1. Ia duwen Siohwa eh ketin duwehte nohno men me kin kadihdi nah serio?

“IA DUWE, lih emen kak manokehla nah seri me e kadihdi?” Peidek wet iei me Siohwa ketin keinemwe ni mwehin Aiseiao. Koht ketin mahsanihong sapwellime aramas akan: “Mehnda ma lih pwukat manokehla, I sohte pahn manokeiukala.” (Ais. 49:15, NW) Koht sohte kin kalapw ketin kapahrekiong pein ih nohno men. Ahpw, e ketin wia met nan irairo. Siohwa ketin karasaraski limpoak me mi nanpwungen nohno men oh nah serio pwehn kasalehda uwen eh ketin poakohng sapwellime ladu kan. Pali laud en nohno kan kak wehwehki dahme emen sister me adaneki Jasmin nda, “Ni omw kin kadihdi noumw serio, kumwa kin ahnekihda nanpwungmwahu uhdahn tohrohr ehu erein amwa mour.”

2. Ia sapwellimen Siohwa pepehm ni sapwellime ladu men eh uhdihsang papah ih?

² Siohwa ketin mwahngih ni emen sapwellime ladu eh uhdihsang werekiong mwomwohdisohn Kristian oh doadoahk en kalohk. Eri, medewehla uwen eh kin ketin kupwurtoutoukihla ni sapwellime ladu kid kei ar uhdihsang papah ih (inactive) * ehuehu sounpar.

3. Dahme Siohwa ketin kupwurki?

³ Tohtohn riatail Kristian pwukat me uhdihsang werekiong mwomwohdiso kin pwurodo nan mwomwohdiso, oh kitail kin perenki kasamwo irail! Siohwa ketin kupwurki irail en pwurodo, pil duwehte kitail. (1 Pit. 2:25) Ia duwen atail kak sawas? Mwohn atail pahn sapengala peidek wet, e pahn mwahu en ese kahrepen ekei ar kin uhdihsang iang mihting kan oh kalohk.

4. Ia duwen doadoahk en mwohni eh kin kerempwahla ekei?

⁴ Ekei kin nohn kedirepwkihla arail doadoahk en mwohni. Hung, * brother men me kin mi nan Eisia nda: “I kin doadoahngkihla laud ei ahnsou oh kehl ong ei doadoahk en mwohni. Ni pweipwei I kin ndaiong pein ngehi me ma I wiahda mwohni tohto, e pahn ehute kamengeila ei kak papah Siohwa. Eri I kalaudehla ei awahn doadoahk. I tepida sohla iang mihting tohto lao I uhdihsang douluhl. E mwomwen me Sehdan kin doadoahngki sampah wet pwehn kerempwahla aramas pwe ren ekisekis uhdihsang papah Koht.”

5. Ia duwen sister men eh mwekidki eh kahpwal kan?

⁵ Ekei riatail Kristian kan ahneki kahpwal tohto me kin kahrehiong ren mworusala. Anne sang Britain, me naineki seri limen, nda: “Emen nei seri ipwidihte ahneki soumwahu laud. Kedekedeo, emen nei serepein ko piskenla oh emen nei pwukat ko ahnekihda soumwahu en madamadau. I uhdahn nsensuwedla laud me kahrehda I uhdihsang iang mihting kan oh kalohk. Kedekedeo, I uhdihsang douluhl.” Kitail kin poakehla Anne oh eh peneineio oh pil meteikan me kin lelohng soangen kahpwalo.

6. Dahme kahrehda emen kakete uhdihsang iang sapwellimen Siohwa aramas akan ma e sohte kapwaiada kaweid en Kolose 3:13?

⁶ Wadek Kolose 3:13. Ekei sapwellimen Siohwa ladu kan kin medengkihla dahme riarail Kristian men wiahiong irail. Wahnpoaron Pohl ese me ekei pak kitail kak ahneki “kahrepen en kaulimih” riatail Kristian men. Ele meteikan kin wiahiong kitail wiewia sapahrek. Ma kitail sohte kanahieng, kitail kakete kadakadaur atail lingeringer. Ni emen eh nsensuwedla laud, e kakete uhdihsang iang sapwellimen Siohwa aramas akan. Tehk dahme wiawihong Pablo, emen brother sang South America. Mie emen me karaunlikamwih Pablo me dene e wiahda mehkot sapwung. Elder kan kamehlele met oh kihsang eh pwukoa nan mwomwohdiso. Ia duwen eh mwekidki met? Pablo nda: “I uhdahn lingeringerda, oh ekisekis I uhdihsang werekiong mwomwohdiso.”

7. Dahme kak wiawihong emen me kadeikpen loale kin kapwunode ih?

⁷ Ma emen wiahda dihp laud ehu mahso, ele e kin nsensuwedki met ahnsou werei. Mwein e kin medewe me Koht sohla kak ketin poakohng ih. Pil mehnda ma e koluhlahr oh ale mahkpen dipe, e kakete medewe me e solahr warohng wia emen sapwellimen Koht aramas. Brother men me adaneki Francisco ahneki soangen pepehm wet. E nda: “I alehdi peneu laud pwehki I wiahda dipen tiahk samin me pid wia nsenen pwopwoud. Mendahki nin tapio I kin pousehlahte towehda mihting kan, I tepida ahneki nsensuwed laud oh medewe me I sohla warohng wia emen sapwellimen Siohwa aramas. Kadeikpen loalei kin kapwunode ie, oh I uhdahn kamehlele me Siohwa saikinte ketin mahkohng ie. Kedekedeo, I uhdihsang werekiong mwomwohdiso.” Ia omw pepehm ong riatail Kristian kan me lelohng soangen irair ko me kitail koasoiapenehier? Ia duwe, ke poakeirailla? Kesempwal sang met, ia sapwellimen Siohwa pepehm ong irail?

8. Siohwa kin ketin manokehla irail kan me mahso kin papah ih? Menlau kawehwehda.

⁸ Siohwa sohte kin ketin manokehla irail kan me kin papah ih mahso ahpw met uhdi. E pil sohte kin ketin manokehla doadoahk me re kin wia nan sapwellime doadoahk. (Ipru 6:10) Soukohp Aiseia ntingihedi karasaras kaselel ehu pwehn kasalehda uwen Siohwa eh ketin apwalih sapwellime aramas akan. Aiseia ntingihedi: “E  pahn ketin apwalih sapwellime pelin sihpw duwehte silepen sihpw men; e pahn ketikipene sihmpwul kan, e pahn ketin apwalihekin irail nin lime.” (Ais. 40:11) Ia pepehm en Silepe Lapalapo ni emen sapwellime sihpw eh salongasang pelin sihpwo? Sises ketin kasalehda sapwellimen Siohwa pepehm ni eh keinemwe rehn tohnpadahk ko: “Dahme kumwail medewe? Ma ohl emen naineki sihpw 100, emen rehrail ahpw salongala, e sou pahn kihdi me 99 pohn nahnao oh kohla rapahki me salongalahro? Oh ma e diarada, I ndaiong kumwail ni mehlel, e pahn perenkihda mehmeno laudsang me 99 me sohte salongala.”​—Mad. 18:12, 13.

9. Ia duwen sounsilepen sihpw mwahu kan nan Paipel ar kin apwalih neirail sihpw kan? (Menlau kilang kilel ni kilin Kahn Iroir wet.)

⁹ Dahme kahrehda e mwahu en karasahiong Siohwa sounsilepen sihpw men? Pwehki sounsilepen sihpw mwahu men nan Paipel kin uhdahn apwalih mwahu nah sihpw kan. Karasepe, Depit peiong laion oh pehr men pwehn pere nah pelin sihpwo. (1 Sam. 17:34, 35) Sounsilepen sihpw mwahu men pahn uhdahn ese ma pil emente nah sihpw ko salongala. (Sohn 10:3, 14) E pahn kihdi nah sihpw duwehk duwemeno nan arail kehlo de rehn sounsilepen sihpw teikan pwe ren apwalih oh kohla rapahki me salongalao. Sises ketin doadoahngki karasaras wet pwehn padahkihong kitail ire mehlel kesempwal ehu: “Semei me ketiket nanleng pil sohte ketin kupwurki emen rehn me tikitik pwukat en sohrala.”​—Mad. 18:14.

10. Nin duwen me Esekiel 34:11-16 mahsanih, dahme Siohwa ketin inoukihda en wia ong sapwellime sihpw men me salongala?

¹⁰ Siohwa ketin poakohng emenemen kitail, iangahki “me tikitik pwukat” me salongasang sapwellime pelin sihpw. Ni Koht eh ketin doadoahngki soukohp Esekiel, e ketin inoukihda me e pahn ketin rapahki sapwellime sihpw kan me salongalahr oh sewese irail en pwurehng ahneki nanpwungmwahu reh. Oh e ketin mahsanih dahme e pahn ketin wia pwehn pere irail. Dahme e pahn ketin wia kin duwehte dahme sounsilepen sihpw en Israel men pahn  wia ma nah sihpwo salongala. (Wadek Esekiel 34:11-16.) Keieu, sounsilepen sihpwo pahn rapahki sihpwo, oh met kin anahne ahnsou oh nanti laud. Eri, ni eh diarada sihpwo me salongala, sounsilepen sihpwo pahn kapwurehdo ih nan pelin sihpwo. Ma sihpwo ohla de duhpekla, ni limpoak sounsilepen sihpwo pahn sewese sihpw me luwetalao, kidimala eh ohla kan, wahda, oh kamwenge. Elder kan, me wia sounsilepen “sapwellimen Koht pelin sihpw,” anahne wia soahng pwukat pwehn sewese koaros me kin salongasang mwomwohdiso. (1 Pit. 5:2, 3) Elder pwukat kin rapahki irail, sewese irail en pwurala nan mwomwohdiso, oh kasalehiong irail limpoak sang ni arail sewese irail en wiahla kompoakepahn Siohwa. *

11. Dahme sounsilepen sihpw mwahu men kin wehwehki?

¹¹ Sounsilepen sihpw mwahu men kin wehwehki me sihpw kan kakete salongala. Oh ma sihpw men salongasang pelin sihpwo, sounsilepen sihpwo sohte kin kaloke. Medewehla mehn kahlemeng me Koht ketikihda ni eh kin ketin sewese sapwellime ladu kan me salongasang reh erein ahnsou ehu.

12. Ia duwen Siohwa eh kin ketin sewese Sona?

¹² Soukohp Sona tangasang eh pwukoao. Mendahki met, Siohwa sohte ketin mwadangete likidmeliehla Sona. Duwehte sounsilepen sihpw mwahu men, Siohwa ketin kapitala ih oh sewese en pwurehng kehlailda pwehn kapwaiada eh pwukoao. (Sona 2:7; 3:1, 2) Mwuhr, Koht ketin doadoahngki kisin tuhke pwoat pwehn sewese Sona wehwehki kesempwalpen mouren emenemen aramas. (Sona 4:10, 11) Dahme kitail kak sukuhlkihsang met? Elder kan en dehr mwadangete uhdihsang sewese irail kan me uhdihsang iang mihting oh kalohk. Ahpw elder kan kin song en wehwehki dahme kahrehda sihpw men kin salongasang pelin sihpwo. Oh ni sihpw men eh pwurodo rehn Siohwa, elder kan kin pousehlahte poakohng oh nsenohki ih.

13. Dahme kitail kak sukuhlkihsang sapwellimen Siohwa wiewia ong sounnting en Melkahka 73?

¹³ Sounnting en Melkahka 73 mworuskihla eh  kilang me aramas suwed kan kin mwomwen pweida. E peidengki ma mie kamwahupen wia kupwuren Koht. (Mel. 73:12, 13, 16) Ia duwen Siohwa eh ketin mwekidki met? E sohte ketin kadeikada ih. Ni mehlel, e ketin doadoahngki sounmelkahkao en ntingihedi nan Paipel dahme e ndao. Ekisekis, sounmelkahkao wehwehkihda me sohte mehkot nan atail mour me kesempwalsang en ahneki nanpwungmwahu rehn Siohwa. (Mel. 73:23, 24, 26, 28) Dahme kitail kak sukuhlkihsang met? Elder kan en dehr mwadangete kadeik irail kan me kin tepida peidengki kamwahupen en papah Siohwa. Ren dehr kadeikirailda, ahpw re anahne song wehwehki dahme kahrehda re kin ndahki oh wiahki soahngo. Eri elder kan kak doadoahngki Paipel pwehn kangoange irail.

14. Dahme kahrehda Elaisa anahne sawas, oh ia duwen Siohwa eh ketikihda sawas?

¹⁴ Soukohp Elaisa tangasang Lih Nanmwarki Sesepel. (1 Nan. 19:1-3) E medewe me sohte emen likin ih me kin papah nin duwen soukohp men ong Siohwa, oh e medewe me eh doadoahko sohte katepe. Elaisa uhdahn nsensuwedla me kahrehda e men mehla. (1 Nan. 19:4, 10) Siohwa sohte ketin kadeikada Elaisa, ahpw e ketin kamehlelehiong me e sohte kelehpw, me e kak likih sapwellimen Koht manaman, oh miehte doadoahk tohto me en wia. Ni kadek Siohwa ketin karonge en Elaisa kapwunod kan oh ketikihong pwukoa kapw kei. (1 Nan. 19:11-16, 18) Dahme kitail kak sukuhlkihsang met? Kitail koaros, ahpw mehlel elder kan, anahne kadek ong sapwellimen Siohwa sihpw kan. Ma  emen nda me e lingeringer de nda me e medewe me Siohwa sohte pahn ketin mahkohng, elder kan pahn rong ih ahnsou me e ndaiong irail eh pepehm kan. Eri irail pahn song en kamehlelehiong sihpw menet me Siohwa ketin poakohng ih.

15. Nin duwen me Sohn 6:39 mahsanih, ia ahn Sises pepehm ong sapwellimen Semeo sihpw kan?

¹⁵ Soangen pepehm dah me Siohwa kupwurki kitail en ahneki ong sapwellime sihpw men me salongala? Kitail kak sukuhlki sapwellimen Sises mehn kahlemeng. E mwahngih me sapwellimen Siohwa sihpw kan uhdahn kesempwal mwohn silangi, eri Sises ketin wia uwen eh kak koaros pwehn sewese “sihpw salongala kan en wehin Israel” en pwurala rehn Siohwa. (Mad. 15:24; Luk 19:9, 10) Nin duwen sounsilepen sihpw mwahwo, Sises pil ketin wia uwen eh kak koaros pwe en dehr kasalongehla emen sapwellimen Siohwa sihpw.​—Wadek Sohn 6:39.

16-17. Ia pahn ahn elder kan pepehm ni arail kin sewese irail kan me salongala? (Menlau kilang koakon “ Ia Pahn Pepehm en Sihpw Men me Salongala.”)

¹⁶ Wahnpoaron Pohl kangoange elder kan en mwomwohdisohn Episos ren alasang sapwellimen Sises mehn kahlemeng. E nda, kumwail “anahne sewese irail akan me luwet oh kumwail pil anahne tamataman mahsen en Kaun Sises ni eh pein mahsanih: ‘Kihwei kin kaperen sang ale.’” (Wiewia 20:17, 35) Iren Paipel wet kasalehda me elder kan ahneki pwukoa kesempwal en apwalih sapwellimen Siohwa aramas akan. Salvador, elder men sang Spein nda: “Ni ei kin medewehla uwen laud en Siohwa eh ketin nsenohki emen sapwellime sihpw me salongala, met kin kamwakid ie en wia uwen ei kak koaros en sewese irail. Nin duwen sounsilepen sihpw men, I ese me Siohwa ketin kupwurki ien apwalih irail.”

¹⁷ Irail koaros me kitail koasoiapenehier nan iren onop wet me uhdihsang papah Siohwa aleier sawas pwehn pwurodo rehn Siohwa. Ni ahnsou wet, me tohto irail kan me uhdihsang papah Siohwa pil men ale soangen sawasohte. Nan iren onop en mwuhr kitail pahn koasoiapene ekei oaritik kan duwen dahme kitail kak wia pwehn sewese irail en pwurodo rehn Siohwa.