1, 2. (a) Menlau kawehwehda dahme kahrehda papidais wia kahk kesempwal ehu. (b) Dahme emen anahne tehk mwahu mwohn eh papidaisla, oh dahme kahrehda?

 KOWE emen me pwulopwul me men papidaisla? Ma ei, met wia pai kaselel ehu me ke kak ahneki. Nin duwen me kitail koasoiaier nan iren onop en mwoweo, papidais wia pilipil kesempwal ehu. E kin kasalehiong meteikan me ke inoukihong Siohwa omw mour, me wehwehki, ke inoukihong ih me ke pahn papah ih kohkohlahte oh me omw wia kupwure iei me keieu kesempwal nan omw mour. Pwehki met wia inou kesempwal ehu ong Koht, met kahrehda ihte ahnsou me ke koahieklahr me ke anahne papidaisla. Ke pil anahne kasalehda me ke inengieng wia met oh ke wehwehki ia wehwehn en inoukihong Koht omw mour.

² Ahpw ele ke medewe me ke saikinte onopadahng papidais. De mwein ke medewe me ke onopadahier ahpw omw pahpa nohno leme me ke anahne awih lao ke laudla oh koahieklahr nan omw mour. Dahme ke pahn wia? Dehr mworusala. Ahpw, ken doadoahngki ahnsou wet en ekisekis koahiekla pwe ehu rahn ni ahnsou keren ke kak  warohng papidaisla. Ni omw medemedewe met, ke kak wiahda mehn akadei kan me pid soahng siluh pwukat: (1) dahme ke uhdahn kamehlele, (2) omw wiewia kan, oh (3) omw kalahngan.

3, 4. Mehn kasukuhl dahieu me me pwulopwul kan kak sukuhlkihsang mehn kahlemeng en Timoty?

³ Medewehla ia duwen omw pahn sapengala peidek pwukat: Dahme kahrehda I kamehlele me Koht ketin ieias? Dahme kahrehda I uhdahn kamehlele me Paipel pwilisang rehn Koht? Dahme kahrehda I kin peikiong sapwellimen Koht kehkehlik kan ahpw sohte kin alasang tiahk kan en sampah? Peidek pwukat kak sewese iuk en idawehn kaweid en wahnpoaron Pohl: “Kadehdehiong pein kumwail dahme Koht kupwurki me mwahu, dahme e kin ketin kupwurperenki oh dahme unsek.” (Rom 12:2, NW) Dahme kahrehda ke anahne wiahki met?

⁴ Mehn kahlemeng en Timoty kak sewese iuk. E esehla mwahu Paipel pwehki eh nohno oh nohno kahlapo padahkihong ih duwen padahk mehlel. Ahpw, Pohl ndaiong Timoty: “Ke en nantihong ni me mehlelo me ke padahngkiher oh uhdahn kamehlele.” (2 Tim. 3:14, 15) Eri Timoty uhdahn kamehlele me e diaradahr padahk mehlel. E pwungki met, kaidehn pwehki eh nohno oh nohno kahlapo ndaiong ih en wia, ahpw pwehki e kasawih oh eri uhdahn kamehlele.​—Wadek 1 Deselonika 5:21.

5, 6. Dahme kahrehda e kesempwal ken sukuhlki en kasawih dahme ke kamehlele ni omw pwulopwulte?

⁵ Ia duwen kowe? Mwein e wereilahr omw ese padahk mehlel. Ma ei, wiahkihla omw mehn akadei en medemedewe ia kahrepen soahng kan me ke kin uhdahn kamehlele. Met pahn sewese iuk en kakehlaka omw pwoson oh soikala wiahda pilipil sapwung kan pwehki kasongosong sang meteikan, madamadau en sampah de pil pein omw pepehm kan.

⁶ Omw sukuhlki en kasawih dahme ke kamehlele ni omw pwulopwulte, ke pahn kak sapengala peidek kan sang iengomw kan duwehte: ‘Ia duwen omw uhdahn ese me mie Koht? Ma Koht ketin poakohng kitail, dahme kahrehda e ketin mweidohng soahng suwed kan en wiawi? Ia duwen atail kak nda me Koht kin ketin ieias poatopoat?’ Ni omw kin onopada mwahu, soangen peidek pwukat sohte pahn kahrehda ken peikasal ahpw e pahn kamwakid uhk en kalaudehla omw onopki Paipel ni keneinei.

7-9. Menlau kawehwehda ia duwen oaralap kan me kohsang “What Does the Bible Really Teach?” (lokaiahn wai) eh kak sewese iuk kakehlakahla dahme ke uhdahn kamehlele.

⁷ Omw kin wia onop mwahu kak sewese iuk en sapengala peidek pwukat, kihsang madamadau en peikasal koaros oh kakehlaka dahme ke uhdahn kamehlele. (Wiewia 17:11) Mie neitail pwuhk kan me kak sewese iuk wia met. Me tohto diarada me e kin sawas en onopki kisin pwuhk me oaralape The Origin of Life—Five Questions Worth Asking (lokaiahn wai) oh pil pwuhken Is There a Creator Who Cares About You? (lokaiahn wai). Pil ehu, me pwulopwul tohto kin perenki oh pil paiekihda oaralap kan me kohsang “What Does the Bible Really Teach?” (lokaiahn wai) me mi nan jw.org. Ke kak diarada met pahn BIBLE TEACHINGS. Ehuehu mehn onop pwukat wiawihda pwehn sewese iuk kakehlaka dahme ke uhdahn kamehlele duwen ire ehu me pid Paipel.

⁸ Ke wia tohnsukuhl en Paipel men, eri ele ke eseier pasapengpen ekei peidek pwukat me mi nan mehn onop pwukat. Ahpw ia duwe, ke uhdahn kamehlele me omw pasapeng kan pwung? Mehn onop pwukat pahn sewese iuk en medemedewe kanahieng duwen soangsoangen iren Paipel kan oh kangoange iuk en ntingihedi kahrepen omw kamehlele mepwukat. Met pahn sewese iuk ken ese ia duwen omw pahn kawehwehiong meteikan dahme ke kamehlele. Ma ke kak kohla nan Internet oh kilang oaralap kan me  kohsang “What Does the Bible Really Teach?” (lokaiahn wai) ke kak doadoahngki met nan omw onop pwehn sewese iuk en kakehlakahla dahme ke kin uhdahn kamehlele.

⁹ Ke anahne kadehdehiong pein uhk me met iei padahk mehlelo. Met pahn sewese iuk en onopada ong papidais. Emen sister pwulopwul nda: “Mwohn ei pilada ien papidaisla, I onopki Paipel oh kilang me met iei pelien lamalam mehlelo. Oh ehuehu rahn, ahi kamehlele met kin kekehlailla.”

10. Dahme kahrehda e pwung en kasik me wiewiahn Kristian papidaislahr men anahne pahrekiong eh pwoson?

¹⁰ Paipel mahsanih: “Ma pwosonte me mie, ahpw sohte iangahki wiewia, eri, met wehwehki me pwosono pwoson mehla ehu.” (Seims 2:17) Ma ke kin uhdahn kamehlele mehkot, e pahn sansalda sang omw wiewia kan. Soangen wiewia dah? Paipel kahdaneki “wiewia sarawi oh wiewia kan me pid poadidi ong Koht.”​—Wadek 2 Piter 3:11, NW. ^[1]

11. Menlau kawehwehda ia wehwehn “wiewia sarawi.”

¹¹ Ia wehwehn “wiewia sarawi”? Ma omw wiewia kan kin sarawi, omw mour kin mwakelekel. Karasepe, medewehla sounpwong weneu samwalahro. Ni omw anahne wiahda pilipil ehu ahnsou me ke lelohng kasongosong en wia mehkot sapwung, ke kin medemedewe ni keneinei duwen dahme pwung oh dahme sapwung? (Ipru 5:14) Ke kin taman ahnsou dah kan me ke sohte dukula pahn kasongosong kan? Ni imwen sukuhl, ke kin wia mehn kahlemeng mwahu ong meteikan? Ke kin kolokol omw lelepek ong Siohwa, de ke kin song en duwehte iengomw tohnsukuhl kan pwe ren dehr kapailoke iuk? (1 Pit. 4:3, 4) Ei mehlel, aramas koaros sohte unsek. Ekei pak, pil irail kan me kin papahki Siohwa sounpar tohto ele kin namenek oh re kin diarada me e apwal en kalohk ong meteikan. Ahpw emen me inoukihong Koht eh mour pahn pohlki eh wia emen Sounkadehdehn Siohwa, oh e kin kasalehda met sang eh wiewia mwakelekel.

12. Ia ekei “wiewia kan me pid poadidi ong Koht,” oh ia pahn omw madamadau ong mepwukat?

¹² Ia wehwehn “wiewia kan me pid poadidi ong Koht”? Met pidada soahng kan me ke kin wia nan mwomwohdiso, duwehte towehda mihting kan oh kalohk. Ahpw mepwukat pil pidada wiewia kan me aramas sohte kak kilang, duwehte omw kin kelehpwla kapakap ong Siohwa oh wia pein omw onop. Emen me inoukihong Siohwa eh mour sohte pahn medewe me soahng pwukat kin katoutouwihala ih. Eh pepehm pahn duwehte ahn Nanmwarki Depit, me nda: “Maing ei Koht, ia uwen ei kin ngoangki kapwaiada kupwuromwien! I kin kolokol sapwellimomwi padahk kan nan mohngiongiet.”​—Mel. 40:8.

13, 14. Mehn sawas dahieu me kak sewese iuk en kasalehda “wiewia kan me pid poadidi ong Koht”? Ia duwen ekei me pwulopwul kan ar paiekihda mehn sawas pwukat?

¹³ Pwehn sewese wiahda omw mehn akadei kan, mie worksheet ehu nan pwuhken Questions Young People Ask​—Answers That Work, Volume 2 (lokaiahn wai) pali 308 oh 309. Nan worksheeto, ke ele kak ntingihedi omw pasapengpen peidek kan duwehte: “Ke kin kasalehda ni oaritik omw pepehm oh anahn kan nan kapakap, oh dahme met kin kasalehda duwen omw limpoak ong Siohwa?” “Dahme pil kin pidada nan omw onop?” “Ke kin kohla kalohk mehnda ma omw pahpa nohno sohte iang?” Pil mie wasa nan worksheeto me ke kak ntingihedi sohte lipilipil mehn akadei dah me ke men wiahda ong pein kowe, me pid omw kapakap kan, onop en Paipel oh kalohk.

¹⁴ Me pwulopwul tohto me medemedewe en papidaisla kin kilangwohng worksheet wet nin duwen mehn sawas kesempwal ehu. Emen sister pwulopwul me adaneki Tilda nda: “I kin doadoahngki worksheeto pwehn wiahda mehn akadei kan. I kapwaiada ehuehu mehn akadei pwukat,  oh onopadahngehr papidais mpen sounpar ehu mwuri.” Emen brother pwulopwul me adaneki Patrick pil pweida ni ahlohte. E nda: “I esehier ia ei mehn akadei kan, ahpw ei ntingihedi kin kahrehda I en doadoahk laud pwehn kapwaiada mepwukat.”

15. Menlau kawehwehda dahme kahrehda inoukihong Koht omw mour anahne wia pein omw pilipil.

¹⁵ Ehu peidek ko nan worksheeto iei: “Ke pahn papah Siohwa mehnda ma omw pahpa nohno oh kompoakepahmw kan uhdihsang wia met?” Nin duwen emen me inoukihong Siohwa eh mour oh papidaislahr, omw nanpwungmwahu rehn Siohwa pahn wia pein ahmw. Eri, dahme ke kin wia ong Siohwa sohte pahn poahsoankihda dahme omw pahpa nohno de meteikan nda. Omw wiewia sarawi oh wiewia kan me pid poadidiong Koht kin kasalehda me ke uhdahn kamehlele me ke miher nan padahk mehlel oh men idawehn sapwellimen Koht koasoandi kan. Ehu rahn ni ahnsou keren ke pahn warohng papidaisla.

16, 17. (a) Dahme pahn kamwakid emen en wiahla Kristian? (b) Ia duwen omw kak karasahda omw kalahnganki pweinen pweipwei sapahlo?

¹⁶ Emen ohl me uhdahn ese kosonned en Moseso patohwan kalelapek rehn Sises ehu rahn: “Mehnia kosonned nan pelien Kosonnedo me keieu kesempwal?” Sises ketin sapeng: “Ke pahn poakohng Kaun-o omw Koht sang nan kapehdomw unsek, sang ni [“omw mour,” NW] unsek, sang ni omw lamalam koaros unsek.” (Mad. 22:35-37) Sises ketin kawehwehda me limpoak ong Siohwa iei kahrepen emen eh kin papidaisla oh wiahla Kristian. Ehu ahl me keieu mwahu ken kakehlakahla omw limpoak ong Siohwa iei en medemedewe mwahu duwen pweinen pweipwei sapahlo, me iei sapwellimen Koht kisakis me keieu laud ong aramas akan. (Wadek 2 Korint 5:14, 15; 1 Sohn 4:9, 19.) Ni omw wia met, e pahn kamwakid uhk en kasalehda omw kalahnganki kisakis kaselel wet.

¹⁷ Ele ke kak karasahda omw kalahnganki pweinen pweipwei sapahlo ni ahl wet: Medewehla me ke pahn mwopwula nan pillap ehu de nansed oh emen kapituhkala. Ia duwe, ke pahn ihte kohla ni imwomwo, limwilimwda, oh manokehla dahme aramaso wiahiong uhk? Soh! Ke pahn ahnsou koaros ahneki pepehm en kalahngan ong aramaso me kapituhkala! Pil duwehte met, kitail anahne uhdahn kalahngankihong Siohwa oh Sises pweinen pweipwei sapahlo. Kitail pweipwandkihong ira atail mour! Ira ketin kapitkitailsang dihp oh mehla. Pwehki ara limpoak ong kitail, met kitail ahneki koapworopwor en mour kohkohlahte nan Paradais nin sampah!

18, 19. (a) Dahme kahrehda ken dehr masak omw wiahla sapwellimen Siohwa aramas? (b) Ia duwen omw papah Siohwa eh kin kamwahwihala omw mour?

 ¹⁸ Ke kin kalahnganki dahme Siohwa ketin wiahda ong uhk? Ma ei, eri omw inoukihong ih omw mour oh papidaisla iei pilipil pwungo. Omw inowo iei ke inoukihong Koht me ke pahn wia kupwureo kohkohlahte. Ia duwe, ke anahne masak en wiahda soangen inou wet? Soh! Siohwa ketin kupwurki dahme keieu mwahu ong uhk, oh e pahn ketin katingih irail kan me kin wia kupwure. (Ipru 11:6) Ni omw inoukihong Koht omw mour oh papidaisla, omw mour sohte pahn apwalla ahpw e pahn mwahula! Emen brother me sounpar 24 me papidaisla ni eh uhdahn pwulopwul nda, “Mwein I pahn wehwehki mwahu padahk mehlel ma I ekis laudsang, ahpw ei pilada en inoukihong Siohwa ei mour kin pere ie sang mehn akadei kan en sampah.”

¹⁹ Siohwa kin ketin kupwurki dahme keieu mwahu ong uhk. Ahpw, Sehdan kin roporop oh sohte nsenohkin uhk. E sohte kak kihong uhk mehkot mwahu ma ke idawehn ih. Ia duwen eh pahn kak kihong uhk mehkot me e sohte ahneki? E sohte kin kihda rohng mwahu oh sohte mie koapworopwor reh. Ihte me e kak kihda iei mour apwal ong ahnsou kohkohdo, pwehki ih soangen mouro me e pahn ahneki ahnsowo!​—Kaud. 20:10.

20. Dahme me pwulopwul men kak wia pwehn kekeirda lao e wiahda inou ong Koht oh papidaisla? (Pil kilang koakon me oaralape “ Pwehn Sewese Iuk Kekeirda.”)

²⁰ En inoukihong Siohwa omw mour iei pilipil me keieu mwahu me ke pahn wiahda. Ke onopadahier en wia met? Ma ei, dehr masak en wiahda inou wet. Ahpw ma ke pehm me ke saikinte onopada, doadoahngki sawas kan nan iren onop wet pwehn pousehlahte kekeirda. Pohl ndaiong rie Kristian ko nan Pilipai ren pousehlahte kekeirda. (Pil. 3:16) Ma ke idawehn kaweid wet, ehu rahn ni ahnsou keren ke pahn inoukihong Siohwa omw mour oh papidaisla.