1-3. (a) Dahme kahrehda Siohwa ketin poakohng Solomon, oh kapai dah kei me Solomon alehdi? (b) Peidek dah kei me kitail pahn sapengala nan iren onop wet?

SOLOMON wiahla nanmwarki en Israel ni ahnsou me e pwulopwul. Erein eh tepida kakaun, Siohwa ketin pwarohng ih nan ouraman ehu oh mahsanih: “Dahme ke anahne I en kihong uhk?” Solomon patohwan sapeng oh nda: ‘I pwulopwul oh soakoahiek en kakaun sapwellimomwi aramas akan. . . . Eri, komw ketikihong ie loalokong [“mohngiong peik,” NW] me I patohwan anahne pwe I en kaunkihda sapwellimomwi aramas.” (1 Nan. 3:5-10) “Mohngiong peik”​—ia uwen met eh wia pekipek aktikitik ehu! Kitail kak wehwehki dahme kahrehda Siohwa ketin poakohng Solomon! (2 Sam. 12:24) Atail Koht uhdahn kupwurperenkihda en nanmwarki pwulopwulo eh pasapeng me kahrehda e ketikihong Solomon mohngiong ehu me ‘loalokong oh wehwe.’​—1 Nan. 3:12.

² Erein eh kin lelepekte, Solomon kin ale kapai tohto. E ale pwais kaselel en kauwada tehnpas sarawio ong mwaren Siohwa, Koht en Israel. (1 Nan. 8:20) E ndandla pwehki erpit me Koht ketikihong ih. Oh Koht ketin doadoahngki ih en nda soahng kan me kileldi nan pwuhk siluh nan Paipel. Ehu pwuhk pwukat iei pwuhken Lepin Padahk.

³ Lepin lokaia wet mohngiong pwarada pak tohto nan pwuhken Lepin Padahk. Karasepe, Lepin Padahk 4:23 (NW) mahsanih: “Me laudsang soahng teikan koaros me ke pahn pere, pere mohngiongomw.” Nan iretikitik wet, dahme lepin lokaia wet ‘mohngiong’ wehwehki? Kitail pahn sapengala peidek wet nan iren onop wet. Kitail pil pahn koasoiapene pasapengpen peidek riau: Ia duwen Sehdan eh kin song kauwehla mohngiongitail? Oh ia duwen atail kak pere mohngiongitail? Pwehn kolokolete atail lelepek ong  Koht, kitail anahne wehwehki pasapengpen peidek kesempwal pwukat.

4-5. (a) Ia duwen Melkahka 51:6 eh sewese kitail en wehwehki dahme lepin lokaiao ‘mohngiong’ kin dokedoke? (b) Ia duwen atail roson en paliwar eh kin karasahda ihs kitail loalatail?

⁴ Nan Lepin Padahk 4:23 (NW), lepin lokaiao ‘mohngiong’ wehwehki loalen emen. Met kin dokedoke pein atail madamadau, pepehm, wiewia, oh ineng kan. E kin pidada uhdahn ihs kitail loalatail, kaidehn ihte mwomwatail ni mas liki.

⁵ Medewehla ia duwen atail roson en paliwar eh kin karasahda kesempwalpen dahme mi loalatail. Keieu, pwe kitail en ahneki roson mwahu, kitail anahne pilada mwenge me mwahu ong paliwaratail oh kitail anahne kaukaule eksersais. Duwehte met, pwe atail nanpwungmwahu rehn Siohwa en kehlailte, kitail anahne kaukaule wadek Paipel oh sawasepen Paipel kan oh kaukaule kasalehda met ni atail pwoson Siohwa. Kitail kin kasalehiong Siohwa atail pwoson ni atail doadoahngki dahme kitail sukuhlki oh padahkihong meteikan duwen atail pwoson. (Rom 10:8-10; Seims 2:26) Keriau, me pid kitail ni mas liki, ele kitail kin medewe me kitail kehlail mehnda ma ni mehlelo loalatail kitail uhdahn soumwahu. Duwehte met, me pid atail en kaukaule wia atail koasoandi kan en Kristian, ele kitail kin medewe me atail pwoson kehlail, ahpw ineng suwed kan kakete kekeirda loalatail. (1 Kor. 10:12; Seims 1:14, 15) Kitail anahne tamataman me Sehdan men kasaminehkihla kitail eh madamadau. Ele dahme e keieu songosong en wia? Ia duwen atail kak pere pein kitail?

6. Ia ahn Sehdan mehn akadei, oh ia duwen eh song en kapwaiada met?

⁶ Sehdan men kitail en duwehla ih me kin pelianda sapwellimen Siohwa koasoandi kan oh kin mwekidki roporop. Sehdan sohte kak idingkihong kitail en medewe oh wia dahme e kin wia. Eri e kin song en kapwaiada eh mehn akadei ni ahl teikan. Karasepe, e kin kahrehiong kitail en mi nanpwungen aramas akan me e pitihdier. (1 Sohn 5:19) E koapworopworki me kitail pahn pilada en werekiong aramas pwukat, mendahki kitail ese me werek suwed kin “kauwehla” mwomwen atail madamadau oh wiewia. (1 Kor. 15:33) Nanmwarki Solomon lohdi pahn soangen  wiepe wet. E pwoudikihda lih tohto me kin kaudokiong koht likamw kan, oh kedekedeo irail kamwakid ih laud oh “kahrehiong eh sohpeisang” Siohwa.​—1 Nan. 11:3.

7. Dahme Sehdan pil kin doadoahngki pwehn kihpeseng mwomwen eh madamadau, oh dahme kahrehda kitail anahne kanahieng duwen met?

⁷ Sehdan kin doadoahngki kasdo oh prokram en TV kan pwehn kihpeseng mwomwen eh madamadau. E wehwehki me soai kan kin wia laudsang en ihte kaperenda kitail; mepwukat kin kasukuhliong kitail ia duwen atail en medewe, pehm, oh wia soahng kan. Sises ketin doadoahngki wiepen mehn kasukuhl wet. Karasepe, kitail tehk sapwellime karasaras duwen ohlen Sameriao oh duwen pwutak me kohkohsang imweo oh kauwehla mwahl eh sohso. (Mad. 13:34; Luk 10:29-37; 15:11-32) Ahpw, irail kan me Sehdan kauwehla arail madamadau kak doadoahngki soai kan pwehn pitihdi kitail. Kitail anahne toupahrek. Kasdo oh prokram en TV kan kak kaperenih oh kasukuhlih kitail ni ahl me sohte pahn kasaminehla atail madamadau. Ahpw kitail anahne kanahieng. Ni atail kin pilada mehn kamweit kan, kitail anahne pein idek rehtail: ‘Ia duwe, kasdo de prokram en TV wet kin padahkihong ie me e mwahu en dukula pahn ei ineng suwed kan?’ (Kal. 5:19-21; Ep. 2:1-3) Dahme ke pahn wia ma ke tehkada me prokram en TV ehu kin utung ahn Sehdan madamadau? Soikala duwehte omw pahn soikala soumwahu keper ehu!

8. Ia duwen pahpa nohno kan ar kak sewese neirail seri kan en pere mohngiongirail?

⁸ Pahpa nohno kan, kumwail ahneki pwukoa tohrohr ehu en pere noumwail seri kan sang ahn Sehdan eh nanti pwehn kauwehla mohngiongirail. E sansal me kumwail kin wia uwen amwail kak koaros pwehn pere noumwail seri kan sang soumwahu kan. Kumwail kin kamwakelehda nan imwamwail kan oh kesehsang soahng kan me pahn kahrehiong kumwail de noumwail seri kan en soumwahuda. Pil duwehte met, kumwail anahne pere noumwail seri kan sang kasdo, prokram en TV, mwadong kan nan Internet de cellphone ape, oh website kan me ele kakete  kauwehkinirailla ahn Sehdan madamadau. Siohwa ketikihong kumwail pwukoa en sewese noumwail seri kan en wiahla kompoakepah. (Lep. Pad. 1:8; Ep. 6:1, 4) Eri dehr masak wiahda kosonned kan ong amwail peneinei me kin poahsoanda sang koasoandi kan en Paipel. Padahkihong noumwail seri pwulopwul kan dahme irail kak oh sohte kak kilang, oh sewese irail en wehwehki kahrepen amwail pilipil kan. (Mad. 5:37) Ni ahnsou me noumwail seri kan laudla, kasukuhlih irail en pein esehda dahme pwung oh dahme sapwung me pid sapwellimen Siohwa koasoandi kan. (Ipru 5:14) Oh tamataman me noumwail seri kan pahn sukuhlki laud sang dahme kumwail kin nda ahpw keieu laud, dahme kumwail kin wia.​—Deud. 6:6, 7; Rom 2:21.

9. Ia ehu madamadau me Sehdan kihda, oh dahme kahrehda met keper?

⁹ Sehdan pil kin song en kauwehla mohngiongitail sang ni eh kin kahrehiong kitail en likih loalokong en aramas akan a kaidehn sapwellimen Siohwa madamadau. (Kol. 2:8) Kitail tehk ehu mwomwen madamadau me Sehdan kin kihda​—en kepwehpwehla iei me keieu kesempwal nan atail mour. Irail me kin ahneki soangen madamadau wet ele kin kepwehpwehla, de ele re sohte kin. Sohte lipilipil mehnia rehra, irail mi nan keper. Dahme kahrehda? Pwehki ele re kin medemedewehte en wiahda mwohni me kahrehda ren tounmeteikihla arail roson, nanpwungmwahu nan arail peneinei, de pil arail nanpwungmwahu rehn Koht pwehn lel arail mehn akadei. (1 Tim. 6:10) Kitail kak kalahnganki me Samatail nanleng me erpit kin ketin sewese kitail en ahneki madamadau toupahrek ong mwohni.​—Ekl. 7:12; Luk 12:15.

10-11. (a) Dahme kitail anahne wia pwehn pere pein kitail? (b) Dahme sounsilepe men kin wia mahso, oh ia duwen kadeikpen loalatail eh kak wia sounsilepatail?

¹⁰ Pwe kitail en pweida ni atail pere mohngiongitail, kitail anahne ese soahng dah kan me keper oh mwadang pere pein kitail. Met katamankihong kitail duwen doadoahk en sounsilepe men. Ni mwehin Nanmwarki Solomon, sounsilepen kahnimw ehu kin sinsile kehl kan oh pakairki ma mie keper ehu kohkohdo. Atail pein medewehla met kin sewese kitail en wehwehki dahme kitail anahne wia pwehn kauhdi Sehdan sang eh kin kauwehla atail madamadau.

¹¹ Mahso, sounsilepe kan kin iang sounsilepen ewen kehl kan ehupene doadoahk. (2 Sam. 18:24-26) Irail kin ehupene sewese pere kahnimw ehu ni arail pahn tehk mwahu me kehl kan ritidi ni ahnsou me imwintihti kan kohkohdo. (Neh. 7:1-3) Kadeikpen loalatail me kaiahnda mwahu sang Paipel * kak wia sounsilepatail oh katamankihong kitail ni Sehdan eh kin songosong en kauwehla mohngiongitail​—met pil wehwehki me ni eh kin song en kamwakid atail madamadau, pepehm, wiewia, de ineng kan. Ahnsou koaros me kadeikpen loalatail kin katamankihong kitail mehkot keper, kitail anahne rong oh wia uwen atail kak koaros pwehn soikala soahng keper kan.

12-13. Dahme kakete kasonge kitail, ahpw ia duwen atail en mwekidki?

¹² Tehk ehu karasepen ia duwen atail kak pere pein kitail sang atail en mwekidki madamadau en Sehdan. Siohwa ketin padahkihong kitail en “dehr kin koasoia duwen tiahk samin me pid wia nsenen pwopwoud oh soangen samin koaros.” (Ep. 5:3) Ahpw dahme kitail pahn wia ma iengatail kan nan wasahn doadoahk de nan sukuhl tepida koasoia duwen soahng kan me pid tiahk samin me pid wia nsenen pwopwoud? Kitail ese me kitail anahne “soikala wiewia kan me kasohwauwih Koht oh ineng en sampah.” (Taitus 2:12)  Sounsilepatail, me iei kadeikpen loalatail, ele kin katamankihong kitail duwen kepero. (Rom 2:15) Ahpw ia duwe, kitail pahn rong kadeikpen loalatail? Ele kitail kin lelohng kasongosong en rong iengatail kan de kilang kilel kan me re kin ehukihpene. Ahpw ih ahnsowo me kitail en soikala irair kepero sang ni atail en koasoia mehkot tohrohr de kohkohsang wasao.

¹³ Kitail anahne eimah pwehn pelianda kasongosong kan sang iengatail kan en medewe de wia soahng suwed kan. Kitail kak kamehlele me Siohwa mwahngih atail kin nanti, oh e pahn ketikihong kitail kehl oh erpit me kitail anahne pwehn pelianda ahn Sehdan madamadau. (2 Kron. 16:9; Ais. 40:29; Seims 1:5) Dahme kitail pil kak wia pwehn pere mohngiongitail?

14-15. (a) Dahme kitail anahne ritingadahng mohngiongitail, oh ia duwen atail kak wia met? (b) Ia duwen Lepin Padahk 4:20-22 eh sewese kitail en paiekihda laud atail wadawad en Paipel? (Pil menlau kilang koakon “ Ia Duwen Atail en Doudouloale Soahng kan.”)

¹⁴ Pwehn pere mohngiongitail, kitail anahne kaidehn ihte soikala soahng suwed kan me kin kamwakid kitail ahpw kitail en pil ale soahng mwahu kan me kin kamwakid kitail. Pil pwurehng medewe duwen karasaras en kahnimw ehu me kehlda. Sounsilepen ewen kehlo kin ritingedi ewen kehl en kahnimwo pwehn kauhdi imwintihti kan en dehr pedolong, ahpw ekei ahnsou e kin ritingada pwehn mweidohng soahng kan me duwehte mwenge oh kepwe kan en wisiklong. Ma ewen kehl kan sohte kin ritida, tohn kahnimwo pahn duhpekla. Duwehte met, kitail anahne kaukaule ritingada mohngiongitail pwe sapwellimen Koht madamadau en kamwakid kitail.

¹⁵ Paipel kin audaudki sapwellimen Siohwa madamadau, eri ehuehu ahnsou me kitail kin wadek, kitail kin mweidohng sapwellime madamadau en kamwakid elen atail madamadau, pepehm, oh wiewia kan. Ia duwen atail kak paiekihda laud sang atail wadawad en Paipel? Kapakap kin kesempwal. Sister men nda: “Mwohn ei pahn wadek Paipel, I kin kapakapohng Siohwa, peki ih en sewese ie en ‘udiahl soahng kapwuriamwei kan’ nan sapwellime Mahsen.” (Mel. 119:18) Kitail pil anahne doudouloale dahme kitail kin wadek. Ni atail kin kapakap, wadawad, oh doudouloale, Mahsen en Koht kin sair ‘nan kapehditail’ oh kitail kin poakohngala sapwellimen Siohwa madamadau.​—Wadek Lepin Padahk 4:20-22; Mel. 119:97.

16. Ia duwen me tohto ar paiekihda ar kilang JW Broadcasting?

¹⁶ Pil ehu ahl en mweidohng sapwellimen Koht madamadau en kamwakid kitail iei en kilang soahng kan nan JW Broadcasting^®. Pwopwoud ehu nda: “Prokram kan me kin wiawi sounpwong koaros kin uhdahn sapengala at kapakap kan! E kin kakehlakahda oh kangoange kiht ni at kin nsensuwed de sangat. Oh se kin kalapw rong koul en prokram ko nan imwat. Se kin rong koul pwukat ni at wie kungkuk, kamwakamwakel, de niminim tea.” Prokram pwukat sewese kitail en pere mohngiongitail. Oh kin padahkihong kitail en medewe soahng kan ni ahlohte me Siohwa kin ketin wia oh en pelianda kasongosong en ahneki ahn Sehdan madamadau.

17-18. (a) Nin duwen me 1 Nanmwarki 8:61 kasalehda, dahme kin wiawi ni atail doadoahngki dahme kitail sukuhlki sang Siohwa? (b) Dahme kitail kak sukuhlkihsang mehn kahlemeng en Nanmwarki Esekaia? (c) Pwehn pahrekiong ahn Depit kapakapo nan Melkahka 139:23, 24, dahme kitail kak kapakapki?

¹⁷ Ehuehu ahnsou me kitail kilang kamwahupen atail wiewia dahme pwung, atail pwoson kin kehlailla. (Seims 1:2, 3) Kitail kin nsenamwahu pwehki kitail kahrehiong Siohwa en ketin pohlki ekerkin kitail sapwellime seri kan, oh atail ineng en kaperenda ih kin kehlailla. (Lep. Pad. 27:11) Ehuehu kasongosong kin kihong kitail ahnsou mwahu en kasalehda me kitail kin uhdahn papah  ni unsek Samatail limpoako. (Mel. 119:113) Kitail kin kadehdehda me kitail kin poakohng Siohwa sang ni mohngiong unsek, mohngiong ehu me koasoanehdi teng en peikiong sapwellime kehkehlik kan oh wia kupwure.​—Wadek 1 Nanmwarki 8:61.

¹⁸ Kitail pahn wiahda sapwung kan? Ei, pwehki kitail sohte unsek. Ma kitail kin dipekelekel, tamanda mehn kahlemeng en Nanmwarki Esekaia. E wiahda sapwung kan. Ahpw e koluhla oh pousehlahte papah Siohwa sang “nan kapehd mehlel.” (Ais. 38:3-6; 2 Kron. 29:1, 2; 32:25, 26) Eri, kitail en soikala en Sehdan eh songosong en kauwehkihla kitail eh madamadau. Kitail en kapakap pwe kitail en kakairada mohngiong peik ehu. (1 Nan. 3:9; wadek Melkahka 139:23, 24.) Kitail kak kolokolete atail lelepek ong Siohwa ma, laudsang soahng teikan koaros, kitail pere mohngiongitail.