1, 2. (a) Doadoahk dahieu me keieu kesempwal nan mour en Sises, oh dahme kahrehda? (b) Dahme kitail anahne wia pwe kitail en pweida nin duwen “iengen Koht tohndoadoahk kan”?

SISES KRAIS ketin wia kapinte men oh mwuhr e ketin wiahla sounpapah men. (Mark 6:3; Rom 15:8) E ketin sukuhlki en wia soangen doadoahk pwukat ni unsek. Nin duwen kapinte men, e ketin sukuhlki ia duwen eh pahn doadoahngki sapwellime mehn doadoahk kan pwehn wiahda kepwe kan sang tuhke. Oh nin duwen sounpapah men, e ketin doadoahngki sapwellime loalokong duwen Nting Sarawi kan pwehn ketin sewese aramas akan en wehwehki dahme mehlel sang Mahsen en Koht. (Mad. 7:28; Luk 24:32, 45) Ni ahnsou me e sounpar 30, e ketin uhdihsang sapwellime doadoahk en kapinte oh ketin wiahla sounpapah men pwehki e mwahngih me doadoahk wet iei me keieu kesempwal. E mahsanih me ehu kahrepe me Koht ketin poaronehdo ih sampah iei en kalohki rongamwahu en Wehin Koht. (Mad. 20:28; Luk 3:23; 4:43) Sises kin ketin mwohneki mahs nan eh mour doadoahk en kalohki rongamwahwo, oh e kupwurki meteikan en pil wia duwehte.​—Mad. 9:35-38.

² Pali laud en kitail kaidehn kapinte kei, ahpw kitail koaros wia sounpapah kei me kin padahkihong meteikan duwen rongamwahwo. Doadoahk wet inenen kesempwal me kahrehda Koht pil iang ketin pidada. Ni mehlel, kitail kin adaneki “iengen Koht tohndoadoahk kan.” (1 Kor. 3:9; 2 Kor. 6:4) Kitail pwungki dahme sounmelkahkao koasoia: “Poahsoan en sapwellimomwi kosonned iei mehlel.” Sapwellimen Siohwa mahsen kan iei  me mehlel. (Mel. 119:159, 160) Ihme kahrehda kitail men tehk kanahieng me kitail kin “padahngki oh kawehwehda mahsen en me mehlelo ni pwung” nan atail doadoahk en kalohk. (Wadek 2 Timoty 2:15.) Eri kitail kin pousehlahte nantihong en koahiekla ni atail doadoahngki Paipel, me iei mehn doadoahk me kitail kin keieu doadoahngki pwehn padahkihong meteikan duwen Siohwa, Sises, oh Wehin Koht. Pwehn sewese kitail en pweida nan atail doadoahk en kalohk, sapwellimen Siohwa pwihn kihongehr kitail mehn doadoahk mwahu teikan, oh kitail anahne esehla ia duwen atail en pil doadoahngki mepwukat. Mehn doadoahk pwukat mi nan neitail Koakon en Kasukuhl.

3. Dahme kitail anahne medemedewe nan atail doadoahk en kalohk, oh ia duwen Wiewia 13:48 eh sewese kitail en wia met?

³ Ele ke men ese dahme kahrehda kitail kahdaneki met Koakon en Kasukuhl ahpw kaidehn Koakon en Kalohk. Met pwehki “kalohk” kin wehwehki en kalohki duwen rohng ehu. Ahpw “kasukuhl” kin wehwehki en kawehwehda rohng ehu pwe emen en wehwehki dahme e rong oh eri mwekidki oh kapwaiada dahme e sukuhlki. Erein ahnsou mwotomwot me luhluhwe nan koasoandi wet, kitail anahne medemedewe en tapiada onop Paipel kan oh padahkihong aramas akan padahk mehlel pwe irail en kak wiahla sapwellimen Krais tohnpadahk kan. Met wehwehki me kitail anahne ngoangki rapahki irail kan koaros me “ahneki mohngiong mwahu en ale mour soutuk” oh sewese irail en tepida papah Siohwa.​—Wadek Wiewia 13:44-48.

4. Ia duwen atail kak diarada irail kan me “ahneki mohngiong mwahu en ale mour soutuk”?

⁴ Ia duwen atail kak diarada irail kan me “ahneki mohngiong mwahu en ale mour soutuk”? Ong tepin Kristian ko mahs, ihte ahl me re kak diar soangen aramas pwukat iei sang ni doadoahk en kalohk. Sises mahsanihong irail: “Sohte lipilipil ma kahnimw laud de tikitik me kumwail kohla ie, kumwail rapahki aramas me warohng.” (Mad. 10:11) Rahnwet, kitail pil anahne wia duwehte. Ma aramas akan kin pohnmwahso, sohte kin mehlel, de sohte uhdahn nsenohki duwen Koht, kitail sohte kasik me irail en rong rongamwahwo. Kitail kin raparapahki aramas akan me kin mehlel, aktikitik, oh me uhdahn men esehla padahk mehlel. Kitail kak kapahrekihong atail kin rapahki aramas duwehte dahme Sises anahne ketin wia ni ahnsou me e wia kapinte men. Keieu, e anahne ketin rapahkihda tuhke me uhdahn mwahu mwohn eh pahn kak ketin wiahda kepwehn nan ihmw ehu, wenihmw ehu, mehn wisik ehu, de mehkot tohrohr. Mwuhr, e kak ketin doadoahngki sapwellime mehn doadoahk kan, sapwellime koahiek, oh wiahda kepwe ko. Eri rahnwet, kitail kin anahne mahs rapahkihda aramas me kin mehlel, oh mwuhr, kitail kak doadoahngki neitail mehn doadoahk kan pwehn sewese irail en wiahla tohnpadahk kan.​—Mad. 28:19, 20.

5. Dahme kitail anahne esehla duwen neitail mehn doadoahk kan nan neitail Koakon en Kasukuhl? Menlau kihda ehu karasaras. (Menlau kilang tepin kilel kan.)

⁵ Nan koakon en mehn doadoahk kan, ehuehu mehn doadoahk ko kin kadoadoahk ong kahrepe ehu. Karasepe, medewehla mehn doadoahk kan me Sises ketin doadoahngki ni eh ketin wia kapinte men. * E ketin anahne mehn sosohng oh mehn kilele, mehn lopuk, mehn kapwoarehda (drill), oh parada tuhke, oh pil mehn doadoahk kan me pahn kainenehla oh kapatapene tuhke kan. Duwehte met, ehuehu mehn doadoahk nan neitail Koakon en Kasukuhl kin kadoadoahk ong kahrepe ehu. Eri kitail pahn kilang ia duwen atail en doadoahngki mehn doadoahk kesempwal pwukat.

6, 7. (a) Ia duwen omw kin doadoahngki neitail contact card kan? (b) Dahme kahrehda kitail kin doadoahngki doaropwehn luhk ong atail mihting kan?

⁶ Contact Card kan. Kisin doaropwe pwukat tikitik ahpw e wia mehn doadoahk uhdahn mwahu ehu me kitail kak doadoahngki pwehn padahkihong aramas akan ihs kitail oh pil kaweid irail en kilang neitail website jw.org. Nan neitail website, irail kak kalaudehla arail sukuhlki duwen kitail oh pil kakete peki emen en onop Paipel rehrail. Aramas tohtohsang  400,000 me doadoahngkiher jw.org pwehn peki emen en onop Paipel rehrail, oh tohtohsang meh epwiki kei me kin wia met rahn koaros! Ke kak weuwa kisin card pwukat oh doadoahngki ni omw kin koasoiong aramas akan me ke tuhwong nan rahn ehu.

⁷ Doaropwehn luhk kan. Nting me mi nan neitail doaropwehn luhk ong atail mihting kan koasoia: “Se luke komwi en onop Paipel rehn Sounkadehdehn Siohwa kan.” E pil koasoia me ke kak wia met “nan at mihting kan” de “rehn emen me pahn onop Paipel rehmw.” Eri luhk wet kin padahkihong aramas akan ihs kitail oh pil luke irail kan me “pohnese me irail anahne Koht” ren onop Paipel rehtail. (Mad. 5:3) Kitail kin kasamwo aramas akan en towehda atail mihting kan sohte lipilipil ma irail pwungki en onop Paipel de soh. Ni arail kohdo iang atail mihting kan, re pahn kilang ia uwen laud me re kak sukuhlki duwen Paipel.

8. Dahme kahrehda e kesempwal aramas akan en iang atail mihting kan? Menlau kihda ehu karasaras.

⁸ E kesempwal kitail en pousehlahte luke aramas akan en iang towehda atail mihting kan. Dahme kahrehda? Pwehki ni arail pahn kohdo, re pahn kilang me Sounkadehdehn Siohwa kan kin padahngki dahme mehlel sang nan Paipel oh sewese aramas akan en esehla Koht, ahpw pelien lamalam likamw kan sohte kin wia met. (Ais. 65:13) Karasepe, pwopwoud ehu me adaneki Ray oh Linda nan Wehin Amerika tehkada duwen wekpeseng wet sounpar kei samwalahro. Ira kamehlele duwen Koht oh men esehla mwahu duwen ih. Eri ira koasoanehdi ira en kohla ni imwen sarawi kan koaros nan ara kahnimwo oh rapahki soahng riau mwohn ara pahn iangala ehu pelien sarawi. Keieu, ira anahne sukuhlki mehkot kesempwal sang imwen sarawio, oh keriau, tohn imwen sarawio anahne likawih likou me konehng irail kan me kin papah Koht. Ira wia met erein sounpar kei pwehki imwen sarawi kan uhdahn tohto. Ahpw ira uhdahn nsensuwedla. Sohte mehkot me ira sukuhlki sang wasa ko, oh tohn sarawi ko kin likawih likou kan me uhdahn sohte kin kasalehda wahu. Mwurin ara iang sarawi ni kaimwiseklahn imwen sarawi me ira kilelehdi ira en tehkada, Linda eri kohla doadoahk oh Ray pwurala imwarao. Ni Ray eh kohkohlahng imwarao, e daulih ehu Wasahn Kaudok en Sounkadehdehn Siohwa kan. E medewe, ‘I pahn kohla oh kilang dahme kin wiawi wasao.’ Ei, dahme wiawi wasao iei me e keieu mwahuki! Koaros nan Wasahn Kaudoko kasalehda kadek oh likawih likou me uhdahn konehng. Ray mwohndi ni sehr ko me keieu mwoweo oh uhdahn perenki dahme e sukuhlki! Met katamandohng kitail dahme wahnpoaron Pohl ndahki emen me edin pahn iang towehda mihting oh kin nda: “Koht uhdahn ketiket nanpwungamwail.” (1 Kor. 14:23-25) Mwurin mwo, Ray kin kohla iang mihting Rahn Sarawi koaros. E pil tepida iang towehda mihting en nan wihk kan koaros. Linda pil tepida kohla iang mihting kan, oh mendahki ira sounpar 70 samwa, ira tepida onopki Paipel oh papidaisla.

9, 10. (a) Dahme kahrehda e mengei en doadoahngki neitail kisin doaropwe kan? (b) Menlau kawehwehda ia duwen atail pahn doadoahngki kisin doaropweo Dahkot Wehin Koht?

⁹ Kisin doaropwe kan. Mie neitail kisin doaropwe waluh nan neitail koakon en kasukuhl. E mengei en doadoahngki kisin doaropwe pwukat oh e uhdahn mwahu ong tapiada koasoiong meteikan. Sangete ahnsou me keieun doaropwe pwukat wiawihda nan pahr 2013, daulih meh limelik (5,000,000,000) me pil wiawihda mwuhr! Mwomwen doaropwe pwukat duwepenehte. Eri ni omw esehla ia duwen omw pahn doadoahngki ehu rehrail, ke pahn pil kak esehla doadoahngki koaros! Ia duwen omw kak doadoahngki kisin doaropwe pwukat pwehn tapiada koasoiong emen?

¹⁰ Mwein ke men doadoahngki kisin doaropweo Dahkot Wehin Koht? Kasalehiong aramaso peideko me kileldi ni tepin doaropweo, oh idek: “Mie pak me ke medewe dahkot Wehin Koht? Ia duwe, ke pahn nda me . . . ?” Mwurin mwo, idek reh mehnia rehn pasapeng siluh ko me e pahn pilada. Dehr nda ma eh pasapengo pwung de sapwung, ahpw pahkala loale wasa me koasoia “Dahme Paipel Mahsanih” oh wadekohng ih iren Paipel ko me kileldi wasao, Daniel 2:44 oh Aiseia 9:6. Ni kaimwiseklahn omw  koasoio, idek peidek me mi ni mwurio pahn sawaspen oaralap “Pwehn Medemedewe Duwen”: “Ia mwomwen mour pahn kaundahn sapwellimen Koht Wehi?” Ke kak sapengala peideko ni ahnsou me ke pahn pwurehng pwurala. Ni amwa pahn pwurehng tuhpene, ke kak kasalehda iren mehn kasukuhl keisuh nan kisin pwuhko Rohng Mwahu Sang Rehn Koht! Kisin pwuhk wet iei ehu neitail mehn doadoahk ong tapiada onop Paipel rehn meteikan.

11. Neitail makasihn kan wiawihda ong dah, oh dahme kitail anahne esehla duwen makasihn pwukat?

¹¹ Makasihn kan. Makasihn me kin keieu wiawihda tohto oh kohpeseng nan sampah pwon iei neitail Kahn Iroir oh Awake! (lokaiahn wai). Pwehki aramas sang sahpw tohtohie kin wadek makasihn pwukat, oaralap kan kin wiawihda pwe aramas akan wasa koaros en kak perenki wadek. Kitail anahne doadoahngki makasihn pwukat pwehn sewese aramas akan en medemedewe dahme keieu kesempwal nan mour rahnwet. Ahpw kitail anahne esehla mahs mehnia makasihn me pahn mwahu ong irair en emenemen aramas.

12. Makasihno Awake! kin wiawihda ong ihs, oh ia eh mehn akadei?

¹² Awake! kin wiawihda ong aramas akan me sohte nohn ese de uhdahn sehse duwen Paipel. Ele re uhdahn sehse padahk en Kristian kan, mwein re sohte uhdahn likih pelien lamalam kan, de ele re sohte kin pohnese me Paipel kak sewese pein irail. Ehu mehn akadei en Awake! iei en kamehlelehiong sounwadawad kan me Koht kin ketin ieias. (Rom 1:20; Ipru 11:6) Awake! pil kin song en sewese sounwadawad kan en pwoson me Paipel iei “mahsen en Koht . . . me mehlel.” (1 Des. 2:13) Oaralap kan nan Awake! siluh ko ong pahr 2018 iei, “Elen Mour Nsenamwahu,” “Iren Sawas 12 ong Pweidahn Peneinei,” oh “Sawas ong Irail kan me Kin Pahtou.”

13. (a) Kahn Iroir ong wehipokon kin wiawihda ong soangen aramas dah? (b) Soahng mwahu dah kan me ahpwtehn wiawihong uhk ni omw doadoahngki mehn doadoahk wet?

¹³ Mehn akadei en Kahn Iroir me wiawihda ong wehipokon iei en kawehwehda padahk en Paipel kan ong aramas akan me kin wauneki Koht oh Paipel. Ele re ese soahng kei duwen Paipel, ahpw re sohte kin wehwehki ni pwung dahme Paipel padahngki. (Rom 10:2; 1 Tim. 2:3, 4) Kahn Iroir siluh me wiawihda ong pahr 2018 sapengala peidek pwukat: “Paipel Kin Kesempwalte Rahnpwukat?,” “Dahme Pahn Wiawi ni Ahnsou Kohkohdo?,” oh “Koht Kin Ketin Nsenohkin Uhk?”

14. (a) Kisin kasdo pahieu kan nan neitail Koakon en Kasukuhl wiawihda ong dah? (b) Soahng mwahu dah kan me wiawihong uhk ni omw doadoahngki kisin kasdo pwukat?

¹⁴ Kisin kasdo kan. Ni mwehin Siseso, sohte mehn doadoahk me kin doadoahngki lioal. Ahpw rahnpwukat, kapinte kan pil kin naineki kepwehn doadoahk kan me doadoahngki lioal, duwehte mehn rasaras, mehn kapwoarehda tuhke, de mehn kamedendel tuhke. Pil duwehte met, patehngete neitail pwuhk kan, met miehier neitail kisin kasdo kaselel kan me kitail en kasalehiong aramas akan. Mie meh pahieu me mi nan neitail koakon en kasukuhl: Dahme Kahrehda Ken Onopki Paipel?, Dahme Kin Wiawi ni Ahnsoun Onop Paipel?, Dahme Kin Wiawi nan Atail Wasahn Kaudok?, oh Sounkadehdehn Siohwa kan​—Ihs Kiht? Ke kak kasalehda kisin kasdo kan me mwotomwot sang minit riau oh e mwahu en doadoahngki ong ni tepin atail tuhwong emen. Ke kak doadoahngki kisin kasdo reirei kan ni omw pwurehng pwurala rehn emen de ong irail kan me mie arail ahnsou en kilang. Kisin kasdo pwukat wia mehn doadoahk kaselel kei pwehki re kak kamwakid aramas akan en onop Paipel oh pil kohdo iang atail mihting kan.

15. Dahme kak wiawihong ekei ni arail kilang ehu neitail kisin kasdo kan ni pein arail lokaia? Menlau kihda ehu karasaras.

¹⁵ Karasepe, sister men tuhwong emen lih me keseusang Micronesia oh kin lokaiahki lokaiahn Yap. Sistero kasalehiong liho kisin kasdo Dahme Kahrehda Ken Onopki Paipel? ni lokaiahn Yap. Ni ahnsou me kisin kasdo tepida, liho nda: “Ahi lokaiao men. Uhdahn kapwuriamwei! I kak ese sang ngileo me e kohsang  dekeo me I kohsang ie. E lokaiahki ei lokaiao!” Mwurin mwo, liho nda me e pahn wadek oh kilang soahng koaros me wiawihda ni eh lokaia nan jw.org. (Pil kilang Wiewia 2:8, 11.) Pil ehu karasaras iei duwen emen sister nan Wehin Amerika me nein rie ohlo pwutak mi nan ehu sahpw tohrohr. Sistero kadarala ehu link me kasalehda kisin kasdo wet rehn pwutako ni pein eh lokaia. Pwutako kilangla kasdo oh e e-mail sistero nda: “I mwekidkihda wasao nan kasdo me pid manaman en me suwedo kin kakaun sampah. I pekidahr emen en onop Paipel rehi.” Met uhdahn kaperen pwehki pwutako kin kousoan nan sahpw ehu me kin keinepwi atail doadoahk en kalohk!

16. Menlau kawehwehda kahrepen ehuehu kisin pwuhk pwukat: (a) Rong Koht pwe Ken Mour Kohkohlahte. (b) Rohng Mwahu Sang Rehn Koht! (c) Ihs me Kin Wia Kupwuren Siohwa Rahn Pwukat?

¹⁶ Kisin pwuhk kan. Ia duwen atail kak padahngki me mehlel ong emen me sohte kak wadawad mwahu de sohte naineki sawaspen Paipel kan ni eh lokaia? Kitail kak doadoahngki kisin pwuhko Rong Koht pwe Ken Mour Kohkohlahte. * Ehu mehn doadoahk me inenen mwahu pwehn tapiada onop Paipel rehn meteikan iei kisin pwuhko Rohng Mwahu Sang Rehn Koht! Ke kak kasalehiong ih oaralap 14 ko me mi ni mwurin pwuhk wet oh idek reh mehnia me e men keieu sukuhlki. Kowe eri tepida onopki iren mehn kasukuhlo reh. Mie pak ke song wiepe wet ni omw pwurehng pwurala rehn emen? Kesiluh en kisin pwuhk nan neitail koakon en kasukuhl iei Ihs me Kin Wia Kupwuren Siohwa Rahn Pwukat? Kisin pwuhk wet wiawihda pwehn padahkihong tohnsukuhl en Paipel kan duwen atail pwihn. Pwehn ese ia duwen omw pahn doadoahngki kisin pwuhk wet nan ehuehu onop en Paipel, menlau kilang Atail Mour en Kristian oh Kalohk​—Doaropwehn Kasukuhl Ong Mihting en March 2017.

17. (a) Ia uhdahn kahrepen ehuehu pwuhken onop kan? (b) Dahme irail me pahn papidaisla kan koaros anahne wia, oh dahme kahrehda?

¹⁷ Pwuhk kan. Mwurin omw tepida onopki ehu kisin pwuhk pwukat rehn emen, ke kak pilada sohte lipilipil iahd me ken uhd doadoahngki pwuhken Dahme Paipel Kak Padahkihong Kitail? Pwuhk wet kak sewese aramas akan en kalaudehla arail sukuhlki padahk mengei kan en Paipel. Ma tohnsukuhlo kin kekeirda mwahu oh e kanekehla pwuhk wet, ke kak pousehla amwa onopo oh onopki pwuhken How to Remain in God’s Love (lokaiahn wai). * Mehn doadoahk wet pahn padahkihong tohnsukuhlo ia duwen eh pahn doadoahngki kaweid oh ire mehlel kan en Paipel nan eh mour en ehuehu rahn. Tamataman me pil mwurin papidais, me kapwodo men anahne pousehlahte eh onop lao e kanekehla pwuhk riau pwukat. Met pahn sewese ih en ahneki pwoson laud ong Siohwa oh kolokolte eh loalopwoatohng ih.—Wadek Kolose 2:6, 7.

18. (a) Dahme 1 Timoty 4:16 kangoange kitail en wia nin duwen sounpadahk en me mehlel, oh ia imwilahn met? (b) Ia atail mehn akadei ni atail doadoahngki neitail Koakon en Kasukuhl?

¹⁸ Nin duwen Sounkadehdehn Siohwa kan, kitail ahneki pwukoa en padahkihong aramas akan “rohng mehlel me iei rongamwahwo” me kak kahluwairaillahng mour soutuk. (Kol. 1:5; wadek 1 Timoty 4:16.) Pwehn sewese kitail wia met, mie neitail Koakon en Kasukuhl me audaudki mehn doadoahk kan me kitail anahne. (Menlau kilang koakon me oaralape “ Koakon en Kasukuhl.”) Kitail en doadoahngki mehn doadoahk pwukat ni uwen atail kak. Emenemen kitail kak pilada mehnia mehn doadoahk me kitail en doadoahngki oh iahd me konehng. Ahpw tamataman me atail mehn akadei iei en dehr kihlahte pwuhk kan, oh kitail sohte kin kihong irail kan me sohte men rong. Atail mehn akadei iei en sewese aramas akan me kin mehlel, aktikitik, uhdahn men esehla Koht, oh me “ahneki mohngiong mwahu en ale mour soutuk” ren wiahla sapwellimen Sises tohnpadahk kan.​—Wiewia 13:48; Mad. 28:19, 20.