IRE MEHLEL: “Kumwail dehr kin pwunodki . . . mourimwail kan.”​—Madiu 6:25.

Ia wehwehn met? Sises ketin mahsanih mahsen pwukat nan sapwellime Kapahrek en Pohn Dohl. Nin duwen me ehu dikseneri en Paipel kasalehda, lepin lokaiahn Krihk me kawehwehdi “kin pwunodki” kak wehwehkiong “ahnepen aramas en mwekidki eh kahpwal en semwehmwe, duhpek oh kahpwal teikan me kin lelohng ih nan eh mour en ehuehu rahn.” Pwunod kin kalapw pidada pwunupwunodki mehkan me kakete wiawi ni ahnsou kohkohdo. E wia ahnepen aramas oh pil konehng en kin nsenohki atail anahn akan oh epwelpen irail kan me kitail kin poakohng. (Pilipai 2:20) Ahpw ni ahnsou me Sises mahsanih, “kumwail dehr kin pwunodki,” e kin mahmahsanihong sapwellime tohnpadahk kan kaweid ong soikala pwunod me daulihala, de masak dahme pahn wiawi mwohrail me pahn kak kihsang arail perenki mour.​—Madiu 6:31, 34.

Kaweid wet kak kadoadoahk rahnpwukat? E wia elen loalokong en peikiong sapwellimen Sises kaweid. Dahme kahrehda? Ekei roporop kasalehda me ni ahnsou me aramas emen kin pwunod laud, mwekimwekid en sahl akan nan paliwere (nervous system) kin nohn doadoahk daulihala oh met “kin kalapw kahrehda soangen kahpwal akan en roson me duwehte soumwahu en mpwei, soumwahu en mohngiong, oh nget.”

Sises ketikihda kahrepe mwahu en soikala soangen pwunod me daulihala: Sohte katepen pwunod daulihala. Sises ketin kalelapak: “Ihs rehmwail me kak kareireikihla eh mour kisin ahnsou kis pwunupwunodki eh mour?” (Madiu 6:27) Medemedewe atail pwunod kan sohte pahn kapatahiong kisin seken kis pwehn kareireila atail mour, de kamwahwihala atail mour. Oh pil ehu, soahng kan sohte kin kalapw imwila nin duwen me kitail kin masak me e pahn wiawi. Emen me samanih Paipel koasoia: “Pwunupwunodki ahnsou kohkohdo uhdahn sohte katepe, pwehki dahme pahn wiawi ahnsou kohkohdo sohte kalapw duwehte dahme kitail kin medewe oh masmasak.”

Ia duwen atail kak soikala pwunod? Keieu, likih Koht. Ma Koht me ketikihda mwenge ong menpihr akan oh kapwatahda wahnrohs en lingan, e sou pahn ketikihdo soangen anahn kan ong mour en aramas akan me kin mwohneki ar kaudok ong ih? (Madiu 6:25, 26, 28-30) Keriau, pwunodki ehuehu rahn. Sises ketin mahsanih: “Kumwail dehr kin pwunodki dahme pahn wiawi lakapw, pwe lakapw pahn pwukoahki pein eh pwunod.” Ke sou pwungki me ‘e sohte konehng kitail en kin katohtowehla kahpwal akan me rahn akan kin wadohng kitail’?​—Madiu 6:34.

Sang ni atail pahn kapwaiada sapwellimen Sises kaweid erpit wet, kitail pahn kak soikala kauwehla paliwaratail. Kesempwalsang met, kitail pahn diar nsenamwahu loalatail, de dahme Paipel kin kahdaneki “sapwellimen Koht popohl.”​—Pilipai 4:6, 7.