ALLEN * nda: “I salohki ei keseudo wasaht. I sehse ma I pahn kak wiahda kompoakepahi de ma re pahn pwungkin ie.” Allen kin nannanti en ahnla mwomwohdiso kapw ehu me e keseula ie me dohki mwail 900 sang eh wasao.

Ma ke keseula nan ehu mwomwohdiso tohrohr, ele ke pil kin saloh. Dahme kak seweseiuk en wiahda wekidekla kan? Dahme ke kak wia ma wekidekla kan apwal sang dahme ke kasik? Weksang met, ma ke sohte keseula wasa kis, ia duwen omw kak sewese pwe wekidekla kan en dehr nohn apwal ong me keseudo wasao?

Medewehla karasaras wet: Ni tuhke ehu eh keseula ehu wasa tohrohr, e kin ahneki kahpwal en kakete mengila. Ni tuhkeo eh pahn weiweidahsang nan pwehlo, pali laud en kalewe kan pahn lopla pwe en mengei ong uhk en wahda. Ni ahnsou me ke pwurehng padokedi, tuhkeo anahne mwadang kawosehda kalewe kapw kan. Pil duwehte, mie soangen kahpwal me ke kak lelohng ni omw keseula nan ehu mwomwohdiso tohrohr. Nan mwomwohdiso me ke keseusango, ke wiahdahr kompoakepahmw kan oh ke kin kaukaule nan omw koasoandi en papah Siohwa. Ke rasehng tuhke kan me “kalewe kan” mieier. Ahpw met ke anahne kakairada kalewe kapw pwehn kak kekeirda mwahu nan mwomwohdiso me ke keseudo ie. Dahme pahn seweseiuk en wia met? Doadoahngki kaweid kan en Paipel. Kitail pahn tehkpene ekei kaweid pwukat.

Me kin kaukaule wadek Mahsen en Koht kin “rasehng tuhke kan limwahn pihl akan, me kin materek nan rahk koaros, oh tehrail kan sohte kin mengila. Re kin pweida mwahu ni soahng koaros me re kin wia.”​—Mel. 1:1-3.

Duwehte tuhke pwoat me kin mi limwahn pihl pwe en pweida mwahu, Kristian men anahne kaukaule onopki Mahsen en Koht pwe en kolokolte eh nanpwungmwahu rehn Koht. Eri, pousehlahte wadek Paipel rahn koaros, oh kaukaule towehda mihting kan en mwomwohdiso. Kolokolte omw koasoandi mwahu ong kaudok en peneinei oh pil pein omw onop. Ke anahne pousehlahte wiewia soahng koaros me ke kin wia mwoweo pwehn kolokol omw nanpwungmwahu rehn Siohwa en kehlail.

“Sewese meteikan, ke ahpw pahn ale sawas sang meteikan.”​—Lep. Pad. 11:25.

Ke pahn kehlailda oh mwadang ahnla mwomwohdiso ehu ni omw pahn iang kalohk. Kristian elder men me adaneki Kevin nda: “Dahme keieu sewese ngehi oh ei pwoudo iei en iang doadoahk en sawaspen pioneer mwurinte at keseudo nan mwomwohdiso kapw. Se mwadangete esehla riat Kristian ko, pioneer ko, oh at wasahn kalohk.” Roger, me keseula wasa ehu me dohki mwail 1,000 sang wasa me e kousoan ie, nda: “Ahl me keieu mwahu en ahnla mwomwohdiso kapw ehu iei en iang kalohk ahnsou koaros me ke kak. Pil padahkihong elder kan me ke kak sawas ni ahl sohte lipilipil, mwein kamwakele Wasahn Kaudok, wiliandi emen me pahn wia padahk, de sawaskihda mehn peidaid ong mihting kan. Ni riatail Kristian kan kin kilang emen me kapwodo nan mwomwohdiso eh ahneki irair en tounmetei, e pahn mengei ong irail en kompoakepahnki ih.”

“Kumwail langahda douluhl mohngiongimwail kan!”​—2 Kor. 6:13.

Kalaudehla omw limpoak ong riomw Kristian kan. Mwurin Melissa oh eh peneineio keseula nan mwomwohdiso kapw ehu, re kin nsenohki en wiahda kompoakparail kapw kan. E nda: “Se kin koasoiong riat kan  nan Wasahn Kaudok mwohn oh mwurin mihting kan. Met kin kihong kiht ahnsou laud en koasoiong irail ahpw kaidehn en rahnmwahute.” Met pil sewese peneineio en mwadang esehla ahd kan. Patehng met, re kalaudehla ar ehuong meteikan ni arail kin kasamwo irail ong imwarailo. E kin kakehlaka arail nanpwungmwahupene. Melissa pil nda: “Se kin ehukihpene nait nempehn delepwohn kan pwe sen kak pesehpene oh ehupene wia doadoahk kan nan mwomwohdiso oh pil wiewia teikan.”

Ma ke apwalki omw pahn koasoiong aramas akan me ke ahpwtehn tuhwong, ke kak tepikihda soahng mengei kan. Karasepe, sirei—mehnda ma ke sohte men wia met nin tapio. Omw sirei pahn kahrehiong meteikan en tehk uhk. Ni mehlel, “mesen kouruhr kin kaperenda nan kapehdomw.” (Lep. Pad. 15:30) Rachel, me keseula wasa ehu me dohsang wasa me e tikidao, nda: “Ngehi aramas namenek men. Ekei pak I anahne idingkihong pein ngehi en koasoiong riei Kristian kan nan mwomwohdiso kapw me I keseula ie. I kin rapahki emen me wie mwomwohd nan Wasahn Kaudok oh me sohte koasoakoasoiong emen. Ele aramaso kin namenek duwehte ngehi.” Dahme ke seu wiahda omw mehn akadei en koasoiong emen me kapw mwohn de mwurin mihting koaros?

Ni pali teio, ele ke pahn perenki tuhwong me kapw kan erein wihk kan me re tepin keseudo wasao. Ahpw mwuhr, ke sohla pahn perenki. Ni ahnsowo, ke anahne nantihong pousehlahte wiahda kompoakepahmw kapw kan.

Ekei tuhke kin pwand en kekeirda nan wasa kapw. Pil duwehte, kaidehn koaros kin duwepenehte ni arail kin ahnla mwomwohdiso kapw ehu. Ma ke keseudo wasao wereila ahpw ke kin apwalkihte wekidekla kan, omw doadoahngki kaweid en Paipel pwukat kak sawas:

“Kitail dehr pwangahki atail wiewia mwahu kan; pwe ma kitail sohte pahn pwangahkihda, ahnsou pahn leledo kitail ahpw pahn dolung.”​—Kal. 6:9.

Mweidohng ahnsou laudsang dahme ke kasik ni tapio pwe ken ahnla wekidekla kan. Karasepe, misineri tohto me iang Kilead kin mihmi nan sahpw me re pekederlahng papah ie sounpar kei daulih arail pahn pwurala mwemweit uhdahn sapwarailo. Arail wia met kin sewese irail en karanihala riarail Kristian kan nan sahpw me re papah ie oh wiahda wekidekla kan pwehn ahnla tiahk en sahpwo.

Alejandro, me keseulahng wasa kan pak tohto, ese me ke sohte kak karuwa omw pahn ahnla wekidekla kan. E nda: “Mwurin at keseudo wasaht, ei pwoudo nda, ‘Kompoakepahi kan koaros mi nan mwomwohdiso me kita keseusang ie!’” Alejandro katamankihong me e ndahla soahngohte sounpar riau samwalahro—mwohnte ara keseudo mwo. Ahpw erein sounpar riau ko, eh pwoudo kin nsenohki tehk meteikan oh mendahki arail sehse emenemen, re wiahla kompoakepah keren kan.

“Ke dehr idek, ‘Dahme ahnsou samwalahr ako mwahukihsang rahn pwukat?’ Met kaidehn peidek en aramas loalokong.”​—Ekl. 7:10.

Dehr kapahrekihpene mwomwohdiso me ke kapwodo ie ong mwomwohdiso en mwoweo. Karasepe, Kristian kan nan mwomwohdiso kapwo ele kin nennen de perenki koasoi laudsang me ke ahnlahr. Medemedewehte soahng mwahu kan rehrail, duwehte me ke mwahuki ren wiahiong uhk. Ekei me kapwodo kan kin pwuriamweikihla me arail keseula wasao kin kahrehiong irail en pein idek rehrail, ‘I kin uhdahn poakohng “pwihn minimin” en riatail kan koaros?’​—1 Pit. 2:17, NW.

 “Kumwail peki, e ahpw pahn kohieng kumwail.”​—Luk 11:9.

Pousehlahte kapakapki sawas. David, me wia elder men, nda: “Dehr song en kelehpwki kahpwalo. Soahng tohto kitail kak wia pwehki sapwellimen Siohwa sawas. Ken kapakapki duwen met!” Rachel, me kitail koasoia mwoweo, pil pwungki: “Ma ngehi oh ei pwoudo pehm me se sohte uhdahn iang wia kisehn mwomwohdiso, se kin kapakapki ong Siohwa oh nda, ‘Komw menlau ketin kasalehiong kiht ma se wiewia mehkot me kahrehda en apwal ong meteikan ren karanihala kiht.’ Eri se kin song en kihong at ahnsou laud ong riat Kristian ko.”

Pahpa nohno kan, ma noumwail seri kan kin apwalki ahnla wasao, kihong ahnsou en iang irail kapakapki ire wet. Sewese irail en wiahda kompoakparail kapw kan sang ni amwail koasoanehdi ahnsou ong werek mwahu kan me pahn kakehlaka kumwail.

Dahme ke kak wia pwehn sewese irail kan me keseudo nan omw mwomwohdiso? Nantihong ken wiahla kompoakparail mehlel men sangete nin tapio. Pwehn wia met, song en medewehda soahng kan me ke pahn kalahnganki ma kowe me kapwala wasa kis, kowe eri wia soahng pwukat. (Mad. 7:12) Ia duwe, irail me kapwodo kan pahn kak iang uhk wia omw kaudok en peneinei de kilang prokram en JW Broadcasting? Ke kak luke irail en iang uhk nan doadoahk en kalohk? Ma ke luke irail en iang uhk mwenge, re pahn tamatamante omw kasamwo irail ni kadek ahnsou reirei. Soangen sawas mwahu dah me ke pil kak sewesehki me kapwodo kan?

Carlos nda: “Ni at keseudo nan at mwomwohdiso kapwo, emen sister kihong kiht eden sidohwa kan me pweitikitik oh mwahu. Met uhdahn wia sawas laud.” Irail kan me keseula wasa karakar, kopou de kalapw keteu oh me weksang irair en arail wasao ele pahn kalahnganki en esehla soangen likou dah me pahn mwahu en likawih. Ke pil kak sewese irail en pweida nan arail kalohk sang ni omw padahkihong irail poadopoad en wasao de kawehwehiong irail dahme aramas akan kin kamehlele me pid pelien lamalam kan.

Allen, me kitail koasoia ni tapio, mihmiher nan eh mwomwohdiso kapwo dauliher sounpar ehu. E nda: “I anahne idingkihong ie nin tapio en esehla riei Kristian kan. Ahpw met re duwehla pein ei peneinei, oh I uhdahn peren.” Allen esehda me sang eh keseuo, sohte kompoakepah men me e luhssang. E pil wiahda me kapw kan, me ele pahn wiahte kompoakepah kohkohlahte.