1, 2. (a) Dahme kin wahdo peren ong sapwellimen Koht aramas akan rahnwet? (b) Ia duwen pahpa nohno Kristian kan oh elder kan ar kak sewese me pwulopwul kan en wehwehki ia wehwehn papidaisla?

 EMEN elder idek rehn Christopher me sounpar 12: “I eseiuk sangete ahnsou me ke ipwidi oh I perenki rong me ke men papidaisla. Ahpw I men idek rehmw, ‘Dahme kahrehda ke men wia met?’” Mie kahrepe mwahu me eldero ahneki pwehn idek peidek pwukat. Kitail kin perenki kilang me pwulopwul kid kid kei papidaisla nan sounpar koaros. (Ekl. 12:1) Ahpw pahpa nohno oh elder kan nan mwomwohdiso kin men tehk mwahu me me  pwulopwul kan kin wiahda pein arail pilipil oh pil wehwehki ia wehwehn en papidaisla.

² Nan Paipel, kitail sukuhlki me wiahda inou oh papidaisla iei tepin kahk ong mour kapw en Kristian men. Mour kapw wet pahn wahdo kapai tohto sang rehn Siohwa, ahpw e pil pahn wahdo uhwong sang Sehdan. (Lep. Pad. 10:22; 1 Pit. 5:8) Ihme kahrehda pahpa nohno Kristian kan anahne kihong ahnsou pwehn padahkihong neirail seri kan ia uhdahn wehwehn en wiahla sapwellimen Krais tohnpadahk. Ma ahn me pwulopwulo eh pahpa de nohno kaidehn Kristian kei, elder kan nan mwomwohdiso pahn ni limpoak sewese me pwulopwulo en wehwehki ia wehwehn en wiahda inou oh papidaisla. (Wadek Luk 14:27-30.) Duwehte atail kin wiahda koasoandi kan pwehn kanekehla koukoudahn ihmw ehu, me pwulopwul kan anahne onopada mwahu mwohn re papidaisla pwe ren kak papah Siohwa ni lelepek lao “lel ni imwi.” (Mad. 24:13) Dahme pahn sewese me pwulopwul kan en koasoanehdi teng en papah Siohwa kohkohlahte? Kitail pahn kilang.

3. (a) Dahme mahsen kan en Sises oh Piter padahkihong kitail duwen kesempwalpen papidaisla? (Mad. 28:19, 20; 1 Pit. 3:21) (b) Peidek dah kei me kitail pahn koasoiapene, oh dahme kahrehda?

³ Ia duwe, kowe emen me pwulopwul me men papidaisla? Ma ei, met wia mehn akadei ehu me uhdahn mwahu! E wia pai uhdahn kaselel ehu en papidaisla oh wiahla emen Sounkadehdehn Siohwa. Met pil wia kahk ehu me Kristian men anahne wia, oh e pil kesempwal ong me pahn komourla erein kahn kamakam kohwahlapo. (Mad. 28:19, 20; 1 Pit. 3:21) Ni ahnsou me ke papidaisla, ke kasalehda me ke wiahda inou en papah Siohwa kohkohlahte. Ke uhdahn men kolokol inou wet, kahrehda peidek pwukat pahn seweseiuk ken kilang ma ke onopadahngehr ken papidaisla: (1) I koahieklahr pwe ien wiahda pilipil wet? (2)  I inengieng wia met? (3) I wehwehki ia wehwehn en wiahda inou ong Siohwa? Kitail pahn koasoiapene peidek pwukat.

4, 5. (a) Dahme kahrehda papidais kaidehn ongete me mah kan? (b) Ong Kristian men, ia wehwehn en koahiekla?

⁴ Paipel sohte mahsanih me irail kante me mah de me lelehr soangen sounpar ehu me kak papidaisla. Lepin Padahk 20:11 mahsanih: “Seri men pil kin kasalehda mwomwe sang ni eh wiewia kan; ke kak ese ma e lelepek oh mwahu.” Eri, seri men pil kak wehwehki ia wehwehn en wia dahme mwahu oh pil wehwehn inoukihong Sounkapikadao eh mour. Kahrehda, papidais iei kahk kesempwal oh konehng ehu ong me pwulopwul men me kasalehda e koahieklahr oh wiahdahr inou ong Siohwa.​—Lep. Pad. 20:7.

⁵ Ia wehwehn en koahiekla? En koahiekla sohte kin ahnsou koaros dokedoke sounpar en emen de eh laudla. Paipel mahsanih me aramas koahiek kin “ahnlahr oh eselahr wekpeseng en me mwahu oh me suwed.” (Ipru 5:14) Aramas koahiek men kin ese dahme pwung oh koasoanehdi nan eh mohngiong en wia met. Eri e sohte kak mwadangete dukula pahn kasongosong en wia dahme sapwung. Oh e sohte pil kin ahnsou koaros anahne emen en padahkihong ih en wia dahme pwung. E pahn pwung en kasik me me pwulopwul men me papidaisla pahn wiahda dahme pwung mehnda ma eh pahpa nohno de emen me laud sohte mie reh.​—Pil kilang Pilipai 2:12.

6, 7. (a) Menlau kawehwehda kahpwal kan me Daniel ahneki erein eh kousoan nan Papilon. (b) Ia duwen Daniel eh kasalehda eh koahiek?

⁶ Ia duwe, me pwulopwul men kak uhdahn kasalehda soangen koahiek wet? Medewehla mehn kahlemeng en Daniel. Ele e sounparte 13 de daulih ni ahnsou me e kohkohsang eh pahpa nohno oh kohla Papilon. E wiahkintehieu kousoanla rehn aramas akan me sohte kin peikiong sapwellimen Koht kehkehlik kan. Ahpw kitail tehk kanahieng eh irairo. Nan Papilon, aramas ako wiahkin ih aramas kesempwal men. E iang me pwulopwul malaulau keite me pilipilda ni keneinei pwehn papah nanmwarkio. (Dan. 1:3-5, 13) E mwomwen me soangen pwukoa me Daniel ahneki nan Papilon mwahusang dahme e kak ahneki nan Israel.

⁷ Eri dahme Daniel wia? Ia duwe, e mweidohng mehn Papilon ko en wekidala ih oh kaluwetehla eh pwoson? Uhdahn soh! Paipel mahsanih me erein Daniel eh kousoan nan Papilon, e koasoanedier ‘nan eh mohngiong me e sohte pahn kasaminehla paliwere,’ oh e pahn soikala mehkoaros me kin pidada kaudok likamw. (Dan. 1:8, NW) Daniel kasalehda me e uhdahn koahiek!

8. Dahme ke kak sukuhlki sang ahn Daniel mehn kahlemeng?

⁸ Dahme ke kak sukuhlki sang ahn Daniel mehn kahlemeng? Me pwulopwul koahiek men pahn tengediong dahme e kin kamehlele, pil ni irair apwal kan. E sohte pahn duwehte kieil me adaneki chameleon me kin wekidala poh pwehn pwungiong wasa me e mi ieo. E sohte kin mwomwehda kompoakepahnki Koht nan Wasahn Kaudok en Sounkadehdehn Siohwa kan ahpw uhd wia kompoakepahn sampah wet ni eh mi nan wasahn sukuhl. Ahpw e pahn kolokolte eh lelepek, pil ni ahnsou me e lelohng kasongosong.​—Wadek Episos 4:14, 15.

9, 10. (a) Ia duwen me pwulopwul men eh paiekihda eh kin medemedewe dahme e wia ni eh pwoson lelohng kasongosong? (b) Ia wehwehn en papidaisla?

⁹ Mehlel, sohte emen me unsek. Me pwulopwul oh me mah kan kin ekei pak wiahda sapwung. (Ekl. 7:20) Ahpw ma ke men papidaisla, e pahn wia elen loalokong en esehda ia uwen laud en omw koasoanehdi me ken  peikiong sapwellimen Siohwa kehkehlik kan. Pein idek rehmw, ‘I kin peikiong Siohwa erein ahnsou reirei?’ Medewehla ia duwen omw mwekidki ahnsowo me omw pwoson lelohng kasongosong. Ke kak ese mwekid pwung dahieu me ken wia? Mie emen me kangoange iuk ken doadoahngki omw koahiek nan ahn Sehdan sampah, duwehte me wiawihong Daniel? Ma mehkot duwehte met kasonge iuk, ke kak ese dahme Siohwa ketin kupwurki ken wia?​—Ep. 5:17.

¹⁰ Dahme kahrehda e kesempwal en ese pasapengpen peidek pwukat? Pwehki peidek pwukat pahn seweseiuk ken kilang uwen kesempwal en papidais. Papidais kin kasalehiong meteikan me ke wiadahr inou kesempwal ehu ong Siohwa. Ke inoukihda me ke pahn poakohng ih oh papah ih kohkohlahte sang nan omw mohngiong unsek. (Mark 12:30) Koaros me papidaisla anahne koasoanehdi teng en kolokolte arail inou ong Siohwa.​—Wadek Eklesiasdes 5:4, 5.

11, 12. (a) Dahme emen me medemedewe en papidaisla anahne tehk mwahu? (b) Dahme pahn seweseiuk ken kolokol madamadau pwung duwen sapwellimen Siohwa koasoandi en papidais?

¹¹ Paipel mahsanih me sapwellimen Siohwa aramas akan koaros, pil me pwulopwul kan, pahn “perenki toukihda” pein irail pwehn papah ih. (Mel. 110:3, NW) Eri mehmen me men papidaisla anahne tehk mwahu me pein ih me inengieng wia met. Met wehwehki me ke anahne kasawih mwahu omw ineng kan, ahpw mehlel ma ke tikida nan peneinei ehu me mi nan padahk mehlel.

¹² Erein omw wie lalaudla, ele ke kilang me tohto papidaisla, mwein pil ekei kompoakepahmw kan oh pein riomw kan. Ahpw kanahieng pwe ken dehr tepida medewe me ke anahne papidaisla ihte pwehki ke lelehr sounpar de pwehki meteikan koaros papidaislahr. Ia duwen omw kak tehk mwahu me ke kin kilangwohng papidais ni ahlohte me Siohwa kin ketin wia? Kihong ahnsou en medemedewe dahme kahrehda papidais uhdahn kesempwal. Ke pahn diarada kahrepe mwahu tohto nan iren onop wet oh pil nan iren onop en mwuhr.

13. Ia duwen omw kak ese ma pilipil en papidaisla kin kohsang nan omw mohngiong?

¹³ Ehu ahl en ese ma omw pilipil en papidaisla kin kohsang nan omw mohngiong iei en kasawih omw kapakap kan. Ia uwen tohtohn omw kin kapakap ong Siohwa? Ke kin kasalehda ni oaritik omw anahn kan nan kapakap? Pasapengpen peidek pwukat ele kin kasalehda ia uwen keren en omw nanpwungmwahu rehn Siohwa. (Mel. 25:4) Pak tohto Siohwa kin ketikihda nan Paipel pasapengpen atail kapakap kan. Eri pil ehu ahl me ke kak ese ma ke uhdahn men karanihala Siohwa oh papah ih sang omw mohngiong iei en tehk mwahu omw koasoandi en onop. (Sos. 1:8) Pein idek rehmw: ‘I kin kaukaule wia pein ei onop en Paipel? I kin men iang pidada laud nan at kaudok en peneinei?’ Pasapengpen peidek pwukat pahn seweseiuk ken kilang ma pein kowe me inengieng en papidaisla.

14. Menlau kawehwehda wekpeseng en wiahda inou ong Siohwa oh papidais.

¹⁴ Ekei me pwulopwul ele sohte uhdahn ese wekpeseng en wiahda inou ong Siohwa oh papidais. Ele ekei nda me re inoukihongehr Siohwa arail mour ahpw re saikinte onopada en papidais. Ahpw ia duwe, met uhdahn kak wiawi? Wiahda inou kin wehwehki me ke inoukihong Siohwa ni kapakap me ke pahn  papah ih kohkohlahte. Ahnsou me ke papidaisla, ke kasalehiong meteikan me ke wiadahr inou ong Siohwa. Eri mwohn omw papidais, ke anahne wehwehki ia wehwehn en inoukihong Koht omw mour.

15. Ia wehwehn wiahda inou ong Siohwa?

¹⁵ Ni omw inoukihong Siohwa omw mour, ke patohwanohng ih me met e sapwellimankinuhkalahr. Ke inoukihda me omw papah ih iei me pahn keieu kesempwal nan omw mour. (Wadek Madiu 16:24.) Soangen inou wet ong Koht uhdahn kesempwal! (Mad. 5:33) Eri ia duwen omw pahn kasalehda me omw mour solahr wia pein ahmw ahpw Siohwa me met sapwellimankinuhkalahr?​—Rom 14:8.

16, 17. (a) Menlau kihda ehu karasaras me pid wehwehn en tounmeteikihla omw mour. (b) Dahme emen me wiahda inou ong Siohwa kin uhdahn ndinda?

¹⁶ Kitail pahn koasoiapene karasaras ehu. Medewehla ma kompoakepahmw men kisikisehkin uhk sidohsa ehu. E kihong uhk doaropwehn kadehdehda me weromw sidohsao oh nda: “Weromw sidohsahn.” Ahpw e uhd nda: “I pahn koledi kih kan. Oh ngehi me pahn kin tangahki sidohsao a kaidehn kowe.” Ia pahn omw pepehm duwen kisakis wet? Ia pahn omw pepehm duwen kompoakepahmwo me kihong uhk sidohsao?

¹⁷ Ni emen eh inoukihong Siohwa eh mour, e kin nda: “I patohwanohng komwi ei mour. I wialahr sapwellimomwi.” Siohwa sapwellimaniki pwuhng en kasik me aramaso pahn kolokol eh inowo. Ahpw ia duwen ma aramaso tepida sapeikiong Siohwa sang ni eh kin ni rir iang de date emen me sohte kin papah Koht? De ia duwen ma aramaso ale doadoahk ehu me katikala eh ahnsou en kak iang kalohk de pil kahrehiong ih en kalapw katihasang mihting kan en mwomwohdiso? Eri aramaso sohte kin kapwaiada eh inowo ong Siohwa. Met pahn duwehte eh koledi kih kan en sidohsao. Ni atail inoukihong Siohwa atail mour, kitail patohwanohng ih, “Komwi me sapwellimanki ei mour, kaidehn ngehi.” Eri kitail pahn ahnsou koaros wia dahme Siohwa ketin kupwurki, mendahki ma kaidehn ihme pein kitail men wia. Ih met me Sises ketin wia. E mahsanih: “I kohdihdo sang nanleng pwe I en kapwaiada kupwur en ih me ketin kadariehdo, a kaidehn pwe I en wia nsenei.”​—Sohn 6:38.

18, 19. (a) Dahme Rose oh Christopher nda me kasalehda me papidais kin wia pai kaselel ehu me imwikihla kapai tohto? (b) Ia omw pepehm duwen pai kaselel wet me pid papidais?

¹⁸ Eri e sansal me papidais wia pilipil kesempwal ehu. E wia pai kaselel ehu en inoukihong Siohwa atail mour oh papidaisla. Me pwulopwul kan me poakohng Siohwa oh me wehwehki ia wehwehn en wiahda inou sohte kin pweiek en inoukihong Koht arail mour oh papidaisla. Re sohte kin koluhkihla arail pilipilo. Emen me pwulopwul me papidaisla me adaneki Rose nda: “I poakohng Siohwa oh sohte mehkot me I perenki wia likin ei kin papah ih. Ei pilipil en papidaisla iei pilipil me I uhdahn kamehlele me keieu mwahu me I wiahda nan ei mour.”

¹⁹ Ia duwen Christopher me kitail koasoia ni tepin iren onop wet? Ia eh pepehm duwen eh pilipilo en papidaisla ni eh sounpar 12? E nda me e uhdahn perenki eh wiahda soangen pilipilo. E tepida papah nin duwen pioneer men ni eh sounpar 17 oh wiahla sounsawas men ni eh sounpar 18. Rahnwet e kin papah nan Pedel. E nda: “Papidais iei pilipil pwungo. Nan ei mour met, I kin wia doadoahk kaperen tohto ong Siohwa oh sapwellime pwihn.” Ma ke men papidaisla, ia duwen omw kak kaunopada en wia met? Iren onop en mwuhr pahn sapengala peidek wet.