Kristian kan ele kin wiahda kahk kesempwal kan pwehn kak mie pereparail, re kin wia met ni arail kin medemedewe duwen kaweid oh ire mehlel kan en Paipel. Kaweid pwukat kin padahkihong kitail en dehr doadoahngki kesik kan pwehn pere kitail sang aramas teikan. Tehk duwen ire pwukat:

Mwohn silangin Siohwa, mour​—ahpw mehlel mouren aramas—​kin uhdahn kesempwal. Sounmelkahkao Depit ese me Siohwa iei “poahsoan en mour koaros.” (Mel. 36:9) Eri, ma Kristian men pilada en wia dahme e kak pwehn pere pein ih de eh kepwe de imweo, e pahn wia uwen eh kak koaros en dehr kemehla emen oh dipkihda kamaramas.​—Deud. 22:8.

Mendahki mie dipwisou tohto me kak kemehla aramas, e mengei en doadoahngki kesik kan pwehn kemehla aramas​—mehnda ma emen sapwungala de e men pein wia met. * Patehng met, ma aramaso me onopadahngehr wia mwersuwed ehu, kilang me meteio kolokol kesik, met kak kalaudehla irair kepero oh kak imwikihla emen mehla.

Ni Sises eh mahsanihong sapwellime tohnpadahk ko ren wa neirail kedlahs kan ni kaimwiseklahn eh ketiket nin sampah, e sohte mahmahsanih duwen mehn pereparail. (Luk 22:36, 38) Ahpw, Sises mahsanih ren wa kedlahs pwehn padahkihong irail ren dehr wia tiahk  lemei, mehnda ma re tuhwongada pokon ehu me weuwa mehn mahwen kan. (Luk 22:52) Mwurin Piter doadoahngki nah kedlahso en pelehsang apali salengen nein samworo lapalapo laduwo, Sises mahsanihong Piter: “Kapwurehiong noumw kedlahs en nan dewe.” Sises ketin kasalehda ire mehlel ehu me kin kaweid sapwellime tohnpadahk kan rahnwet: “Koaros me kin doadoahngki kedlahs pahn mehkihla kedlahs.”​—Mad. 26:51, 52.

Nin duwen me pahrekiong Maika 4:3, sapwellimen Koht aramas akan “wekidohng neirail kedlahs akan ni mehn deipwel, oh neirail ketieu kan ni naip en pal tuhke.” Met wia kilelepen Kristian mehlel oh e pahrekiong dahme wahnpoaron Pohl kaweidki: “Ma emen pahn wiahiong kumwail me suwed, kumwail dehr dupungkihong me suwed. . . . Kumwail wia uwen amwail kak pwe kumwail en ahneki popohl rehn aramas koaros.” (Rom 12:17, 18) Mendahki apwal tohto me Pohl lelohng, iangahki “apwal . . . rehn loallap suwed kan,” e kapwaiada eh kaweido oh kesempwalki kaweid kan en Paipel laudsang pein poadoarepe. (2 Kor. 11:26) E likih Koht oh erpit me kohsang sapwellime Mahsen​—erpit me “mwahusang tehtehn mahwen.”​—Ekl. 9:18.

Kristian kan kin kesempwalki mour laudsang kepwe kan. “Mour mehlel en aramas sohte kin mi ni kepwe kan me e ahneki.” (Luk 12:15) Eri, ma lokaia mwahu sohte kauhdi aramas mwersuwedo, Kristian loalokong men kin kapwaiada sapwellimen Sises kaweido: “Dehr dupungki me suwed ong emen me wia suwed.” Karasepe, kitail pil kakete kihong sohte lipilipil dahme e mwahuki. (Mad. 5:39, 40; Luk 6:29) * Wiepe me keieu mwahu iei en wia soahng kan pwe met en dehr wiawi. Ma kitail soikala “mehkoaros me mi nin sampah me [kitail] kin pohnmwahsohkihda” oh ma mehn mpatail kan ese kitail nin duwen Sounkadehdehn Siohwa kan me kin kasalehda limpoak oh meleilei, aramas mwersuwed kan ele sohte pahn men mwersuwedih kitail.​—1 Sohn 2:16; Lep. Pad. 18:10.

Kristian kan kin wauneki kadeikpen loalen meteikan. (Rom 14:21) Ma e sansalda me emen tohn mwomwohdiso naineki kesik pwehn pere ih sang aramas mwersuwed kan, ekei rie Kristian kan ele kakete pwuriamweikihla de pil dipekelekelkihda. Limpoak kin kamwakid kitail en nsenohki madamadau de pepehm en meteikan laudsang pein atail, mehnda ma met wehwehki kitail en mendahkihla dahme kitail medewe me pwung nin duwen kosonned.​—1 Kor. 10:32, 33; 13:4, 5.

Kristian kan kin nantihong en wia mehn kahlemeng mwahu. (2 Kor. 4:2; 1 Pit. 5:2, 3) Mwurin Kristian men ale kaweid sang nan Paipel ahpw pousehlahte naineki kesik pwehn pere ih sang aramas mwersuwed kan, e sohte kin wia mehn kahlemeng mwahu. E sohte pahn warohng ale pwukoa kan de pwukoa tohrohr kan nan mwomwohdiso. Met pil kin dokedoke Kristian men me kin pousehlahte weuwa kesik pwehki eh doadoahko. E sou pahn mwahu en diar ehu doadoahk tohrohr? *

Mwomwen Kristian men eh kin pilada en pere pein ih, eh peneinei, de eh kepwe kan, uhdahn wia pein eh pilipil, duwehte eh pilipil en doadoahk. Eri kaweid oh ire mehlel kan sang nan Paipel kin kasalehda duwen sapwellimen Koht erpit oh limpoak ong kitail. Pwehki Kristian koahiek kan kin kesempwalki kaweid pwukat, re kin pilada en dehr naineki kesik pwehn pere irail sang aramas mwersuwed kan. Re ese me irail kan me kin kasalehda me re likih Koht sang ni arail kin mour pahrekiong kaweid oh ire mehlel kan sang nan Paipel kin uhdahn ahneki onepek mwahu me poatopoat.​—Mel. 97:10; Lep. Pad. 1:33; 2:6, 7.