OARALAP | DAHME KAHREHDA KITAIL EN KIN MEHLEL?
En Kin Mehlel Solahr Kadoadoahk?
Hitoshi kin doadoahk nan ohpis en apwalih mwohni en ehu ohpis lap me kin sawaskihda doadoahk, nan Sapan. Ahnsou me ih oh eh kauno tetehk neirail doaropwe kan me pid mwohni, eh kauno ndahng me e kak kawekala de likamwkihda audepen ripoht en mwohni ko. Hitoshi kawehwehda me kadeikpen loale sohte kak mweidohng en wiahda likamw nan eh doadoahk. Imwilahn met, eh kauno kamasak ih me e pahn kesehsang ih nan eh doadoahko oh kedekedeo e sohla doadoahk.
Sounpwong kei mwurin mwo, Hitoshi tepida nsensuwed pwe mwomwen solahr doadoahk me e kak diar. Karasepe, ni ahnsou me ehu wasa me e peki doadoahk idek peidek reh, Hitoshi kasalehda me e sohte kak wia soangen doadoahk kan me sohte kin mehlel. Me wia peidek reho sapengki, “Omw madamadau uhdahn ehusoahng!” Ahn Hitoshi peneinei oh kompoakepah kan kin kangoangehki en tengedihongete eh wia aramas mehlel ahpw e tepida peikasal. Karasepe, e koasoia, “I medewe ma ei kin mehlel pwehki ei pwoson kin wia tiahk mwahu ehu.”
Dahme Hitoshi lelohng kin kapwunode kitail en ese me kaidehn aramas koaros kin kesempwalki en kin mehlel. Ni mehlel, ekei kin medewe me en kin mehlel kin wia luhs ehu, keieu nan palien pesines. Emen lih me mie eh doadoahk palieir en Aperika koasoia: “I mi nanpwungen aramas akan me sohte kin mehlel, oh ekei pak kasongosong en duwehla irail inenen kehlail.”
Ehu wiepen en sohte kin mehlel me kin paraparala wasa koaros rahnpwukat iei kinehda likamw. Sounpar kei samwalahr ako, emen ohl Robert S. Feldman me samanih palien madamadau oh wiewia sang University en Massachusetts Amherst wiahda roporop ehu me kasalehda me persent 60 en aramas laud kan kin kinehda likamw pak ehu ni arail koasoakoasoipene nan erein minit eisek. Feldman koasoia: “E uhdahn kapwuriamwei imwilahn roporop wet. Se sohte kasik me kinehda likamw wia tiahk ehu me kin kalapw wiawi nan atail mour en ehuehu rahn.” Ia duwe, e sou ehusoahng me pali moron en aramas kin kahng aramas en pitih irail ahpw kinehda likamw iang ehu tiahk me keieu paraparala wasa koaros nan rahnpwukat?
Dahme kahrehda likamw, pirap, oh wiepen likamw teikan kin kalapw wiawi rahnpwukat? Ia duwen sohte kin mehlel eh kamwakidada aramas koaros? Oh me keieu kesempwal, ia duwen atail kak soikala soangen tiahk pwukat me pid sohte kin mehlel?
