DAHME kitail kin wia me pahrekiong dahme soukohp en mahs ako kin wia? Nan kawehwehn lepin lokaia kan (Glossary of Bible Terms) nan New World Translation me pwurehng wiawihda nan pahr 2013, lepin lokaia wet soukohp kin wehwehki: “Emen me Koht ketin padahkihong audepen kupwure kan. Soukohp kan wia sapwellimen Koht sounkair kei me kin padapadahkihwei kaidehn ihte kokohp kan ahpw sapwellimen Siohwa padahk, kehkehlik oh kadeik kan.” Mendahte ke sohte kin wia kokohp, ahpw ke wia sapwellimen Koht sounkair men me kin kalokalohki dahme dierek nan sapwellime Mahsen.​—Mad. 24:14.

Ia uwen eh wia pai kaselel ehu en kalohkihong meteikan duwen atail Koht, Siohwa, oh padahkihong irail ia kupwure ong tohnsampah! Kitail kin iangete ‘tohnlengo me pipihr nan wehwe’ wia doadoahk wet. (Kaud. 14:6) Ahpw ele mie ekei kahpwal me kitail kin lelohng me kakete kahrehiong kitail en manokehla uwen eh wia pai kaselel ehu en wia doadoahk wet. Ia ekei kahpwal pwukat? Kitail ele kin pwangada, mworusala, de ahneki pepehm me dene sohte katepatail. Irail soukohp en mahs ako sohte weksang kitail ahpw re sohte uhdi. Oh Siohwa ketin sewese irail ren kapwaiada arail pwukoa ko. Kitail pahn tehkpene kahlemeng en ekei irail oh kilang ia duwen atail kak alasang.

Ele ekei pak kitail kin pwangada pwehki atail doadoahk kan en ehuehu rahn oh medewe me kitail sohte kak kohla kalohk. Mehlel, kitail anahne kommoal. Sises oh sapwellime wahnpoaron ko pil wia met. (Mark 6:31) Ahpw medewehla Esekiel nan Papilon oh pwukoa me e ahneki nanpwungen mehn Israel ko me kalipilipala sang Serusalem. Ehu pak Koht ketin mahsanihong Esekiel en ale ehu takai pweht oh elehda pohn takaio kilel en kahnimw en Serusalem. Mwuhr Esekiel pahn kamwomwada me imwintihti kan kapilpene kahnimwo pwehn kalowehdi ni eh pahn wendi palimeingi erein rahn 390, oh mwuhr, ni palimauni erein rahn 40. Siohwa mahsanihong  Esekiel: “I pahn pireiukpene pwe ke en sohte kak mwekidseli lao kahpwalo pahn imwisekla.” (Esek. 4:1-8) Ele mwekid wet kahrehiong mehn Israel ko me kalipilipala en tehkada mwomweo. Esekiel anahne wia mwekid kalok wet daulih sounpar ehu. Ia duwen soukohpo eh kapwaiada eh pwukoao?

Esekiel wehwehki dahme kahrehda e pekederla nin duwen soukohp men. Ni ahnsou me Koht ketin poaronehla ih, e ketin mahsanihong: “Mehnda ma aramas . . . pwuko [mehn Israel ko] pahn rong uhk de soh, a re en ese me soukohp men miher nanpwungarail.” (Esek. 2:5) Esekiel tamatamante kahrepen eh pekederla. Eri e kapwaiada eh pwukoa en kamwomwada ni karasaras mwekid en kalowehdi Serusalem. E kadehdehda me e wia soukohp mehlel men. Ripoht ehu leledo reh oh ienge me sensel ko duwen “kahnimwo eh ohlahr.” Ei, mehn Israel ko esehda me soukohp men miher nanpwungarail.​—Esek. 33:21, 33.

Rahnwet kitail kin padahkihong aramas akan duwen kasohrlahn koasoandi en Sehdan pwon me pahn wiawi ahnsou kohkohdo. Mendahte kitail kin pwangada, kitail kin doadoahngki atail kehl pwehn kalohki Mahsen en Koht, pwurala rehn aramas akan oh wia onop en Paipel rehrail. Ni ahnsou me kokohp kan duwen imwin koasoandi wet ar pahn pweida, kitail pahn perenki atail wia “emen me Koht ketin padahkihong audepen kupwure kan.”

Pwehki sawas sang sapwellimen Siohwa manaman, kitail kin nantihweite. Ahpw ele ekei pak kitail kin mworusala pwehki mwomwen aramas akan ar kin mwekidki rohng me kitail kalohki. E pahn mwahu kitail en tamanda mehn kahlemeng en soukohp Seremaia. Mehn Israel ko kin kapailoke oh kasarowe pwehki eh kin kalohki sapwellimen Koht mahsen ong irail. Mie ahnsou me Seremaia pil nda: “I solahr pahn tamanda KAUN-O, oh I solahr pahn kokohp ni mware.” Seremaia pil ahneki soangen pepehm kohte me kitail kin ahneki. Ahpw e doulahte kalokalohki mahsen en Koht. Dahme kahrehda? Soukohpo doula nda: “Sapwellimomwi mahsen kin rasehng kisiniei me lullul nan kapehdi, oh kin ngkengken nan tih kat en paliwereiet. I kin nantihong kolediong loalei ahpw I kin sohla kakohng kolokol loalei.”​—Ser. 20:7-9.

Pil duwehte, ma kitail kin mworuskihla mwomwen aramas akan ar mwekidki dahme kitail kin kalohki, kitail kak pelianda pepehm wet sang ni atail doudouloale audepen rohngo me kitail kalohki. E kak rasehngala ‘kisiniei me lullul nan kapehditail, oh kin ngkengken nan tih kan en paliwaratail.’ Wadek Paipel rahn koaros nin duwen tiahk ehu kak sasaun kisinieio pwehn wie lullul loalatail.

Ekei Kristian me alehdi pwukoa ehu ele kin pwunodki ar sehse mwomwen arail pahn wia pwukoa wet de dahme kahrehda re alehkihdi pwukoao. Soukohp Oseia ele ahneki soangen pepehm wet. Siohwa ketin mahsanihong: “Kohwei oh pwoudikihda emen lihen [“lihen netiki paliwere,” NW]. Omw pwoud sohte pahn loalopwoatohng uhk, oh noumw seri kan pahn suwed duwehte liho.” (Os. 1:2) Medewehla ia pahn omw pepehm ma ni omw pahn pwopwoudida, Koht mahsanihong uhk me omw pwoudo pahn wia emen lihen netiki paliwere! Oseia alehdi pwukoa wet. E pwoudikihda Komer oh liho naitikihada pwutak men. Mwuhr, liho pil naitikihada serepein men oh pil pwutak men. E mwomwen me seri riemen pwukat me ipwidi mwuhr kohsang en liho eh kamwahl. Siohwa mahsanihongehr Oseia me liho me e pahn pwoudikihda pahn kin “pwakihseli eh kerir kan.” Tehk me wasaht koasoia “kerir kan,” kaidehn emente. Oh mwuhr liho pahn song en pwurala rehn Oseia. Ia duwe, ma kowe soukohpo, ke pahn pwurehng pwoudiki liho? Iei met me Siohwa ketin mahsanihong Oseia en wia! Soukohpo pil pwurehng pwainda liho ni uwen pweipwei laud ehu.​—Os. 2:7; 3:1-5.

Oseia ele medewe duwen soangen kamwahu dah me pahn kohsang eh kapwaiada pwukoa wet. Ahpw ni eh kapwaiada ni lelepek pwukoa wet nan pein eh mour, eh mehn kahlemeng sewese kitail en wehwehki ia sapwellimen Siohwa pepehm ong dahme mehn Israel ko wiahdahr. Oh me mie ekei mehn Israel me ahneki mohngiong mehlel me pwurodo rehn Koht.

Rahnwet, sohte emen me Koht ketin mahsanihong en pwoudikihda “lihen netiki paliwere.” Ahpw ia duwe, kitail kak sukuhlkihsang en Oseia  eh men kapwaiada pwukoa wet? Ehu mehn kasukuhl iei kitail en kin men kalohki rongamwahu en Wehin Koht ong wehi pokon de ihmw lel ihmw, mehnda ma pein kitail kin apwalki. (Wiewia 20:20) Ekei wiepen doadoahk en kalohki Wehio kakete apwal ong uhk. Aramas tohto me kin onop rehn Sounkadehdehn Siohwa kan nda me re perenki onopki Paipel ahpw re sohte pahn kohla ihmw lel ihmw pwehn kalohki rongamwahwo. Mwuhr, tohtohn irail pwukat tepida wia dahme re leme re sohte pahn kak wia mwoweo. Ia duwe, mie mehn kasukuhl me ke sukuhlkihsang met?

Kitail kak sukuhlki pil ehu mehn kasukuhl sang en Oseia eh ale pwukoa apwal ehu. E ahneki kahrepe tohto en sohte iang soangen mouro me pidada eh pwoudo. Ahpw mie emen kak ese duwen pwukoa wet ma Oseia sohte ntingihdi dahme wiawi? Ele kitail pil kin lelohng irair ehu me wia ahnsou mwahu kitail en padahkihong emen duwen Siohwa oh sohte emen ese duwen ahnsowo. Met wiawihong Anna, tohnsukuhl pwulopwul men nan Wehin Amerika. Eh sounpadahko padahkihong ih oh ienge tohnsukuhl ko ren ntingihada oaralap ehu me pid dahme re kin uhdahn kamehlele oh song kahrehiong meteikan en iang kamehlele. Anna kakete pohnsehsehla ahnsou mwahu wet en kalohk ong ienge tohnsukuhl ko. Ahpw e pehm me ahnsou mwahu wet kohsang rehn Koht. E wehwehki dahme ienge tohnsukuhl ko kakete wia. Ih eri kapakap ong Siohwa oh met kahrehiong ih en inengieng isaneki ahnsou mwahu wet. E ntingihada oaralap ehu (Evolution: Consider the Evidence) me koasoia duwen padahk me dene mour pein miehla oh aramas kohsang mahn oh pil mehn kadehde kan.

Ahnsou me Anna koasoiaiong ienge tohnsukuhl ko eh ripohto, emen serepein me uhdahn kamehlele padahk wet idek peidek tohto pwehn kadehdehda me Anna sapwung. Ahpw Anna pweida ni eh uhki oh pere dahme e kamehlele. Eh sounpadahko pwuriamweikihla met oh kisikise Anna pwehki eh wiahda ripoht me keieu kamwakid meteikan en kamehlele. Sang ahnsowo kohdo, Anna kin koasoiong serepeino me idek peidek tohto duwen soahng tohto me pid kepikipikda. Imwilahn eh ale “pwukoa” wet sang Siohwa, Anna nda: “Met I kin kalohki rongamwahwo ni eimah oh sohte masepwehk.”

Mendahte kaidehn kitail uhdahn soukohp kei, sang atail kin alasang madamadau en tounmetei me soukohp ko duwehte Esekiel, Seremaia, oh Oseia kasalehda, kitail pil kak pweida ni atail kapwaiada dahme Siohwa kupwurki ong kitail rahnwet! Erein atail wia atail kaudok en peneinei de pein atail onop, kitail sou wadek duwen soukohp teikan en mahs ako oh doudouloale ia duwen atail kak alasang arail mehn kahlemeng kan?