1, 2. Ni atail karanihala Siohwa, dahme kitail sukuhlki en wia? Menlau kihda ehu karasaras.

MEDEWEHLA me emen kihong kisin seri men kisakis ehu. En serio pahpa nohno ndaiong ih, “Nda kalahngan.” E wia met pwehki ira ndaiong ih en wia. Ahpw ni serio eh laudla, e tepida wehwehkihda ia kahrepen eh pahpa nohno medewe me e kesempwal en kalahnganki meteikan ar wia soahng mwahu kan ong ih. Kedekedeo, met kamwakid ih en pein kasalehda kalahngan ong meteikan pwehki e sukuhlki en kasalehda kalahngan.

² Soahng ehu me duwehte met wiawihong kitail. Ni atail tepida esehla Siohwa, kitail sukuhlki ia uwen kesempwal en peikiong sapwellime kehkehlik kan. Ahpw ni atail kin karanihala Siohwa, kitail kin kalaudehla atail sukuhlki duwen sapwellime madamadau, me iei, dahme e kin ketin kupwurki, dahme e sohte ketin kupwurki, oh ia duwen eh kin ketin kilangwohng soahng kan. Ni atail mweidohng sapwellimen Siohwa madamadau en kamwakid atail pilipil kan oh wiewia kan, kitail kin wiahkihla sapwellime madamadau atail.

3. Dahme kahrehda e kakete apwal en kilangwohng soahng kan duwehte me Siohwa kin ketin wia?

³ Mendahki atail perenki sukuhlki en ahneki madamadau duwehte sapwellimen Siohwa, ekei pak e apwal en kilangwohng soahng kan duwehte me e kin ketin wia pwehki kitail sohte unsek. Karasepe, kitail ese ia  sapwellimen Siohwa madamadau ong tiahk samin me pid wia nsenen pwopwoud, noahrok kepwe, doadoahk en kalohk, doadoahngki nta ni ahl sapwung, oh soahng teikan. Ahpw ele e kin apwal ong kitail en wehwehki dahme kahrehda e kin ketin kilangwohng soahng pwukat ni ahl wet. Eri ia duwen atail kak sukuhlki en kalaudehla atail ahneki madamadau me duwehte sapwellimen Siohwa? Oh ia duwen met eh pahn sewese kitail en wiahda pilipil mwahu kan ahnsou wet oh ni ahnsou kohkohdo?

4. Ia wehwehn en wekidala elen atail madamadau?

⁴ Wadek Rom 12:2. Wasaht wahnpoaron Pohl kawehwehda dahme kitail anahne wia pwehn sukuhlki en kilangwohng soahng kan ni ahl me Siohwa kin ketin wia. E nda me kitail anahne ‘uhdihsang atail kahlemengih aramas en koasoandi en mwehi wet.’ Duwehte me kitail sukuhlkier nan iren onop en mwoweo, met wehwehki me kitail anahne soikala madamadau oh wiewia kan en sampah. Ahpw Pohl pil nda me kitail anahne wekidala elen atail madamadau. Met wehwehki me kitail anahne onopki Mahsen en Koht, wehwehkihla sapwellime madamadau, doudouloale soahng pwukat, oh doadoahk laud pwehn ahneki sapwellime madamadau ong soahng kan.

5. Dahkot onop?

⁵ Onop kin pidada laudsang en ihte mwadang wadekala ire kan de lainihala pasapeng ong peidek kan en iren onop kan. Ni atail kin onop, kitail anahne medemedewe dahme ire kan kin padahkihong kitail duwen Siohwa, dahme kahrehda e ketin wia soahng kan ni soangen ahl ehu, oh ia sapwellime madamadau. Kitail anahne song en wehwehki dahme kahrehda Siohwa ketin mahsanihong kitail en wia soahng ehu oh en soikala wia soahng ehu tohrohr. Kitail pil anahne medemedewe ia duwen atail kak kapwaiada dahme kitail sukuhlki sang ni atail wiahda wekidekla kan nan atail wiewia kan oh mwomwen atail madamadau. Ei mehlel, ele e sohte mengei en doudouloale ire pwukat koaros ahnsou koaros me kitail kin onop. Ahpw e mwahu en kihong ahnsou, ele elep en atail ahnsou en onop, doudouloale dahme kitail kin wadek.​—Mel. 119:97; 1 Tim. 4:15.

6. Dahme kin wiawi ni atail doudouloale Mahsen en Koht?

⁶ Mehkot kapwuriamwei kin wiawihong kitail ni atail kin kaukaule doudouloale Mahsen en Koht. Dahkot met? Kitail kin ‘kadehdehiong pein kitail’ de kamehlelehiong pein kitail me sapwellimen Siohwa madamadau unsek. Ni atail kin doudouloale, kitail kin tepida wehwehkihla mwomwen eh kin kilangwohng soahng kan, oh kedekedeo kitail kin pwungkihla sapwellime madamadau. Eri kitail kin wekidala elen atail madamadau oh tepida ahneki madamadau ni ahl kapw ehu. Ekisekis, kitail kin wiahkihla sapwellimen Siohwa madamadau atail.

7, 8. (a) Ia sapwellimen Siohwa madamadau ong mehkan en sampah? (Menlau kilang tepin kilel kan.) (b) Ma kitail kin kilangwohng mehkan en sampah nin duwen me Siohwa kin ketin wia, dahme pahn keieu kesempwal ong kitail ahnsou koaros?

⁷ Atail madamadau sohte kin ihte kamwakid atail pepehm kan ahpw e pil kin kamwakid dahme kitail kin wia. (Mark 7:21-23; Seims 2:17) Kitail pahn koasoiapene ekei karasaras me kak kasalehda ni sansal ire wet. Ehu karasepe iei me dierek nan koasoipen Paipel duwen ipwidien Sises, me kasalehda ni sansal ia sapwellimen Siohwa madamadau ong mehkan en sampah. Pein Koht ketin pilada Sosep oh Mery pwehn apwalihada sapwellime Ohlo mendahki ira sohte naineki mwohni tohto. (Lip. 12:8; Luk 2:24) Ni Sises eh ketin ipwidi, Mery “pwilikihdi nan dewen kenen mahn ehu pwehki solahr pere nan wasahn pweidio.” (Luk 2:7) Ma Siohwa ketin kupwurki, e kak ketin tehk mwahu me Sises en ipwidi nan wasa ehu me uhdahn mwahu. Ahpw e kupwurki Sises en tikida nan peneinei ehu me kin mwohneki mahs arail kaudok ong Koht. Iei met me keieu kesempwal ong Siohwa.

⁸ Koasoipen Paipel wet duwen ipwidien Sises padahkihong  kitail ia sapwellimen Siohwa madamadau ong mehkan en sampah. Ekei pahpa nohno mwahuki neirail seri kan en ahneki kepwe me keieu mwahu, mendahki ma met pahn kauwehla ahn neirail seri kan nanpwungmwahu rehn Siohwa. Ahpw, e sansal me sapwellimen Siohwa madamadau ong atail nanpwungmwahu reh iei me keieu kesempwal. Ia duwe, ke pwungki sapwellimen Siohwa madamadau me pid ire wet? Dahme omw wiewia kan kin kasalehda?​—Wadek Ipru 13:5.

9, 10. Ia duwen atail en kasalehda me kitail kin ahneki soangen madamadauohte me Siohwa sapwellimanki me pid kadipikelekelih meteikan?

⁹ Pil ehu karasepe iei duwen sapwellimen Siohwa madamadau ong emen me kin kadipikelekelih meteikan, de kahrehiong meteikan en wiahda dihp de uhdihsang papah Siohwa. Sises mahsanih: “Mehmen me kin kadipekelekele emen rehn me tikitik pwukat me kin pwoson, e pahn mwahu ong ih ma takain ngidar pilawa me dongki men kin kamwakamwakid en kohieng ni tepinwere oh lekdeklahng nansed.” (Mark 9:42) E sansal me Sises ketin medewe me en kadipikelekelih meteikan uhdahn wia dihp laud ehu! Oh kitail ese me Sises kin ketin duwehte Semeo. Eri kitail kak kamehlele me Siohwa pil kin ketin medewe me e wia dihp laud ehu ni emen eh sohte kin nsenohki ma eh wiewia kan kin kadipikelekelih emen sapwellimen Sises tohnpadahk kan.​—Sohn 14:9.

¹⁰ Ia duwe, kitail kin ahneki madamadauohte me Siohwa oh Sises sapwellimanki me pid kadipikelekelih meteikan? Dahme atail wiewia kan kin kasalehda? Karasepe, ele kitail kin mwahuki wiepen kapwat de sidail en likou ehu. Ahpw dahme kitail pahn wia ma kitail ese me sidail en likowo kin kadipikelekelih ekei nan mwomwohdiso de kahrehiong meteikan en ahneki madamadau samin? Ia duwe, atail limpoak ong riatail Kristian kan pahn kamwakid kitail en soikala sidail en likou wet?​—1 Tim. 2:9, 10.

11, 12. Ia duwen atail pahn pere pein kitail ma kitail sukuhlki en kakairada irair en kaunda pein kitail oh tateki dahme Siohwa ketin kalahdeki?

¹¹ Karasepe kesiluh: Siohwa kin ketin kalahdeki dahme sapwung. (Ais. 61:8) Ei mehlel, e ketin mwahngih me ekei pak e apwal ong kitail en wia dahme pwung pwehki kitail sohte unsek. Ahpw, e pil ketin kupwurki kitail en ahneki madamadauohte me e ketin sapwellimaniki oh tateki dahme suwed. (Wadek Eimwos 5:15.) Ma kitail kin doudouloale dahme kahrehda Siohwa ketin kalahdeki soahng suwed kan, met pahn sewese kitail en wiahki sapwellime madamadau atail oh kakehlaka atail en soikala wia soahng sohte lipilipil me e kin ketin kalahdeki.

¹² Ma kitail sukuhlki en tateki dahme suwed, e pil pahn sewese kitail en pohnese me mie soahng kan me sapwung mendahki Paipel sohte uhdahn koasoia. Karasepe, mie ehu mwomwen kahlek suwed me aramas tohto kin wiewia rahnwet. Ekei aramas medewe me soangen kahlek wet sohte duwehte wia nsenen pwopwoud rehn emen, eri irail kin medewe me irail sohte anahne soikala. * Ahpw ia duwe, ih met me Siohwa kin ketin medewe? Tamataman me Siohwa ketin kalahdeki soahng suwed kan koaros. Eri kitail en kadohwaneweisang kitail soangen suwed koaros sang ni atail sukuhlki en kakairada irair en kaunda pein kitail oh tateki dahme Siohwa ketin kalahdeki.​—Rom 12:9.

13. Dahme kahrehda kitail anahne medemedewe ia duwen Siohwa eh kin ketin kilangwohng soahng kan ahnsou wet pwe kitail en kak wiahda pilipil loalokong kan ni ahnsou kohkohdo?

¹³ Ni atail kin onop, kitail anahne medewe ia duwen Siohwa eh kin ketin kilangwohng soahng kan pwehki met kak sewese kitail en wiahda pilipil loalokong kan ni ahnsou kohkohdo. Eri, ma kitail mi nan irair ehu me kitail anahne wiahda pilipil  karuwaru, kitail pahn onopadahr oh ese dahme kitail pahn wia. (Lep. Pad. 22:3) Kitail pahn koasoiapene ekei karasepe kan sang Paipel.

14. Dahme kitail sukuhlkihsang mwomwen ahn Sosep eh tangasang ahn Podipar eh pwoudo?

¹⁴ Ni en Podipar eh pwoudo song en kasonge Sosep, Sosep mwadangete tangasang ih. E sansal me Sosep kin doudouloale ia sapwellimen Siohwa madamadau ong lelepek nanpwungen pwopwoud ehu. (Wadek Senesis 39:8, 9.) Sosep ndaiong en Podipar eh pwoudo: “Ia duwen ei pahn wiahda soangen sapwung laud wet, oh dipikihda mwohn Koht?” Met kasalehda me e kin wiahki sapwellimen Koht madamadau ah. Ia duwen kitail? Dahme ke pahn wia ma iengomw tohndoadoahk men tepida kalahiong uhk? De ma emen kadar ong nan noumw cellphoneo kilel de koasoi me pid tiahk samin? * E uhdahn pahn mengeila en loalopwoatohng Siohwa ma kitail sukuhlkier duwen oh pwungki sapwellime madamadau ong soahng kan oh piladahr dahme kitail pahn wia.

15. Ia duwen atail kak lelepekohngete Siohwa, duwehte me mehn Ipru silimeno wia?

¹⁵ Pil medewehla karasepen mehn Ipru silimeno Sadrak, Mihsak, oh Apedneko. Ni nanmwarki Nepukadnesar eh kehkehlikihong irail en poaridi oh pwongih sansalo me e wiahdao, re koasoanehdi teng en dehr wia met. Arail pasapeng sansal ong nanmwarkio kasalehda me irail medewedahr dahme irail anahne wia pwehn lelepekohngete Siohwa. (Eks. 20:4, 5; Dan. 3:4-6, 12, 16-18) Ia duwen kitail rahnwet? Dahme ke pahn wia ma omw kaun en doadoahko ndaiong uhk en toukihda mwohni ong kasarawi ehu me pidada kaudok likamw? Pwe kitail en dehr awih lao kitail lelohng soangen irair wet, e pahn mwahu kitail en doudouloale ahnsou wet duwen sapwellimen Siohwa madamadau ong soahng pwukat. Eri, ma kitail lelohng nan soangen irairo, e pahn mengeila ong kitail en wia oh nda dahme pwung, duwehte me mehn Ipru silimeno wia.

16. Ia duwen atail wehwehki ni sansal sapwellimen Siohwa madamadau eh kak sewese kitail en kaunopada ma kitail mihla nan keper pwehki soumwahu de aksident ehu?

¹⁶ Doudouloale sapwellimen Siohwa madamadau pil kak sewese kitail en kolokolete atail loalopwoatohng ih ma atail mour mihla nan keper pwehki soumwahu de aksident ehu. Ei mehlel, kitail kin koasoanehdi teng en dehr ale doken nta oh soahng pahieu ko me wiahda nta. (Wiewia 15:28, 29) Ahpw mie wiepen pwal kan me pidada nta  me Kristian kan anahne wiahda pein ar pilipil poahsoankihda kaweid oh ire mehlel kan en Paipel. Iahd me keieu mwahu en pilada dahme kitail en wia? Ni ahnsou me kitail mi nan imwen wini, mwein medek oh lelohng kasongosong en mwadang wiahda pilipil ehu? Uhdahn soh. Met iei ahnsou en wia roporop, audehda doaropwe kan, duwehte doaropwehn dehr ale nta, me kawehwehda ni sansal dahme kitail mwahuki, oh koasoiong atail toahkte kan. *

17-19. Dahme kahrehda e kesempwal en sukuhlki ahnsou wet ia duwen Siohwa eh kin ketin kilangwohng soahng kan? Menlau kihda ehu karasaras.

¹⁷ Keieu mwuhr, medewehla duwen Sises en ketin mwadang sapengala ahn Piter kaweid sapwungo: “Komw ketin kadek ong pein komwi.” E sansal me Sises kin ketin doudouloale laud dahme Koht ketin kupwurki ih en wia oh kokohp kan duwen eh mour oh pwoula nin sampah. Loalokong wet kihong ih kehl en kolokolete eh lelepek ong Siohwa oh ketikihda sapwellime mour nin duwen meirong ehu ong kitail koaros.​—Wadek Madiu 16:21-23.

¹⁸ Rahnwet, Koht ketin kupwurki kitail en wia kompoakepah oh wia uwen atail kak en kalohki rongamwahwo. (Mad. 6:33; 28:19, 20; Seims 4:8) Ahpw ekei aramas me ahneki kahrepe mwahu kan kak song en kasohwe atail en wia met, duwehte me Piter wiahiong Sises. Karasepe, ia duwen ma omw kaunen doadoahko kihong uhk doadoahk mwahu ehu me pahn kahrehong ken wiahda mwohni laud ahpw pahn kihsang omw ahnsou me met ke ahneki ong towehda mihting kan de iang mwomwohdiso kalohk? De ma ke mi nan sukuhl, mwein ke alehdi soahng ehu me kahrehiong uhk en kohkohsang imwomwo pwehn kalaudehla omw sukuhl. Ma met wiawi, ke pahn anahne kapakap, wia roporop, oh koasoiong omw peneinei de elder kan mwohn omw wiahda pilipil ehu? E pahn mwahu ma ahnsou wet ken sukuhlki ia duwen Siohwa eh kin ketin kilangwohng soahng kan oh wiahkihla sapwellime madamadau ahmw. Eri ma ke alehdi soahng pwukat, ele ke pahn diar me mepwukat sohte uhdahn kin kasonge iuk. Ke pahn ese dahme ke uhdahn pahn wia pwehki ke piladahr en medemedewehte en papah Siohwa.

¹⁹ Ele ke kak medewe duwen ekei irair kan me kak ni soh kasikpe kasonge omw loalopwoatohng Siohwa. Ei mehlel, kitail sohte kak kaunopada ong soangen irair koaros. Ahpw ma kitail doudouloale sapwellimen Siohwa madamadau erein atail ahnsoun onop, kitail pahn kak tamataman dahme kitail sukuhlkier oh doadoahngki pwehn wiahda pilipil loalokong kan nan irair sohte lipilipil. Eri ni atail kin onop, kitail en diarada ia duwen Siohwa eh kin ketin kilangwohng soahng kan, wiahkihla sapwellime madamadau atail, oh medemedewe ia duwen met eh kak sewese kitail en wiahda pilipil loalokong kan ahnsou wet oh ni ahnsou kohkohdo.

20, 21. (a) Dahme kahrehda kitail pahn perenki atail saledek nan sampah kapwo? (b) Ia duwen atail kak perenki mour ahnsou wet?

²⁰ Kitail koaros kin uhdahn kasikasik sampah kapwo. Pali laud en kitail kin koapworopworki en mour kohkohlahte nan Paradais nin sampah. Pahn kaundahn Wehin Koht, kitail pahn saledeksang medek oh lokolok koaros me kitail kin ahneki nan koasoandi wet. Nan sampah kapwo, kitail pil pahn ahneki saledek en wiahda pilipil kan poahsoankihda dahme kitail mwahuki oh inengieng.

²¹ Ahpw met sohte wehwehki me sohte pahn mie irepen atail saledek. Ni me opampap kan nin sampah kapwo ar pahn pilada nanpwungen dahme pwung oh dahme sapwung, re pahn wiahda pilipil kan me poahsoankihda sapwellimen Siohwa kosonned kan oh madamadau. Oh met pahn wahdo peren oh popohl mwuledek. (Mel. 37:11) Lao lel ahnsowo, kitail kak ahnekihte peren ni atail wiahki sapwellimen Siohwa madamadau atail.