1, 2. (a) Pwukoa kesempwal dahieu me Solomon alehdi? (b) Dahme kahrehda Depit nsenohki Solomon?

SOLOMON alehdi pwukoa tohrohr ehu. Siohwa ketin pilada ih en apwalih kokoudahn tehnpas sarawio nan Serusalem, me wia ehu koasoandi en kokou ihmw me keieu kesempwal nan poadopoad. Tehnpas sarawio “uhdahn pahn lingan oh ndand.” Keieu kesempwal, e pahn wia tehnpas en Siohwa, Koht mehlelo.​—1 Kron. 22:1, 5, 9-11.

² Nanmwarki Depit uhdahn kamehlele me Koht pahn ketin sewese Solomon. Ahpw Solomon “me nohn pwulopwul oh soakoahiek.” Ia duwe, e pahn eimahiong pwukoahn kauwada tehnpas sarawio? De eh pwulopwul oh soakoahiek pahn kauhdi ih sang wia met? Pwe en kak pweida, Solomon anahne eimah oh tepida doadoahk.

3. Dahme Solomon kakete sukuhlkihsang semeo duwen eimah?

³ Solomon ele sukuhlki laud duwen eimah sang semeo, Depit. Pil ni Depit eh pwulopwul, e peiong mahn lawalo kan me kohdohng wahsang nein semeo sihpw ko. (1 Sam. 17:34, 35) E pil kasalehda eimah ni eh peiong kodon kommwad oh kamasepwehko, Kolaiad. Ei,  pwehki sapwellimen Koht sawas, Depit kalowehkihdi Kolaiad takai medendel ehu.​—1 Sam. 17:45, 49, 50.

4. Dahme kahrehda Solomon anahne en eimah?

⁴ Kitail kak wehwehki dahme kahrehda Depit warohng kangoange Solomon en eimah oh kauwada tehnpas sarawio. (Wadek 1 Kronikel 28:20, NW.) * Ma Solomon sohte kasalehda eimah, masak kak kahrehiong en luwetala, de kauhdi ih sang tepida doadoahko. Met pahn suwedsang eh sohte pweida nan eh pwukoa.

5. Dahme kahrehda kitail anahne eimah?

⁵ Duwehte Solomon, kitail anahne sawas sang Siohwa pwehn eimah oh kanekehla doadoahko. Eri kitail pahn tehkpene mehn kahlemeng en ekei irail kan mahso me kasalehda eimah. Oh kitail kak medewe ia duwen atail kak kasalehda eimah oh kapwaiada atail doadoahk.

6. Dahme kapwuriamwei me pid en Sosep eh eimah?

⁶ Sosep kasalehda eimah ni en Podipar eh pwoudo kasonge ih en wendi reh. E ese me eh mour pahn mihla nan keper ma e sohte dukiong. Ahpw mendahki met, e kasalehda eimah oh mwadangete tangasang liho.​—Sen. 39:10, 12.

7. Ia duwen Reap eh kasalehda eimah? (Menlau kilang tepin kilel.)

⁷ Reap pil emen me wia mehn kahlemeng en eimah. Ni lipoahrok riemen en Israel ko ara kohla ni imweo nan Seriko, e kakete masepwehkada oh sohte sewese ira. Ahpw pwehki e likih Siohwa, ni eimah e karukihirahla oh sewese ira en kohkohsang wasao. (Sos. 2:4, 5, 9, 12-16) Reap kamehlele me Siohwa iei Koht mehlelo, oh e uhdahn koapworopworki me Koht pahn uhdahn ketikihong mehn Israel ko sahpwo. E sohte mweidohng masak aramas, pil iangahki nanmwarki en Seriko oh nah sounpei kan, en kaluwetala ih. Ahpw ni eimah, e kapitala ih oh eh peneineio.​—Sos. 6:22, 23.

8. Ia duwen sapwellimen Sises eimah eh kamwakid wahnpoaron ko?

⁸ Sapwellimen Sises wahnpoaron ko pil kasalehda eimah laud. Irail kilang eimah me Sises ketin kasalehda, oh met sewese irail en kahlemengih ih. (Mad. 8:28-32; Sohn 2:13-17; 18:3-5) Ni ahnsou me Sadusi ko song en kauhiraildi sang padahngki duwen Sises, wahnpoaron ko sohte dukiong.​—Wiewia 5:17, 18, 27-29.

9. Ia duwen 2 Timoty 1:7 eh sewese kitail en wehwehki ia wasa eimah kohsang ie?

⁹ Sosep, Reap, Sises, oh wahnpoaron ko uhdahn koasoanehdi teng en wia dahme pwung. Re kasalehda eimah, kaidehn pwehki re koapworopworki pein arail koahiek kan, ahpw pwehki irail kin likih Siohwa. Ni ahnsou kan me kitail anahne eimah, kitail pil anahne koapworopworki Siohwa, ah kaidehn pein kitail. (Wadek 2 Timoty 1:7.) Kitail pahn tehkpene irair riau nan mour me kitail anahne eimah: nan peneinei oh nan mwomwohdiso.

10. Dahme kahrehda Kristian pwulopwul kan anahne eimah?

¹⁰ Mie soangen irair tohto me me pwulopwul kan anahne kasalehda eimah pwehn papah Siohwa. Irail kak sukuhlki oh idawehn mehn kahlemeng en Solomon, me kasalehda eimah ni e wiahda pilipil loalokong kan pwehn kanekehla kokoudahn tehnpas sarawio. Mendahki me pwulopwul kan kak oh anahne ale kaweid sang arail pahpa nohno, mie pilipil kesempwal kan me pein irail anahne wiahda. (Lep. Pad. 27:11) Re anahne eimah pwehn pilada ni loalokong ihs me pahn wia kompoakparail, mehn kamweit kan, ia duwen arail pahn kolokolete arail tiahk mwakelekel, oh iahd me irail pahn papidaisla.  Re anahne soangen eimah wet pwehki re kin pelianda Sehdan, me kin kauwe Koht.

11, 12. (a) Ia duwen Moses eh kasalehda eimah? (b) Ia duwen me pwulopwul kan ar kak alasang en Moses eh mehn kahlemeng?

¹¹ Ehu pilipil kesempwal me me pwulopwul kan anahne wiahda kin pidada arail mehn akadei kan. Nan ekei sahpw, me pwulopwul kan kin lelohng kasongosong en nantihong ale sukuhl laud oh ale doadoahk me pahn kahrehiong ren naineki mwohni tohto. Nan sahpw teikan, palien mwohni uhdahn apwal, oh me pwulopwul tohto medewe me arail mehn akadei keieu kesempwal iei en doadoahk pwehn sewese arail peneinei kan. Ma ke mi nan soangen irair pwukat, medewehla ahn Moses mehn kahlemengo. Nein Parao serepeino me apwalihada ih, eri e kakete akadeiong en uhdahn kepwehpwehla oh lapalapala. Medewehla kasongosong me e lelohng sang eh peneinei, sounpadahk, oh sounkaweid kan en Isip! Ahpw Moses uhdahn eimah oh pilada en papah Siohwa. Mwurin Moses eh kohkohsang Isip oh pai kan en wasao, e kin uhdahn koapworopworki Siohwa. (Ipru 11:24-26) Imwilahn met, Siohwa ketin kapaiahda laud ih, oh pil pahn ketin kapaiahda ih ni ahnsou kohkohdo.

¹² Ni me pwulopwul kan ar kin eimah wiahda mehn akadei kan nan sapwellimen Siohwa doadoahk oh pil mwohneki mahs Wehio nan arail mour, Siohwa pahn ketin kapaiahda irail. E pahn ketin sewesekin irail anahn akan en arail peneinei. Ni mwehin tepin Kristian ko, pwutak pwulopwulo Timoty kin medemedewehte eh papah Koht, oh ke pil kak wia duwehte. *​—Wadek Pilipai 2:19-22.

13. Ia duwen eimah eh sewese emen sister pwulopwul en kapwaiada eh mehn akadei kan?

¹³ Emen sister nan Alabama, Wehin Amerika, anahne eimah pwehn wiahda mehn akadei kan nan eh papah Koht. E ntingihedi: “Ni ei wie kekeirda, I kin uhdahn namenek. I kin apwalki koasoiong aramas akan ni Wasahn Kaudok, oh pil apwalki letelet ni wenihmw kan nan kalohk.” Pwehki sawas sang eh pahpa nohno oh meteikan nan eh mwomwohdiso, Kristian pwulopwul menet kapwaiada eh mehn akadei en wiahla emen pioneer. E nda: “Ahn Sehdan sampah kin wiahki mehn akadei mwahu kei en iang sukuhl laud, ndandla, naineki mwohni laud, oh ahneki kepwe tohto.” Ahpw sistero pil pohnese me pali laud en aramas akan sohte kak kapwaiada mehn akadei pwukat oh me soahng pwukat kin ihte kahrehda pwunod oh medek. E kapatahiong: “Papah Siohwa kin uhdahn kihong ie nsenamwahu mehlel oh I pehm me I pweida mwahu.”

14. Ni ahnsou dah me pahpa nohno Kristian kan anahne eimah?

¹⁴ Pahpa nohno Kristian kan pil anahne eimah. Karasepe, omw kaun en doadoahko kin kalapw peki rehmw ken doadoahk mwurin awahn doadoahk ni rahn akan me ke koasoanehdi ong kaudok en peneinei, doadoahk en kalohk, oh mihting en mwomwohdiso kan. Ke anahne eimah pwehn ndaiong ih soh oh wiahda mehn kahlemeng mwahu ong noumw seri kan. De mwein ekei pahpa nohno nan mwomwohdiso kin mweidohng neirail seri kan en wia soahng kan me ke sohte men noumw seri kan en wia. Ni pahpa nohno pwuko ar idek rehmw ia kahrepe, ke pahn eimah oh kawehwehiong irail ni wahu?

15. Ia duwen Melkahka 37:25 oh Ipru 13:5 ara kak sewese pahpa nohno kan?

¹⁵ Kitail anahne eimah pwehn sewese neitail seri kan en wiahda oh kapwaiada ar mehn akadei kan en papah Koht. Karasepe, ekei pahpa nohno mwein kin masak kangoange neirail seri kan en wia doadoahk en pioneer, papah wasa ehu me mie anahn laud ong sounkalohk kan, papah nan Pedel, de iang sewese kauwada Wasahn Kaudok kan oh wasahn kapokon laud kan.  Mwein re perki me neirail seri ko sohte pahn kak apwalih irail ni ahnsou me re pahn mahla. Ahpw, pahpa nohno loalokong kan kin kasalehda eimah oh pwoson me Siohwa pahn ketin kapwaiada sapwellime inou kan. (Wadek Melkahka 37:25; Ipru 13:5.) Pahpa nohno kan me kin kasalehda soangen eimah wet oh koapworopworki Siohwa kin sewese neirail seri kan en wia duwehte.​—1 Sam. 1:27, 28; 2 Tim. 3:14, 15.

16. Ia duwen ekei pahpa nohno kan ar kin sewese neirail seri kan en wiahda mehn akadei kan en papah Koht, oh ia duwen neirail seri kan ar paiekihda met?

¹⁶ Pwopwoud ehu nan Wehin Amerika sewese neira seri kan en medemedewe duwen arail en papah Siohwa. Ohl pwopwoudo nda: “Ni ahnsou me nait seri ko saikinte alu de lokaia, se kin koasoiaiong irail duwen kaperen en pioneer oh papah nan mwomwohdiso. Ih met arail mehn akadei ahnsouwet.” E pil nda me pwehki neira seri ko wiahda oh kapwaiada soangen mehn akadei pwukat, met kin sewese irail en pelianda kasongosong kan sang ahn Sehdan sampah oh en kilangwohngete arail papah Siohwa. Emen brother me naineki seri riemen ntingihedi: “Pahpa nohno tohto kin kihong arail ahnsou laud, mwohni, de kehl pwehn sewese neirail seri kan en lel arail mehn akadei kan ong soahng kan me duwehte mwadong kan, mehn kamweit, oh sukuhl. E uhdahn pahn wia elen loalokong en kihong ahnsou laud, mwohni, de kehl pwehn sewese neitail seri kan en lel mehn akadei kan me pahn sewese irail en kolokol arail nanpwungmwahu rehn Siohwa. E uhdahn kaperen kaidehn ihte en kilang neitail seri kan en lel ar mehn akadei kan en papah Siohwa ahpw en pil ieiang irail.” Ke kak kamehlele me Siohwa kin ketin kupwurperenki pahpa nohno kan me kin sewese neirail seri kan en wiahda oh kapwaiada mehn akadei kan en papah ih.

17. Menlau kasalehda mehn kahlemeng kan en eimah nan mwomwohdisohn Kristian.

¹⁷ Kitail pil anahne kasalehda eimah nan mwomwohdiso. Karasepe, elder kan anahne eimah ni arail kin sewese irail kan me wiahda dihp laud de irail kan me arail mour mihla nan keper pwehki soumwahu. Ekei elder kin mwemweitla  ni imweteng kan pwehn onop de wia mihting kan rehn irail me perenki rong. A ia duwen sister kiripw kan? Irail ahneki ahnsou mwahu tohto en kasalehda eimah oh papah Siohwa. Re kak pioneer, keseula wasa kan me anahn laud ong sounkalohk, iang doadoahk en kauwada ihmw (Local Design/Construction), oh audehda doaropwehn iang Sukuhl ong Sounkalohki Wehio kan. Ekei pil ale luhk en iang Sukuhl en Kilead.

18. Ia duwen sister mah kan ar kak kasalehda eimah?

¹⁸ Kitail kin poakohng riatail sister mah kan, oh kitail kin kalahnganki arail iang atail mwomwohdiso! Mendahki ekei mwein sohte kak wia uwen me re kin wia mahso pwehn papah Koht, re pil kak kasalehda eimah oh kohla doadoahk. (Wadek Taitus 2:3-5.) Karasepe, sister mah men anahne kasalehda eimah ma elder kan peki reh en koasoiong sister pwulopwul men duwen en doadoahngki likou me konehng. E sohte pahn lipwoarehki sistero likou me e doadoahngki ko, ahpw ni kadek, e pahn sewese ih en medemedewe ia duwen eh pilipil kan ar pahn kamwakid meteikan. (1 Tim. 2:9, 10) Ni sister mah kan ar kin kasalehda ar limpoak ni ahl pwukat, re kak kakehlakahda mwomwohdiso.

19. (a) Ia duwen brother papidaislahr kan ar kak eimah? (b) Ia duwen Pilipai 2:13 oh Aiseia 12:2 ara sewese brother kan ren kakairada eimah?

¹⁹ Brother papidaislahr kan pil anahne eimah oh kohla doadoahk. Ni arail kin men papah nin duwen sounsawas oh elder kei, mwomwohdiso kin paiekihda laud. (1 Tim. 3:1) Ahpw, mwein ekei kin peikasalki wia met. Mwein brother men wiahda sapwung kei mahso, oh met e kin pehm me e sohte warohng wiahla sounsawas de elder men. Pil emen brother kin pehm me e sohte ahneki koahiek en papah. Ma ke kin ahneki soangen pepehm wet, Siohwa kak ketin sewese iuk en kakairada eimah. (Wadek Pilipai 2:13; Aiseia 12:2.) Tamataman mehn kahlemeng en Moses. E pil pehm me e sohte kak wia dahme Siohwa ketin mahsanihong en wia. (Eks. 3:11) Ahpw Siohwa ketin sewese ih en eimah oh wia dahme e anahne wia. Ia duwen brother papidaislahr men eh kak ahneki soangen eimahohte? E kak kapakapki sawas sang rehn Siohwa oh pil wadek Paipel ehuehu rahn. E kak doudouloale mehn kahlemeng en irail kan nan Paipel me kin kasalehda eimah. Ni aktikitik, e kak peki rehn elder kan ren kaiahne ih oh en pil iang sawas nan mwomwohdiso ni ahl sohte lipilipil me anahn. Se kangoange brother papidaislahr kan koaros ren eimah oh doadoahk laud ong mwomwohdiso!

20, 21. (a) Dahme Depit katamankihong Solomon? (b) Dahme kitail kak kamehlele?

²⁰ Nanmwarki Depit katamankihong Solomon me Siohwa pahn ketin ieiang ih lao e pahn kanekehla kokoudahn tehnpas sarawio. (1 Kron. 28:20) Solomon uhdahn kin doudouloale koasoi pwukat, oh e sohte mweidohng eh pwulopwul oh soakoahiek en kauhdi ih sang wia doadoahko. Ahpw e kasalehda eimah laud, oh pwehki sapwellimen Siohwa sawas, e kanekehla tehnpas sarawi kaselelo nan erein sounpar isuh elep.

²¹ Siohwa ketin sewese Solomon. E pil kak ketin sewese kitail en eimah oh kapwaiada atail doadoahk, nan atail peneinei oh nan mwomwohdiso. (Ais. 41:10, 13) Ma kitail kasalehda eimah ni atail kin papah Siohwa, kitail kak kamehlele me e pahn ketin kapaikitailda ahnsouwet oh pil ni ahnsou kohkohdo. Eri, “eimah . . . oh kohla doadoahk.”