EREIN ahnsou reirei, meirong kan kin wia kisehn kaudok mehlel. Mehn Israel ko kin meirongki mahn akan, oh me tohto kin ese duwen Kristian kan ar kin kihda arail “meirong en kaping.” Ahpw mie meirong teikan me Koht pil kin ketin kupwurperenki. (Ipru 13:15, 16) Meirong pwukat kin wahdo peren oh kapai, nin duwen me karasaras pwukat pah kasalehda.

Ana, emen ladu lelepek en mahso, uhdahn men naineki emen pwutak ahpw e sohte kak naineki seri. Nan eh kapakap, e inoukihong Siohwa me ma e pahn nainekihda pwutak emen, e pahn “kasarawihong komwi [Siohwa] erein eh mour unsek.” (1 Sam. 1:10, 11) Kedekedeo, Ana liseianda oh naitikidi kisin pwutak kis me adaneki Samuel. Mwurin Samuel mweisang dihdi, Ana wahla ih nan impwal sarawio nin duwen me e inoukihda. Siohwa ketin kapaiahda Ana pwehki eh meirong en tounmetei. Mwuhr Ana pil nainekihda seri limen, oh Samuel wiahla soukohp oh sounnting en Paipel men.​—1 Sam. 2:21.

Duwehte Ana oh Samuel, Kristian kan rahnwet ahneki pwais kaselel en doadoahngki arail mour pwehn papah Sounkapikparail. Sises ketin inoukihda me sohte lipilipil soangen meirong dah me kitail wiahda pwehn kaudokiong Siohwa, kitail pahn ale keting laud.​—Mark 10:28-30.

Ni mwehin wahnpoaron ko, mie lih Kristian men me adaneki Dorkas. Me tohto kin ese ih pwehki eh kin “wiewia mwahu oh sewese” meteikan ni tounmetei. Ahpw e “soumwahuda oh mehla,” oh tohn mwomwohdiso pwon pahtoula. Ni tohnpadahk ko ar rongada me Piter mi karanih arail wasao, re peki ih en menlau mwadangala rehrail. Medewehla uwen arail peren ahnsou me Piter lella mwo oh kaiasada Dorkas. Met wia keieun kaiasada me wahnpoaron men wiahda! (Wiewia 9:36-41) Koht sohte ketin meliehla wiewiahn tounmetei kan me Dorkas wiahda. (Ipru 6:10) Eh wiewia sapan kan kileldi nan Paipel nin duwen mehn kahlemeng mwahu kei me kitail en alasang.

Wahnpoaron Pohl pil wia mehn kahlemeng mwahu nin duwen emen me kin kihda eh ahnsou oh nsenohki meteikan. Ni eh ntinglahng rie Kristian ko nan Korint, Pohl nda: “Ngehi I pahn netikihla mehkoaros me I ahneki, pil pein ngehi, pwe I en sewesehkin kumwail.” (2 Kor. 12:15) Pohl sukuhlki sang dahme e kin lelohng me en tounmeteikihla pein ih ong meteikan kin wahdo kaidehn ihte nsenamwahu ahpw, kesempwal sang met, kapai oh kupwuramwahu sang rehn Siohwa.​—Wiewia 20:24, 35.

Eri e sansal me Siohwa kin ketin kupwurperenki atail doadoahngki atail ahnsou oh kehl pwehn utungada doadoahk en Wehio oh sewese riatail Kristian kan. Ahpw ia duwe, mie ahl teikan me kitail kak sewesehki doadoahk wet? Ei! Patehng atail doadoahngki atail ahnsou oh kehl, kitail kak kawauwih Koht sang ni atail toukihda sawas en mwohni oh kepwe kan. Sawas pwukat kin sewese doadoahk en kalohk me kin wiawi nan sampah pwon, me iangahki sewese misineri kan oh irail tohrohr teikan me kin doadoahngki pali laud en ar ahnsou ong papah Koht. Patehng met, atail pein toukihda sawas pwukat pil kin sewese kawehwehpen oh wiawihdahn sawaspen Paipel kan, sewese wasa kan me lelohng kahpwal kan duwehte melimel ape, oh pil kokoudahn Wasahn Kaudok kapw kan. Kitail kak kamehlele me aramas “sapan . . . pahn alehki kupwuramwahu” arail wiewia kan. Laudsang met, ni atail kin patohwanohng Siohwa soahng kesempwal kan me kitail ahneki, kitail kin kawauwih ih.​—Lep. Pad. 3:9; 22:9.