“Ni ahnsou me emen me I pahn rianki eh tepida peiong ie, I koledihte tepinwereo oh tepida padikpene. I men kemehla.”​—Paul.

“Ni imweio, I kin keh lingeringer, pil ni soh kahrepe. I pahn kapwalang dipwisou kan, mehn mwadong kan, de sohte lipilipil dahme I koledi.”​—Marco.

Mwein pali laud en kitail sohte kin lingeringerda duwehte met. Ahpw kitail koaros kin apwalki kaunda pein kitail ekei pak. Met pwehki kitail sohsohki dihp sang tepin ohlo, Adam. (Rom 5:12) Ekei kin duwehte Paul oh Marco me sohte kak kaunda arail lingeringer. Ekei pil kin apwalki kaunda arail madamadau. Re kin medemedewehte soahng kan me re kin perki de kansensuwedih irail. Pil ekei kin apwalki pelianda ineng en wia tiahk samin me pid wia nsenen pwopwoud, kang sakau daulihala, de doadoahngki ni sapwung wini en kasahliel kan.

Irail kan me sohte kin kaunda arail madamadau, ineng, oh wiewia kan kak kauwehla arail mour. Ahpw kitail kak soikala met. Ia duwen? Sang atail en kakairada irair en kaunda pein kitail. Pwehn sewese kitail en wia met, kitail pahn koasoiapene peidek siluh: (1) Ia wehwehn en kaunda pein kitail? (2) Dahme kahrehda e kesempwal? (3) Ia duwen atail kak kakairada irair wet me wia kisehn “wahn sapwellimen Koht manaman”? (Kal. 5:22, 23) Mwuhr, kitail pahn koasoiapene dahme pein kitail kak wia ma ekei pak e apwal en kaunda pein kitail.

Emen me kin kaunda pein ih sohte kin pwurur en mwekid. E sohte kin lokaia de wia mehkot ni ahl ehu me pahn kansensuwedihala Koht.

Sises ketin kasalehda ia wehwehn en kaunda pein emen. Paipel mahsanih: “Ni ahnsou me aramas akan kin kauwe ih, e sohte ketin kauwe irail. Ni ahnsou me e kin ketin lokolok, e sohte ketin kamasak irail kan me kin kaloke ih, ahpw e ketin mweidala pein ih ong Meno me kin ketin kadeikada ni pwung.” (1 Pit. 2:23) Sises ketin kaunda pein ih ni sapwellime imwintihti ko ar kapailoke ahnsou me e ketiket ni tuhkehn kalokoloko. (Mad. 27:39-44) Mwoweo, e pil ketin kasalehda kanengamah laud ahnsou me kaunen pelien lamalam lemei ko song en lidipiheki sapwellime mahsen. (Mad. 22:15-22) E pil ketin wiahda mehn kahlemeng mwahu ni mehn Suhs kei ar lingeringerda pah oh rik takai pwehn katehki ih. Sises sohte ketin pelianda irail, ahpw e “ketin rukula oh ketieisang nan tehnpas sarawio.”​—Sohn 8:57-59.

Ia duwe, kitail kak alasang Sises? Kitail kak, ahpw kaidehn ahnsou koaros. Wahnpoaron Piter ntingihedi: “Krais pil ketin lokolongkin kumwail, oh ketikihdiong kumwail mehn kahlemeng ehu pwe kumwail en idawehn mwahu dahme e kin ketin wia.” (1 Pit. 2:21) Mendahki kitail sohte unsek, kitail kak idawehn mwahu sapwellimen Sises mehn kahlemeng en kaunda pein ih. Dahme kahrehda e kesempwal en wia met?

Kitail anahne kaunda pein kitail ma kitail men kaperenda Siohwa. Pil mehnda ma kitail papahkiher Siohwa ni lelepek erein sounpar tohto, kitail kak kauwehla atail nanpwungmwahu reh ma kitail sohte kin kaunda dahme kitail kin wia oh nda.

Medewehla Moses, “me keieu aktikitik rehn aramas en sampah kan” ni ahnsowo. (Nemp. 12:3) Ni kanengamah Moses kin rongorong ahn mehn Israel ko arail kaulim erein sounpar tohto. Ahpw ehu rahno, Moses sohla kak kaunda pein ih. E lingeringerda ni ahnsou me irail pwurehng kaulimki eh sohla itar pihl. E mwehldahte ndaiong aramas ako: “Kumwail rong, kumwail me nan kapehd keptakailahr kan. Ia duwe, se pahn kakusieisang pihl nan paipalap wet, pwe kumwail en nim?”​—Nemp. 20:2-11.

Moses sohte kaunda pein ih. E sohte kapingahki Siohwa Eh ketikihda pihl ni ahl kapwuriamwei ehu. (Mel. 106:32, 33) Pwehki met, Siohwa sohte ketin mweidohng en pedolong nan Sapwen Inowo. (Nemp. 20:12) Erein eh mour, ele Moses uhdahn koluhkihla eh sohte kaunda eh lingeringero.​—Deud. 3:23-27.

Dahme kitail kak sukuhlkihsang met? Mehnda ma kitail wereilahr nan padahk mehlel, kitail en dehr mwamwahliki irail kan me kin kalingeringerih kitail de me kin anahne kaweid pwehn kapwungala arail wiewia. (Ep. 4:32; Kol. 3:12) Mehlel, ni atail kin mahla, ele atail kanengamah kin tikitikla ekei pak. Ahpw tamanda Moses. Kitail sohte men kauwehla atail adamwahu rehn Siohwa pwehki atail sohte kaunda pein kitail. Dahme kitail kak wia pwehn kakairada irair kesempwal wet?

Kapakapki sapwellimen Koht manaman. Dahme kahrehda? Pwehki irair en kaunda pein emen iei ehu wahn sapwellimen Koht manaman, oh Siohwa kin ketikihong irail kan me peki reh sapwellime manaman. (Luk 11:13) Pwehki sapwellime manaman, Siohwa kak ketikihong kitail kehl me kitail anahne pwehn kaunda pein kitail. (Pil. 4:13) E pil kak ketin sewese kitail en kakairada wahn sapwellime manaman teikan, me duwehte limpoak, me pahn sewese kakehlakahda atail irair en kaunda pein kitail.​—1 Kor. 13:5.

Soikala mehkan me kakete kaluwetehla atail en kaunda pein kitail. Karasepe, soikala soahng kan nan Internet oh mehn kamweit kan me kin kangoange wiewia sapwung. (Ep. 5:3, 4) Ni mehlel, kitail en soikala soahng koaros me kakete kasonge  kitail en wia me sapwung. (Lep. Pad. 22:3; 1 Kor. 6:12) Karasepe, emen me kin mwadang dukula pahn kasongosong en wia tiahk samin anahne koasoanehdi en dehr wadek pwuhk de kilang kasdo kan me kin pidada soai en limpoak kan.

Ele kitail apwalki kapwaiada kaweid wet. Ahpw ma kitail nantihong wia met, Siohwa pahn ketikihong kitail kehl me kitail anahne pwehn kaunda pein kitail. (2 Pit. 1:5-8) E pahn ketin sewese kitail en kaunda atail madamadau, lokaia, oh wiewia kan. Pwehn kadehde me met kak wiawi, Paul oh Marco, me kitail koasoiapene mwoweo, emenemen ira sukuhlki en kaunda ara lingeringer. Pil medewehla emen brother me kin kalapw lingeringerda pahn sountangahki sidohsa teikan, oh pil kin akamaiong irail. Dahme e wiahiong met? E nda: “I kin kapakap ni ngidingid rahn koaros. I onopki oaralap kan duwen kaunda pein ngehi oh wadlikihala iren Paipel kan me kak sewese ie. Mendahki I kin wiewia met erein sounpar tohto, I pil kin katamankihongiehte ni menseng koaros me I men ahneki meleilei. Oh ma mie ahi appointment kan, I kin mwadang en kohla wasa ko mwohn e dirala sidohsa pwe ien dehr kin nohn karuwaru.”

Ekei pak, kitail sohte kak kaunda pein kitail. Ni ahnsou me met wiawi, ele kitail pahn namenek en kapakap ong Siohwa. Ahpw ih soangen ahnsowo me kitail pahn keieu anahne kapakap ong ih. Eri kapakap ong Siohwa ni ahnsou mwadang. Peki en ketin mahkohng uhk, peki sapwellime sawas, oh koasoanehdi teng ken dehr pwurehng wiahda soangen sapwungohte. (Mel. 51:9-11) Dehr medewe me Siohwa sohte pahn ketin karonge omw peki ni mehlel sapwellime mahk kalahngan. (Mel. 102:17) Wahnpoaron Sohn katamankihong kitail me ntahn sapwellimen Koht Ohlo “kamwakeleikitailsang dihp koaros.” (1 Sohn 1:7; 2:1; Mel. 86:5) Tamataman me Siohwa ketin padahkihong sapwellime ladu kan ren pwurupwurehng mahkohng meteikan. Eri kitail kak kamehlele me e pahn pil ketin wia soahngohte ong kitail.​—Mad. 18:21, 22; Kol. 3:13.

Siohwa ketin kupwurtoutoula erein ahnsou kiso me Moses sohla kak kaunda pein ih nan sapwtehno. Ahpw Siohwa ketin mahkohng. Oh Mahsen en Koht mahsanih me Moses wia mehn kahlemeng uhdahn mwahu en pwoson. (Deud. 34:10; Ipru 11:24-28) Siohwa sohte ketin mweidohng Moses en pedolong nan Sapwen Inowo, ahpw E pahn ketin kasamwo Moses ong nan Paradaiso nin sampah oh ketikihong ih koapworopwor en mour kohkohlahte. Kitail pil kak ahneki soangen koapworopworohte ma kitail kin doulahte nantihong en kakairada irair kesempwal en kaunda pein kitail.​—1 Kor. 9:25.