Koht Ketin Nsenohkin Uhk
PAIPEL kin audaudki kaweid me keieu mwahu ong kitail, pwehki e pwilisang rehn Koht. Paipel kaidehn pwuhk en wini ehu ahpw e kak sewesei kitail en apwalihala irair kapwunod kan, soahng kan me kin kauwehla elen madamadau, pepehm kamedek kan oh kahpwal en paliwar oh madamadau.
Me keieu kesempwal, Paipel kin kamehlelehiong kitail me Sounkapikpatailo, Siohwa Koht, a ketin mwahngih atail madamadau oh pepehm kan laudsang meteikan. E ketin kupwurki sewesei kitail en apwalihala kahpwal kan me kitail kin sohsohpai. Karasepe, medewe iren Paipel kansenamwahu riau pwukat:
“[“Siohwa,” NW] kin ketiket mpen irail me nan kapehd tikitiklahr; oh kin ketin doarehla irail kan me kin sohla ar koapworopwor.”—MELKAHKA 34:18.
“Ngehi, [“Siohwa,” NW], amwail Koht; ngehi me kin kakehlakei kumwail, oh mahmahsanihong kumwail, ‘Kumwail dehr masak, pwe I pahn sewesei kumwail.’”—AISEIA 41:13.
Ahpw, ia duwen Siohwa eh kin ketin sewesei kitail en apwalihala kahpwal en madamadau kan? Ni omw pahn kilang nan oaralap kan mwurin met, Siohwa kin ketin kasalehda me e uhdahn kin ketin apwalih kitail ni soangen ahl tohto.
