Dahme Kahrehda Kailok Kin Wiewiawi?
Dahme kahrehda kailok kin wiewiawi nin sampah? Pwe kitail en ese kahrepe, kitail anahne wehwehki mahs dahkot kailok, dahme kahrehda aramas tepida kailok oh dahme kahrehda mie kailok wasa koaros.
Dahkot Kailok?
Kailok iei pepehm kehlail en sohte mwahuki de uhdahn tateki emen aramas de pwihn ehu. Met kin laudsang lingeringer pahn emen ni ahnsou kis.
KAHREPEN ARAMAS AR TEPIDA KAILOK
Aramas akan kin tepida kailok pwehki soangen kahrepe kei. Kailok kin kalapw wiawihong meteikan, kaidehn pwehki dahme re wia, ahpw pwehki ihs irail. Aramas akan me kin kailongki meteikan kin wiahki me re suwed, medewe me re kin wia mehkot keper de medewe me re sohte kak wekila. Aramas akan kin wiahkin irail sohte mehkot oh medewe me re keper de re kin kahrehda kahpwal. Irail akan me kin kailongki meteikan mwein kin lokolongki mwekid lemei kan, wiewia sapahrek de soahng teikan me kin kahrehda pepehm en kailok kin tengala rehrail.
DAHME KAHREHDA MIE KAILOK WASA KOAROS
Aramas emen kak kailongki meteikan mehnda ma e saikinte tuhwong irail. Karasepe, aramas kin kalapw ahneki soangen madamadau ehu duwen pwihnen aramas ehu duwehte en arail peneinei oh kompoakparail kan madamadau. Kahrehda, kailok kak mihla rehrail koaros.
Ni atail wehwehkihla uwen mengei en kailok eh kin kohpeseng, kitail kak wehwehki dahme kahrehda aramas tohto kin kailongki meteikan. Ahpw pwe kitail en kauhdi kailok nan sampah wet, kitail anahne ese ia duwen kailok eh tepida miehla. Kitail kak sukuhlki duwen met sang nan Paipel.
PAIPEL KASALEHDA DUWEN KAILOK EH TEPIDA
KAILOK SOHTE TEPIDA REHN ARAMAS. E tepida nanleng ni ahnsou me emen tohnleng me adanekihla Sehdan me Tepil, uhwongada Koht. Tepilo wia ‘sounkam aramas emen ni eh tapiada’ eh uhwongo. Nin duwen “sounlikamw men oh semen likamw,” e kin pousehlahte kalaudehla oh pil wiahda kailok. (Sohn 8:44; 1 Sohn 3:11, 12) Paipel kin kawehwehda ih nin duwen emen me mwersuwed, kin lingeringer oh lemei.—Sohp 2:7; Kaudiahl 12:9, 12, 17.
E MENGEI ARAMAS SOH UNSEK EN KIN KAILOK. Tepin aramaso, Adam, alasang en Sehdan mwekido. Imwilahn met, aramas koaros sohsohkihdi dihp oh soh unsek. (Rom 5:12) Nein Adam meseniho Kain, kemehla rie pwutako Eipel pwehki eh kailongki. (1 Sohn 3:12) Mehlel, aramas tohto kin kasalehda limpoak oh poakehla meteikan. Ahpw pwehki ar sohsohki dihp, aramas tohto kin roporop ong pein irail, peirin oh kin aklapalap me kahrehda re kin kailok.—2 Timoty 3:1-5.
KAILONGKI ARAMAS ME WEKSANG IRAIL. Sampah wet kin kalaudehla kailok sang ni eh kin utung madamadau oh wiewia lemei oh kamedek kan. Aramas me kin kailongki oh lipilipilki meteikan me weksang irail, oh koasoi kamedek, lidere aramas oh kauwehla wasa kin wie lalaudla pwehki “sampah pwon mi pahn manaman en me suwedo,” Sehdan me Tepil.—1 Sohn 5:19.
Ahpw, Paipel sohte kin kasalehdahte ia wasa me kailok tepisang ie. E pil kasalehda dahme kak kamwahwihala.
