Ahnsou me Kailok Sohla Pahn Mie!
Mehnda ma kitail kihsang kailok nan atail mohngiong, kitail sohte kak kaunda wiewia oh madamadau en aramas teikan. Kahpwal en kailok kin pousehlahte lelohng aramas akan. Eri, dahme pahn kak kauhdi kailok kohkohlahte?
Siohwa Koht kelehpw me kak ketin katokehdi douluhl kailok kohkohlahte. Iei met me Paipel inoukihda me e pahn ketin wia.—Lepin Padahk 20:22.
KOHT PAHN KETIKIHSANG DAHME KIN KAHREHDA KAILOK
-
1. SEHDAN ME TEPIL. Sehdan, tohnleng uhwongo, me uhdahn pwukoahki kailok me kitail kin kilang rahnwet. Koht pahn ketin kasohrehla Sehdan oh koaros me kin kailongki meteikan duwehte ih. —Melkahka 37:38; Rom 16:20.
-
2. EN SEHDAN SAMPAH SUWED. Koht pahn ketin kasohrehla soahng suwed koaros nin sampah wet, iangahki palien politik mwersuwed kan oh kaunen pelien lamalam kan me kin kahrehda kailok. Koht pil pahn ketikihsang palien pesines kan me kin noahrok, mwersuwed oh isaneki aramas akan.—2 Piter 3:13.
-
3. EN ARAMAS SOH UNSEK. Paipel kawehwehda me aramas koaros sohsohki soh unsek, me iei ahneki ineng en kin medewe, pehm oh wia dahme sapwung. (Rom 5:12) Kolokol kailok oh kailongki meteikan iei ehu kisehn soh unsek pwukat. Koht pahn ketin sewese kitail kihsang sapwung pwukat oh mwuri kasohrehla kailok kohkohlahte.—Aiseia 54:13.
PAIPEL INOUKIHDA SAMPAH EHU ME SOHTE KAILOK
-
1. SOHTE ME PAHN LELOHNG WIEWIA SAPAHREK. Wehin Koht me mi nanleng pahn kaunda sampah oh wahdo pwung pahrek kohkohlahte. (Daniel 2:44) Lipilipilki aramas oh sohte pwungki meteikan sohla pahn wiawi. Koht pahn ketin kapwungala wiewia sapahrek koaros me aramas akan kin lelohng rahnwet.—Luk 18:7.
-
2. KOAROS PAHN AHNEKI POPOHL. Sohte me pahn lokolongki tiahk lemei de mahwen. (Melkahka 46:9) Aramas koaros nin sampah pahn perenki popohl, eri sampah pahn wia wasa me sohte keper en kousoan ie.—Melkahka 72:7.
-
3. KOAROS PAHN MOUR KOHKOHLAHTE NI UNSEK. Tohn sampah koaros pahn kasalehda limpoak mehlel nanpwungarail. (Madiu 22:39) Sohte me pahn mworusala, de pil ahneki madamadau suwed de tamanda soahng suwed kan. (Aiseia 65:17) Ni ahnsou me kailok koaros pahn sohrala, aramas akan “pahn paiamwahu oh popohl.”—Melkahka 37:11.
Ke men mour nan sampah me duwehte met? Pil rahnwet, aramas tohto kin sukuhlki en kesehla kailok sang ni ar doadoahngki kaweid en Paipel kan. (Melkahka 37:8) Ih met me Sounkadehdehn Siohwa kan nan sampah pwon kin wiewia. Mendahki ar tiahk oh mwomwen ar tikida eh wekpeseng, irail kin miniminpene oh limpoakpene.—Aiseia 2:2-4.
Sounkadehdehn Siohwa kan pahn perenki ehukihong uhk dahme re sukuhlki duwen kanengamahiong wiewia sapahrek oh lipilipilki aramas. Dahme ke sukuhlki kak seweseiuk uhdihsang kailok oh tepida ahneki limpoak. Ke kak esehla duwen omw pahn kasalehda limpoak, pil ong irail kan me sohte kin kasalehda kalahngan de irail kan me kin kailok. Ni omw wia met, ke pahn nsenamwahu ni ahnsou wet oh omw nanpwungmwahu rehn meteikan pahn mwahula. Ahpw keieu, ke pahn esehla dahme ke kak wia pwe ken mour pahn kaundahn Wehin Koht ni ahnsou me sohla pahn mie kailok kohkohlahte.—Melkahka 37:29.
You May Also Like
KAHN IROIR
Dahme Wehin Koht Pahn Kapwaiada?
Sises mwahngih me Wehin Koht kelehpw iei ihte koperment me kak kamwahwihala kahpwal kan pohn sampah. Dahme koperment wet wiadahr pwehn kalaudehla atail koapworopworki?
