Rose nda: “I kohwahki soangen soumwahu ehu me kin kalapw kahrehiong ie en ahneki medek laud. Ei mour uhdahn suwedla.” Ehu rehn kapwunod kan me keieu laud ong ih iei me ekei pak e sohte kak uhdahn onop Paipel mwahu de wia soahng kan me kin pidada eh kaudok. Ahpw mahsen en Sises me kileldi nan Madiu 19:26 uhdahn sewese ih. E mahsanih: “Rehn Koht mehkoaros kak pweida.” Rose sukuhlki me mie ahl tohto me e kak wia eh onop en Paipel. Pwehki eh medek kin kahrehda e sohte kak wadawad ekei pak, e tepida rong wadawad en Paipel oh pil pwuhk kan nan rekord kan. * E nda: “Ma sohte mepwukat, I sehse ia duwen ei pahn kolokol ei nanpwungmwahu rehn Koht.”

Ni Rose eh kin mworuskihla eh sohte kak wia dahme e kak wia mahso, e kin diar kamweit sang mahsen pwukat me kileldi nan 2 Korint 8:12, me mahsanih: “Pwe ma kumwail pahn kin ngoangki kihwei, Koht pahn kin kupwurperenki uwen me kumwail pahn kak kihwei, ahpw e sohte pahn kupwurperenki amwail kihwei mehkot me kumwail sohte kakohng.” Mahsen pwukat katamankihong Rose me Koht kin ketin kupwurperenki dahme e kin wia, pwehki e kin wia uwen me e kak mendahki eh soh itar kan.

Delphine, me kitail koasoia mwoweo, nda: “Mwurin nei serepeino me sounpar 18 mehla, pahtou me I ahneki  uhdahn laud me kahrehda I sohte kin kamehlele me I kak pousehla wie momour. Soahng koaros wekila.” Ahpw e diar kamweit sang Melkahka 94:19, wasa me sounmelkahkao patohwanohng Koht: “Ni ahnsou me I kin pwunodada oh pahtoula, komw kin ketin kansenamwahwihiehla oh kapereniehda.” Delphine nda: “I kapakap ong Siohwa en ketin sewese ie diarada dahme I kak wia pwehn kihsang ei pahtou.”

Ih eri soupisengkihla doadoahk en kalohk. Mwurin ahnsou kis, e kin kapahrekihong ih crayon me seri kan kin mahlenki. Mehnda ma crayono timpeseng, ke pil kak doadoahngkihte. Duwehte met, mendahki e pehm me e rasehng crayon ehu me timpeseng, e sukuhlki me e pil kak sewesehte meteikan. E nda: “Ni ei kin doadoahngki kaweid de iren Paipel kan en kansenamwahwih nei tohnsukuhl en Paipel kan, I diarada me ih ahl wet me Siohwa kin ketin doadoahngki pwe en ketin kansenamwahwih oh kapereniehda.” Delphine ntingihedi eden irail kan nan Paipel me ahneki pahtou laud. E nda: “E sansal me aramas ako wia aramas kei me kin kalapw kapakap.” E pil esehda me “ke sohte kak diar pasapeng ma ke sohte pahkpeseng noumw Paipel.”

Onopki Paipel kasukuhliong Delphine pil ehu soahng tohrohr, me iei en medemedewehte ahnsou kohkohdo, kaidehn ahnsou kan mahs. Koapworopwor me kileldi nan Wiewia 24:15 kin kamweitala ih. Ireo mahsanih: “Aramas koaros, me mwahu oh suwed, pahn iasada sang mehla.” Ia uwen laud en eh kamehlele me Siohwa pahn ketin kaiasada nah serepeino? Delphine sapengki: “I uhdahn pahn kilang nei serepeino ni ahnsou kohkohdo. E mwomwen me Samatailo Koht ketin kileledier iahd me ngehi oh nei serepeino pahn tuhpene. I kilang at mi nan at kisin mwetuwelo, duwehte ei kilang ih ni rahn me e ipwidio.”