1. Ia sapwellimen Siohwa pepehm ni emen sapwellime sihpw kan eh tepida pwurehng papah ih?

NIN duwen me kitail koasoiapenehier nan iren onop en mwoweo, Siohwa ketin kapahrekihong ih duwehte sounsilepen sihpw mwahu men me ni kadek kin apwalih emenemen nah sihpw, oh kin rapahki koaros me salongalahr. Siohwa ketin mahsanihong mehn Israel ko me kohkohsang ih: “Kumwail pwurodohng rehi, oh I ahpw pahn sapahlwohng rehmwail.” Kitail ese me e ketin sapwellimanki soangen pepehmohte pwehki e ketin mahsanih: “I sohte pahn wekila.” (Mal. 3:6, 7) Sises mahsanih me Siohwa oh tohnleng kan kin uhdahn perenda ma pil emente Sapwellime ladu me salongala pwurodo Reh.​—Luk 15:10, 32.

2. Dahme kitail pahn koasoiapene nan iren onop wet?

² Kitail pahn koasoiapene sapwellimen Sises karasaras siluh me pahn sewese kitail en sewese irail kan me sohla papah Siohwa. Kitail pahn koasoiapene soangen irair kan me kitail anahne pwehn sewese sihpw kan me salongala en pwurodo reh. Oh kitail pahn kilang dahme kahrehda e kesempwal en sewese irail me luwet kan.

3-4. Dahme kahrehda liho nan Luk 15:8-10 rapahki ni keneinei nah mwohni silpero me salongala?

³ Kitail anahne doadoahk laud pwehn diar irail kan me men pwurodo rehn Siohwa. Nan karasaras ehu me kileldi nan Rongamwahu en Luk, Sises mahsanih duwen lih emen me rapahki mwohni silper ehu me salongala. Dahme kesempwal nan karasaraso iei duwen liho eh doadoahk laud pwehn rapahkihda mwohni silpero.​—Wadek Luk 15:8-10.

⁴ Sises ketin kawehwehda pepehm en liho ni liho eh diarada mwohni silpero me salongala. Ni mwehin Siseso, ni lih en Israel men eh pahn pwopwoudida, ekei pak eh nohnou pahn kihong nah mwohni silper eisek. Ele mwohnio wia kisehn mwohni eisek ko me eh nohnou kihong. Liho medewe me mwohnio pwupwudi pohn tahto. Eri e isikada lamp ehu oh rapahkiseli, ahpw e sohte diar. Ele  nah lampo sohte nohn marain pwehn kak diarada kisin mwohni silpero. Eri, ni keneinei e koahkoa wasa koaros nan imweo. Nan pwelpar me e koahkoahpeneo, e diar nah mwohni silpero eh maramarain pwehki lingen lampo. Uhdahn e perenkihda eh diarada mwohnio! E ekerpene kompoakepah oh mehn mpe kan pwehn ndaiong irail.

5. Dahme kahrehda e kakete apwal en diar irail kan me sohla werekiong mwomwohdiso?

⁵ Nin duwen me kitail kilang nan sapwellimen Sises karasaraso, kitail anahne doadoahk laud pwehn diar mehkot me salongala. Pil duwehte, ele kitail anahne doadoahk laud pwehn diarada irail kan me sohla werekiong mwomwohdiso. Ele irail uhdihsang werekiong kitail erein sounpar tohto. Mwein re keseula wasa ehu me riatail Kristian ko wasao sehse irail. Ahpw kitail kak kamehlele me ahnsou wet, ekei irail pwukat uhdahn men pwurodo rehn Siohwa. Re men iang sapwellimen Siohwa tohnkaudok mehlel kan papah ih, ahpw irail anahne atail sawas.

6. Ia duwen koaros nan mwomwohdiso ar kak iang rapahki irail kan me sohla iang kalohk oh mihting?

⁶ Ihs me kak iang rapahki irail kan me sohla werekiong mwomwohdiso? Kitail koaros​—elder kan, pioneer kan, tohnpeneinei, oh sounkalohk kan​—kak iang rapahki irail. Mie kompoakepahmw de kisehmw me sohla werekiong mwomwohdiso? Mie pak me ke kohla kalohk ihmw lel ihmw de iang kalohk ong wehipokon oh tuhwong emen me sohla iang kalohk oh mihting? Menlau kawehwehiong aramaso me ma e pahn mwahuki emen en mwemweitla reh, ke pahn perenki ale nah adres de nempehn delepwohn pwehn wahla rehn elder kan nan mwomwohdiso.

7. Dahme ke sukuhlkihsang dahme emen elder me adaneki Thomas nda?

⁷ Elder kan me keieu pwukoahki en rapahkihda irail kan me men pwurala rehn Siohwa. Ia duwen arail kak wia met? Tehk dahme emen elder me adaneki Thomas * nda. E kin mi Spein oh e sewesehier Sounkadehde tohtohsang meh 40 pwe ren pwurodo nan mwomwohdiso. Thomas nda: “Keieu I kin tepte idek rehn ekei riatail Kristian kan ma re ese wasa me irail pwukat me sohla werekiong mwomwohdiso kin mi ie ahnsou wet. De I kin idek rehn sounkalohk kan ma re taman mie emen me sohla iang mihting. Pali laud nan mwomwohdiso uhdahn perenki sawas pwehki re pehm me irail kin iang rapahki me sohla iang kalohk oh mihting. Mwuhr, ni ei mwemweitla rehn irail kan me sohla iang mihting oh kalohk, I kin idek rehrail duwen neirail seri kan oh duwen kisehrail teikan. Ekei irail kin wahdo neirail seri kan ni mihting kan, oh seri pwukat ele wia sounkalohk kei mahso. Irail pil anahne sawas pwehn pwurodo rehn Siohwa.”

8. Nin duwen me karasaraso nan Luk 15:17-24 kasalehda, dahme pahpao wia ong nah pwutak me koluhlao?

⁸ Soangen irair kaselel dah me kitail anahne ahneki pwehn sewese irail kan me men pwurodo rehn Siohwa? Tehk ekei mehn kasukuhl kan me kitail kak sukuhlkihsang sapwellimen Sises karasaras en pwutak ketihwou me kohkohsang imweo. (Wadek Luk 15:17-24.) Sises ketin kawehwehda me pwutako esehda mwuhr me e uhdahn pweipwei oh lemehda en pwurala imweo. Eh pahpao tangalahng nah pwutako oh pwoalehdi, oh kamehlelehiong me e poakohng. Pwutako uhdahn nsensuwedkihla dahme e wiao oh pehm me e sohte warohng wia nein eh pahpao pwutak. Pahpao poakehla nah pwutako, me padahkihong ih eh pepehm kan. Eri pahpao wia soahng kei pwehn kamehlelehiong nah pwutako me e kasamwo ih nin duwen emen kisehn eh peneinei me kesempwal, a kaidehn lidu men. Pwehn kamehlelehiong ih met, pahpao kaunopada kamadipw laud ehu oh kihong nah pwutak me koluhlao eh likou mwahu.

9. Soangen irair dah me kitail en ahneki pwehn sewese me sohla iang kalohk oh mihting en pwurodo rehn Siohwa? (Menlau kilang koakon “ Ia Duwen Atail en Sewese Irail kan me Men Pwurodo.”)

 ⁹ Siohwa ketin duwehte pahpao nan karasaraso. E ketin poakohng riatail Kristian kan me sohla iang kalohk oh mihting oh ketin kupwurki ren pwurodo reh. Sang ni atail kahlemengih Siohwa, kitail kak sewese irail en pwurodo. Kitail anahne kasalehda kanengamah, limpoak, oh wehwehki arail pepehm kan. Dahme kahrehda kitail anahne kasalehda irair kaselel pwukat, oh ia duwen atail kak wia met?

10. Dahme kahrehda kitail anahne kanengamah pwehn sewese emen en pwurehng karanihala Siohwa?

¹⁰ Kitail anahne kanengamah pwehki emen kin anahne ahnsou pwehn pwurodo rehn Siohwa. Irail kan me mahso sohla iang kalohk oh mihting nda me re pwurodo ihte mwurin elder kan oh meteikan nan mwomwohdiso pwurupwurehng mwemweitla rehrail. Nancy, sister men sang Palieir en Eisia nda: “Kompoakepahi keren men nan mwomwohdiso sewese ie laud. E poakohng ie duwehte riei serepein men me laudsang ie. E katamankihong ie ahnsou kaperen kan me se kin wiapene mahso. E kin rong kanahieng ni ei kin koasoiaiong ei pepehm kan, oh e sohte kin pweiek en kihong ie kaweid. E uhdahn wia kompoakepahi mwahu men oh kin onopada ahnsou koaros pwehn sewese ie.”

11. Dahme kahrehda kitail anahne wehwehki pepehm en meteikan pwehn sewese emen me nsensuwedla?

¹¹ Ni emen eh kin nsensuwed, e kin duwehte ohla ehu me kamedek. En wehwehki pepehm en meteikan kin duwehte wini ehu me kak sewese aramaso en mwahula. Ekei me sohla iang kalohk oh mihting nsensuwedla pahn emen nan mwomwohdiso erein sounpar tohto. Pwehki met, irail sohte men pwurodo rehn Siohwa. Ele ekei  medewe me re lelohng wiewia sapahrek. Mwein re anahne emen me pahn rong irail oh wehwehki arail pepehm kan. (Seims 1:19) María, me ehu pak sohla iang kalohk oh mihting, nda, “I anahne emen me pahn rong ie, kansenamwahwih ie, oh kihong ie kaweid oh sawas mwahu.”

12. Ia duwen sapwellimen Siohwa limpoak eh duwehte sahl ehu?

¹² Paipel mahsanih me sapwellimen Siohwa limpoak ong sapwellime aramas akan kin duwehte sahl ehu. Ni ahl dah me sapwellimen Koht limpoak kin duwehte sahl ehu? Medewehla karasaras wet: Medewehla me ke pahn kihrlahr nansed ehu me uhdahn iloakin oh mie me kesehwei mehn pampap ehu. Ke uhdahn pahn kalahnganki met pwehki e pahn seweseiuk en dehr kihrla. Ahpw mehn pampapo sohte pahn itar pwehn kapituhkala. Kopou nansedo oh ke pahn mehla ma ke sohte lella ni pwohto. Ke anahne emen en kesehwei sahl ehu oh waikuhkodo ni pwohto. Siohwa ketin mahsanihki mehn Israel kan me salongala: “I doadoahngki kadek oh limpoak duwehte sahl kan pwe I en kahreiraildo rehi.” (Os. 11:4, NW) Koht ketin sapwellimanki soangen pepehmohte rahnwet ong irail kan me uhdihsang papah ih oh me kin ahneki kahpwal oh kapwunod kan. E ketin kupwurki irail en ese me e ketin poakohng irail, oh irail en karanihala ih. Eri Siohwa kak ketin doadoahngkin uhk en kasalehiong irail sapwellime limpoak.

13. Ia duwen dahme wiawihong Pablo eh kasalehda me atail limpoak kak sewese meteikan en pwurodo rehn Siohwa?

¹³ E kesempwal en kamehlelehiong irail me sohla iang kalohk oh mihting me Siohwa ketin poakohng irail oh me kitail pil poakohng irail. Pablo, me kitail koasoiapene mwoweo, sohla iang kalohk oh mihting dauliher sounpar  30. E nda: “Ehu nimensengo, ni ei onohnop en kohkohsang imweio, sister mah oh kadek men tuhwong ie oh koasoiong ie ni kadek. I tepida sengiseng duwehte seri men. I ndaiong me e mwomwen me Siohwa me ketin kadarodo ih pwehn koasoiong ie. Ih ahnsowo me I koasoanehdi ien pwurala rehn Siohwa.”

14. Me pid karasaraso nan Luk 15:4, 5, dahme sounsilepen sihpwo wia ni ahnsou me e diarada sihpw me salongalao?

¹⁴ Kitail anahne doulahte sewese irail kan me sohla iang kalohk oh mihting. Duwehte pwutako nan sapwellimen Sises karasaraso, ele irail ahneki mworus laud me kakete pwand en mwahula. Oh arail nanpwungmwahu rehn Siohwa ele uhdahn luwetala pwehki dahme wiawihong irail nan ahn Sehdan sampah. Kitail anahne sewese irail en pwurehng kakehlakahda arail pwoson Siohwa. Nan karasaras en sihpw me salongalao, Sises ketin kawehwehda ia duwen sounsilepen sihpwo eh kidahng pohn pwopweo sihpwo oh kapwurehla nan pelin sihpwo. Sounsilepen sihpwo kihongehr ahnsou laud oh kehl pwehn rapahki sihpw me salongalao. Ahpw e ese me sihpwo anahnehte sawas laud. Sihpwo sohte nohn kehlail en pein pwurala ni pelin sihpwo, eri e wahda.​—Wadek Luk 15:4, 5.

15. Ia duwen atail kak sewese me luwet akan me men pwurodo rehn Siohwa? (Menlau kilang koakon “ Mehn Sawas Kesempwal Ehu.”)

¹⁵ Ele kitail anahne ahnsou oh kehl pwehn sewese irail kan me sohla iang kalohk oh mihting pwehn powehdi arail luwet kan. Ahpw pwehki sapwellimen Siohwa manaman, sapwellime Mahsen, oh sawasepen Paipel kan me mwomwohdiso kin kihda, kitail kak sewese irail en pwurehng kakehlakahda arail nanpwungmwahu rehn Siohwa. (Rom 15:1) Ia duwen atail kak wia  met? Emen elder koahiek nda, “Pali laud en irail kan me sohla iang kalohk oh mihting kin anahne emen en onop Paipel rehrail mwurin arail pilada me re uhdahn men pwurodo rehn Siohwa.” * Eri ma elder kan peki rehmw ken onop Paipel rehn emen me sohla iang kalohk oh mihting, ke seu ale pwukoa wet ma ke kak? Eldero pil nda, “Sounkalohk me wia onop en Paipelo anahne wia kompoakepah mwahu men me irail me sohla iang kalohk oh mihting kak likih oh ndaiong ih arail pepehm kan.”

16. Ia duwen atail ese me tohnleng kan pahn sewese kitail?

¹⁶ Mie rohng kan sang riatail kan me kin kasalehda me tohnleng kan kin iang kitail sewese rapahki irail me men pwurodo rehn Siohwa. (Kaud. 14:6) Karasepe, Silvio, sang Ecuador, ni ngidingid peki rehn Siohwa en ketin kadarala emen en sewese ih. Erein eh kapakap, elder riemen letelet ni eh wenihmwo. Erein mwemweito, ira perenki tepida kihong sawas me e anahne.

17. Soangen keting dah me kitail kin ahneki ni atail sewese irail me luwetala?

¹⁷ Kitail pahn diar peren laud ni atail sewese irail kan me luwetala ren pwurodo rehn Siohwa. Tehk dahme Salvador, pioneer men me kin nantihong sewese irail kan me sohla iang mihting oh kalohk, nda: “Ekei pak, e kin apwal en koledi pilen mesei pwehki ei peren. I kin uhdahn perenki ei iang Siohwa ketin doadoahk pwehn sewese emen sapwellime ladu kan en kohkohsang ahn Sehdan sampah oh pwurodo nan mwomwohdiso.”​—Wiewia 20:35.

18. Ma ke sohla iang mihting de kalohk, dahme ke kak kamehlele?

¹⁸ Ma ke uhdihsang werekiong sapwellimen Siohwa aramas akan, ke kak kamehlele me e ketin poakepoakeiukete. E ketin kupwurki ken pwurodo reh. Ke anahne nantihong pwe ken pwurodo reh. Ahpw duwehte pahpao nan sapwellimen Sises karasaraso, Siohwa kin ketin awiawihiukete ken pwurodo reh, oh pahn kupwurperenki kasamwoiuk ong nan sapwellime pwihn.