu karanih kiht iei Nhulunbuy me mwail 450 samwa dohsang kiht, eri se kin isaneki ahnsoun mihting tohrohr kan. Se kin mwadang lel wasao oh kesempwalki at ehuong brother oh sister ko. Se kin kilangwohng ahnsou pwukat nin duwen ahnsou me keieu kaperen nan sounparo pwon!”

Paipel mahsanih: “Iei kupwuramwahu en KAUN-O me kahrehda omw kepwehpwe.” (Lep. Pad. 10:22) Nan sampah pwon, me tohto me kin keseula wasa kan me mie anahn laud ong sounkalohk kin pein esehda mehlelpen iren Paipel wet.

Mark nda: “Nait seri ko ar mwekidki at keseulao iei kapai me keieu laud. Me laud riemeno kin uhdahn kamehlele me Siohwa pahn ketin apwalih irail kan me kin mwohneki mahs Wehio nan arail mour. Soangen likilik wet kesempwalsang mehkoaros.”

Shane nda: “I uhdahn karanihala ei pwoudo oh nait seri ko. Ni ei kin rong arail ehukihong ie dahme Siohwa ketin wiahiong irail, I kin uhdahn nsenamwahu.” Nah pwutako, Jacob, pwungki met. E nda: “Erein ei mi me uhdahn kaperen. I uhdahn perenki at keseudo wasaht!”