Mour Pil Kak Kaperen Rahnpwukat
EHU rahn sohte emen pahn soumwahuda, mahla de mehla. Ke kak pil ahneki soangen mour wet. Ahpw rahnpwukat, aramas koaros kin ahneki kahpwal kan. Mie mehkot me kak seweseiuk? Paipel kak seweseiuk ken ahneki mour kaperen oh kansenamwahu rahnpwukat. Tehk duwen ekei kahpwal nan mour oh ia duwen Paipel eh kak sawas.
RAPAHKIHDA NSENAMWAHU
Paipel kaweidki: “Amwail mour en saledeksang limpoak en mwohni, ni amwail kin itarki dahme kumwail ahneki.”—Ipru 13:5.
Nan rahnpwukat, mie soahng tohto me aramas kin nda me kitail anahne alehda de doadoahngki. Ahpw Paipel mahsanih me kitail pahn kak ‘itarki dahme kitail ahneki.’ Ia duwen?
Soikala “limpoak en mwohni.” Aramas kin tounmeteikihla arail roson, peneinei, kompoakparail kan, arail tiahk mwahu, pil wahuparail—pwehki “limpoak en mwohni.” (1 Timoty 6:10) Met sohte katepe! Emen me kin limpoak ong kepwe pahn ni imwila, “sohte mwahn pahn itarki.”—Eklesiasdes 5:10.
Aramas kesempwal sang kepwe kan. Ni mehlel, kepwe kan kin katapan. Ahpw kepwe kan sohte kak poakohng oh kalahngankin kitail; aramaste me kak wia met. Ahneki “kompoakepah kan” pahn sewese kitail en ahneki mour nsenamwahu.—Lepin Padahk 17:17.
ATAIL MOUR KAK KAPEREN NI ATAIL IDAWEHN KAWEID EN PAIPEL KAN
DADAURETE NI OMW SOUMWAHU
Paipel kaweidki: “Ma ke pahn pereperen rahn koaros, ke pahn ahneki roson mwahu en paliwar.”—Lepin Padahk 17:22.
“Pereperen” kak sewese kitail en dadaur ni atail soumwahu. Ahpw ia duwen atail kak pereperen ni ahnsou me kitail soumwahu?
Kin kalahnganki. Ma kitail kin medemedewehte atail kahpwal kan, “ahnsou koaros” pahn mwomwen suwed. (Lepin Padahk 15:15) Ahpw Paipel mahsanih, “kumwail en kin kasalehda kalahngan.” (Kolose 3:15) Sukuhlki ken kalahnganki soahng mwahu kan nan omw mour, mendahki ma tikitik. Lingan en kihrlahn ketipin, engitik kansenamwahu, sirei sang kompoakepahmw men—soahng pwukat kak kamwahwihala atail mour.
Wia soahng kan ong meteikan. Mendahki ma atail roson sohte mwahu, “kihwei kin kaperen sang ale.” (Wiewia 20:35) Ni meteikan ar kalahnganki dahme kitail wia, kitail pahn peren oh sohte medemedewe laud duwen atail kahpwal kan. Kitail kak kamwahwihala atail mour sang ni atail sewese meteikan ren kamwahwihala arail mour.
KAKEHLAKA MOUREN PWOPWOUD
Paipel kaweidki: “Kumwail en pilada dahme keieu kesempwal.”—Pilipai 1:10.
Pwopwoud kan me sohte kin kalapw mihmipene ele pahn kauwehla arail nanpwungmwahu. Eri e wia elen loalokong ong ohl oh lih pwopwoud kan en mwohneki arail mouren pwopwoud—mehkot me keieu kesempwal nan arail mour.
Wiapene soahng kan. Dehr ihte awiawih mehkot en peien pwarada, ahpw wiahda koasoandi en wiapene mehkot. Paipel mahsanih: “Aramas riemen mwahusang emente.” (Eklesiasdes 4:9) Kumwa kak wiapene soahng pwukat, kuk, eksersais, komkommoal oh niminim mehkot, de wia dahme kumwa perenki.
Kasalehda me ke poakohng omw pwoud. Paipel kin kangoange ohl oh lih pwopwoud ren poakohng oh wauneki emenemen. (Episos 5:28, 33) Mesen sirei de pwoalehdi ni limpoak, de kihong kisin kisakis kak sawas laud pwehn kakehlaka mouren pwopwoud. Ahpw, pwopwoud kan anahne irehdi kasalepen limpoak me pid wia nsenen pwopwoud ongete nanpwungara.—Ipru 13:4.
