MEDEWEHLA me kowe emen Kristian me iang momour ni mwehin tepin Kristian akan. Mwomwohdiso me ke iang ahpwtehn alehdi kisinlikou ehu sang rehn wahnpoaron Pohl. Ni omw rongorong emen eh wadewadek kisinlikowo, ke tehkada me Pohl kin kalapw pwurehng kasalehda koasoi kan en nan “Pwuhk Sarawi,” me iei, Palien Paipel ni Lokaiahn Ipru. (2 Timoty 3:15) Kowe eri pein idek rehmw, ‘I uhdahn men kilang ireo me e pwurehng kasalehda nan eh koasoi.’ Ahpw met sohte pahn mengei. Dahme kahrehda?

Nna tehk ia mwomwen doaropwe kan en “pwuhk sarawi” me mie ni mwehin Pohl. Ehu me sansalda wasaht iei ehu kisehn pwuhken Aiseia sang Pwuhk Limilim kan nan Sehden Mehla. Dahme ke kilang? Lepin lokaia kan mihpenehte, sohte kilel kan me duwehte period de kama nanpwungen nting kan. Oh sohte nempehn irelaud kan oh iretikitik kan me kitail kin doadoahngki nan pwuhk sarawi rahnwet.

Sounnting kan en Paipel sohte kihpeseng nting kan ni irelaud kan de iretikitik kan. Irail kin uhdahte ntingihedi soahng koaros me Koht ketin padahkihong irail pwe meteikan me wadek en kak wehwehki rohngo pwon, a kaidehn ekeite ire kan. Kaidehn ih me ke mwahuki ni omw kin alehdi kisinlikou kesempwal ehu sang rehn emen me ke poakohng? Ke kin wadekala kisinlikowo pwon, a kaidehn ekeite ire kan loale.

Ahpw, sohte irelaud kan de iretikitik kan kin kahrehda kahpwal. Ihte me Pohl kak wia pwehn kasalehda wasa me e koasokoasoia, e kin nda “nin duwen me Pwuhk Sarawi mahsanih” de “nin duwen me Aiseia mahsaniher mahs.” (Rom 3:10; 9:29) Oh e pahn apwal en rapahkihda wasa me e koasokoasoia ko, ahpw ke kak diar ma ke uhdahn esehla “pwuhk sarawi” pwon.

Oh pil, “pwuhk sarawi” sohte wia rohng ehute sang rehn Koht. Ni imwin mwehin tepin Kristian akan, irail wiahda lapalahn pwuhk ehu sang kohpenehn kisin pwuhk tikitik 66! Ihme kahrehda pali laud en irail kan me kin wadek Paipel rahnpwukat perenki eh mie irelaud kan oh iretikitik kan me kin sewese irail en kin diarada ire ieu, duwehte ire tohto kan me Pohl kin kalapw kapwurehda nan nah kisinlikou kan.

Ele ke pahn idek, ‘Eri, ihs me kihong nempehn irelaud oh iretikitik kan nan Paipel?’

Stephen Langton iei emen sounpadahk en Paipel nan England, me mwuhr wiahla kaunen Pisop nan Canterbury, alehdi kapingpen eh doadoahk en katohrepeseng irelaud kan nan Paipel. E wia met ni tepin pahr 1200 ni ahnsou me e wia sounpadahk nan University en Paris nan France.

Mwohn mwehin Langton, irail me samanih Paipel kan kin songosong en wiahda mwomwen arail pahn katohrepeseng ire kan nin duwen irelaud kei nan Paipel, kahrepeo iei, en kak mengei en diarada ire ieu ni ahnsoun roporop. Ke kak medewehla ia uwen eh pahn mengei ong irail en diarada pali me ireo kileldi ie ma re pahn anahne rapahki irelaud ehute ah kaidehn pwuhk ehu pwon, duwehte pwuhken Aiseia me mie irelaud 66.

Ahpw soahng pwukat koaros kahrehda kahpwal ehu. Me samanih Paipel kan wiahda soangsoangen koasoandi kei me wekpeseng oh sohte pahrekpene. Nan ehu koasoandi pwukat iei ire kan nan Rongamwahu en Mark me nehnehpeseng kereniong irelaud 50, a kaidehn irelaud 16 ko me kitail naineki met. Ni mwehin Langton, nan Paris mie tohnsukuhl kan sang sahpw tohto oh re wahdo neirail  Paipel kan ni arail lokaia sang sapwarail kan. Ahpw sounpadahk kan oh tohnsukuhl kan sohte kak kawehwehpene nanpwungarail ia wasa nan Paipel me re koasokoasoia. Dahme kahrehda? Pwehki irelaud kan me nehnehpeseng nan neirail pwuhk sarawi kan sohte pahrekpene.

Eri Langton wiahda nehnehpeseng kapw ehu en irelaud kan. Ehu pwuhk me adaneki The Book​—A History of the Bible koasoiahki koasoandi me Langton doadoahngki me e “pwungiong en irail sounwadawad kan oh sounkawehwe kan arail madamadau,” oh e “mwadangete kohpeseng nan Iurop.” Ih me koasoanehong nempehn irelaud kan nan pali laud en Paipel kan rahnpwukat.

Sounpar 300 mwuri, nanpwungen pahr 1500 samwa, Robert Estienne mehn France me ndandki eh kin wiahda pwuhk kan pil kamengeila doadoahk wet. Eh mehn akadei iei onopki Paipel en ndandla. E wehwehkihda uwen kesempwal en mie ehu koasoandi me pahn mie nempe ong irelaud kan oh pil mie nempe ong iretikitik kan.

Kaidehn Estienne me tepin medewehda en wiahda mwomwen nehnehpeseng en iren Paipel kan ong ni iretikitik kan. Meteikan wiahdahr met mwohn ih. Karasepe, sounpar epwiki kei mwowe, sounnting en mehn Suhs kan, katohrepeseng ire kan ong ni iretikitik kan ahpw kaidehn ni irelaud kan nan Paipel en lokaiahn Ipru, de ekei pwuhk kan nan Paipel me kin adaneki Kadehde Mering. Pil pwurehng, ni ar koasoane iretikitik kan e duwehte ni tepin ahnsou kan me re koasoanehong irelaud kan me koasoandi kan sohte kin pahrekpene.

Estienne katohrepeseng Palien Paipel ni Lokaiahn Krihk, de me adaneki Kadehde Kapw, ong koasoandi kapw en mie nempehn iretikitik kan oh kapatahiong ire kan me mihier nan Paipel en lokaiahn Ipru. Nan pahr 1553, e wiahda tepin Paipel unsek (ni lokaiahn France) me kereniong duwehte pali laud en Paipel en rahnpwukat me kin mie irelaud kan oh iretikitik kan. Ekei kauwe met oh koasoia me iretikitik ko kamwerepeseng iren Paipel kan kahrehiong en mwomwen me koasoi kan tohrohrpeseng oh sohte patpene. Ahpw ekei sounwiahda pwuhk kan mwadangete alasang koasoandi me e wiahdao.

E mwomwen mehkot mengei en mie nempehn irelaud kan oh iretikitik kan. Met kihong iretikitik kan nan Paipel en mie pein eh “adres”, duwehte nempehn pwohsdo ehu. Mehlel, kaidehn Koht me ketin kamwakid nehnehpeseng en irelaud kan oh iretikitik kan, oh ekei pak e kin mwomwen ehusoahng iren Paipel kan me re kin katohrepeseng. Ahpw re kamengeila ong kitail en mwadangete diarada ire kan oh kawehwehda de ehuki iretikitik kan me ele wia ire kesempwal kei ong kitail, duwehte atail kin kawehwehda koasoi kan me kitail men tamataman nan doaropwe ehu de pwuhk ehu.

Mendahki nehnehpeseng en irelaud kan oh iretikitik kan eh wia kamwahu ong kitail, ahnsou koaros kitail en kin tamataman me e kesempwal en kin wehwehkihla rohng koaros me Koht ketikihda. Kakairada tiahk ken ahnla wadek iren Paipel ko koaros a kaidehn ekeite iretikitik kan. Ni omw pahn wia met e pahn seweseiuk en kalaudehla omw esehla oh ahnla “Pwuhk Sarawi, me kak kasalehiong uhk erpit me kak kahluweiukalahng nan mour soutuk.”​—2 Timoty 3:15.