1. Dahme wahnpoaron Pohl ntingkilahng Kristian kan nan Kolose? (Menlau kilang tepin kilel.)

WAHNPOARON POHL ntinglahng Kristian kan nan Kolose erein eh wie sensel nan Rom mpen pahr 60 lel 61. E kawehwehiong irail dahme kahrehda irail anahne ‘audehkinirailda kupwuren Koht,’ de ahneki koahiek en kilang soahng kan nin duwen me Siohwa kin ketin wia. (Kol. 1:9) Pohl nda: “I men ndaiong kumwail: kumwail dehr mweidohng emen en pitihekin kumwail akamai likamw kan. Kumwail kanahieng pwe emen de pitihkinkumwaildi loalokong widing mwahl en aramas akan, me re kin alehdi sang ni padahk kodoudou en mehn kawa ko, oh sang rehn ngehn suwed akan me kin kakaun wasa nin sampah, a kaidehn sang rehn Krais.” (Kol. 2:4, 8) Eri, Pohl kawehwehda dahme kahrehda elen madamadau pwukat sapwung oh dahme kahrehda aramas tohto kin perenki soahng pwukat. Karasepe, ekei madamadau pwukat kak kahrehiong aramas en medewe me re loalokongsang de mwahusang meteikan. Eri Pohl ntingihedi nah kisinlikowo pwehn sewese Kristian kan en soikala madamadau oh wiewia sapwung kan en sampah wet.​—Kol. 2:16, 17, 23.

2. Dahme kahrehda kitail pahn koasoiapene karasaras kan duwen elen madamadau en sampah?

 ² Aramas akan me kin ahneki madamadau en sampah kin pohnsehsehla sapwellimen Siohwa kaweid kan, oh ma kitail sohte kanahieng, arail madamadau kak ekisekis kaluwetehla atail kin koapworopworki sapwellimen Koht erpit. Kitail koaros kin kilang madamadau en sampah nan tv, Internet, nan wasahn doadoahk, de wasahn sukuhl kan. Dahme kitail kak wia pwehn soikala soahng suwed pwukat? Nan iren onop wet, kitail pahn koasoiapene karasaras limau me pid elen madamadau en sampah oh tehk ia duwen atail kak soikala soangen madamadau pwukat.

3. Soangen elen madamadau dah me aramas tohto kin mwahuki? Dahme kahrehda?

³ “I kak wia aramas mwahu men ahpw sohte kamehlele Koht.” Me tohto kin kalapw ahneki soangen madamadau wet nan sahpw tohto rahnwet. Aramas me kin nda met ele sohte kin uhdahn medemedewe laud ma mie Koht, ahpw ele e kin perenki eh saledek en wia dahme e men wia. (Wadek Melkahka 10:4.) Ekei medewe me re loalokong ma re nda: “I kak ahneki tiahk mwahu ahpw sohte kamehlele Koht.”

4. Dahme kitail kak nda pwehn sewese emen me kamehlele me sohte Sounkapikpatail?

⁴ Ia duwe, e wia elen loalokong en kamehlele me sohte Sounkapikpatail? Ekei aramas kin pingida ni arail rapahki pasapengo sang palien sains. Ahpw pasapeng mehlelo mengei. Ia duwe, ihmw ehu kakete pein miehla? Uhdahn soh! Emen anahne kauwada ihmwo. Ahpw soahng kan me momour kin wiawihkihda soahng tohto sang ihmw ehu. Pil soahng kan me momour duwehte kisin war kan nan paliwar (cell) kak wiahda ekei cell me duwehte irail, ahpw ihmw ehu sohte kak wia met. Met wehwehki me cell kan kak nekidala soahng kan me anahn oh pil kihla nan cell kapw kan pwe ren kak wiahda cell teikan me duwehte irail. Ihs me kapikada cell kan me ahneki koahiek en wia soahng pwukat? Paipel sapengki: “Aramas akan me kin kauwada ihmw-ahpw Koht, iei ih me ketin wiahda mehkoaros.”​—Ipru 3:4.

5. Dahme kitail kak ndahki duwen madamadau me kitail kak ese dahme mwahu ahpw sohte kamehlele Koht?

⁵ Dahme kitail kak ndahki duwen madamadau me kitail kak ese dahme mwahu ahpw sohte kamehlele Koht? Mehlel, Mahsen en Koht mahsanih me aramas me sohte kin kamehlele Koht pil kak ahneki tiahk mwahu. (Rom 2:14, 15) Karasepe, emen ele kin wauneki oh poakohng eh pahpa nohno. Ahpw ma e sohte kin idawehn sapwellimen Siohwa koasoandi kan, e kakete wiahda pilipil sapwung kan. (Seims 4:12) Aramas loalokong tohto rahnwet kin kamehlele me kitail anahne sapwellimen Koht sawas pwehn kamwahwihala kahpwal laud kan en sampah wet. (Wadek Seremaia 10:23.) Eri kitail en dehr medewe me kitail kak ese dahme mwahu ahpw sohte kamehlele Koht oh sohte idawehn sapwellime koasoandi kan.​—Mel. 146:3.

6. Dahme aramas tohto kin medewehki duwen pelien lamalam?

⁶ “Ke kak peren ahpw sohte iang ehu pelien lamalam.” Aramas tohto kin medewe me pelien lamalam kan kin kasangat oh sohte kesempwal. Ekei sohte mwahuki pelien lamalam kan me kin padahngki duwen kisiniei nan ehl, idingkihong aramas akan en kihong irail mwohni, de utungada sounpolitik kan. E sohte kapwuriamwei me e tohtohlahr aramas me kin nda me re nsenamwahu mendahki sohte arail pelien lamalam! Irail ele kin nda, “I men esehla duwen Koht, ahpw I sohte men iang ehu pelien lamalam.”

7. Ia duwen kaudok mehlel eh kak kahrehda ken nsenamwahu?

⁷ Ia duwe, kitail uhdahn kak peren ma sohte atail pelien lamalam? Ei uhdahn, aramas men kak nsenamwahu ma e sohte iang pelien lamalam likamw. Sohte emen kak uhdahn peren ahpw ihte ma e wia kompoakepahn Siohwa, “Koht en  peren.” (1 Tim. 1:11, NW) Soahng koaros me Siohwa kin ketin wia kin sewese meteikan. Nin duwen sapwellime ladu kan, kitail kin nsenamwahu pwehki kitail kin rapahki ahl akan en sewese meteikan. (Wiewia 20:35) Karasepe, medewehla ia duwen kaudok mehlel eh kak sewese peneinei kan en nsenamwahu. Kitail kin sukuhlki en wauneki oh lelepek ong atail werek, kakairada seri kan me kin kasalehda wahu, oh kin ahneki limpoak mehlel ong tohn atail peneinei kan. Kaudok mehlel kin sewese sapwellimen Siohwa aramas akan sampah pwon en doadoahkpene ni popohl oh kasalehda limpoak nan mwomwohdiso.​—Wadek Aiseia 65:13, 14.

8. Ia duwen Madiu 5:3 eh sewese kitail en wehwehki dahme kin uhdahn kahrehiong aramas akan en peren?

⁸ Eri ia duwe, aramas men kak uhdahn peren ahpw sohte papah Koht? Dahme kin kahrehiong aramas akan en peren? Ekei kin perenki arail doadoahk, mwadong kan, oh soahng kan me re kin perenki wia. Meteikan kin nsenamwahu ni arail apwalih arail peneinei kan oh kompoakparail kan. Mendahki soahng pwukat kin wahdo peren, mie soahng tohto likin met. Kitail weksang mahn akan, eri kitail kak esehla Sounkapikpatail oh kaudokiong ih. E ketin wiaikitailda ni ahl ehu me kahrehda kitail en peren ni atail wia met. (Wadek Madiu 5:3.) Karasepe, kitail kin peren oh ale kangoang ni atail tuhpene rehn riatail Kristian kan pwehn kaudokiong Siohwa. (Mel. 133:1) Kitail pil kin diar peren ni atail wia kisehn pirien en Kristian kan sampah pwon, mourki mour mwakelekel, oh ahneki koapworopwor kaselel ehu me kohkohdo.

9. (a) Dahme me tohto kin medewehki wia nsenen pwopwoud? (b) Dahme kahrehda Mahsen en Koht mahsanih me wia nsenen pwopwoud likin pwopwoud sapwung?

⁹ “E sapwung en wia nsenen pwopwoud rehn emen me kaidehn ei pwoud?” Ele emen kin idek rehmw: “Dahme ke nohn poadidihki? Iangete peren.” Ahpw Mahsen en Koht keinapwidi tiahk samin me pid wia nsenen pwopwoud. * (Wadek 1 Deselonika 4:3-8.) Siohwa sapwellimanki pwuhng en wiahda kosonned kan ong kitail pwehki ih me ketin kapikitailda. E mahsanih me ihte nanpwungen pwopwoud ehu me mweimwei en wia nsenen pwopwoud. Siohwa ketikihong kitail kosonned kan pwehki e ketin poakohng kitail. E mwahngih me ma kitail idawehn kosonned pwukat, atail mour pahn mwahula. Limpoak oh wahu nan peneinei ehu oh pepehm en sohte perki mehkot pahn laudla ma irail kin idawehn sapwellimen Koht kosonned kan. Ahpw Koht pahn ketin kaloke irail kan me ese sapwellime kosonned kan ahpw sohte peikiong.​—Ipru 13:4.

10. Ia duwen Kristian men eh kak soikala tiahk samin me pid wia nsenen pwopwoud?

¹⁰ Paipel padahkihong kitail ia duwen atail en soikala tiahk samin me pid wia nsenen pwopwoud. Kitail anahne kaunda dahme kitail kin kilang. Sises mahsanih: “Mehmen me pahn kilikilang lih emen oh men dihpki, nahn e wiadahr dipen kamwahl nan kapehde. Eri, ma palimaun en pwoaren mesomwen pahn kahrehiong uhk nan dihp, pwadikasang oh kesehweisang uhk.” (Mad. 5:28, 29) Eri kitail en dehr kilang kilel oh kasdo suwed oh rong koul kan me pid tiahk samin. Pohl ntingihedi: “Kumwail uhdahn pahn kemehla ineng kan en sampah me kin wie doadoahk loalamwail, eri, iet akan; kamwahl.” (Kol. 3:5) Kitail pil anahne kaunda dahme kitail kin medemedewe oh koasoia.​—Ep. 5:3-5.

11. Dahme kakete kahrehiong kitail en men ahneki doadoahk en mwohni me mwahu?

¹¹ “Doadoahk en mwohni me mwahu pahn kahrehiong  uhk en nsenamwahu.” Aramas akan ele pahn ndaiong kitail en nsenohkihte atail ahnsou oh kehl ong atail doadoahk en mwohni, ahpw mehlel ehu doadoahk me pahn kahrehiong kitail en ndandla, ahneki manaman, de kepwehpwehla. Pwehki me tohto kin medewe me en ahneki doadoahk en mwohni me mwahu pahn kahrehda nsenamwahu, mwein kitail kakete tepida ahneki soangen madamadau wet.

12. En ahneki doadoahk en mwohni me mwahu pahn kahrehiong uhk en nsenamwahu?

¹² Ia duwe, mehlel me doadoahk en mwohni me pahn kahrehiong uhk en ahneki manaman oh ndandla pil pahn kahrehda nsenamwahu? Soh. Medewehla duwen met. Sehdan men ahneki manaman oh ndandla. Mwomwen me e alehdi dahme e mwahuki. Ahpw e kin lingeringer oh sohte nsenamwahu. (Mad. 4:8, 9; Kaud. 12:12) Weksang met, medewehla ia uwen atail kin nsenamwahu ni atail sewese meteikan en sukuhlki duwen Koht oh duwen ahnsou kaselel ehu me kohkohdo me e ketin inoukihda. Sohte ehu doadoahk en mwohni me kak kihong uhk soangen nsenamwahu duwehte met. Pil ehu, en ahneki doadoahk en mwohni me mwahu kin kahrehda aramas akan en ahneki madamadau en siaipene, lingeringer oh men pei, de peirinki meteikan. Ahpw soahng pwukat sohte kin kaitarala dahme re anahne. Paipel mahsanih me re kin “songosong en koledi kisinieng.”​—Ekl. 4:4, NW.

13. (a) Ia duwen atail en kilangwohng atail doadoahk en mwohni? (b) Dahme kahrehiong Pohl en uhdahn nsenamwahu?

¹³ Ei mehlel, kitail anahne doadoahk en mwohni, oh e sohte sapwung en pilada doadoahk ehu me kitail mwahuki. Ahpw atail doadoahk en mwohni en dehr wiahla mehkot me keieu kesempwal nan atail mour. Sises mahsanih: “Sohte aramas emen kak liduwih soumas riemen; pwe e pahn kailongki emen, e ahpw pahn poakepoake meteio; e pahn loalopwoatohng emen, e ahpw pahn mwamwahliki meteio. Eri, ih pil duwen kumwail: kumwail sohte kak papah Koht oh pil kepwehn sampah kan.” (Mad. 6:24) Papah Siohwa oh padahkihong meteikan duwen Paipel pahn kahrehda nsenamwahu keieu laud. Wahnpoaron Pohl pil kin lelohng met. Ni ahnsou me e pwulopwul, e kin nsenohkihte pwehn ahneki doadoahk ehu me pweida mwahu. Mwuhr, e uhdahn perenki ni eh kilang mahsen en Koht eh wekidala mour en aramas akan me e kalohk ong. (Wadek 1 Deselonika 2:13, 19, 20.) Sohte ehu doadoahk nin sampah me kak kahrehiong kitail en nsenamwahu sang atail kin papah Siohwa oh padahkihong meteikan duwen ih!

14. Dahme kahrehda aramas akan ahneki madamadau me re kak kamwahwihala pein ar kahpwal kan?

¹⁴ “Aramas kak pein kamwahwihala arail kahpwal kan.” Aramas tohto kin pwungki soangen madamadau wet. Dahme kahrehda? Ma met mehlel, met wehwehki me kitail sohte anahne sapwellimen Koht kaweid oh kitail kak wia dahme kitail mwahuki. Ele ke rong aramas ar kin nda me kahpwal kan me duwehte mahwen, mwersuwed, soumwahu, oh semwehmwe kin tikitikla. Ehu ripoht koasoia: “Ehu kahrepe me soahng kan kin mwamwahula iei pwehki aramas akan koasoanehdi en kamwahwihala sampah.” Met mehlel? Ia duwe, aramas akan diaradahr ia duwen ar pahn kamwahwihala kahpwal kan en sampah? Kitail tehkpene ire mehlel kan.

15. Dahme kahrehda kitail kak nda me kahpwal kan en sampah uhdahn laud?

¹⁵ Ia duwe, aramas akan kamwahwihalahr kahpwal kan en mahwen? Erein Mahwen Keieu oh Keriau en Sampah, aramas tohtohsang meh wenedep (60 million) mehla. Nan pahr 2015, nempehn aramas akan me anahne kohkohsang imwarail kan pwehki mahwen oh kalokolok lelehr mpen meh 65,000,000. Nan pahr 2015 kelehpw, aramas 12,400,000 anahne kohkohsang imwarail ko. Ia duwen mwersuwed? Nan ekei sahpw, ekei soangen mwersuwed tikitikla. Pil ni ahnsowohte, ekei soangen mwersuwed duwehte cypercrime, tiahk lemei nan peneinei, tiahk en terrorist oh mwersuwed teikan lalaudla. Ia duwen soumwahu? Mehlel me aramas akan diaradahr wini kan en kamwahwihala ekei soumwahu kan. Ahpw nan pahr 2013, ehu ripoht nda me sounpar koaros aramas duwerar me pahnangin sounpar 60 kin mehkihla soumwahu en mohngiong, stroke, kanser, soumwahu en ngolungol, oh soumwahu en suke. Oh ia duwen semwehmwe? Pangk me adaneki The World Bank ripohtki me nempehn aramas akan me inenen semwehmwe nan Aperika kelehpw lalaudla oh lella aramas riesapw walidep (280 million) nan pahr 1990 oh aramas silisapw silidep (330 million) nan pahr 2012.

16. (a) Dahme kahrehda Wehin Koht kelehpw me kak kamwahwihala kahpwal kan en sampah? (b) Dahme Aiseia oh sounmelkahkao nda me Wehin Koht pahn wia?

¹⁶ Ire mehlel pwukat sohte kapwuriamwei ong kitail. Rahnwet, aramas roporop kan iei me kin kaunda palien mwohni oh pwihn en politik kan. Aramas pwukat sohte kak kauhdi mahwen, mwersuwed, soumwahu, oh semwehmwe. Wehin Koht kelehpw me kak wia met. Medewehla dahme Siohwa pahn ketin wia ong aramas akan. Sapwellime Wehi pahn kihsang soahng koaros me kin kahrehda mahwen, me duwehte roporop ong pein emen, wiewiahn mwersuwed, uhki wehi, kaudok likamw, oh pil Sehdan. (Mel. 46:8, 9) Wehin Koht pahn kauhdi mwersuwed. Pil rahnwet, wehi wet kin padahkihong aramas rar kei en poakohng oh likih emenemen. Sohte koperment ehu me kak wia met. (Ais. 11:9) Ahnsou keren, Siohwa pahn ketin kauhdi soumwahu oh ketikihong aramas koaros roson unsek. (Ais. 35:5, 6) E pahn ketin kauhdi semwehmwe oh kahrehiong aramas koaros en mour nsenamwahu oh ahneki nanpwungmwahu keren reh. Met uhdahn kesempwalsang en naineki mwohni tohto.​—Mel. 72:12, 13.

17. Ia duwen omw kak soikala elen madamadau en sampah?

¹⁷ Eri ma ke rong duwen ehu elen madamadau ndand me mwomwen pahn kasonge omw pwoson, sukuhlki dahme Paipel mahsanih me pid duwen ireo. Koasoiaiong emen Kristian koahiek. Medemedewe dahme kahrehda aramas akan kin mwahuki elen madamadauo, dahme kahrehda e sapwung, oh ia duwen omw kak soikala. Kitail kak pere kitail sang elen madamadau en sampah ni atail pahn wia dahme Pohl nda: “Kumwail kanahieng amwail wiewia kan mwohn irail kan me seupwoson. Kumwail uhdahn pahn ese duwen amwail pahn sapeng koaros ni pwung.”​—Kol. 4:5, 6.