1, 2. (a) Ia duwen Sises eh ketin sapeng Piter ni Piter eh patohwanohng ih en ketin kadek ong pein ih? (Menlau kilang tepin kilel.) (b) Dahme kahrehda Sises ketin sapeng ih ni ahl wet?

SAPWELLIMEN Sises tohnpadahk ko uhdahn pwuriamweila! Irail medewe me Sises pahn ketin kapwurehdo wehin Israel, ahpw Sises mahsanih me e pahn kereniong lellong lokolok oh pwoula. Wahnpoaron Piter me tepin lokaia: “Maing Kaun, komw ketin kadek ong pein komwi, mepwukat sohte mwahn pahn lelohng komwi.” Sises mahsanihong: “Kohla mwuri, Sehdan! Kowe mehn kadipekelekel ehu ong ie, pwehki dahme ke medemedewe, kaidehn sapwellimen Koht madamadau, ahpw ahn aramas.”​—Mad. 16:21-23; Wiewia 1:6.

² Ni eh mahsanih met, Sises ketin kasalehda ni sansal me mie wekpeseng nanpwungen sapwellimen Siohwa madamadau oh madamadau en sampah wet me Sehdan kin kakaun. (1 Sohn 5:19) Piter kangoange Sises en sapwellimanki madamadau roporop me aramas tohto nin sampah wet kin ahneki. Ahpw Sises mwahngih me Siohwa ketin kupwurki ih en onopada ong lokolok oh pwoula me pahn kereniong lelohng ih. Sapwellimen Sises pasapengo kasalehda ni sansal me e ahneki sapwellimen  Siohwa madamadau oh kin soikala douluhl ahn sampah.

3. Dahme kahrehda e apwal en ahneki sapwellimen Siohwa madamadau ah kaidehn ahn aramas en sampah?

³ Ia duwen kitail? Kitail kin ahneki madamadau me duwehte sapwellimen Siohwa de duwehte ahn aramas en sampah? Nin duwen Kristian kan, kitail kin doadoahk laud oh tehk mwahu me atail wiewia kin kaperenda Koht. Ahpw ia duwen mwomwen atail madamadau? Kitail kin doadoahk laud pwehn ahneki madamadau me duwehte sapwellimen Siohwa, de en kilangwohng soahng kan duwehte me e kin ketin wia? En wia met kitail anahne nanti laud. Ahpw, e kin uhdahn mengei en ahneki madamadau me duwehte ahn aramas en sampah. Met pwehki elen madamadau en sampah kin mi wasa koaros. (Ep. 2:2) Pil aramas akan nin sampah wet kin kalapw kangoange kitail en roporop, eri met kak kasonge kitail en rong irail. Ei, e apwal en ahneki madamadau me duwehte sapwellimen Siohwa ahpw e uhdahn mengei en ahneki madamadau me duwehte ahn aramas en sampah.

4. (a) Dahme pahn wiawi ma kitail mweidohng sampah wet en kamwakid atail madamadau? (b) Dahme kitail pahn sukuhlki nan iren onop wet?

⁴ Ma kitail mweidohng sampah en kamwakid atail madamadau, kitail pahn tepida roporop oh men pein pilada dahme pwung de sapwung. (Mark 7:21, 22) Eri e uhdahn kesempwal kitail en sukuhlki en ahneki “sapwellimen Koht madamadau” a kaidehn “ahn aramas.” Iren onop wet pahn sewese kitail en wia met. Kitail pahn koasoiapene kahrepe kan ong dahme kahrehda e mwahu en kilangwohng soahng kan nin duwen me Siohwa kin ketin wia. Kitail pahn sukuhlki dahme kahrehda atail en wia met eh sohte kin nohn kakos, ahpw e kin uhdahn wia kamwahupatail. Kitail pil pahn koasoiapene ia duwen atail kak dehr mweidohng sampah en kamwakid kitail. Nan iren onop en mwuhr, kitail pahn sukuhlki ia duwen atail kak alehda sapwellimen Siohwa madamadau ong soahng kan oh wiahkihla sapwellime madamadau atail.

5. Dahme kahrehda ekei aramas sohte men emen tohrohr en kamwakid arail madamadau?

⁵ Ekei aramas sohte mwahuki emen tohrohr en kamwakid mwomwen arail madamadau. Irail kin nda: “I kak pein medewehda.” Ele re kin ndinda me re men pein wiahda arail pilipil kan oh me re ahneki pwuhng en wia met. Irail sohte men emen tohrohr en kaunda irail de idingkihong irail en duwehte meteikan. *

6. (a) Soangen saledek dahieu me Siohwa ketikihong kitail? (b) Saledek wet sohte irepe?

⁶ E mwahu en ese me ma kitail kin kilangwohng soahng kan nin duwen me Siohwa kin ketin kupwurki kitail en wia, kitail kak doadoahngkihte pein atail madamadau. 2 Korint 3:17 mahsanih: “Wasa me sapwellimen Siohwa manaman kin mi ie, saledek pil kin mi ie.” Siohwa ketikihong kitail saledek en wiahla soangen aramas dah me kitail men wiahla. Kitail kak pein pilada dahme kitail mwahuki oh pilada soahng kan me kitail kin perenki. Siohwa ketin wiaikitailda ni ahl wet. Ahpw met sohte wehwehki me sohte irepen atail saledek. (Wadek 1 Piter 2:16.) Ni atail kin anahne pilada ma soahng ehu pwung de sapwung, Siohwa ketin kupwurki kitail en doadoahngki sapwellime Mahsen pwehn sewese kitail wiahda atail pilipilo. Ia duwe, met nohn kakos, de e wia kamwahupatail?

7, 8. Ia duwe, e nohn kakos en kilangwohng soahng kan ni ahl me Siohwa ketin kupwurki ong kitail? Menlau kihda ehu karasaras.

⁷ Kitail kak karasahda ni ahl wet. Pahpa nohno kan kin song en padahkihong neirail seri kan tiahk de wiewia mwahu kan. Ele irail kin padahkihong seri ko en kin mehlel, doadoahk laud, oh nsenohki meteikan. Met sohte kin wia mehkot me nohn kakos. Ahpw, pahpa nohno kan kin kaunopada neirail seri kan en pweida nan arail mour. Eri ni  seri ko ar laudla oh kohkohsang imwarail, irail ahneki saledek en pein wiahda arail pilipil kan. Ma re pilada en mour pahrekiong tiahk oh wiewia mwahu me arail pahpa nohno padahkihong irail, irail pahn kak wiahda pilipil mwahu kan oh soikala kahpwal tohto, kapwunod, oh soahng kan me re kakete wiahda oh koluhkihla.

⁸ Duwehte pahpa nohno mwahu men, Siohwa kin ketin kupwurki sapwellime seri kan en ahneki mour me keieu nsenamwahu. (Ais. 48:17, 18) Eri e ketin padahkihong kitail kaweid oh ire mehlel mengei kan duwen tiahk mwahu oh ia pahn mwomwen atail wiewia ong meteikan. E ketin luke kitail en sukuhlki en kilangwohng soahng kan ni ahl me e kin ketin wia oh en mour pahrekiong sapwellime koasoandi kan. Met sohte wia mehkot me nohn kakos. Ahpw, e kin sewese kitail en medewe soahng kan ni ahl me pwung. (Mel. 92:5; Lep. Pad. 2:1-5; Ais. 55:9) Ma kitail wia met, kitail kak pilada dahme kitail mwahuki oh pil wiahda pilipil kan me pwung, me pahn kahrehiong kitail en nsenamwahu. (Mel. 1:2, 3) Ni atail kin ahneki sapwellimen Siohwa madamadau, e pahn wia kamwahupatail ni ahl tohto!

9, 10. Dahme kadehdehda me sapwellimen Siohwa madamadau ileilesang ahn sampah?

⁹ Pil ehu kahrepe me kitail men atail madamadau en duwehte sapwellimen Siohwa iei me sapwellime madamadau uhdahn ileilesang ahn sampah. Sampah wet kin kihda kaweid duwen mehnia tiahk de wiewia me mwahu, duwen en ahneki mouren peneinei nsenamwahu, duwen en pweida mwahu nan doadoahk, oh pil soahng teikan nan atail mour. Ahpw pali laud en kaweid pwukat uhdahn weksang sapwellimen Siohwa madamadau. Karasepe, sampah wet kin kalapw kangoange aramas akan en nsenohkihte dahme irail perenki. E pil kin kangoange aramas akan en medewe me tiahk samin me pid wia nsenen pwopwoud sohte sapwung. Oh ekei pak e kin kaweidki pwopwoud kan ren tohrohrpeseng de mweipeseng ni soh kahrepe mwahu ma re medewe me met pahn kahrehiong irail en nsenamwahu. Kaweid wet kin uhwong dahme Paipel padahngki. Ahpw ia duwe, kaweid en sampah kin kadoadoahk rahnwet mwahusang kaweid en Paipel?

¹⁰ Sises mahsanih: “Erpit kin dehdehda sang ni wiewia.” (Mad. 11:19) Mendahki sampah wet pweida mwahu ni dipwisou kan me re kin wiahda, e sohte kak kamwahwihala kahpwal laud kan me kin kahrehiong kitail en nsensuwed, duwehte mahwen, lipilipilki aramas, oh mwersuwed. Pil ehu, sampah wet kin medewe me tiahk samin me pid wia nsenen pwopwoud sohte sapwung. Ahpw aramas tohto nda me met kin kauwehla peneinei, kahrehda soumwahu, oh kin imwikihla soahng suwed teikan. Ia duwen sapwellimen Siohwa kaweid? Kristian kan me kin ahneki sapwellimen Siohwa madamadau kin ahneki peneinei nsenamwahu, roson mwahu, oh ahneki popohl rehn sapwellimen Siohwa aramas akan koaros nan sampah pwon. (Ais. 2:4; Wiewia 10:34, 35; 1 Kor. 6:9-11) Met kin kadehdehda ni sansal me sapwellimen Siohwa madamadau ileilesang ahn sampah.

11. Ihs me kamwakid ahn Moses madamadau, oh ia imwilahn met?

¹¹ Sapwellimen Siohwa ladu lelepek kan mahso ese me sapwellimen Siohwa madamadau kin uhdahn ileile. Karasepe, mehnda ma Moses pil “sukuhlkiher duwen erpit koaros en mehn Isip,” e ese me erpit mehlel kohsang rehn Siohwa. (Wiewia 7:22; Mel. 90:12) Eri e patohwan peki rehn Siohwa: “Kasalehiong ie kupwuromwien.” (Eks. 33:13) Pwehki Moses mweidohng Siohwa en ketin kamwakid eh madamadau, Siohwa ketin doadoahngki ih ni ahl kapwuriamwei ehu en kapwaiada Kupwure oh ketikihong Moses wahu ni eh mahsanih me Moses wia ohl emen me ahneki pwoson laud.​—Ipru 11:24-27.

12. Ahn Pohl pilipil kan kin poahsoankihda dah?

¹² Wahnpoaron Pohl iei ohl emen me uhdahn loalokong oh iang sukuhl laud, oh e kin lokaiahki lokaia riau. (Wiewia 5:34; 21:37, 39; 22:2, 3) Ahpw ni ahnsou me e anahne pilada ma ekei soahng kan  pwung de sapwung, e soikala erpit en sampah oh wiahda eh pilipil kan me poahsoankihda Mahsen en Koht. (Wadek Wiewia 17:2; 1 Korint 2:6, 7, 13.) Imwilahn met, eh doadoahk en kalohk kin uhdahn pweida mwahu oh e kin kasikasik keting ehu me pahn mihmi kohkohlahte.​—2 Tim. 4:8.

13. Ihs me pwukoahki kapwungala atail madamadau pwe kitail en kilangwohng soahng kan ni ahl me Siohwa kin ketin wia?

¹³ E sansal me sapwellimen Koht madamadau uhdahn ileilesang ahn sampah. Ma kitail idawehn sapwellimen Koht koasoandi kan, kitail uhdahn pahn nsenamwahu oh pweida mwahu. Ahpw Siohwa sohte pahn ketin idingkihong kitail en ahneki madamadau me duwehte sapwellime. “Ladu lelepek oh loalokong” oh pil elder kan, sohte kin kaunda atail madamadau. (Mad. 24:45; 2 Kor. 1:24) Emenemen kitail pein pwukoahki en kapwungala atail madamadau pwe kitail en kilangwohng soahng kan ni ahl me Siohwa kin ketin wia. Ia duwen atail kak wia met?

14, 15. (a) Dahme kitail anahne doudouloale pwe kitail en kilangwohng soahng kan nin duwen me Siohwa kin ketin wia? (b) Dahme kahrehda kitail en dehr mweidohng madamadau en sampah en mi nan atail madamadau? Menlau kihda ehu karasaras.

¹⁴ Rom 12:2 mahsanih: “Kumwail uhdihsang amwail kahlemengih aramas en koasoandi en mwehi wet, ahpw wekidala pein kumwail sang ni amwail wekidala elen amwail madamadau, pwe kumwail en kadehdehiong pein kumwail kupwuren Koht, kupwure me mwahu, me unsek oh me e kin ketin kupwurperenki.” Iren Paipel wet padahkihong kitail me sohte lipilipil dahme kin kamwakid atail madamadau mwohn atail esehla padahk mehlel, kitail kak wekidala atail kin kilangwohng soahng kan oh wiahiong atail madamadau en duwehte sapwellimen Koht. Mendahki dahme kitail sohsohki sang atail peneinei de dahme wiawihong kitail nan mour kin kamwakid mwomwen atail madamadau ni soangen ahl ehu, atail madamadau kak wekila. Oh e pahn wekila, oh pali laud en ahnsou, met pahn poahsoankihda pali laud en soahng kan me kitail kin pilada en medemedewe. Eri ma kitail kin doudouloale sapwellimen Siohwa madamadau, kitail pahn kadehdehiong pein kitail me sapwellime madamadau kin ahnsou koaros pwung. Eri, kitail pahn men kilangwohng soahng kan ni ahl me e kin ketin wia.

¹⁵ Ahpw pwe kitail en kamwahwihala atail madamadau pwehn ahneki madamadau me duwehte sapwellimen Siohwa, kitail anahne ‘uhdihsang atail kahlemengih aramas en koasoandi en mwehi wet.’ Met wehwehki me kitail en uhdihsang kilang, wadek, oh rong soahng sohte lipilipil me kin kangoange madamadau me kin uhwong sapwellimen Koht madamadau. Pwehn sewese kitail en wehwehki ia uwen kesempwal en met, tehk karasaras me pid mwenge. Emen me men ahneki roson mwahu ele pilada en kang mwenge me kin kahrehda roson mwahu. Ahpw eh nanti koaros pahn sohte katepe ma e pil kin kalapw kang mwenge me kiteila! Pil duwehte met, atail nanti koaros en sukuhlki duwen sapwellimen Siohwa madamadau sohte pahn katepe ma kitail kin mweidohng madamadau en sampah en mi nan atail madamadau.

16. Dahme kitail anahne pere kitail sang?

¹⁶ Ia duwe, kitail kak soikala douluhl madamadau en sampah? Soh. Ekei soahng pwukat pahn sansal ong kitail pwehki kitail sohte kak uhdahn katohrekitailweisang sampah wet. (1 Kor. 5:9, 10) Pil ni atail kin kalohk, kitail pahn rong aramas akan kasalehda madamadau sapwung oh padahk likamw kan me re kin kamehlele. Ahpw mendahki kitail sohte kak uhdahn soikala madamadau sapwung pwukat, kitail sohte anahne medemedewe de pwungki. Duwehte Sises, kitail anahne mwadang soikala soangen madamadau me Sehdan men kitail en ahneki. Oh kitail kak pere pein kitail sang ni atail en dehr mweidohng kitail en mihla nan irair ehu me madamadau en sampah kak kamwakid kitail.​—Wadek Lepin Padahk 4:23.

17. Ia duwen atail kak soikala mihla nan irair ehu me madamadau en sampah kak kamwakid kitail?

¹⁷ Karasepe, kitail anahne pilada mwahu  kompoakepatail kan. Paipel katamankihong kitail me ma kitail kompoakepahnki aramas akan me sohte kin kaudokiong Siohwa, kitail pahn tepida ahneki soangen madamadau me irail kin ahneki. (Lep. Pad. 13:20; 1 Kor. 15:12, 32, 33) Kitail pil anahne pilada mwahu mehn kamweit kan. Ni atail kin soikala mehn kamweit kan me kin utung padahk me dene mour pein miehla oh aramas kohsang mahn, tiahk lemei, oh tiahk samin, kitail kin soikala kasaminehkihla atail madamadau madamadau me kin “uhwong loalokong en Koht.”​—2 Kor. 10:5.

18, 19. (a) Dahme kahrehda kitail uhdahn anahne tehk kanahieng madamadau kan en sampah me sohte uhdahn sansal? (b) Peidek dah kan me kitail anahne idek rehtail, oh dahme kahrehda?

¹⁸ Kitail pil anahne pohnese oh soikala madamadau en sampah ni ar kin pwarada ni ahl kan me sohte uhdahn sansal. Karasepe, ekei rohng en nuhs kin kasansalda ni ahl ehu me pwungki ekei madamadau en palien politik. Oh ekei nuhs kin kasalehda arail kangoange mehn akadei oh elen pweida mwahu kan me sampah kin pwungki. Ekei kasdo kan oh pwuhk kan kin utung madamadau en “ngehi mahs” oh “peneinei mahs” oh wiahki me mepwukat pwung oh mwahu. Ahpw soangen madamadau pwukat kin uhwong Paipel. Paipel mahsanih me kitail oh atail peneinei pahn uhdahn nsenamwahu ni atail kin poakohng Siohwa mwohn mehkoaros. (Mad. 22:36-39) Pil ekei soai ong seri kan, mehnda ma pali laud en audepe kan mwahu, ele kakete ni ahl me sohte nohn sansal kahrehiong seri kan en pwungki tiahk samin.

¹⁹ Met sohte wehwehki me e sapwung en perenki mehn kamweit mwahu kan. Ahpw kitail anahne pein idek rehtail: ‘I kin pohnese madamadau en sampah pil ni eh kin pwarada ni ahl kan me sohte uhdahn sansal? I kin pere nei seri kan oh pein ngehi sang en kilang ekei prokram en TV kan de pwuhk kan? I kin sewese nei seri kan en kilangwohng soahng kan ni ahl me Siohwa kin ketin wia, pwe madamadau en sampah me irail kin rong de kilang en dehr kamwakid irail?’ Ma kitail kin pohnese wekpeseng en sapwellimen Koht madamadau oh ahn sampah, kitail kak soikala “kahlemengih aramas en koasoandi en mwehi wet.”

20. Dahme pahn kasalehda ihs me kin kamwakid kitail?

²⁰ Kitail anahne tamataman me wasa riaute me kitail kin alehdi ire kan. Ehu iei sang rehn Siohwa, oh meteio iei sang ahn Sehdan sampah. Mehnia rehra me kin kamwakid uhk? Pasapeng iei, wasa me ke kin alehsang ie ire kan. Ma kitail kin alehda de pwungki madamadau en sampah, sampah wet pahn kamwakid atail madamadau oh atail madamadau oh wiewia pahn duwehte ahn pali laud en aramas akan en sampah. Eri e uhdahn kesempwal me kitail en pilada kanahieng dahme kitail kilang, wadek, rong, oh medemedewe.

21. Dahme kitail pahn koasoiapene nan iren onop en mwuhr?

²¹ Nan iren onop wet, kitail sukuhlkiher me pwe kitail en kilangwohng soahng kan ni ahl me Siohwa kin ketin wia, kitail anahne wia laudsang en soikala soahng suwed kan me kak kamwakid kitail. Kitail pil anahne doudouloale sapwellimen Koht madamadau pwe kitail en kalaudehla atail pahn ahneki madamadau me duwehte sapwellime. Nan iren onop en mwuhr, kitail pahn sukuhlki ia duwen atail en wia met.