1, 2. (a) Ia imwilahn emen eh sohte kak kaunda pein ih? (b) Dahme kahrehda kitail en koasoiapene duwen irair en kaunda pein emen nan rahnpwukat?

SIOHWA KOHT kak ketin sewese kitail en kakairada irair en “kaunda pein kitail.” (Kal. 5:22, 23, NW) Siohwa ketin sapwellimanki irair en kaunda pein ih me uhdahn unsek, ahpw kitail sohte kak, pwehki kitail sohte unsek. Kahpwal tohto me aramas akan rahnwet ahneki kin kohsang arail sohte kak kaunda pein irail. Sohte kak kaunda pein emen kak kahrehiong ih en pwand en kapwaiada doadoahk kesempwal kan de sohte pweida mwahu nan sukuhl de doadoahk. E pil kak kahrehda emen en doadoahngki lokaia lemei, kamamsakau, tiahk lemei, mweipeseng en pwopwoud, pweipwand laud, doadoahngki wini en kasahliel, selidi nan imweteng, nsensuwed laud, soumwahu suwed me kohsang tiahk samin, oh pil liseian en kiripw.​—Mel. 34:11-14.

² Aramas akan me sohte kin kaunda pein irail kin kahrehiong irail oh meteikan nan apwal. Ahnsou douwehr powe, e sansal me aramas akan solahr nohn kin kasalehda irair wet. Ahpw met sohte wia mehkot kapwuriamwei pwehki Mahsen en Koht kohpada me irair en sohte kak kaunda pein emen pahn wia ehu mehn kadehde me kitail miehier “ni imwin rahn akan.”​—2 Tim. 3:1-3.

3. Dahme kahrehda kitail anahne irair en kaunda pein kitail?

³ Dahme kahrehda kitail anahne irair en kaunda pein kitail? Mie  kahrepe kesempwal riau. Keieu, aramas akan me kak kaunda arail pepehm sohte kin ahneki kahpwal tohto. E pil mengei ong irail en ahneki nanpwungmwahu rehn meteikan oh kak soikala keh lingeringer, pwunod oh nsensuwed laud. Keriau, pwehn kompoakepahnkihte Koht, kitail anahne pelianda kasongosong oh powehdi ineng sapwung kan. Adam oh Ihp sohte wia met. (Sen. 3:6) Duwehte ira, aramas tohto rahnwet ahneki kahpwal laud kan pwehki re sohte kak kaunda pein irail.

4. Dahme kak sewese irail kan me kin apwalki kaunda arail ineng sapwung kan?

⁴ Siohwa ketin mwahngih me kitail sohte unsek oh e apwal ong kitail en kaunda pein kitail. Ahpw e ketin kupwurki sewese kitail en powehdi atail ineng sapwung kan. (1 Nan. 8:46-50) Nin duwen kompoakparail limpoak men, e kin ketin kangoange ni kadek irail kan me kin ekei pak apwalki kaunda arail pepehm oh ineng kan. Nan iren onop wet, kitail pahn sukuhlki sapwellimen Siohwa mehn kahlemeng duwen kaunda pein ih. Kitail pil pahn koasoiapene karasaras mwahu oh suwed kan nan Paipel, oh kousapahl kaweid mwahu kan me kak sewese kitail.

5, 6. Mehn kahlemeng mwahu dahieu me Siohwa ketikihda ong kitail me pid irair en kaunda pein ih?

⁵ Sapwellimen Siohwa irair en kaunda pein ih uhdahn unsek pwehki e kin ketin unsek ni soahng koaros. (Deud. 32:4) Ahpw kitail sohte unsek. Kitail anahnehte tehk mwahu sapwellime mehn kahlemeng en kaunda pein ih pwe kitail en kak kamwahwihala atail kin kahlemengih ih. Met pahn sewese kitail en ese ia duwen atail en mwekid ni ahl pwung ni ahnsou me soahng kan wiawi me kak kansensuwedihala kitail. Ia ekei karasaras en sapwellimen Siohwa irair en kaunda pein ih?

⁶ Medewehla mwomwen Siohwa eh ketin mwekidki ahn Sehdan eh uhwongada ih nan mwetuwel en Ihden. Sapwellimen Koht ladu lelepek ko koaros nanleng kakete pwuriamweikihla oh lingeringerkihda ahn Sehdan eh karaun likamwo. Mwein ke pil ahneki soangen pepehm wet ni omw medewehla duwen lokolok koaros me Sehdan kahredahr. Ahpw Siohwa sohte ketin kasalehda mwekid en pwurur. E ketikihda pasapeng me uhdahn pwungiong irairo. Siohwa sohte ketin mwadang engiengda ahpw ketin kasalehda pahrek ni eh ketin apwalihala ahn Sehdan uhwongo. (Eks. 34:6; Sohp 2:2-6) Dahme kahrehda? Siohwa ketin mweidohng ahnsou pwehki e sohte kupwurki emen en sohrala ahpw e “kupwurki koaros en wiliakapwala.”​—2 Pit. 3:9.

7. Dahme kitail kak sukuhlkihsang sapwellimen Siohwa mehn kahlemeng?

⁷ Sapwellimen Siohwa mehn kahlemeng kin padahkihong kitail me kitail anahne medewe kanahieng mwohn atail en lokaia oh dehr pwurur. Eri ni omw pahn wiahda pilipil kesempwal ehu, kihong ahnsou en medemedewe mwahu. Kapakapki erpit pwe ken nda de wia me pwung. (Mel. 141:3) Ni atail kin lingeringerda de nsensuwedla, e kin mengei en mwekid ni pwurur. Ihme kahrehda me tohto kin koluhkihla dahme re nda de wia ni soh lamalam!​—Lep. Pad. 14:29; 15:28; 19:2.

8. (a) Ia wasa kitail kak diarada mehn kahlemeng mwahu en kaunda pein kitail? (b) Dahme sewese Sosep en pelianda kasongosong ni ahn Podipar eh pwoudo kasonge ih en wendi reh? (Menlau kilang tepin kilel.)

⁸ Mehn kahlemeng dah kan nan Paipel me kasalehda kesempwalpen irair en kaunda pein kitail? Ehu me kitail kak medewehda iei nein Seikop pwutako, Sosep. E pelianda kasongosong ni ahnsou me e doadoahk ni imwen Podiparo, kaunen silepen tehnpas en Parao. Ahn Podipar  pwoudo mwahukihda Sosep pwehki Sosep “paliwaramwahu . . . oh pil masamwahu,” oh pak tohto e kin kasonge Sosep en wendi reh. Dahme sewese Sosep en pelianda kasongosongo? Mwein e kihong ahnsou en medemedewe kanahieng mwohn dahme kakete wiawi ma e dukula pahn liho. Eri, ni liho eh koledi eh likowo, Sosep tangasang. E nda: “Ia duwen ei pahn wiahda soangen sapwung laud wet, oh dipikihda mwohn Koht?”​—Sen. 39:6, 9; wadek Lepin Padahk 1:10.

9. Ia duwen omw kak kaunopada pein uhk pwehn pelianda kasongosong kan?

⁹ Dahme kitail sukuhlkihsang ahn Sosep mehn kahlemengo? Ehu me kitail sukuhlki iei en pelianda kasongosong en kauwehla sapwellimen Koht kosonned kan. Mwohn arail wiahla Sounkadehdehn Siohwa kan, ekei ahneki kahpwal en mwenge daulihala, sakau daulihala, simwok, doadoahngki wini en kasahliel, tiahk samin me pid wia nsenen pwopwoud, de pil kahpwal teikan. Pil mwurin arail papidaisla, soahng pwukat kin ekei pak kasonge irail. Ma met wiawihong uhk, uhdi oh medewe ia duwen omw nanpwungmwahu rehn Siohwa eh pahn kakete ohla ma ke dukula pahn kasongosongo. Ke kak song en tehkada soangen irair kan me kakete kasonge iuk oh koasoanehdi ia duwen omw kak soikala. (Mel. 26:4, 5; Lep. Pad. 22:3) Ma ke mihla nan kasongosong ehu, peki rehn Siohwa en ketikihong uhk erpit oh irair en kaunda pein kowe pwe ken pelianda kasongosongo.

10, 11. (a) Dahme kin wiawihong me pwulopwul tohto nan sukuhl? (b) Dahme kak sewese Kristian pwulopwul kan ren pelianda kasongosong en kauwehla sapwellimen Koht kosonned kan?

¹⁰ Dahme wiawihong Sosep pil kin wiawihong Kristian pwulopwul tohto rahnwet. Ehu karasaras iei Kimberly. Iengen Kimberly tohnsukuhl kan kin kalapw suweiki arail wia nsenen pwopwoud rehn ekei ni imwin wihko. Kimberly sohte kin wia met, eri e sohte kin nda mehkot. E nda me eh weksang ienge ko kin kahrehiong ih en pehm me e kin “kelehpwla” ekei pak, oh me ienge tohnsukuhl ko leme me e pweipwei pwehki e sohte kin date. Ahpw Kimberly loalokong. E sohte kin date pwehki e ese me kasongosong en wia nsenen pwopwoud kak uhdahn kehlail ni atail pwulopwul. (2 Tim. 2:22) Ekei tohnsukuhl ko kin idek ma e meipwonte. Re kin mweidohng ih en kawehwehda dahme kahrehda e pilada en dehr wia nsenen pwopwoud. Kitail kin uhdahn pohlki Kristian pwulopwul kan me kin koasoanehdi teng ren pelianda kasongosong en wia tiahk samin, oh Siohwa pil ketin kupwurperenkin irail!

¹¹ Paipel pil kihda karasaras en irail kan me sohte pelianda kasongosong en wia tiahk samin me pid wia nsenen pwopwoud. E pil kasalehda imwila suwed kan ni ahnsou me kitail sohte kin kaunda pein kitail. Ma ke mi nan soangen irairo me Kimberly ahneki, medewehla duwen mwahnakapw pweipweio nan Lepin Padahk irelaud 7. Pil medewehla duwen Amnon oh imwila suwed en eh wiewiao. (2 Sam. 13:1, 2, 10-15, 28-32) Pahpa nohno kan kak sewese neirail seri kan en kakairada irair en kaunda pein irail oh pil erpit sang ni arail koasoiapene mehn kahlemeng pwukat nan arail kaudok en peneinei.

12. (a) Ia duwen Sosep eh kaunda eh pepehm kan ong rie pwutak ko? (b) Ni soangen irair dah me kitail anahne kaunda atail pepehm kan?

¹² Pil ehu ahnsou, Sosep pwurehng wia mehn kahlemeng mwahu duwen kaunda pein ih. Ahnsowo iei ahnsou me rie pwutak ko kohla Isip pwehn pwainda mwenge. Pwehn wehwehki dahme rie ko uhdahn medemedewe, Sosep sohte ndahng irail ihs ih. Oh ni eh pepehm en men sengiseng eh uhdahn laudla, e pedoila sang rie ko pwehn kak kelehpwla oh sengiseng. (Sen. 43:30, 31; 45:1) Ma riatail Kristian men wiahda mehkot me kansensuwedihukada, omw alasang Sosep eh kaunda pein ih pahn seweseiuk en  soikala nda de wia mehkot me ke kakete koluhkihla mwuhr. (Lep. Pad. 16:32; 17:27) De mwein mie kisehmw kan me piskenla. Ma mie, ke anahne kaunda omw pepehm kan pwe ken soikala koasoiong irail ma sohte anahnepe. Met kak apwal. Ahpw e pahn mengeila ma ke tamanda me ke kin alahlasang sapwellimen Siohwa mehn kahlemeng oh wiewia dahme e ketin kehkehlingki.

13. Mehn kasukuhl dah kan me kitail kak sukuhlkihsang mouren Nanmwarki Depit?

¹³ Kitail pil paiekihda mehn kahlemeng en Nanmwarki Depit. Ni Sohl oh Simei ara kasonge ih en lingeringerda, Depit sohte wia met de pil doadoahngki eh manaman pwehn uhwongada ira. (1 Sam. 26:9-11; 2 Sam. 16:5-10) Ahpw Depit sohte kin ahnsou koaros kaunda pein ih. Kitail ese met sang atail wadek duwen eh wiahda dihp rehn Padsipa oh pil mwomwen eh mwekidki noahrok en Napal. (1 Sam. 25:10-13; 2 Sam. 11:2-4) Mie mehn kasukuhl kesempwal tohto me kitail kak sukuhlkihsang Depit. Keieu, sounapwalih kan nan sapwellimen Koht pwihn uhdahn anahne kaunda pein irail pwe ren dehr doadoahngki arail manaman ni ahl sapwung. Keriau, sohte emen en nohn koapworopworki pein eh koahiek oh medemedewe me e sohte pahn lohdiong kasongosong kan.​—1 Kor. 10:12.

14. Dahme wiawihong brother men, oh dahme kahrehda atail mwekid nan soangen irairo kesempwal?

¹⁴ Dahme ke kak wia pwehn kalaudehla omw irair en kaunda pein uhk? Medewehla irair wet me uhdahn wiawi. Sidohsa ehu loiong mwurin weren Luigi sidohsao. Mendahki ohl me tangahki sidohsao iei me kahrehda aksidento, e tepida wering oh men peiong Luigi. Luigi kapakap ong Siohwa pwe en kak meleilei oh song en kameleileidi ohlo. Ahpw ohlo pousehlahte wie weriwer. Luigi eri ntingihedi nein ohlo doaropwehn insurance ko oh kohkohla, mendahki ohlo wie weriwerte. Wihk ehu mwuri, Luigi pwurehng pwurala rehn lih emen nan kalohk. Ahn liho pwoudo iei ohl me tangahki sidohsa teio! Ohlo namenekda oh pekimahngki eh wiewia lemei ko. E ndaiong Luigi me e pahn koasoiong kompani en insurance me Luigi kin doadoahngki pwe Luigi en kak mwadang kamwahwihala were sidohsao. Ohlo eri iang mwohdehng koasoakoasoipene en Paipelo oh uhdahn perenkihda. Pwehki met, Luigi esehda ia uwen kesempwal eh kolokolte eh meleilei mwurin aksidento oh pil ia imwila suwed me kakete wiawi ma e lingeringerda ahnsowo.​—Wadek 2 Korint 6:3, 4.

15, 16. Ia duwen onopki Paipel eh kak seweseiuk oh omw peneinei en kakairada irair en kaunda pein kumwail?

¹⁵ En kaukaule onop Paipel ni ahl me katapan kak sewese Kristian kan ren kakairada irair en kaunda pein irail. Tamataman dahme Koht mahsanihong Sosua: “Kanahieng pwe pwuhken Kosonnedo pahn kin wadawad ni ahnsoun kaudok koaros. Ke pahn kin sukusukuhlki nin rahn oh nipwong, oh kanahieng soahng koaros me ntingdier loale. Eri, ke ahpw pahn kepwehpwehla oh pweida.” (Sos. 1:8) Ahpw ia duwen onop Paipel eh kak seweseiuk en kakairada irair en kaunda pein uhk?

¹⁶ Kitail sukuhlki me mie mehn kahlemeng kan nan Paipel me kasalehda ia duwen atail kin paiekihda ni atail kin kaunda pein kitail oh pil ia duwen atail kin lelohng lokolok ni atail sohte kin. Siohwa ketikihda mehn kahlemeng pwukat nan Paipel ong kahrepe ehu. (Rom 15:4) E pahn wia elen loalokong en wadek, onopki, oh medewe kanahieng mehn kahlemeng pwukat. Song en wehwehki ia duwen mepwukat ar kak kadoadoahk ong pein kowe oh omw peneinei. Peki rehn Siohwa en ketin seweseiuk en doadoahngki kaweid kan sang sapwellime Mahsen. Ma ke esehda me mie wasa kan rehmw me ke  sohte kak kaunda, nantihong kapwungala. Eri kapakapki oh nantihong en kilang ia duwen omw kak kamwahwihala. (Seims 1:5) Wia roporop nan neitail sawaspen Paipel kan pwehn diarada kaweid mwahu me kak seweseiuk.

17. Ni ahl dah kan me pahpa nohno kan ar kak sewese neirail seri kan en kakairada irair en kaunda pein irail?

¹⁷ Ia duwen omw kak sewese noumw seri kan en kakairada irair en kaunda pein irail? Pahpa nohno kan ese me neirail seri kan sohte ipwidihte ahneki irair wet. Eri re anahne padahkihong neirail seri kan duwen irair mwahu kan sang ni pein arail mehn kahlemeng mwahu. (Ep. 6:4) Ma ke kilang me noumw seri kan sohte ahneki irair en kaunda pein irail, pein idek rehmw ma ke kin wia mehn kahlemeng mwahu. Ke kak wia mehn kahlemeng mwahu ni omw kin kaukaule iang kalohk, mihting, oh wia kaudok en peneinei. Oh dehr perki ndaiong irail soh ni ahnsou me konehng! Mie irepen soahng kan me Siohwa ketikihong Adam oh Ihp. Soahng pwukat kak sewese ira en sukuhlki en wauneki sapwellimen Siohwa manaman en kaunda. Ni ahlohte, ni pahpa nohno kan ar kaiahne neirail seri kan oh wiahda mehn kahlemeng mwahu ong irail, met kak padahkihong seri ko duwen irair en kaunda pein irail. Poakohng sapwellimen Koht manaman en kaunda oh wauneki sapwellime koasoandi kan iei ekei soahng kan me keieu kesempwal me ke kak sewesehki noumw seri ko en ahneki.​—Wadek Lepin Padahk 1:5, 7, 8.

18. Dahme kahrehda kitail anahne pilada ni loalokong ihs me kitail pahn kompoakepahnki?

¹⁸ Sohte lipilipil ma kitail wia pahpa nohno kei de soh, kitail koaros anahne pilada ni loalokong ihs me kitail pahn kompoakepahnki. Ma kompoakepahmw kan kin poakohng Siohwa, re pahn kangoange iuk ken wiahda mehn akadei mwahu kan oh soikala kahpwal. (Lep. Pad. 13:20) Arail mehn akadei mwahu kan pahn kamwakid uhk en alasang arail irair en kaunda pein irail. Oh omw wiewia mwahu kan pil pahn uhdahn kangoange irail. Atail kakairada irair en kaunda pein kitail pahn sewese kitail en kenikenla pahn kupwuren Koht, perenki atail mour, oh ahneki ahnsou mwahu rehn me kitail kin poakohng kan.