1. Dahme koul kin kahrehiong kitail en wia?

SOUN wiahda koul ndand men nda: “Lepin lokaia kan kin kahrehda ken madamadau. Keseng kin kamwakid uhk. Ahpw koul pwoat kin kahrehda ken pehm madamadau ehu.” Atail koul kan kin kasalehda atail kaping oh limpoak ong Samatailo nanleng, Siohwa. Koul pwukat kin kahrehda kitail en karanihala ih. Eri e mengei en wehwehki dahme kahrehda koul kin wia kisehn kaudok min me kesempwal, mehnda ma kitail kin koul kelehpw de iang riatail Kristian kan koul.

2, 3. (a) Ia en ekei pepehm ni arail kin iang tohnmwomwohdiso koul laud? (b) Peidek dah kan me kitail pahn koasoiapene nan iren onop wet?

² Ahpw ia omw pepehm duwen omw kin iang tohnmwomwohdiso koul ni ngihl laud? Ke kin namenengki? Nan ekei sahpw, ohl akan ele kin soansuwedki koul mwohn meteikan. Met kak suwediong tohnmwomwohdiso pwon, ahpw mehlel ma elder kan kin peikasalki koul, de ma re kin kedirepwkihla soahng teikan ni ahnsoun koul.​—Mel. 30:12.

³ Koul kin wia kisehn atail kaudok ong Siohwa. Uhdahn kitail sohte men kohkohlahsang de katihasang ahnsoun koul nan mihting. Kahrehda kitail en pein idek rehtail: ‘Ia ei pepehm ong koul nan mihting kan? Dahme I kak wia ma I peikasalki koul mwohn  meteikan? Oh ia duwen ei kak koulki koul kan sang loalei?’

4, 5. Ia mwomwen koasoandi en koul kan nan tehnpas sarawio ni mwehin Israel en mahso?

⁴ Nan poadopoad, sapwellimen Siohwa tohnkaudok kan kin doadoahngki koul pwehn kapinga ih. Ni mehn Israel ko ar kin lelepek ong Siohwa, koul kin wia mehkot kesempwal nan arail kaudok. Karasepe, ni Depit eh kaunopada tehnpaso ong kaudok, e koasoanehdi mehn Lipai 4,000 en kapingahki Siohwa koul kan. Nanpwungen irail pwukat, meh 288 “me inenen koahiek,” de kaiahnda mwahu pwe ren koul ong Siohwa.​—1 Kron. 23:5; 25:7.

⁵ Koul oh keseng pil wia kisehn kasarawi en tehnpaso me kesempwal. Paipel mahsanih: “Sounkoul kan pil iang kokoul ni ngihl pahrekiong sowi kan, simpal kan, oh soangen keseng teikan, nindokon arail kapikapinga KAUN-O, . . . pelien depwek lingaling en KAUN-O ahpw kadirehla wasao.” Nna medewehla ia uwen met eh kakehlakahda pwoson en mehn Israel ko!​—2 Kron. 5:13, 14; 7:6.

6. Soangen koasoandi en keseng oh koul dah me Nehmaia wiahda ni ahnsou me e wia kepina en Serusalem?

⁶ Nehmaia, me koasoanehdi mehn Israel ko ong onohnsapahldahn dihd kan en Serusalem, pil koasoanehdi mehn Lipai ko ren koul oh keseng. Arail koul oh keseng pil kalaudehla peren en ahnsowo. Nehmaia koasoanehdi “pwihn kalaimwun riau pwe re en alu . . . oh kapikapinga Koht.” Pwihn riau pwukat kin alu pohn kehlo sang pali riau lao re tuhpene ni dihd me keieu karanih tehnpaso. Ngilarail ko me inenen laud kahrehda aramas akan kak rong sang wasa doh. (Neh. 12:27, 28, 31, 38, 40, 43) Kitail kak kamehlele me Siohwa ketin kupwurperenki karonge sapwellime tohnkaudok kan arail koul laud oh peren kapikapinga ih.

7. Ia duwen Sises eh ketin kasalehda me koul pahn wia kisehn kaudok me kesempwal ong Kristian kan?

⁷ Ni mwehin Siseso, koul pil wiewiahte kisehn kaudok me kesempwal. Medewehla dahme wiawi ni pwohng me keieu kesempwal nan poadopoad en aramas. Mwurin Sises ketin wia Sak en Soutik en Kauno rehn sapwellime tohnpadahk ko, irail koaros koulki koul en kaping ong Siohwa.​—Wadek Madiu 26:30.

8. Ia duwen tepin Kristian ko ar wiahda mehn kahlemeng mwahu duwen en kapingahki Koht koul kan?

⁸ Tepin Kristian ko wiahda mehn kahlemeng mwahu duwen en kapingahki Koht koul kan. Weksang mehn Israel ko me kin kohla ni tehnpaso pwehn kaudokiong Siohwa, Kristian pwukat kin tuhpene ni imwarail kan. Mendahki imwarail ko sohte kaselel duwehte tehnpaso, Kristian ko pil kin koulte ni ngoang. Ni mehlel, wahnpoaron Pohl ndaiong rie Kristian ko: “Kumwail padahkpene oh pil peneupene nanpwungamwail ni soangen loalokong koaros. Kumwail koulki koulen kaudok oh koul sarawi kan; kumwail kouliong Koht, kapinga ih nan mohngiongimwail kan.” (Kol. 3:16) Kitail anahne koulki koul kan nan neitail pwuhken koulo ni kalahngan. Koul pwukat kin iangete kisehn “mwenge” me “ladu lelepek oh loalokongo” kin kihda ong kitail ni “ahnsou me konehng.”​—Mad. 24:45, NW.

9. (a) Dahme kahrehda ekei kin peikasalki arail en koul ni peren ni atail mihting oh mihting tohrohr kan? (b) Ia duwen atail en koulki koul en kaping kan ong Siohwa, oh ihs me anahne tiengla mwowe? (Menlau kilang tepin kilel.)

⁹ Ia ekei kahrepe kan me kahrehiong uhk  ken peikasal ni omw kin koul? Mwein omw peneinei de pil tiahk en omw wasao kin sahn koul. De mwein ke rong sounkoul mai kan nan redio de TV oh ke namenengki ngilomwen ni omw kapahrekihong ngilarailo. Ahpw kitail koaros pwukoahki en koulki koul en kaping kan ong Siohwa. Eri kolada noumw pwuhken koul, sarada oh koul ni ngoang! (Esra 3:11; wadek Melkahka 147:1.) Atail Wasahn Kaudok tohto rahnwet kin mie TV (screen) me kasalehda lokaia kan en koul ko, oh met kak sewese kitail en koul laud. E pil kaperen en ese me ahnsou wet, en koulki koul en wehio kan wiahier kisehn Sukuhl ong Elder kan. Met kasalehda kesempwalpen elder kan ar en tiengla mwowe ni ahnsoun koul nan mihting kan en mwomwohdiso.

10. Dahme kitail en tamataman ma kitail kin perki koul ni ngihl laud?

¹⁰ Me tohto kin perki en koul laud pwehki re medewe me re pahn nohn katairong de ngilarail ko suwed. Ahpw medewehla met. “Kitail koaros kin kalap sapwungala” ni atail kin koasoi, ahpw met sohte kin irekitaildihsang atail en koasoakoasoi. (Seims 3:2) Eri ia kahrepen atail en mweidohng ngilatail me soh unsek en irekitaildihsang atail en koulki koul en kaping kan ong Siohwa?

11, 12. Ia duwen atail kak kamwahwihala atail kin koul?

¹¹ Mwein kitail kin perki koul pwehki kitail sehse ia duwen atail pahn koul. Ahpw mie ekei wiepe mengei kan me kitail kak wia pwehn kamwahwihala atail kin koul. *

¹² Ke kak koul ni ngihl laud oh kehlail sang ni omw sukuhlki ia duwen omw pahn esingek ni pwung. Duwehte lioal eh kin kihong kehl en dengki, omw esingek kak kakehlakahla ngilomw ni ahnsou me ke kin lokaia de koul. Ke anahne koul laud duwehte ni omw  kin lokaia de pil laudsang. (Menlau kilang iren sawas kan nan pwuhken Benefit From Theocratic Ministry School Education, pali 181 lel 184, pahn sawaspen oaralap me koasoia duwen omw en esingek ni pwung (Properly Control Your Air Supply). Ni mehlel, ekei pak Paipel kin mahsanihong sapwellimen Siohwa tohnkaudok kan ren ‘ngisingiski arail peren’ ni arail koulki koul en kaping kan.​—Mel. 33:1-3.

13. Menlau kawehwehda ia duwen atail kak koul ni soh peikasal.

¹³ Nan atail kaudok en peneinei de pein atail onop, song wia soahng pwukat: Pilada ehu koul sang koul kan me ke keieu perenki nan neitail pwuhken koulo. Wadek ire ehu nan koulo ni ngihl laud oh ni soh peikasal. Mwuri, ni omw doadoahngki soangen ngihl laudohte, ndahla lepin lokaia ko koaros nan ireo ni esingek tehieu. Kowe eri koulki lokaia ko ni ngihl laudohte me ke doadoahngki. (Ais. 24:14) Ngilen omw koul pahn laudla oh met mwahu. Dehr perki de namenengki met!

14. (a) Ia duwen omw sarapeseng eh kak sewese omw kin koul? (Menlau kilang kakon me oaralape “ Ia Duwen Omw Pahn Kamwahwihala Omw Kin Koul.”) (b) Iren sawas dah kan me pid powehdi kahpwal en ngihl me ke diarada sewese iuk?

¹⁴ Pwehn koul ni ngihl kehlail, kitail anahne sarapeseng laudsang ni ahnsou me kitail kin lokaia. Ahpw dahme ke pahn wia ma ke pehm me ngilomwen luwet de nohn marahra? Ke kak kilang ekei iren sawas nan kakon me koasoia duwen omw pahn powehdi soangen kahpwal kan me pid met (Overcoming Specific Problems) me mi nan pwuhken Benefit From Theocratic Ministry School Education, pali 184.

15. (a) Pakair dahieu me wiawi ni mihting en pahr en 2016? (b) Ia ekei kahrepe kan me pwuhken koulo anahne pwurehng wiawihda?

¹⁵ Koaros me iang towehda mihting en pahr (annual meeting) en 2016 perenkihda ni Brother Stephen Lett, sang Pwihn me Kin Apwalih Mwomwohdiso nan Sampah Pwon, eh pakairki duwen pwuhken koul kapw me oaralape Koul ni Peren ong Siohwa. Nin duwen  Brother Lett eh kawehwehda, ehu kahrepe me kitail anahnehki pwuhken koul kapw iei pwehki New World Translation of the Holy Scriptures pwurehng wiawihda. Lepin lokaia kan nan koul ko wekidekla pwehn kihsang lokaia kan me sohte dierek nan pwuhken New World Translation. Pil ehu, re pil kapatahiong koul kapw kan duwen doadoahk en kalohk oh pil pweinen pweipwei sapahlo. Patehng met, pwehki koul kin wia kisehn atail kaudok me kesempwal, Pwihn me Kin Apwalih Mwomwohdiso nan Sampah Pwon men wiahda pwuhken koul ehu me uhdahn mwahu oh kaselel. Eri kilin pwuhko me poh silper en duwehte pwuhken New World Translation.

16, 17. Ia pil ekei wekidekla kan me wiawihong pwuhken koul kapwo?

¹⁶ Pwehn kamengeila omw en doadoahngki pwuhken koulo, koul kan me pid oaralap ehu kin mihte pahn oaralapo. Karasepe, koul nempe 1 lel 12 kin koasoia duwen Siohwa, koul waluh ko mwurin mwo kin koasoia duwen Sises oh pil pweinen pweipwei sapahlo, oh koul kan mwuri pil kairekdi duwehte. Irekidi en oaralap ko koaros mi ni tepin pwuhken koulo. Met kak sewese brother men, karasepe, ni eh pahn pilada mehnia koul ong kapahrek ong wehipokon.

¹⁷ Pwehn sewese koaros en koul sang loalarail, ekei lepin lokaia kan nan koul ko wekidekla pwehn kasalehda ni sansal audepen koulo. Lokaia kan me sohla kadoadoahk pil kohsang. Wekideklahn oaralap en koulo “Pere Loalamwail” ong “Kitail Kin Pere Atail Mohngiong” uhdahn konehng. Dahme kahrehda? Met pwehki mwoweo, ni emen eh koulki lepin lokaia ko, e kin ndindaiong meteikan dahme ren wia. Met kakete kahrehda me kapwodo nan mwomwohdiso, me perenki rong padahk mehlel, me pwulopwul kan, oh sister kan me iang mihting kan oh pil mihting tohrohr kan, ren soansuwedkihda. Eri oaralap en koulo oh lepin lokaia ko wekidekla.

18. Dahme kahrehda kitail en esehla koul kan nan neitail pwuhken koulo? (Menlau kilang nting tikitik kan me kileldi.)

¹⁸ Koul tohto sang pwuhken Koul ni Peren ong Siohwa kin duwehte kapakap kan. Koul pwukat kak seweseiuk en patohwanohng Siohwa omw pepehm kan. Koul teikan pahn sewese kitail en kangoange riatail Kristian kan en “nsenoh sawaspene ni kasalepen atail limpoak oh atail wiewia mwahu kan.” (Ipru 10:24) Kitail men esehla koul ko, ngilen keseng ko, oh lepin lokaia kan en atail koul ko. Ehu ahl me kitail kak wia met iei en rong rekord en ngilen riatail kan me koulki koul ko. Mie soangen rekord pwukat nan jw.org. Ni omw praktiski koul pwukat ni imwomwo, ke kak sukuhlki en koul ni soh peikasal oh pil sang loalomw. *

19. Ia duwen koaros nan mwomwohdiso ar kak kaudokiong Siohwa?

¹⁹ Tamataman me koul kin wia kisehn atail kaudok me kesempwal. Met wia ahl laud ehu en kasalehiong Siohwa me kitail kin poakohng ih oh kalahnganki soahng koaros me e ketin wiahda ong kitail. (Wadek Aiseia 12:5.) Ni omw kin koul ni peren, ke kak kangoange meteikan en wia duwehte. Koaros nan mwomwohdiso, mehnda ma pwulopwul, mah, de kapw nan padahk mehlel, kak kaudokiong Siohwa ni ahl wet. Eri dehr peikasalki omw kin koul sang loalomw. Kapwaiada kaweid en sounmelkahkao me nda: “Kumwail kouliong KAUN-O.” Ei, ken koul ni peren!​—Mel. 96:1.