Karasepe, Sally * nan Amerika, me pali laud en eh kepwe ko ohkihla melimel laud ehu, koasoia: “I solahr kak dadaur pahn kapwunod. Rahn tohto I kin pehm me I solahr kakohng ahi kahpwal akan.”

Pil ehu kahpwal nan mour iei ni ahnsou me emen me kitail kin poakohng mehla. Janice, nan Australia, koasoia: “Ni ahnsou me nei pwutak riemeno koaros mehla, me tikitiko mehla sounpar riau mwurin me laudo, e mwomwen me ei mour ohla douluhl oh I anahne pwurehng koasoanehdi ni uwen ei kak. Ngehi eri peki rehn Koht: ‘Menlau, I solahr kak dadaur pahn lokolok! Mweidohng ie ien meirlahtehieu. I sohte men pwurehng pwourda.’”

Pil ehu karasepe, Daniel nsensuwedkihla eh pwoudo eh salelepekohngada ih. E koasoia: “Ni ahnsou me ei pwoudo wehkada me e salelepekda, likamwete naip ieu idilong nan ei mohngiong. I pehm me medek wet kin pwurupwurehng doakoah ie​—oh met wiawihong ie sounpwong kei.”

Kahn Iroir wet pahn koasoia dahme kahrehda mour kak katapan pil ni ahnsou me

• Kahpwal wiawi

• Emen me kitail kin poakohng mehla

• En emen eh pwoud salelepekda

• Ke ahneki soumwahu laud ehu

• Mour nohnla apwal

Eri keieu, dahme kitail kak wia ni ahnsou me kahpwal wiawi?