1, 2. (a) Mehn kataman dahieu me doarehla aramas tohto? (Menlau kilang tepin kilel.) (b) Kaweid dahieu me sapwellimen Koht kan ahneki me kak doarehla arail mour?

 “UHDI, KILANG, RONG.” Lepin lokaia pwukat kohda ni sain laud kan ni wasa me kisa kan kin tang ie nan Amerika daulih sounpar 100 samwalahro. Dahme kahrehda? Pwe kisa kan me tangatang uk en dehr loiong sidohsa kan me kin kotehla wasa me kisao tangatang ie. En tehk mwahu sain pwukat doarehlahr mouren aramas tohtohie.

² Dahme Siohwa kin ketikihong kitail pwehn perekitail sang keper kin mwahusang sain kan. E kin ketin kaweid sapwellime kan pwe ren kak ale mour soutuk oh soikala soahng keper kan. Duwehte sounsilepen sihpw limpoak men, Siohwa kin ketin kaweid oh padahki sapwellime sihpw kan pwe ren kak soikala ahl keper kan.​—Wadek Aiseia 30:20, 21.

3. Ia duwen aramas akan ar mihla nan ahl me kahluwairaillahng mehla?

³ Sangete ni tepin poadopoad en aramas, Siohwa ketikihong aramas  akan iren kaweid sansal kan. Karasepe, nan mwetuwel en Ihden, Siohwa ketikihda iren kaweid sansal kan me pahn kahluwa aramas akan ong mour soutuk oh nsenamwahu. (Sen. 2:15-17) Ahpw Adam oh Ihp soikala kaweid me Samara limpoako ketikihda. Ihp rong kaweido me mwomwen kohsang sineik men, oh mwuhr Adam rongala eh pwoudo. Ia imwilahn met? Ira koaros lelohng lokolok, mehla oh sohte ara koapworopwor. Oh pwehki ara sapeik, aramas koaros mihla nan ahl me kahluwairaillahng mehla.

4. (a) Dahme kahrehda mie pil ekei kaweid kan me anahn mwurin Nohliko? (b) Ia duwen irair kapw kan ar kasalehda duwen sapwellimen Koht madamadau?

⁴ Koht ketikihong Noha kaweid kan me kin doarehla mour. Mwurin Nohliko, Siohwa ketin kehkehlikihong aramas en dehr tungoale de nim nta. Dahme kahrehda? Met Siohwa pahn ketin mweidohng aramas en tungoale uduk. Pwehki irair kapw wet, re anahne kaweid kapw: “Ihte me kumwail sohte pahn tungoalehn: uduk me mie nta, I sohte mweidada pwehki mour mi nan nta.” (Sen. 9:1-4) Kitail sukuhlki sang kehkehlik wet duwen sapwellimen Koht madamadau ong mour. E ketin sapwellimanki mour koaros. Ih me Sounkapikpatail oh e ketikihong kitail mour, eri e sapwellimanki pwuhng en ketin wiahda kosonned kan me pid mour. Karasepe, e ketin kehkehlikihong aramas akan ren dehr kamaramas. Koht ketin kilangwohng mour oh nta nin duwen mehkot sarawi, oh e pahn ketin kaloke mehmen me doadoahngki ni ahl sapwung.​—Sen. 9:5, 6.

5. Dahme kitail pahn tehkpene ahnsou wet, oh dahme kahrehda?

⁵ Mwurin mwehin Nohao, Koht kin ketin pousehlahte kaweid sapwellime kan. Nan iren onop wet, kitail pahn kilang ekei karasepen eh kin ketin kaweid kitail. Met pahn kakehlakahda atail koasoanehdi teng en idawehn sapwellime kaweid me pahn kahluwakitaillahng sampah kapwo.

6. Dahme kahrehda mehn Israel ko anahne kosonned kan me Koht ketikihong Moses, oh soangen madamadau dah me re anahne ahneki?

⁶ Ni mwehin Moseso, Siohwa ketikihong sapwellime kan iren kaweid sansal me pid arail wiewia oh kaudok. Dahme kahrehda? Irair kan pil pwurehng wekila. Daulih sounpar riepwiki, mehn Israel ko mour nin duwen lidu kei nan Isip wasa me koaros me kapilirailpene kin kaudokiong me melahr akan, doadoahngki dikedik kan, oh wia soahng tohto teikan me sohte kin kawauwih Koht. Ni sapwellimen Koht aramas ako ar saledek sang Isip, re anahne kaweid kapw kan. Re pahn wiahla wehi ehu me kin idawehnte sapwellimen Siohwa Kosonned. Ekei pwuhk kan nda me lepin lokaiahn Ipru ong “kosonned” kin duwehte lepin lokaia ehu me wehwehki “kaweid, kahluwa, padahki.” Kosonnedo doarehla mehn Israel ko sang tiahk samin oh pelien lamalam likamw kan sang wehi kan me kapilirailpene. Ni mehn Israel ko ar rong Koht, re kin alehdi sapwellime kapai. Ni ahnsou me re kin pohnsehsehla ih, re kin lelohng imwila suwed.​—Wadek Deuderonomi 28:1, 2, 15.

7. (a) Menlau kawehwehda dahme kahrehda Siohwa ketikihong sapwellime aramas akan kaweid. (b) Ia duwen Kosonnedo eh wia sounkaweid ong Israel?

⁷ Kaweid kapw kan anahn ong pil ehu kahrepe tohrohr. Kosonnedo kaunopada mehn Israel ko ong ahnsou kesempwal ehu me pid dahme Siohwa ketin kupwurki, me iei ketidohn Mesaiao, Sises Krais. Kosonnedo katamankihong mehn Israel ko me re sohte unsek. Kosonnedo pil sewese irail en wehwehki me re anahne pweinen pweipwei sapahl ehu, me iei meirong unsek ehu me pahn kihsang  douluhl diparail kan. (Kal. 3:19; Ipru 10:1-10) Patehng met, Kosonnedo doarehla peneinei me Mesaiao ketisang ie oh sewese mehn Israel ko en kasawihada ih ni ahnsou me e pahn ketido. Ei, Kosonnedo duwehte kaweid ehu, de “sounkaweid,” me kin kadoadoahk erein ahnsoukis pwehn kahluwahlahng irail Krais.​—Kal. 3:23, 24.

8. Dahme kahrehda kitail anahne idawehn ire mehlel kan en Kosonned en Moseso?

⁸ Nin duwen Kristian kei, kitail pil kak paiekihda kaweid kan me Siohwa ketikihda nan Kosonnedo. Ni ahl dah? Kitail kak uhdi oh kilang ire mehlel kan me wia poahsoanpen Kosonnedo. Mendahki kitail solahr mi pahn kosonned pwukat, kitail kak kilangwohng tohtohn mepwukat nin duwen mehn kaweid kei ong atail mouren ehuehu rahn oh atail kaudok ong Siohwa. Siohwa ketikihda kosonned pwukat nan Paipel pwe kitail en kak sukuhlki, ale kaweid sang ire kesempwal kan sang kosonned ko, oh kalahnganki me Sises ketin padahkihong kitail mehkot me mwahusang Kosonnedo. Rong dahme Sises mahsanih: “Kumwail rongehr padahk pwoatet: ‘Ke dehr kamwahl.’ A ngehi I ndaiong kumwail met: mehmen me pahn kilikilang lih emen oh men dihpki, nahn e wiadahr dipen kamwahl nan kapehde.” Eri kaidehn ihte kitail en soikala wiewiahn kamwahl, ahpw kitail pil anahne soikala madamadau oh ineng samin.​—Mad. 5:27, 28.

9. Irair kapw dah kei me kahrehda en mie anahn ong kaweid kapw sang rehn Koht?

⁹ Mwurin Sises eh ketido nin duwen Mesaiao, Siohwa ketikihda kaweid kapw kan oh kasalehda oaritik teikan duwen dahme e kupwurki. Dahme kahrehda? Nan pahr 33, Siohwa ketin soikala wehin Israel oh pilada mwomwohdisohn Kristian en wiahla sapwellime. Eri sapwellimen Koht aramas akan pwurehng mihla nan irair kapw.

10. Dahme kahrehda kosonned kapw kan kohwong mwomwohdisohn Kristian, oh ia duwen ar weksang kosonned ko me kohwong mehn Israel ko?

¹⁰ Siohwa ketikihong mehn Israel ko Kosonned en Moseso pwehn padahkihong irail ia duwen arail pahn mour oh kaudokiong ih. Ni mwehin tepin Kristian ko, sapwellimen Koht aramas ako solahr kohsang wehi tehieu ahpw kohsang wehi tohto oh soangsoangen mour oh met adaneki Israel en Koht. Irail wiahda mwomwohdisohn Kristian oh mi pahn inou kapw ehu. Siohwa ketikihong irail kaweid kapw kan ong ia duwen arail pahn mour oh kaudokiong ih. Mehlel, “Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.” (Wiewia 10:34, 35) Re idawehn “kosonned en Krais,” me kin uhdahn poahsoandahsang ire mehlel kan me ntingdi nan mohngiongirail, a kaidehn pohn takai. Kosonned wet pahn kaweid oh wia kamwahu ong Kristian kan sohte lipilipil ia wasa re kousoan ie.—Kal. 6:2.

11. Kehkehlik kesempwal riau dah ong Kristian kan me kohsang “kosonned en Krais”?

¹¹ Israel en Koht uhdahn paiekihda kaweid kan me Siohwa ketikihda rehn Sises. Mwohnte Sises ketin wiahda inou kapwo, e ketikihda kehkehlik kesempwal riau. Ehu iei doadoahk en kalohk. Meteio iei me pid wiewiahn Kristian kan ong emenemen. Kaweid pwukat wiawihda ong Kristian koaros, eri e pil kin kadoadoahk ong kitail koaros rahnwet, mehnda ma kitail ahneki koapworopwor en mour kohkohlahte nanleng de nin sampah.

12. Dahme kapw nan doadoahk en kalohko?

¹² Mahsie, aramas en wehi kan kin anahne kohla Israel pwehn papah Siohwa. (1 Nan. 8:41-43) Ahpw mwuhr Sises ketikihda kehkehliko me dierek nan Madiu 28:19, 20. (Wadek.)  Sises mahsanihong sapwellime tohnpadahk ko ren “kohwei” rehn aramas koaros. Ni Pendekos nan pahr 33, Siohwa ketin kasalehda me e kupwurki rongamwahwo en lohkseli nin sampah pwon. Ahnsowo, mpen aramas 120 me wia tohn mwomwohdiso kapwo direkihla sapwellimen Koht manaman oh tepida lokaiahki soangsoangen lokaia kan ong mehn Suhs ko oh mehn liki kan me wehkohng lamalam en mehn Suhs. (Wiewia 2:4-11) Mwuhr, wasahn kalohko laudla oh lellahng mehn Sameria kan. Mwurin mwo, nan pahr 36, wasahn kalohko pil ehute laudla oh lellahng mehn liki kan me sohte sirkumsaisla. Met wehwehki me Kristian kan anahne kalohk ong aramas koaros nin sampah!

13, 14. (a) Dahme pidada nan sapwellimen Sises ‘kosonned kapwo’? (b) Dahme kitail sukuhlkihsang mehn kahlemeng en Sises?

¹³ Sises pil ketikihda “kosonned kapw ehu” duwen mwomwen atail wiewia ong riatail Kristian kan. (Wadek Sohn 13:34, 35.) Kitail anahne kasalehda atail limpoak ong irail rahn koaros, oh kitail pil anahne men tounmeteikihla atail mour ong irail. Kosonnedo sohte koasoia me kitail anahne wia met.​—Mad. 22:39; 1 Sohn 3:16.

¹⁴ Sises iei mehn kahlemeng me keieu mwahu duwen emen me kin kasalehda limpoak ni soh roporop. Uwen laud en eh ketin poakohng sapwellime tohnpadahk ko, e kupwurki pwoukinirailla. Oh e ketin kupwurki sapwellime tohnpadahk kan koaros en wia duwehte. Eri kitail pahn kin men dadaur pahn kahpwal kan oh pil mehkihla riatail kan.​—1 Des. 2:8.

15, 16. Irair kapw dah kei me kitail ahneki, oh ia duwen Koht eh kin ketin kaweid kitail?

¹⁵ Sises ketin idihada “ladu lelepek oh loalokongo” pwehn kihong sapwellime tohnpadahk kan kanarail “mwenge ahnsou me konehng.” (Mad. 24:45-47, NW) Mwenge wet kin iangahki kaweid kesempwal kan ong sapwellimen Koht aramas akan ahnsou me irair kan kin wekila. Ia duwen atail irair kan kin wekila?

¹⁶ Kitail mi ni “imwin rahn akan,” oh ahnsou keren kitail pahn lelohng apwal ehu me laudsang apwal koaros. (2 Tim. 3:1; Mark 13:19) Pil ehu, Sehdan oh nah ngehn saut kan pisikendiongehr sampah sang nanleng oh met kahrehda lokolok laud ong aramas akan. (Kaud. 12:9, 12) Patehng met, kitail kin peikiong sapwellimen Sises kehkehlik ni atail kin kalohk nin sampah pwon ong aramas oh pil ni lokaia me tohtohsang mahs!

17, 18. Ia duwen atail pahn mwekidki kaweid kan?

¹⁷ Sapwellimen Koht pwihn kin kihong kitail mehn sawas tohto pwehn sewese kitail nan doadoahk en kalohk. Ke kin doadoahngki mehn sawas pwukat? Ni atail mihting kan, kitail kin ale kaweid ong ia duwen atail pahn doadoahngki mehn sawas pwukat ni ahl me keieu mwahu. Ke kin kilangwohng met nin duwen kaweid ehu sang Siohwa?

¹⁸ Pwehn ale sapwellimen Koht kapai, kitail anahne tehk kanahieng kaweid koaros me e ketikihong kitail nan mwomwohdisohn Kristian. Ma kitail peik ahnsou wet, e pahn mengei en idawehn kaweid kan erein ‘kahn kamakam kowahlapo,’ ni ahnsou me ahn Sehdan sampah suwed wet pwon pahn sohrala. (Mad. 24:21, NW) Mwurin mwo, kitail pahn anahne kaweid kapw ong mour nan sampah pwung kapw ehu me pahn uhdahn saledeksang manaman en Sehdan.

19, 20. Pwuhk dah kei me pahn papahkpeseng, oh ia imwilahn met?

¹⁹ Ni mwehin Moseso, wehin Israel anahne  kaweid kapw kan, eri Koht ketikihong irail Kosonnedo. Mwuhr, mwomwohdisohn Kristian anahne idawehn “kosonned en Krais.” Duwehte met, Paipel mahsanihong kitail me nan sampah kapwo, kitail pahn alehdi pwuhk kan me audaudki kaweid kapw kan. (Wadek Kaudiahl 20:12.) Pwuhk pwukat pahn kawehwehda dahme Siohwa ketin kupwurki ong aramas ni ahnsowo. Ni aramas koaros, iangahki me iasada kan, ar onopki pwuhk pwukat, re pahn kak ese dahme Koht ketin kupwurki ong irail. Pwuhk ko pahn sewese kitail en kalaudehla atail sukuhlki duwen sapwellimen Siohwa elen madamadau. Kitail pil pahn wehwehkihla mwahu Paipel, eri koaros nan Paradais pahn kasalehda arail limpoak oh wauneki emenemen. (Ais. 26:9) Medewehla soahng tohto me kitail pahn sukuhlki oh padahkihong meteikan ni atail pahn mi pahn kaweid en Nanmwarkio, Sises Krais!

²⁰ Ma kitail idawehn kaweid kan me “ntinting nan pwuhk ko” oh kolokol atail lelepek ong Siohwa erein kaimwiseklahn kasongosongo, e pahn ketin kilelehdi adatail kan nan “pwuhken me momour kan” kohkohlahte. Kitail kak ahneki mour soutuk! Eri kitail anahne UHDI oh wadek dahme Paipel mahsanih, KILANG pwehn wehwehki ia wehwehn met ong kitail, oh RONG sang ni atail kin peikiong sapwellimen Koht kaweid ahnsou wet. Ma kitail wia mepwukat, kitail kak pitsang kahn kamakam kowahlapo oh pousehlahte sukuhlki duwen atail Koht, Siohwa, me erpit oh limpoak, kohkohlahte.​—Ekl. 3:11; Rom 11:33.