NI MPEN pahr 1935, ei pahpao oh nohno​—James oh Jessie Sinclair—keseula Bronx, kousapw ehu nan New York City. Ira tuhwong ohl emen, Willie Sneddon, me duwehte ira, pil kohsang Scotland. Minit kei mwurin arail tuhpene, re tepida koasoia duwen arail peneinei kan. Met wiawi sounpar kei mwohn ei ipwidi.

Nohno ndaiong Willie me mwohnte mahwen keieu en sampah, eh pahpao oh rie pwukat laudo mwopwula ni ahnsou me werera pwohto lel pakudang ehu nan Sehd en Paliepeng. Willie ndaiong, “Ahmw pahpao mi nan ehl!” Willie wia emen Sounkadehdehn Siohwa, oh ih ahl kapwuriamwei wet me ei nohno esehkihda padahk mehlel.

Ei nohno nsensuwedkihla dahme Willie ndao pwehki e ese me eh pahpao ohl mwahu men. Ahpw Willie nda, “Ia duwen ma I ndaiong uhk me Sises pil iang ketila nan ehl?” Nohno tamanda dahme pelien lamalam kan padahngki me kasalehda me Sises ketila nan ehl oh iasada rahn siluh mwuri. Eri e medewe, ‘Ma ehl wasa ehu me kisiniei kin wie lullul oh aramas suwed kan kin ale kalokolok, dahme kahrehda Sises ketila wasao?’ Met iei tepin ahnsou me ei nohno men esehla duwen padahk mehlel. E tepida towehda mihting kan nan Mwomwohdisohn Bronx oh papidaisla nan pahr 1940.

Ni ahnsowo, pahpa nohno Kristian kan sohte ale kangoang tohrohr en onop Paipel rehn neirail seri kan. Ni ahnsou me I wia kisin seri, ei pahpao kin apwalih ie erein ei nohno kin towehda mihting kan oh iang doadoahk en kalohk ni imwin wihk kan. Mwurin sounpar kei, ngehi oh ei pahpao tepida iang ei nohno towehda mihting kan. Ei nohno kin uhdahn pwerisekiong kalohki duwen rongamwahwo oh kin onop Paipel ong me men rong kan. Mie ahnsou ehu me e kin onop rehn nah tohnsukuhl kan nin duwen pwihn ehu pwehki re mi karanih emenemen. I kin iang ih kalohk erein ahnsoun kommoal en sukuhl. Ni ahl wet, I sukuhlki soahng tohto duwen Paipel oh ia duwen ei pahn padahkihong meteikan dahme e mahsanih.

I suwedki nda me ni ei tikitiko, I sohte uhdahn kalahnganki padahk mehlel. I ese me e mehlel, ahpw I sohte wiahki mehkot laud. Ahpw ni ei sounpar 12, I wiahla sounkalohk en Wehio men oh kin kaukaule iang kalohk  sang ahnsowo. Ni ei sounpar 16, I inoukihong Siohwa ei mour oh papidaisla July 24, 1954, ni mihting tohrohr ehu nan Toronto, Canada.

Ekei brother nan at mwomwohdiso wia tohn Pedel kei mahso. Re uhdahn kin kangoange ie laud. I kin pwuriamweiki arail koahiek en koasoia oh kawehwe duwen padahk mehlel kan en Paipel. Mendahki ei sounpadahk kan men I en iang sukuhl laud, ei mehn akadei iei en kohla Pedel. Eri, I audehda doaropwehn iang Pedel ni mihting tohrohr ehu nan Toronto. I pil pwurehng wia met nan pahr 1955 ni mihting tohrohr ehu nan wasahn mwadong laud ehu (Yankee Stadium), nan New York City. Sohte pwand, ni ei sounpar 17, I ale luhk en tepida papah nan Pedel en Brooklyn nan September 19, 1955. Ni rahn keriau en ei mi Pedel, I tepida doadoahk ni wasahn wiahda pwuhk (Bindery) kan ni 117 Adams Street. I kin doadoahngki misihn ehu me kin kihpene oh kaunopada pwuhk kan me audaudki pali 32 pwe ehu misihn tohrohr en dehkpene.

Mwurin mpen sounpwong ehu en ei doadoahk nan Bindery, I kohla ni wasahn wiahda makasihn kan (Magazine Department) pwehki I ese daip. Ni ahnsowo se kin daipihada adres en irail kan me kin oahte Kahn Iroir oh Awake! ni at doadoahngki dipwisou en nting ehu (address stencil). Sounpwong kei mwuri, I uhd doadoahk ni wasahn kadarpeseng pwuhk kan (Shipping Department). Klaus Jensen, me wia sounapwalih en doadoahko, idek rehi ma I men iang brother me kin doadoahngki sidohsa laud pwehn wahla koakon en sawaspen Paipel kan ni wasa me sohp kan kin peidi ie pwe sohp ko en kadarpeseng koakon ko. Pil mie ehd kan me audaudkihda makasihn me se anahne wahla wasahn pekeder kepwe kan pwehn kadarala ni mwomwohdiso koaros nan Wehin Amerika. Brother Jensen nda me e medewe e pahn  mwahu ma I wia soangen doadoahk me kin kahrehiong ie en mwekimwekidseli. I paun 125 oh uhdahn tihti ahnsowo. Ei kin iang kohla ni wasa me sohp kan kin peidi ie oh pil ni wasahn pekeder kepwe kan sewese ie en kehlailla. Brother Jensen uhdahn ese dahme mwahu ong ie!

Magazine Department pil kin audehda doaropwehn oaht makasihn kan me kohsang mwomwohdiso kan. Met kahrehda I en esehda duwen lokaia kan nan neitail makasihn kan me wiawihda Brooklyn oh pekederla nan sahpw teikan. I saikinte rong pali laud en lokaia pwukat ahpw I perenki ei ese me tohto makasihn pwukat kin pekederla wasa doh kan. I sohte ese ni ahnsowo me ehu rahn I pahn ahneki pwais kaselel en mwemweitla wasa pwukat.

Nan pahr 1961, I kohla doadoahk nan ohpis en nekid dipwisou kesempwal kan de mwohni (Treasurer’s Office) me mi pahn epwelpen Grant Suiter. Mwurin sounpar kei en ei doadoahk wasao, Nathan Knorr, me ni ahnsowo kin tiengla mwowe nan atail doadoahk en kalohk nin sampah, ekeriehla nan eh ohpiso. E kawehwehda me emen brother ko me doadoahk nan eh ohpiso pahn kohla iang Sukuhl ong Elder kan oh Sounsawas kan erein sounpwong ehu, oh mwuhr doadoahk nan Pali en Kalohk (Service Department). I wiliandi brothero oh iang doadoahk rehn Don Adams. Don iei brothero me alehdi nei doaropweo me I audehda ong Pedel ni mihting tohrohro nan pahr 1955. Mie brother riemen me pil doadoahk nan ohpisohte, Robert Wallen oh Charles Molohan. Kiht meh pahmeno doadoahkpene daulih sounpar 50. E uhdahn kaperen ei iang papah rehn brother lelepek pwukat!​—Mel. 133:1.

Tepida sang pahr 1970, I ale pwukoa en seiloak erein wihk kei nan sounpar ehu de riau pwehn mwemweitla nan ekei ohpis en  Sounkadehdehn Siohwa kan en Watch Tower Society. Met kin pidada ei pahn mwemweitla rehn tohn Pedel oh misineri kan nan sampah pwon, kangoange irail, oh kilang rekord kan en ohpis pwukat. E uhdahn kaperen ei tuhwong ekei me iang kesepwil sang Sukuhl en Kilead me tepin wiawi ko me kin papahte ni lelepek nan arail doadoahk nan sahpw teikan! E wia pwais kaselel ehu en mwemweitla ni sahpw daulih 90 ni ei wia pwukoa wet.

Mie mwomwohdiso kan nan New York City me emenemen tohn Pedel nan Brooklyn kin koasoansoandi en iang wia towe. Mwomwohdiso me I iango mi nan Bronx. Tepin mwomwohdiso nan kousapwo laudla oh kohpeseng. Mwomwohdiso me tepin wiawihdao adanekihla Mwomwohdisohn Upper Bronx. Ih mwomwohdiso wet me I kin towehda.

Ni mpen pahr 1965, peneinei ehu sang Latvia me wiahla Sounkadehde kei nan palieir en Bronx keseula nan wasahn kalohk me mwomwohdiso wet kin apwalih. Livija, nein pwopwoudo serepein laudo, wiahla pioneer men mwurinte eh neksang sukuhl. Sounpwong kei mwuri, e keseula Massachusetts pwehn papah wasa me anahn laud mie ong sounkalohki Wehio. I tepida ntingla reh koasoia duwen rohng en mwomwohdiso, oh e kin ntingdo rehi koasoia duwen eh kin pweida mwahu nan kalohk wasao nan Boston.

Sounpar kei mwuri, Livija idihdida en wiahla pioneer tohrohr men. E men wia uwen eh kak nan sapwellimen Siohwa doadoahk, eri e audehda doaropwehn iang Pedel oh ale luhk en kohdo nan pahr 1971. E mwomwen me met wia mehn kilel ehu sang Siohwa! Nan October 27, 1973, se pwopwoudida oh e wia kapai ehu me Brother Knorr me wia padahk ni at kapwopwoudo. Lepin Padahk 18:22 mahsanih: “Me kin diaradahr eh pwoud lih mwahu, e diaradahr mehkot mwahu; met kasalehda me KAUN-O ketin kupwureiuk.” Ngehi oh Livija ahneki pwais kaselel en papah daulih sounpar 40 nan Pedel. Oh se kin pousehlahte sewese mwomwohdiso ehu nan wasaohte nan Bronx.

I uhdahn perenki ei iang doadoahk rehn Brother Knorr. E kin pwerisekiong kalohki padahk mehlel oh kin uhdahn kalahnganki misineri kan nan sampah pwon. Tohto misineri pwukat wia tepin Sounkadehde nan sahpw kan me re pekederlahng. E uhdahn kansensuwed en kilang Brother Knorr lokolongki soumwahu laud en kanser nan pahr 1976. Ehu ahnsowo, ni eh soumwahu oh sohla kak kohsang nan dewe, e peki rehi en wadekohng ih ekei sawaspen Paipel kan me pahn kereniong printla. E peki rehi en eker Frederick Franz pwe en pil kak kohdo oh iang rong ei wadawado. I mwuhr diarada me mesen Brother Franz-o ekisekis maskunla, oh Brother Knorr kin doadoahngki ahnsou laud en wadekohng ih sawaspen Paipel kan.

Brother Knorr mehla nan pahr 1977, ahpw irail kan me ese ih oh poakepoake ih ale kamweit pwehki ni lelepek e kanekelahr eh pwukoa doadoahk nin sampah. (Kaud. 2:10) Mwurin mwo, Brother Franz tiengla mwowe nan at doadoahko.

 Ni ahnsowo, I wia pwukoa nin duwen sekteri men ong Milton Henschel, me iang doadoahk rehn Brother Knorr ahnsou werei. Brother Henschel padahkihong ie me ehu pwukoa me keieu kesempwal nan Pedel iei en sewese Brother Franz ahnsou koaros ma anahn. I kin kaukaule wadekohng ih sawaspen Paipel ehu mwohn eh pahn printla. Ahn Brother Franz eh kin taman soahng kan oh eh koahiek en medemedewehte dahme I wadeko inenen kapwuriamwei. E uhdahn kaperen ei sewese ih ni ahl wet lao e kanekehla eh pwukoa doadoahk nin sampah nan December 1992!

Sounpar 61 me I doadoahk nan Pedel mwomwen imwila mwadang. Ei pahpa nohno mehla ahpw kolokolete ara lelepek ong Siohwa, oh I kin kasikasik ahnsowo me I pahn kasamwo ira nan sampah ehu me inenen mwahu. (Sohn 5:28, 29) Sohte mehkot me koasoandi en sampah wet kihda me kak pahrekiong pwais kaselel en iang doadoahk rehn ohl oh lih lelepek kan nan sapwellimen Koht aramas akan sampah pwon. Ngehi oh Livija kak ni mehlel nda me erein at doadoahngki pali laud en at ahnsou en papah Siohwa, peren me Siohwa ketikihong kiht kakehlakahda kiht.​—Neh. 8:10.

Doadoahk en lohkiseli padahk mehlel en Wehio kin pousehlahte wiewiawi, sohte lipilipil dahme pahn wiawi, oh e sohte kin koapworopworkihte koahiek en emente aramas nan sapwellimen Siohwa pwihn. E uhdahn kaperen oh pil wia pwais kaselel ehu en iang doadoahk rehn brother oh sister loalopwoat kan erein sounpar tohto. Pali laud en me keidi kan me I iang doadoahk rehrail solahr mi nin sampah. Ahpw I kalahnganki ei kompoakepahnki me lelepek pwukat nan sapwellimen Siohwa doadoahk.