1. Ia wehwehn lemmwiki Koht, oh dahme kahrehda irail kan me poakohng Siohwa anahne wia met?

KRISTIAN kan kin poakohng Koht, oh re pil kin lemmwiki ih. Nan iren onop wet, kitail pahn koasoiapene kesempwalpen en lemmwiki Koht. Ahpw ia wehwehn en lemmwiki Koht? Irail kan me kin lemmwiki Koht kin uhdahn wauneki ih. Re sohte men kansensuwedihada Samarailo nanleng pwehki re sohte men kauwehla arail nanpwungmwahu reh.​—Mel. 111:10; Lep. Pad. 8:13.

2. Soahng riau dah kan me kitail en koasoiapene me poahsoanda sang dahme Nanmwarki Depit nda nan Melkahka 86:11?

² Wadek Melkahka 86:11, NW. * Ni omw medewehla mahsen pwukat, ke kak ese me Nanmwarki Depit wehwehki kesempwalpen lemmwiki Koht. Kitail pahn koasoiapene ia duwen atail kak doadoahngki dahme Depit nda nan eh kapakapo. Keieu, kitail pahn tehkpene ekei kahrepe kan me kitail en uhdahn wauneki mwaren Koht. Keriau, kitail pahn koasoiapene ia duwen atail en kasalehda me kitail kin wauneki mwaren Koht rahn koaros.

3. Dahme wiawihong Moses me sewese ih en doulahte wauneki mwaren Koht?

³ Medewehla ahn Moses pepehm ni ahnsou me e karahkidi limwahn paip ehu oh kilangada lingan en Siohwa eh daulih  ih. Pwuhko Insight on the Scriptures kasalehda me kaudiahl wet “ele wia mehkot me keieu kapwuriamwei me aramas kilangada mwohn ketidohn Sises Krais.” Moses rong mahsen pwukat, me ni sansal, tohnleng men me nda: “Ngehi, KAUN-O, Koht emen me diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel. I kin kapwaiada ei inou ong me ngeder, oh kin mahkohng me suwed kan oh me dipan akan.” (Eks. 33:17-23; 34:5-7) Ele Moses kin medewe duwen dahme wiawio ahnsou me e kin doadoahngki mwaren Siohwa. Eri e sohte kapwuriamwei me Moses katamankihong mehn Israel kan mwuhr me ren “wauneki mwar lemmwin oh kapwuriamwei” wet.​—Deud. 28:58.

4. Dahme kak sewese kitail en kalaudehla atail wauneki Siohwa?

⁴ Ni atail kin medewe duwen mwaren Siohwa, e mwahu kitail en doudouloale soangen Koht dah men ih. Kitail en medewe duwen sapwellime irair kan, duwehte manaman, erpit, pwung pahrek, oh limpoak. Atail medemedewe irair pwukat oh pil irair teikan kak kalaudehla atail wauneki ih.​—Mel. 77:11-15.

5-6. (a) Ia wehwehn mwaren Koht? (b) Nin duwen me Eksodus 3:13, 14 oh Aiseia 64:8 mahsanih, ni ahl dah kan me Siohwa kin ketin kahrehiong soahng kan en wiawi?

⁵ Dahme kitail ese me pid wehwehn mwaren Koht? Semen tohto en poadopoad kan kin pwungki me mwaren Siohwa mwomwen wehwehki “E Kahrehiong en Wiahla.” Wehwe wet katamankihong kitail me sohte mehkot kak kauhdi Siohwa sang eh pahn ketin kapwaiada kupwure, oh e kak ketin kahrehiong soahng kan en wiawi. Ia duwen?

⁶ Siohwa kin ketin kahrehda soahng kan en wiawi sang ni eh kin ketin wiahla soahng sohte lipilipil pwehn ketin kapwaiada kupwure. (Wadek Eksodus 3:13, 14.) * Neitail sawaspen Paipel kan kin kalapw katamankihong kitail en kin medemedewe duwen sapwellimen Koht irair wet me inenen kaselel. Siohwa pil kak ketin kahrehiong sapwellime ladu soh unsek kan ren  wiahla dahme anahn pwe ren papah ih oh kapwaiada kupwure. (Wadek Aiseia 64:8.) Ni ahl pwukat, Siohwa kin ketin kahrehiong kupwure en pweida. Sohte mehkot kak kauhdi ih sang eh pahn ketin wia met.​—Ais. 46:10, 11.

7. Ia duwen atail kak kalaudehla atail kalahnganki Samatailo nanleng?

⁷ Kitail kak kalaudehla atail kalahnganki Samatailo nanleng sang atail kin doudouloale dahme e ketin wiadahr oh dahme e kin ketin kahrehiong kitail en kak wia. Karasepe, ni atail kin doudouloale duwen kepikipik kan koaros, kitail kin uhdahn pwuriamweikihla soahng kan me e ketin wiadahr. (Mel. 8:3, 4) Oh ni atail kin medemedewe dahme Siohwa ketin kahrehiong kitail en wiahla pwe kitail en kak wia kupwure, atail wauneki ih kin laudla. Mwaren Siohwa uhdahn warohng wahu laud! E kin pidada soahng koaros duwen Samatailo, soahng koaros me e ketin wiadahr, oh soahng koaros me e pahn ketin wia.​—Mel. 89:7, 8.

8. Nin duwen me Deuderonomi 32:2, 3 mahsanih, dahme Siohwa ketin kupwurki ong mwareo?

⁸ Mwohnte mehn Israel ko pedolong nan Sapwen Inowo, Siohwa ketin padahkihong Moses koul ehu. (Deud. 31:19) Moses pahn uhd padahkihong aramas ako koulo. (Wadek Deuderonomi 32:2, 3.) Ni atail doudouloale iretikitik 2 oh 3, e sansal me Siohwa sohte ketin kupwurki mwareo en ekiekla sang aramas, de ren wiahki me e nohn sarawi en nda. E ketin kupwurki aramas oh tohnleng kan koaros en esehla mwareo! Ia uwen eh wia pai kaselel ehu ong mehn Israel ko en rong Moses eh padahkihong irail duwen Siohwa oh duwen mware kaselelo! Dahme Moses padahkihong irail kin ketihnainih oh kansenamwahwih irail, duwehte keteu eh kin mweredi pohn dihpw kan. Ia duwen atail kak tehk kanahieng pwe mwomwen atail wia padahk kin duwehte met?

9. Ia duwen atail kak sewese kasarawihla mwaren Siohwa?

⁹ Ni atail kin kalohk ihmw lel ihmw de ong wehi pokon, kitail kak doadoahngki Paipel pwehn kasalehiong aramas akan mwaren Koht, Siohwa. Kitail kak kasalehiong irail kisin pwuhk de makasihn kaselel kan, kisin kasdo mwahu kan, oh pil soahng kan nan neitail website me kin kawauwih Siohwa. Nan wasahn doadoahk, sukuhl, de ni atail kin seiloak, kitail en isaneki koasoiaiong meteikan duwen atail Koht me kitail kin poakohng oh soangen Koht dahmen ih. Ni atail padahkihong irail kan me kitail kin tuhwong duwen kupwuren Siohwa ong aramas oh pil sampah, ele irail pahn ahpwtehn esehda ia uwen Siohwa eh kin ketin poakohng kitail. Ni atail kin padahkihong meteikan dahme mehlel duwen Samatail limpoako, kitail kin sewese kasarawihla mwaren Koht. Kitail kin kihsang likamw tohto duwen Siohwa me mwein meteikan padahkihong irail. Dahme kitail padahkihong aramas sang nan Paipel iei me keieu kansenamwahu me re kak sukuhlki.​—Ais. 65:13, 14.

10. Ni atail kin wia onop en Paipel, dahme kahrehda kitail anahne wia laudsang en ihte padahngki duwen sapwellimen Koht kosonned kan?

¹⁰ Ni atail kin wia onop en Paipel, kitail men sewese neitail tohnsukuhl kan en esehla oh pil doadoahngki mwaren Siohwa. Patehng met, kitail men sewese irail en esehla wehwehn mwareo. Ia duwe, kitail pahn kapwaiada met ma kitail kin ihte padahkihong irail duwen kaweid kan, koasoandi kan sang rehn Koht, oh kosonned kan me pid atail tiahk kan? Tohnsukuhl mwahu men kak sukuhlki duwen sapwellimen Koht kosonned kan, pil wauneki kosonned pwukat. Ahpw ia duwe, e pahn peikiong Siohwa pwehki e poakohng? Tamataman, Ihp ese duwen sapwellimen Koht kosonned, ahpw e sohte uhdahn poakohng Koht; pil duwehte Adam. (Sen. 3:1-6) Eri kitail anahne wia laudsang en ihte padahkihong meteikan duwen sapwellimen Koht kosonned kan.

11. Ni atail kin padahngki duwen sapwellimen Koht kosonned kan, ia duwen atail kak sewese neitail tohnsukuhl kan en poakohngala Sounketikihda kosonnedo?

 ¹¹ Sapwellimen Siohwa kosonned kan kin mwahu ong kitail ahnsou koaros. (Mel. 119:97, 111, 112) Ahpw ele neitail tohnsukuhl kan sohte pahn medewe met ma re sohte wehwehki me Siohwa ketin wiahda kosonned pwukat pwehki e ketin poakohng kitail. Eri kitail kak idek rehrail: “Dahme kahrehda ke medewe me Koht ketin kupwurki sapwellime ladu kan en wia de dehr wia met? Dahme met padahkihong kitail duwen Ih?” Ma kitail sewese neitail tohnsukuhl kan ren medewe duwen Siohwa oh kakairada limpoak mehlel ong mwareo, kitail ele pahn sair mohngiongirail. Neitail tohnsukuhl kan pahn poakohngala kaidehn ihte kosonned pwukat ahpw pil Sounketikihda kosonnedo. (Mel. 119:68) Arail pwoson pahn laudla oh pahn sewese irail en dadaur pahn kasongosong apwal kan me pahn pwarada.​—1 Kor. 3:12-15.

12. Ia duwen Depit eh sohla ahneki mohngiong tehieu, oh ia imwilahn met?

¹² Ehu ire kesempwal nan Melkahka 86:11 (NW) iei “ketikihong ie mohngiong tehieu.” Siohwa ketin doadoahngki Nanmwarki Depit en ntingihedi mahsen pwukat. Erein en Depit mour, e kilang uwen mengei en mweidohng eh mohngiong en tohrohrpeseng. Ehu ahnsowo, e mi pohn pwelengen imweo oh kilangada ahn emen ohl pwoud eh wie duhdu. Ia duwe, ahnsowo Depit ahneki mohngiong tehieu de soh? E ese duwen sapwellimen Siohwa kosonnedo: “Kumwail sohte pahn noahroke en emen eh pwoud.” (Eks. 20:17) Ahpw e doulahte kilikilang. Eh mohngiongo tohrohrpeseng pwehki apali inangih liho Padsipa, a pali teio, e men kaperenda Siohwa. Mendahki Depit kin poakohng oh lemmwiki Siohwa erein ahnsou werei, e dukula pahn eh ineng roporopo. Pwehki met, Depit wiahda soahng kei me uhdahn suwed. E kauwehla mwaren Siohwa. E pil kahrehda kahpwal laud ong aramas akan me sohte arail sapwung, iangahki pein eh peneineio.​—2 Sam. 11:1-5, 14-17; 12:7-12.

13. Ia duwen atail ese me ahn Depit mohngiong pwurehng wiahla mohngiong tehieu?

¹³ Siohwa ketin panawih Depit, oh Depit pwurehng ahnekihda nanpwungmwahu rehn Siohwa. (2 Sam. 12:13; Mel. 51:2-4, 17) Depit tamataman kahpwal oh nsensuwed laud me kohsang eh mweidohng eh mohngiong en tohrohrpeseng. Ia duwe, Siohwa ketin sewese Depit en ahneki mohngiong tehieu? Ei, pwehki mwuhr Siohwa ketin mahsanih me Depit wia ohl emen me “eh mohngiong kin . . . unsek ong Siohwa eh Koht.”​—1 Nan. 11:4; 15:3, NW.

14. Dahme kitail en pein idek rehtail, oh dahme kahrehda?

 ¹⁴ Ahn Depit mehn kahlemeng wia mehn kangoang oh pil mehn kataman ehu ong kitail. Eh lohdi nan dihp laud wia mehn kataman ong sapwellimen Koht ladu kan rahnwet. Sohte lipilipil ma kitail ahpwtehn tepida papah Siohwa de papahki ih sounpar tohto, kitail en pein idek rehtail, ‘I kin pelipelian ahn Sehdan nannanti en katohrepeseng ei mohngiong?’

15. Ia duwen atail lemmwiki Koht eh kin pere kitail ma kitail kilang kilel ehu me kahrehda kitail en ahneki madamadau samin?

¹⁵ Karasepe, ma ke kilang kilel ehu nan TV de Internet me kakete kahrehda ken ahneki madamadau samin, dahme ke pahn wia? E mengei en medewe me kilelo de kasdou kaidehn uhdahn kilel de kasdo suwed ehu. Ahpw met seu kakete wia mehkot me Sehdan kin doadoahngki pwehn katohrepeseng omw mohngiong? (2 Kor. 2:11) Kilelo kakete duwehte sile me ohl emen doadoahngki pwehn pwalangpeseng lepin tuhke laud ehu. Ni tapio e pasurdiong sileo ni tuhkeo. Eri ni eh pwurupwurehng pasur moangen sileo, tuhkeo pahn kohkohlaho pwalpeseng. Ia duwe, kilelo nan kasdou kakete duwehte wasa kengo ni sileo? Dahme mwomwen tikitik oh sohte keper nin tapio kak mwadangete katohrepeseng en emen mohngiong, oh imwikihla eh wiahda dihp. Eri dehr mweidohng nan omw mohngiong mehkot me sohte konehng! Omw mohngiong en wia mohngiong tehieu pwehn lemmwiki mwaren Siohwa!

16. Ni atail lelohng kasongosong kan, peidek dah kan me kitail en pein idek rehtail?

¹⁶ Likin kilel kan me kak kahrehda kitail en ahneki madamadau samin, Sehdan kin kihda soahng tohto teikan pwehn kasonge kitail. Dahme kitail pahn wia? E mengei en nda me soahng pwukat sohte uhdahn suwed. Karasepe, ele kitail kin nda: ‘I sohte pahn piskenla ma I wia met, eri e sohte wiahda mehkot laud.’ Soangen madamadau  wet uhdahn sapwung. E mwahu en pein idek rehtail soangen peidek pwukat: ‘Ia duwe, Sehdan doadoahngki kasongosong wet pwehn katohrepeseng ei mohngiong? Ma I lohdi pahn ineng sapwung kan, I pahn kauwehla mwaren Siohwa? Ei wia met pahn kahrehda ien karanihala Koht, de dohsang ih?’ Doudouloale peidek pwukat. Kapakapki erpit pwehn sapengala peidek pwukat ni mehlel. (Seims 1:5) Omw wia met kak wia mehn perepomw mwahu. E kak seweseiuk en pelianda ni kehlail kasongosong kan, duwehte me Sises ketin wia ni eh mahsanih: “Sehdan, kohkohweisang ie!”​—Mad. 4:10.

17. Dahme kahrehda e sohte mwahu ma mohngiongitail kin tohrohrpeseng? Menlau kihda ehu karasaras.

¹⁷ E sohte mwahu ma mohngiongitail kin tohrohrpeseng. Medewehla pwihnen mwadong ehu me sohte kin ehupene. Ekei men kaping en kohwong irail kelehpw, ekei sohte men idawehn koasoandi kan, oh ekei irail kin mwamwahlikih arail kaunen mwadongo. Soangen pwihn wet sohte pahn kak kana nan mwadong. Ahpw pwihn ehu me kin ehupene nanpwungarail pahn kak pweida. Omw mohngiong kak duwehte pwihnen mwadongo me pweida ma omw lamalam, ineng, oh pepehm kan kin ehupene ni omw papah Siohwa. Tamataman, Sehdan pahn perenki katohrepeseng omw mohngiong. E men omw lamalam, ineng oh pepehm kan en sohte ehuong sapwellimen Siohwa kosonned kan. Ahpw ke anahne papah Siohwa sang omw mohngiong unsek. (Mad. 22:36-38) Dehr mweidohng Sehdan en katohrepeseng omw mohngiong!

18. Pwehn pahrekiong mahsen ko nan Maika 4:5, dahme ke koasoanehdi teng en wia?

¹⁸ Kapakap ong Siohwa duwehte me Depit wia: “Komw ketikihong ie mohngiong tehieu pwehn kin lemmwiki mwaromwi.” Wia uwen omw kak pwehn mour pahrekiong kapakap wet. Rahn koaros, koasoanehdi teng pwe omw pilipil kan, mehnda ma tikitik de laud, en kasalehda me ke kin uhdahn wauneki mwaren Siohwa. Nin duwen Sounkadehdehn Siohwa men, omw wia met pahn wahdo kaping ong mwar wet. (Lep. Pad. 27:11) Oh kitail koaros kak iang soukohp Maika nda: “Kitail pahn kekeid ni mwaren Siohwa atail Koht kohkohlahte.”​—Maika 4:5, NW.